သီဝကရီတရာꩻဂွုဏ်ႏတောႏ

"ပဌမသန္ဒိဋ္ဌိကသုတ် ('သီဝက'ရီ တရာꩻဂွုဏ်ႏတောႏသူပါꩻ)" 'မောဠိယ သီဝကပရိဗိုဇ်'နဝ်ꩻ လွဉ်ထေ့ဗွေႏဘုရာꩻ၊ ဒေါ့ꩻရီစွော့ꩻတက် ငေါဝ်းနစ်သက်၊ ငေါဝ်းသꩻရေꩻ၊ ငေါဝ်းတောင်ꩻစွေးထွူခါ ရီပါဗွေႏဘုရာꩻနုဲင်းယို- "ဩဗွေႏ- ၁။ နီဗွေႏနမ်းနမ်း ကဟော်ꩻခါꩻ တရာꩻတောႏနဝ်ꩻ ၂။ ကိတ္တာဝတာ နုခေါ ဘန္တေ သန္ဒိဋ္ဌိကော ဓမ္မော ဟောတိ- နမ်းတွမ်ႏနမ်း သေထီႏချာတရာꩻနုဲင်းမုဲင်ꩻ ဗွေႏဩ။ ၃။ အကာလိကော ဟောတိ- အခိန်ႏရွေꩻတဝ်း အကျိုꩻဖေႏနုဲင်းမုဲင်ꩻ ဗွေႏဩ။ ၄။ ဧဟိ ပဿိကော ဟောတိ- 'လွဉ်လုဲင်း၊ ထွားဟုဲင်း'အွဉ်ႏနယ်ဗွုန်ႏစွဉ်ႏနုဲင်းမုဲင်ꩻ ဗွေႏဩ။ ၅။ ဩပနေယျိကော ဟောတိ- ထူႏသော့ꩻထွိုက်သꩻကိုနုဲင်းမုဲင်ꩻ ဗွေႏဩ။ ၆။ ပစ္စတ္တံ ဝေဒိသဗ္ဗော ဝိညူဟိ- ပညႏသား သေထွိုက်လꩻခါꩻ ပငါပရာꩻနုဲင်းမုဲင်ꩻ ဗွေႏဩ"။ "သီဝကဟွေး- နာꩻထာꩻမဉ်လꩻ 'လောႏဘꩻ'မဉ်ႏထွာနဝ်ꩻ ခွေနမ်းကိုယို လောႏဘꩻအဝ်ႏ စဲင်းစဲင်းစဲ့စဲ့ (ထင်ႏထင်ႏသျာꩻသျာꩻ) နာꩻသေချာဒျာႏ၊ နာꩻသꩻကိုနဝ်ꩻ ထာꩻမဉ်လꩻပေါႏတဝ်း 'လောႏဘꩻ'အဲဉ်ထဝ်း စဲင်းစဲ့ထင်ႏသျာꩻ နာꩻသေချာနေဟောင်း" "သေချာဒျာႏ ဗွေႏဩ" "နာꩻထာꩻမဉ်လꩻ 'လောႏဘꩻ'မဉ်ႏထွာနဝ်ꩻ ခွေနမ်းကိုယို လောႏဘꩻအဝ်ႏ စဲင်းစဲင်းစဲ့စဲ့ (ထင်ႏထင်ႏသျာꩻသျာꩻ) နာꩻသေချာဒျာႏ၊ နာꩻသꩻကိုနဝ်ꩻ ထာꩻမဉ်လꩻပေါႏတဝ်း 'လောႏဘꩻ'အဲဉ်ထဝ်း စဲင်းစဲ့ထင်ႏသျာꩻ နာꩻသေချာဒျာႏ၊ ကသေချာနုဲင်းနဝ်ꩻနဝ်ꩻ (ဝင်ꩻအဝ်ႏအသောင် ဒေါ့ꩻမွေးတောဝ်း)၊ နာꩻနမ်းတွမ်ႏနာꩻနမ်း သေချာဒျာႏ၊ 'သန္ဒိဋ္ဌိကော-နမ်းတွမ်ႏနမ်းသေချာ'ကရိုꩻနဝ်ꩻ သေနုဲင်းနဝ်ꩻသွူ။ နာꩻဒေါႏသꩻထွာတဲ့နဝ်ꩻ၊ နာꩻမောႏဟꩻထွာတဲ့နဝ်ꩻ နာꩻသေချာနုဲင်းနဝ်ꩻနေနေ၊ ပေါႏသꩻလျားထာꩻတဲ့ မဲ့ငါတကုဲင်စွဉ်ႏယိုခါ၊ ပေါႏသꩻရေꩻတဲ့ ပယွုမ်းစွဉ်ႏယိုခါ၊ နဝ်ꩻနဝ်ꩻ အကာလိ-အဖွိုꩻစား၊ အသေယိုꩻစားသွူ၊ အခိန်ႏတရွေꩻတဝ်း အကျိုꩻဖေႏယိုခါနောဝ်ꩻသွူ။ မဉ်ႏယွုမ်းတဝ်းနဝ်ꩻ စံꩻစံꩻသွော့လုဲင်း၊ ကျင်ꩻစံꩻသွော့ဟုဲင်း၊ သီႏလ သမာႏဓိ ပညာႏ-စတဲင်တရာꩻဖုံႏနဝ်ꩻ ဟောတ်သော့ꩻခါꩻငါႏသꩻကို၊ (ဩပနေယျိကော)နောဝ်ꩻသွူ။ သောႏတာႏပန်ႏပုဂ္ဂိုလ်ႏတဲ့ သေထွိုက်လꩻပဲင်ႏခါꩻ သောတာပတ္တိမဂ်၊ သောတာပတ္တိဖိုလ်ႏ၊ သကဒါႏဂါမ်ႏပုဂ္ဂိုလ်ႏတဲ့ သေထွိုက်လꩻပဲင်ႏခါꩻ သကဒါဂါမိမဂ်၊ သကဒါဂါမိဖိုလ်ႏ၊ အနာႏဂါမ်ႏပုဂ္ဂိုလ်ႏတဲ့ သေထွိုက်ꩻလꩻပဲင်ႏခါꩻ အနာဂါမိမဂ်၊ အနာဂါမိဖိုလ်ႏ၊ ရဟန္တာႏပုဂ္ဂိုလ်ႏတဲ့ သေထွိုက်လꩻပဲင်ႏခါꩻ အရဟတ္တမဂ်၊ အရဟတ္တဖိုလ်ႏ၊ သေထွိုက်လꩻပဲင်ႏခါꩻ ပငါပရာꩻနုဲင်းနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ ဆက္ကနိပါတ်၊ ပဌမသန္ဒိဋ္ဌိကသုတ်)