သာသနာႏဖာမွိုး အဝ်ႏသိုမ်စွိုး
ရဟန်ꩻတကာႏကရိုꩻနဝ်ꩻ ပိုသွီႏယာႏယိုတဲ့သင် တဝ်းလဲ့ ဝင်ꩻပိုယိုတဲ့သင် ထေရွဉ်ထေခံꩻ ခံႏထူႏပစ္စေꩻလိစ်ꩻပါꩻထွူ အွဉ်ႏခံႏသျင်ႏ အွဉ်ႏထင်ႏစင်ꩻ ခံႏထူႏလွဝင်ꩻသာႏသနာႏဒါယကာႏတဲင် ရိုꩻဗာႏ သာႏသနာႏဖာမွိုး နုဲးနဝ်ꩻသွူ။ နဝ်ꩻတွော့ꩻ သာႏသနာႏဖာမွိုး ကရိုꩻနဝ်ꩻ အဝ်ႏသိုမ်စွိုးသွူ-
- ၁။ ရဟန်ꩻတကာႏ ဗိုန်ပီနုဲး "ကမ်ႏပုဲးမွူး"။
- ၂။ ရဟန်ꩻတကာႏ ဗိုန်ပီနုဲး "ကြေ့ꩻမွူး"။
- ၃။ ရဟန်ꩻတကာႏ ဗိုန်ပီနုဲး "ဆျာမွူး" အဝ်ႏယိုသိုမ်စွိုးသွူ။
၁။ ရဟန်ꩻတကာႏ ပထမတမျိုꩻနဝ်ꩻ ဗိုန်ပီနုဲး "ကမ်ႏပုဲးမွူး"နဝ်ꩻသွူ။ "ကံႏပုဲးမွူးသီးအမျိုꩻ"နဝ်ꩻ ဝွေꩻကဒီႏခါꩻဒါႏ အဒီႏဖုံႏ တန်နဲ့ ? တန်တဝ်းနဲ့? အပေႏအောင်ႏနဲ့? အောင်ႏတဝ်းနဲ့? တသေထွားချာတဝ်း၊ တသေအွဉ်ႏရေꩻချာဒါႏတဝ်း။ အဝ်ႏ"ကံႏပုဲး"ဒီႏ ဖေႏကထွာ "ကံႏပုဲး"ပေႏတာႏ အမွိုး "ကံႏပုဲးမွူး"နဝ်ꩻ တသေထူႏချာဒါႏတဝ်း တာႏဝိုန်ႏထွူ ဒီႏဖေႏတလဲင်ႏငါ လꩻလဲဉ်း၊ ထွူလဲဉ်း တာႏဝိုန်ႏကေႏလဲဉ်း အယူႏဒျာႏနုဲးနဝ်ꩻသွူ။ ဥပမာႏ ပုင်ႏခွိုင်ꩻနုဲးနဝ်ꩻအတွိုင်ꩻ ရဟန်ꩻတကာႏယဟန်ႏနဝ်ꩻ ရဟန်ꩻတကာႏ တမွေးတဝ်း၊ (ရဟန်ꩻတခါႏ)ဒျာႏ။(မန်းကရိုꩻ "ရဟန်းတကာ မဟုတ်၊ ရဟန်းတခါ" နုဲးနဝ်ꩻသွူ)။ "လူႏတလဲင်ႏငါ လꩻလဲဉ်း ထွူလဲဉ်းတာႏဝိုန်ႏကေႏလဲဉ်း-ရိုꩻနဝ်ꩻတွော့ꩻ တသေထွားချာဒါႏတဝ်း အကအွဉ်ႏဗုဲခါꩻဒါႏ ရဟန်ꩻပေႏနဝ်ꩻသွူ။ သွဉ်လိတ်သား ဗွေႏရဟန်ꩻပေႏသီးဘဝနဝ်ꩻ အယပ်အခုဲႏအဝ်ႏအာ......တန်။ ယင်ဟန်ႏသားနဝ်ꩻ တမဲဉ်လꩻတဝ်း တမဲဉ်မော့ꩻခွဲးတဝ်းမျိုꩻလဲ့ အဝ်ႏမော့ꩻခွဲး အဝ်ႏလက်ခံႏဗာႏဒျာႏ၊ ဖေႏကအုံနွောင်ꩻလဲ့ ကျိုꩻစာꩻဗာႏဒျာႏဝင်ꩻဖုံႏသွူ...။
