သေက္ခပုဂ္ဂိုလ်ႏတာႏ
"ပဌမ ပရိဟာနိသုတ် (သေက္ခပုဂ္ဂိုလ်ႏတာႏ ဆွုတ်ယွုတ်ခရာႏ)" "သေက္ခပုဂ္ဂိုလ်ႏ"ကရိုꩻနဝ်ꩻ အဝ်ႏလိုႏကျိုꩻစာꩻနေကနဝ်ꩻ ဟဲ့ꩻ"သေက္ခပုဂ္ဂိုလ်ႏ"နောဝ်ꩻသွူ။ သေက္ခပုဂ္ဂိုလ်ႏ အဝ်ႏ(၇)ပါꩻ- ၁။ လꩻတမဂ်နောဝ်ꩻ ဟဲ့ꩻ"သောတာပတ္တိမဂ္ဂဋ္ဌာန်ႏ"ပုဂ္ဂိုလ်ႏ ၂။ လꩻတဖိုလ်ႏနောဝ်ꩻ ဟဲ့ꩻ"သောႏတာႏပန်ႏ"ပုဂ္ဂိုလ်ႏ ၃။ လꩻနီမဂ်နောဝ်ꩻ ဟဲ့ꩻ"သကဒါဂါမိမဂ္ဂဋ္ဌာန်ႏ"ပုဂ္ဂိုလ်ႏ ၄။ လꩻနီဖိုလ်ႏနောဝ်ꩻ ဟဲ့ꩻ"သကဒါႏဂါမ်ႏ"ပုဂ္ဂိုလ်ႏ ၅။ လꩻသွံမဂ်နောဝ်ꩻ ဟဲ့ꩻ"အနာဂါမိမဂ္ဂဋ္ဌာန်ႏ"ပုဂ္ဂိုလ်ႏ ၆။ လꩻသွံဖိုလ်ႏနောဝ်ꩻ ဟဲ့ꩻ"အနာႏဂါမ်ႏ"ပုဂ္ဂိုလ်ႏ ၇။ လꩻလစ်ꩻမဂ်နောဝ်ꩻ ဟဲ့ꩻ"အရဟတ္တမဂ္ဂဋ္ဌာန်ႏ"ပုဂ္ဂိုလ်ႏ ဝွေꩻဗွေႏသီးယို နွုတ်ꩻပါꩻနဝ်ꩻ ထွာတဝ်းဒွိုန်း ရဟန္တာႏ၊ ဖေႏနေးကလꩻ လစ်ꩻဖိုလ်ႏ၊ ဖေႏနေးကထွာနွောင်ꩻ ရဟန္တာႏပုဂ္ဂိုလ်ႏနဝ်ꩻ အဝ်ႏလိုႏအားထွုတ်နေကတရာꩻနဝ်ꩻမꩻ ဟဲ့ꩻဗာႏ"သေက္ခ"ပုဂ္ဂိုလ်ႏနောဝ်ꩻသွူ။ အွိုးခꩻတလဲင်ႏ- နီဗွေႏဘုရာꩻအဝ်ႏအုံ ကျောင်ꩻဇေႏတဝွန်ႏကိုအတွင်ꩻ ဟော်ꩻဖေႏရဟန်ꩻသီး တရာꩻနုဲင်းယို- ရဟန်ꩻသီးဖုံႏဟွေး- သေက္ခပုဂ္ဂိုလ်ႏသီးတာႏ ဆွုတ်ယွုတ်ခရာႏနဝ်ꩻ အဝ်ႏနွုတ်ꩻမျိုꩻ၊ နွုတ်ꩻမျိုꩻကရိုꩻနဝ်ꩻ- ၁။ ပျောႏလွဉ်ꩻဒျာႏ ထာꩻမာꩻတသာ (မာꩻမွိုင်းဒျာႏ ထာꩻမာꩻ) ၂။ ပျောႏလွဉ်ꩻမွိုင်းဒျာႏ ထာꩻဒေါ့ꩻ (ဖုတ်ꩻမွိုင်းဒျာႏ တလီꩻဆျာႏ) ၃။ ပျောႏလွဉ်ꩻမွိုင်းဒျာႏ ထာꩻဗေင်ႏ (ဗေင်ႏတွီꩻမွိုင်းဒျာႏထာꩻ) ၄။ ပျောႏလွဉ်ꩻမွိုင်းဒျာႏ သွꩻပေႏ (လယ်ႏလွင်ꩻမွိုင်းဒျာႏထာꩻ) ၅။ ထိန်ꩻတောဝ်းဣန္ဒြေႏ (ပျောႏလွဉ်ꩻမွိုင်းဒျာႏ အာႏရွုံႏ) ၆။ အံႏတမွိုꩻတမာꩻ (ချင်းတဝ်း အအံႏ-အအွꩻ) ၇။ နွို့မာꩻတရေင် သံဃာႏတန်သီးဆဲင်ႏရာꩻထာꩻမာꩻ၊ သေက္ခပုဂ္ဂိုလ်ႏဖုံႏနဝ်ꩻ ယိုနွုတ်ꩻပါꩻ တပါꩻပါꩻကို ပေါႏအဝ်ႏမာꩻနေကနဝ်ꩻ အဝ်ႏအဆွုတ်ယွုတ်သဲင်ꩻလွုမ်ꩻ၊ တိုꩻတက်ခရာႏအဲဉ်ထောဝ်း။ ရဟန်ꩻသီးဖုံႏဟွေး- သေက္ခပုဂ္ဂိုလ်ႏသီးအတာႏ ဆွုတ်ယွုတ်ခရာႏအဲဉ်ထဝ်းနဝ်ꩻ အဝ်ႏနွုတ်ꩻမျိုꩻ၊ နွုတ်ꩻမျိုꩻကရိုꩻနဝ်ꩻ- ၁။ ပျောႏလွဉ်ꩻတဝ်း ထာꩻမာꩻတသာ (မာꩻမွိုင်းတဝ်း ထာꩻမာꩻ) ၂။ ပျောႏလွဉ်ꩻတဝ်း ထာꩻဒေါ့ꩻ (ဖုတ်ꩻမွိုင်းတဝ်း တလီꩻဆျာႏ) ၃။ ပျောႏလွဉ်ꩻတဝ်း ထာꩻဗေင်ႏ (ဗေင်ႏတွီꩻမွိုင်းတဝ်းထာꩻ) ၄။ ပျောႏလွဉ်ꩻတဝ်း သွꩻပေႏ (လယ်ႏလွင်ꩻမွိုင်းတဝ်းထာꩻ) ၅။ ထိန်ꩻဒျာႏဣန္ဒြေႏ (ပျောႏလွဉ်ꩻတဝ်း အာႏရွုံႏ) ၆။ အံႏတမွိုꩻတမာꩻ (ချင်းဒျာႏ အအံႏ-အအွꩻ) ၇။ နွို့မာꩻတရေင်တဝ်း သံဃာႏတန်သီးဆဲင်ႏရာꩻထာꩻမာꩻ၊ သေက္ခပုဂ္ဂိုလ်ႏဖုံႏနဝ်ꩻ ယိုနွုတ်ꩻပါꩻ တပါꩻပါꩻကို ပေါႏအဝ်ႏလွောက်ꩻနာႏလွဉ်ꩻနဝ်ꩻ ဆွုတ်ယွုတ်အဲဉ်ထဝ်း၊ အဝ်ႏအတိုꩻတက်လွုမ်ꩻနဝ်ꩻသွူ။ အဝ်ႏအတိုꩻတက်လွုမ်ꩻ ကရိုꩻနဝ်ꩻ အဝ်ႏသောႏတာႏပန်ႏနဝ်ꩻ ထွာသကဒါႏဂါမ်ႏ၊ အဝ်ႏသကဒါႏဂါမ်ႏနဝ်ꩻ ထွာအနာႏဂါမ်ႏ၊ အဝ်ႏအနာႏဂါမ်ႏနဝ်ꩻ ထွာရဟန္တာႏ၊ တိုꩻတက်ကီကီထင်ႏနုဲင်းနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ သတ္တကနိပါတ်၊ ပဌမ ပရိဟာနိသုတ်)[၁][၂]