သာႏသနာႏရေꩻ

မီႏထွားဖျင် သာႏသနာႏရေꩻဖဲ့ꩻလဲ့ နီပအိုဝ်ႏ ရဟန်ꩻသင်္ဃာႏကို ကအီႏထင်ႏထိုတသွောင်း နုဲးဝင်ꩻသင်္ဃာႏလင်နဝ်ꩻလဲ့ တထီႏတဝ်းဒွိုန်းနေနေနော၊ ယိုလဲင်ႏခါ ကဒါႏထွူ၊ ကသေထွူပုဂ္ဂိုလ်ႏသား နီပအိုဝ်ႏကိုနဝ်ꩻလဲ့ အဝ်ႏအာလဲဉ်းထွူဒျာႏ၊ ကွဲႏတွော့ꩻ နီပအိုဝ်ႏပုဂ္ဂိုလ်ႏဒါႏသား ကအီႏတယ်ႏထောင်ႏဒါႏ လိတ်သွဉ်တွိုက် ဝေင်ꩻကိုခူꩻကိုနဝ်ꩻ တအဝ်ႏတဝ်း၊ ကအီႏဟော်ꩻဒါႏတရာꩻ ဓမ္မကထိကနဝ်ꩻလဲ့ တအဝ်ႏတဝ်း၊ ကအီႏတဲမ်းထန်ႏဒျာႏ လောကီꩻပညာႏ လောကုတ်ပညာႏဖဲ့ꩻလိတ်စောင်ႏ တအဝ်ႏတဝ်း၊ လိုꩻပေႏဆလဖုံႏ ကထင်ႏထီႏဗာႏ ပုဂ္ဂိုလ်ႏဒါႏသေသားနုဲးနဝ်ꩻခါ အောင်ႏစွဉ်ႏ ဒါႏစွဉ်ႏလဲ့နဝ်ꩻ၊ တအောင်ႏတဝ်းပုဂ္ဂိုလ်ႏ တဒါႏတဝ်းပုဂ္ဂိုလ်ႏလဲ့နဝ်ꩻ အပီပီဒျာႏဝင်ꩻ၊ တထူꩻတဝ်း၊ သွင်ꩻဖွီအံႏသဲ့ꩻခန်း ပုဂ္ဂိုလ်ႏဒါႏနုဲးနဝ်ꩻတဲင် သာႏသနာႏရေꩻ၊ ပညာႏရေꩻဖဲ့ꩻနဝ်ꩻ သꩻဆုတ်ယုတ်ထွာလွဉ်နဝ်ꩻလဲ့ ထီႏဗာႏ။ ပုဂ္ဂိုလ်ႏဒါႏသား၊ သေသားယဟန်ႏနဝ်ꩻ ကွဉ်ကꩻထွူ ဘုရာꩻသင်္ကန်ꩻ၊ အံႏအွꩻထွူ ဘုရာꩻပဉ္စောဝ်းဒဲဉ်သွမ်ꩻလဲ့ အသꩻနဝ်ꩻ ထွာဒျာႏလိုꩻလမ်း၊ ထာꩻယူႏထာꩻတွေꩻ၊ ထာꩻခွုမ်ထာꩻမာꩻ၊ ထာꩻဒေါ့ꩻထာꩻဖြဝ်ႏနုဲးနဝ်ꩻလဲ့ အဝ်ႏနော၊ ပုဂ္ဂိုလ်ႏဒါႏသေ နုဲးနဝ်ꩻခါ တွမ်ႏကဗေက်ꩻသော့ꩻဖေႏ ဘုရာꩻပဉ္စောဝ်း ပိဋကတ် ယို့စူကိုနဝ်ꩻ ပီဝင်ꩻ၊ အယားကုဲင်ထဲင်း ဘုရာꩻအဆုံꩻအမꩻ ပိဋကတ်၊ အသွင်ꩻဖွီတောဒျာႏ ဘုရာꩻသာႏသနာႏနဝ်ꩻလဲ့ အဝ်ႏထီႏဗာႏနဝ်ꩻသွူ။ အသꩻအွဉ်ႏဒါႏနုဲးလိုꩻလမ်း၊ ထာꩻယူႏထာꩻတွေꩻ၊ ထာꩻဒေါ့ꩻထာꩻဖြဝ်ႏ၊ ထာꩻခွုမ်ထာꩻမာꩻ ပုဂ္ဂိုလ်ႏဒါႏသေနဝ်ꩻခါ ဟဝ်အွဉ်ႏသတိꩻငါႏ အချက်ဆလယိုနော (၁) ခွေယိုနဝ်ꩻ သာႏသနာႏထံꩻ ရဟန်ꩻတပါꩻမွော့ (၂) ခွေယိုနဝ်ꩻ ကွဉ်ကꩻဘုရာꩻပဉ္စောဝ်း အကွဉ်အကꩻမွော့ (၃) ခွေယိုနဝ်ꩻ ခံႏထူႏ တကာႏတကာႏမူႏသီး