သာမဏေရ
သာမဏေရဝိနယ-ကရိုꩻနဝ်ꩻ ဘုရာꩻစိုးခါ လိုꩻကနိတ်သက်ဒါႏ ဘုရာꩻသားဖုံႏ မဲန်လꩻတရာꩻယဖြာꩻဖြာꩻ ပွိုးလꩻတရာꩻထွူ မဲန်ထွာရဟန်ꩻတဲင် အသက်ပေႏပေႏပါ အသက်တန်တန်ပါ ဗုဲင်သင်္ကန်ꩻ မာꩻတရာꩻ၊ လꩻလွမဂ်ဖိုလ်ႏဖုံႏနဝ်ꩻ ဝင်ꩻဟဲ့ꩻ အရဟန္တ ကိလေႏသာႏအဲန္ထဝ်း၊ သမဏ-မာꩻလို့ထိုꩻ ကိလေႏသာႏစိုး(ဂဏ)အနေႏ ပေါႏလွောန်ဗာႏနဝ်ꩻသွူ။ အရဟန္တစိုးခါ ဒေါ့ꩻခရာႏအဲန္ထဝ်း၊ ထင်ႏတွိုႏသမဏစိုးခါ ထွာပါရဟန်ꩻ မာꩻပါတရာꩻသားတာႏ သမဏသာရုပ္ပဖေႏကထွာ၊ ဖေႏကလꩻတရာꩻ၊ ဖေႏဝင်ꩻကဖုဲင်ႏထွား ဘုရာꩻအွောန်ႏဖေႏဗာႏ စီꩻကန်ꩻဥပဒေႏ(ဝိနယ)နဝ်ꩻသွူ၊ ကိလေႏသာႏအဲန္ထဝ်းသား ရဟန်ꩻစဲတ်မန်ႏသားဖုံႏနဝ်ꩻ ဟွုန်ဟဝ်နိတ်သက်ငါႏဖုံႏသွူ၊ အဝ်ႏလိုꩻလမ်းထင်ႏနွို့သော့ꩻ သာႏသနာႏဘောင်ႏ(ပဗ္ဗဇ္ဇ)သားနဝ်ꩻ အွောန်ႏဗာႏနီမျိုꩻ၊ ခမ်ႏနွောင်ꩻလဲန်း သုခဒုက္ခသား (အသက် ၂၀-မာꩻကီ)သားတာႏ အွောန်ႏထွာဥပသမ္ပဒ၊ လိုꩻပေႏတာႏ အွောန်ႏထွာသာမဏေရနဝ်ꩻသွူ။ ရဟန်ꩻသီးတာႏ ဥပဒေႏစီꩻကန်ꩻ သိက္ခာပဒယို အွောန်ႏဖေႏဗာႏ၊ သာမဏေရတာႏတဲ့ ကလျော်ဒါႏ တောမ်ႏသာမဏေရ ဥပဒေႏစီꩻကန်ꩻသိက္ခာပဒနဝ်ꩻတဲ့ အွောန်ႏဖေႏဗာႏနဝ်ꩻသွူ။ သာမဏေရဝိနယရိုꩻကီတဲ့ ရဟန်ꩻသီးတဲ့ပါ လွောက်ꩻနာႏလွောန်ꩻဗာႏဒျာႏကရိုꩻနဝ်ꩻ သေနာႏဗာႏနဝ်ꩻသွူ။ အီႏထွာသာႏမဏေႏ ကြော့ꩻဖေႏကလူꩻနဝ်ꩻ ထွာအထျꩻအတွိုင်ꩻ ကြော့ꩻဖေႏပရီႏပရာႏလꩻတဝ်း၊ ရီစဲင်းဗာႏအမွိုးဖါ၊ ဒေါ့ꩻနယ်ဗာႏရဟန်ꩻကျောင်ꩻကို ကားကအဝ်ႏ၊ ပျဿနာႏကရအီႏ တထွာတဝ်းလိုꩻနဝ်ꩻ ကိစ္စအဲန္ထဝ်းထွူမꩻ ကြော့ꩻ။ ငဝ်းကပ်သင်္ကန်ꩻ ကွီသင်္ကန်ꩻဖုံႏနဝ်ꩻ သင်္ကန်ꩻအဝ်ႏသွူတဲ့ နမ်းဗုဲင်ချာ တအပ်တဝ်း-ဝိမတိဋီကာကို ဒေါ့ꩻခါꩻနဝ်ꩻမꩻ ဆရာႏစခါဖုံႏ ပွိုင်ဆင်ဆုဲင်ꩻဖေႏဒျာႏ၊ ပေါႏ(ဥပဇ္ဈာယ)ဆရာႏရိုꩻ "ဗုဲင်ဟုဲင်း"လꩻအခွင်ꩻငါတဲ့ အွောန်ႏဗုဲင်တဲ့ ထွာသွူးဒျာႏသျင်ႏ။ ကွဲႏတွော့ꩻ ငဝ်းကွီသီႏလနဝ်ꩻတဲး အရေꩻတန်၊ အီႏနွို့သာႏသနာႏဘောင်ႏ ထွာသာႏမဏေႏတာႏ ထူႏဗာႏသရဏဂမ် (နမောတဿ၊ ဗုဒ္ဓံ ဓမ္မံ သံဃံ သရဏံ ဂစ္ဆာမိ)ဖုံႏ၊ ပေါႏရွောတ်ထွူနဝ်ꩻငါ ထွာလဲးန္ဒျာႏ သာႏမဏေႏ၊ သီႏလဆီပါꩻနဝ်ꩻတဲး ဒေါ့ꩻနယ်လွေꩻယွဲးး ခိꩻခိꩻဆုဲင်ꩻဗာႏဒျာႏ။ လိင်ႏသီႏလမီႏကုဲင် အွောန်ႏထွာဗာႏလိုꩻလမ်း၊ တမ်ႏသီႏလမီႏကုဲင်နဝ်ꩻ အွောန်ႏမာꩻဗာႏတမ်ႏ၊ လိင်ႏသားမီႏမဲန်ဗုဲင်ချာတဲ့ အွောန်ႏဗုဲင်၊ တမ်ႏသားတဲ့ မာꩻတမ်ႏထွူ အွောန္ထူႏယင်းဗာႏ သရဏဂမ်နဝ်ꩻမꩻ သျင်ႏတဲ့ထွာယင်း၊ အွောန်လွေꩻငါသော့ꩻ သာႏသနာႏဘောင်ႏ(ခမ်ႏရဟန်ꩻ)နဝ်ꩻတဲ့ လꩻယင်း။ အမ်ႏအွꩻလွေꩻသဲင်ꩻဗေင်ႏထွိုင်ႏ တရာꩻဖေႏကအဝ်ႏဗွို့ꩻတသေႏနမ်းတာႏ တဲႏစကဗုဲင်သင်္ကန်ꩻကိုကာႏ ထူႏဗုဲင်ဗာႏတောမ်ႏတရာꩻ၊ ဗုဲင်သင်္ကန္တာႏ မီႏတရွောတ်နွောင်ꩻတဝ်း ပါဠိနက်တဲ့ ရွောတ်ဗော့ꩻငဝ်းလင်္ကာႏယိုတဲ့ လꩻဒျာႏ။ သင်္ကန္တာႏ= ပယ်ႏအခွꩻလျား၊ ရဲးထာꩻသား၊ ဒို့ꩻခါꩻဟိရိဂုဏ်ႏ။ ဘုရာꩻပီဖြို့ꩻ၊ ထူႏအွောန္ဒို့ꩻ၊ နွို့မို့သာႏသနာႏဘောင်ႏ။ သောမ်ꩻတာႏ= ဓာတုလိတ်ꩻပါꩻ၊ ဣရိယာပထ၊ ငီႏမꩻတရာꩻဖျော်။ တွိုႏထာꩻမျတ္တာႏ၊ သောမ်ꩻသုင်ꩻဗာႏ၊ ခန္ဓာႏယမ္မျတ်ခေါ်။ ကျောင်ꩻတာႏ= ပယ်ႏအခွꩻလျား၊ ရဲးထာꩻသား၊ ရဲးပါဥတုဖုံႏ။ ဘုရာꩻတွိုင်ꩻထွာ၊ အွိုးတခြာ၊ ခွေခါအုံလꩻကွိုင်ႏ။ တသီႏတာႏ= ဓာတုလိတ်ꩻပါꩻ၊ ဣရိယာပထ၊ ငီႏမꩻတရာꩻဖျော်။ ဓာဣယမ်ငီႏ၊ သုင်ꩻတသီႏ၊ ယမ္ဖေႏခြွိုင်ႏသန်ꩻခေါ်။ ပစ္စဝေက္ခဏာႏကရိုꩻနဝ်ꩻ ဗိုန်ပီဝင်ꩻကမာꩻတရာꩻ၊ ဖေႏကထွာတရာꩻ အကူႏငီႏအထောက္ကမ်းတဲင် သုင်ꩻဗာႏဒျာႏ အွောန်ႏသꩻဗာႏနုဲင်းနဝ်ꩻ။[၁][၂]