ဗွေႏရဟန်ꩻကရိုꩻနဝ်ꩻ ၉ဝ%နဝ်ꩻ ထွာဒျာႏ အဝ်ႏဆင်ꩻရဲꩻသား၊ လိုꩻတောꩻ၊ လိုꩻဒုံသီးလွူးလင်ꩻလွဉ်။ တွိုႏလွဉ်လိုꩻဘဝ အရွယ်ႏကအဝ်ႏတွင်ꩻ ကလꩻထွိုက်လꩻသင်ꩻဒါႏ လိုꩻသီးဆဲင်ႏရာꩻထာꩻပျောႏဖုံႏယို အဝ်ႏမဲဉ်ခူမ်ပဆိုး၊ ခံႏစာꩻနုဲးနုဲးရိုꩻကီလဲ့ အွဉ်ႏကုဲထိုꩻချာ နွို့ငါဖရာꩻသာသနာႏ အဝ်ႏသွဉ်ထူႏကျပ်ဒျာႏ ဖရာꩻလိတ်၊ အခိင်ႏလို့လွေꩻဒျာႏဗော့ꩻတောမ်ႏ သာသနာႏအတွက်ဖုံႏသွူ။ နဝ်ꩻတွော့ꩻ အဆင်ႏကရော့ꩻဒါႏဗွေႏပေႏဖုံႏတဲ့ အဝ်ႏ...(အဝ်ႏနဝ်ꩻအဝ်ႏကီလဲ့ အဆေ့ꩻ)။ အဆင်ႏတရော့ꩻတဝ်း ဗွေႏပေႏ သဲင်ꩻလူႏခံႏလျာဗာႏဒျာႏ မွိုးဖာထျꩻသားဖုံႏတဲ့ အာ...တန်။ (တဲမ်းလိတ်သားတဲ့ အဝ်ႏပါငီꩻ ဗꩻတွိုႏယိုခါ)။ ခါးလားအရွယ်ႏကတွိုႏ(ခါးလားကထွာ ဗွေႏဗိုန်)အခိင်ႏနဝ်ꩻ ဒဲဉ်သောမ်ꩻဗွာစတဲင် ခွိုင်းကားပစ္စေꩻလိစ်ꩻပါꩻနဝ်ꩻ အခိင်ႏလွောက်ꩻရာꩻအဝ်ႏလိုႏလွဝင်ꩻဖုံႏ ပငါပရာꩻ။ ကွဲႏတွော့ꩻ သွဉ်လိတ်သားဗွေႏရဟန်ꩻအပါꩻမုဲꩻခန်းတယဝ်း တဒေါ့ꩻထန်ႏရုဲးတဝ်း"အဝ်ႏလိုႏထာꩻယို၊ အဝ်ႏလိုႏထာꩻနဝ်ꩻ"နုဲးနဝ်ꩻသွူ။ယင်ဟန်ႏနဝ်ꩻ မွိုးဖာထျꩻငါမိဉ်ႏတဲ့ တကွီရုဲးတဝ်းက အဝ်ႏကုဲလိုꩻလင်ထျꩻထဲင်းဟမာꩻနုဲးမုဲꩻအီႏဒေါ့ꩻထန်ႏရုဲးဟောင်း။ ယလဲင်ႏလဲင်ႏ "အဝ်ႏလိုႏထမုဲꩻ အခိင်ႏတရွေꩻတဝ်း ဒေါ့ꩻဟုဲးဩ" ကလဝ်းနယ်ခါꩻဒါႏအတွိုင်ꩻ "တကာႏမူႏ... ဗွေႏစင်ꩻ အဝ်ႏလိုႏတခြိုꩻယို တကာႏခို... ဗွေႏစင်ꩻအဝ်ႏလိုႏ တခြိုꩻနဝ်ꩻ" ထွိုင်ႏလွေꩻဒေါ့ꩻနယ်ခိင်ႏနဝ်ꩻ တော်တနꩻစွော့ꩻထိုꩻ ဝွေꩻသီးလမ်းကိုအဆင်ႏရော့ꩻတဝ်းခိင်ႏတဲင် "လိုꩻကျောင်ꩻနဝ်ꩻ တသေနာႏဖေႏဒါႏတဝ်းဝင်ꩻတန်ကွေး..." ရော့ꩻရော့ꩻတဝ်း ခံႏဗာႏက ဝင်ꩻဒေါ့ꩻလိုꩻနုဲးနဝ်ꩻသားတဲ့အဝ်ႏသွူ။ လိုꩻကရိုꩻနဝ်ꩻ အုံအဝ်ႏတောမ်ႏ နားဟွုန်စုကလမ်းကိုကိစ္စအရေꩻအဝ်ႏရင်ꩻရင်ꩻသနယ်။ ကွဲႏတွော့ꩻ ဗွေႏရဟနပေႏသီးလဲ့ အယပ်ꩻအခုဲႏအဝ်ႏနေနေကရိုꩻနဝ်ꩻ ဟဝ်သေနာႏငါႏနေနေသွူ။ ပုထုဇဉ်ႏလိုꩻသီး သဒ္ဓါႏတရာꩻဖုံႏနဝ်ꩻ တဟီႏတန်၊ တခွေါင်ခံႏတဝ်း။ နုဲးနဝ်ꩻနေနေ ပုထုဇဉ်ႏဗွေႏပေႏသီးဖုံႏလဲ့ အီႏဗိုန်ပီနုဲးစွဉ်ႏဖရာꩻရဟန္တာႏသီးအတွိုင်ꩻ ကေႏညိုႏခရာႏကဟဝ်ဒါႏဂုဏ်ႏအင်္ဂါႏဖုံႏ မျိုꩻအီႏအဝ်ႏနွောင်ꩻစွဉ်ႏသေႏသေႏတမွေးတဝ်း။ အာႏပေႏချက်ဖုံႏ အဝ်ႏလွဝင်ꩻ ပငါပရာꩻသွူ။ နုဲးမုဲꩻမုဲꩻခန်းတယဝ်း ပေါႏအွဉ်ႏဗုဲဖေႏလဲဉ်းသွူဝင်ꩻပိုရဟန်ꩻ၊ အွဉ်ႏထပ်ဖေႏလဲဉ်းသွူဝင်ꩻပို သိက္ခာႏနဝ်ꩻ ဖေႏကထွာမွုန်းတဝ်း ဗိုန်ပီနုဲး"ကမ်ႏပုဲးမွူး"တသေထွားချာဒါႏတဝ်း အဒီႏနဝ်ꩻအတွိုင်ꩻ အဝ်ႏလိုႏသတိꩻငါႏဝင်ꩻသွူ။ သာႏသနာႏကရိုꩻနဝ်ꩻ ပင်ႏထိုဗာႏ ပျုဗာႏ ဗွေႏရဟန်ꩻသီးလူမ်ꩻတလꩻတဝ်း၊ အုံနောင်တကာႏဖုံႏ ပျုလွေꩻဗာႏဒျာႏ သာႏသနာႏနဝ်ꩻသွူ။ နဝ်ꩻမꩻ တကာႏခိုမူႏလိုꩻလမ်းသီးဖဲ့ꩻတဲ့ တာႏဝိုန်ႏအဝ်ႏငီꩻလွဝင်ꩻတဖဲ့ꩻတခဝ်နေနေသွူ။
၂ ။ ရဟန်ꩻတကာႏ ဒုတိယတမျိုꩻနဝ်ꩻ ဗိုန်ပီနုဲး "ကြေ့ꩻမွူး"သွူ။ "ကြေ့ꩻမွူး"သီးအမျိုꩻနဝ်ꩻ စစရာႏရာႏ ထူႏတာႏဝိုန်ႏနွောင်ꩻချာတဝ်းနမ်း။ ကွဲႏတွော့ꩻ အယူႏလꩻသေႏသေႏချာဒါႏဒျာႏ အဒီႏ။ ဗိုန်ပီနုဲးနဝ်ꩻနေနေ ရဟန်ꩻတကာႏယင်ဟန်ႏနဝ်ꩻ အွဉ်ႏဗုဲဖေႏရဟန်ꩻထွူ အုံကြွို့ꩻအဝ်ႏကြို့ꩻဒျာႏထာꩻ၊ အွဉ်ႏတဖေင်ꩻခါꩻဒျာႏအဗွေႏစင်ꩻ။ "ခွေရဟန်ꩻ အဝ်ႏလိုႏဒါႏထမုဲꩻနဲး" သေယူႏဒါႏတဝ်းနုဲးနဝ်ꩻထွူ သေထူႏတာႏဝိုန်ႏဒါႏတဝ်း အဗွေႏစင်ꩻ၊ တသေရိက်ခေႏ ခတ်ကယ်ꩻဒါႏတဝ်း အဗွေႏစင်ꩻ။ အကျောင်ꩻတဲက်ဆဲင်ႏမုꩻ မိဉ်ႏအဝ်ႏစိင်ႏစွော့ꩻခန်းလဲ့ "အော်... မွေးမွေး၊ နီဗွေႏ အဆင်ႏအဝ်ႏရော့ꩻဒျာႏကရို" လꩻကွို့ꩻလူမ်ꩻ အလဝ်းရီခြေင်ထာꩻ တောမ်ႏငဝ်း ညညတလဲင်ႏပေႏလူမ်ꩻသွူ။ ရဟန်ꩻတကာႏယိုစားနဝ်ꩻ ဗိုန်ပီနုဲး "ကြေ့ꩻမွူး"သွူ။ ခေတ်ယိုခါ ရဟန်ꩻတကာႏယိုစားနဝ်ꩻ အဝ်ႏဗောႏထာꩻ။ ထီႏလဲ့ထီႏနွောင်ꩻဒျာႏ။ ခွိုင်းကားစစရာႏရာႏ မဲဉ်လိုႏထာꩻမုဲꩻလိုႏ လူႏလို့လို့ဗာႏ နုဲးနဝ်ꩻတမွေးတဝ်း။ မွိုးဖာသီး ကဖေႏပိုနဝ်ꩻတဲ့ ဖေႏသင်ꩻခိင်ႏမꩻ ဖေႏ မွေးတဝ်းနဲ့။ လောကကိုယို မွိုးကရိုꩻနဝ်ꩻ အဆင်ႏတရော့ꩻတဝ်းခန်းနုဲးမုဲꩻမုဲꩻတယဝ်း။ နီအလောင်း အဝ်ႏဖေႏနွောင်ꩻဒျာႏ အခွꩻရျူႏသွတ်ꩻမေတ္တာႏ။ နေးတောမ်ႏကာယကမ်ႏ တမာꩻဖေႏနွောင်ꩻတဝ်း နီအတာႏလဲ့ နေးတောမ်ႏဝစီႏကမ်ႏ ပိုရဟန်ꩻ ဖေႏကထွက်သဲင်ꩻမွုန်းထာꩻ၊ဖေႏကပျောႏသာႏသနာႏကိုနဝ်ꩻ အွဉ်ႏရေꩻဒါႏ ဒေါ့ꩻဒါႏဒျာႏကရိုꩻယို ဟဝ်သတိခရာႏသွူ။
၃။ ရဟန်ꩻတကာႏ တတိယတမျိုꩻနဝ်ꩻ ဗိုန်ပီနုဲး "ဆျာမွူး" နဝ်ꩻသွူ။ "ဆျာမွူး"သီးအမျိုꩻနဝ်ꩻ အဝ်ႏသေလွဒျာႏဝင်ꩻ ပငါပရာꩻ။ ပေါႏဝွေꩻဒီႏသွူ အဒီႏထွူနဝ်ꩻ ဝွေꩻပွေါးထွား ရဲးရဲပ်ဟဝ်ဟဝ်ဒျာႏ ဗꩻတွိုႏစွဉ်ႏ ကထွာလွဉ်ဆျာပေႏသွူ။ ယလဲင်ႏလဲင်ႏ ဝွေꩻခို့ꩻလိုမ်ꩻဖေႏပါဒွိုန်းကထဲင်း ဆျာမွူးလင်ဒီႏဖုံႏ...