ပစ္စေꩻလစ်ꩻပါꩻမွော့ (၄) ယံကပင်ႏထိုတသွောင်းနွောင်ꩻ ဘုရာꩻသာႏသနာႏတဲင် ဆရာႏသမာꩻ အွဉ်ႏဗုဲင်ခွေသင်္ကန်ꩻမွော့ (၅) ခွေကွဉ်ကꩻ ဘုရာꩻသင်္ကန်ꩻတဲင် ခွေအီႏနာႏဗာႏ ဘုရာꩻအဆုံꩻအမꩻမွော့ (၆) တုနုဲးလိုꩻလမ်းသီး ထာꩻယူႏထာꩻတွေꩻ၊ ထာꩻဒေါ့ꩻထာꩻဖြဝ်ႏ၊ ထာꩻမာꩻနဝ်ꩻ တွမ်ႏခွေကကွဉ်ကꩻသင်္ကန်ꩻယိုနဝ်ꩻ တမဲဉ်ႏတဝ်းဝင်ꩻမွော့ (၇) စပ်ဆွိုင်ꩻတွမ်ႏ သာႏသနာႏဘာႏသာႏတဲင် ဗီယဲက်နမ်လိုꩻမျိုꩻသီး လဲင်ꩻခံႏသီနေး အနမ်းမွော့ (၈) ခွေယိုနဝ်ꩻ အီႏယားကုဲင် ဘုရာꩻသာႏသနာႏ၊ ဘုရာꩻအဆုံꩻအမꩻနဝ်ꩻရော့ꩻတဝ်းမွော့ (၉) အုံဒေါင် ဘုရာꩻသာႏသနာႏ၊ ဆရာႏတကာႏတဲင် ဘုရာꩻသာႏသနာႏ ယံကထင်ႏထိုတသွောင်းနဝ်ꩻ ခွေတာႏဝွန်ႏအဝ်ႏမွော့-ယူႏဗဲင်းနုဲးနဝ်ꩻနော။ ကအောင်ႏမျင်ႏထွူ ထာꩻမာꩻ (ဓမ္မာစရိယ)သားပုဂ္ဂိုလ်ႏဖုံႏနဝ်ꩻ (၁) အုံတဉ်ႏဉ်ႏ အုံစွူစွူ သန္နိဋ္ဌာန်ႏနုဲးနဝ်ꩻတဲင် အဝ်ႏလိုႏချꩻလိတ်လုဲင်ꩻ (၂) သုမင်္ဂလာႏ ဒုမင်္ဂလာႏတရာꩻနဝ်ꩻလဲ့ ယံကဟော်ꩻဒါႏနဝ်ꩻ ကျိုꩻစာꩻဗာႏ (၃) ဆွိုက်ဆန်ႏတွမ်ႏတကာႏ တကာႏမနဝ်ꩻလဲ့ ယံကထွာနဝ်ꩻ ကျိုꩻစာꩻဗာႏ (၄) တွမ်ႏလိုꩻတန် အရာႏအဝ်ႏ အရာႏခံႏသားနဝ်ꩻလဲ့ ဆွိုက်ဆန်ႏဒါႏဗာႏ (၅) ယထိန်ꩻထွားနွောင်ꩻ လိတ်သွက်တွိုက်နဝ်ꩻလဲ့ ကျိုꩻစာꩻဗာႏနဝ်ꩻသွူ။ တနုဲးထွားနုဲးဝင်ꩻလိုꩻမျိုꩻလင်နဝ်ꩻမꩻ နီပအိုဝ်ႏ ဓမ္မာစရိယထင်ႏထိုတသွောင်းလꩻသွူ။ ထီႏဝင်ꩻလိုꩻမျိုꩻလင် ထင်ႏထိုတသွောင်းတဲင် ချီႏမွမ်ꩻအံႏဖြာႏဒျာႏနဝ်ꩻ နီအမျိုꩻထင်ႏထိုတသွောင်းလꩻ မွေးတဝ်း၊ နီမဉ်ႏကျိုꩻစာꩻလွေꩻ၊ နီမဉ်ႏခွုမ်မာꩻလွေꩻနဝ်ꩻမꩻ နီထင်ႏထိုတသွောင်း၊ တွမ်ႏပါꩻကအံႏထော့ꩻယာႏတူႏလောင်ႏ တန်န်နဝ်ꩻ နီအဝ်ႏအထျꩻအသောင်ထွားတဲင် နီယုဲꩻထီရီႏငခြေင်ထာꩻ၊ နီဟို့ꩻတကွို့ꩻတဝ်း၊ နီတခံႏစာꩻဗာႏတဝ်း အရသာႏနဝ်ꩻ ပီဝင်ꩻနဝ်ꩻသွူ။