။ အဒီႏထွိုင်ႏပꩻထွူလဲ့ ဝွေꩻပိုပေႏဖုံႏ အုံပြုံႏအဝ်ႏငီꩻ သွီႏထီꩻရက်ပဲင်ꩻ ခူမ်သဲဉ်ꩻသော့ꩻသꩻအင် ရဲးကာႏကွယ်ႏဖေႏပါဒွိုန်းထဲင်း ရူး တဗင် အန္တရာယ်ႏဖုံႏသွူ။ ဆျာမွူးစားနဝ်ꩻနဝ်ꩻ လွေꩻဗွူႏစမ်ꩻ ဟူမွိုင်။ မာꩻစွဉ်ႏ အငဝ်း ကွတ်ကွတ် တခြွတ်ပါဟံႏဖေႏအံႏလို့ဒျာႏ အပိုပေႏဖုံႏသွူ။ နုဲးနဝ်ꩻလူမ်ꩻ တကာႏတဝ်း ထီႏထာꩻအီႏပုမ်ႏယိုတောမ်ႏခင်ႏမီႏနာ ခံႏအဆာထွူ တောမ်ႏဖြောင်းအံႏဖူꩻ ဖေႏအံႏစူꩻဒျာႏ ပိုပေႏတာႏတဲင် နမ်းတာႏခံႏစွဉ်ႏအံႏမ နဝ်ꩻသွူ။ ဗိုန်ပီနုဲးနဝ်ꩻနေနေ လောကကိုယို ရဟန်ꩻတကာႏယင်ဟန်ႏနဝ်ꩻ ဘဝဆင်ꩻရဲ့ကီလဲ့ သဒ္ဓါႏဆေ့ꩻခြေားတဝ်း၊ သဒ္ဓါႏတရာꩻတန်စေႏတနာႏသန် လူႏတန်ꩻခရာႏမိဉ်ႏအဝ်ႏလွဉ်သွူနဝ်ꩻ လူႏတဝ်း အုံဒါႏတဝ်း၊ သာႏသနာႏထောက်ထမ်ꩻ ပိုရဟန်ꩻတာႏ ဗွေႏသံဃာႏတာႏ သꩻယူႏဒျာႏနုဲးနဝ်ꩻထွူ မာꩻမွေးကုသိုလ်ႏ၊ လူႏမွေးတန်ꩻမွေး။ ကီႏညိုႏမွေးစွဉ်ႏဗွေႏရဟန်ꩻသီးသွူ။ ရဟန်ꩻတကာႏယိုစားနဝ်ꩻ ဗိုန်ပီနုဲး "ဆျာမွူး"နဝ်ꩻသွူ။
ကမဲဉ်ဒေါ့ꩻသုပ်ဒါႏငဝ်းနဝ်ꩻ သျင်ႏပေႏ အဝ်ႏမꩻ ရဟန်ꩻအဝ်ႏ၊ ရဟန်ꩻအဝ်ႏမꩻ ဗွေႏဗိုန်အီႏအဝ်ႏလွဉ်သွူ။ နဝ်ꩻမꩻ သျင်ႏပေႏဖုံႏယိုလဲ့ အဝ်ႏလိုႏထွားလွိုတဝ်း၊ အဝ်ႏလိုႏရက်၊ အဝ်ႏလိုႏဖေႏအာႏလွဝင်ꩻသွူ။
ဟောꩻထွားလိတ်ယိုထွူ သေနာႏ စာႏနာႏဖေႏဒါႏသွော့ ရဟန်ꩻ သာမဏေႏသီးအလောင်း.....။ နဝ်ꩻထွူ ရီချာသွော့နမ်း "ခွေမိဉ်ႏထွာ ရဟန်ꩻတကာႏနဝ်ꩻ အဝ်ႏလိုႏမာꩻဗာႏ ရဟန်ꩻတကာႏအစွိုးနုဲးမုဲꩻ ?၊ (ခွေပါသော့ꩻ အစွိုးမုဲꩻ ?) " ကရိုꩻနဝ်ꩻ.....။ [၁]
အာႏကွိုꩻ
မွဉ်းဖျင်- ↑ ပေါက်တောဝဆရာတော် ဘဒ္ဒန္တဩဘာသ မိန့်ကြားတော်မူအပ်သော "ရဟန်းမိခင်သုံးမျိုး"ဩဝါဒဓမ္မကထာ