သဲ့ꩻသွမ်ꩻအံႏဖြာႏသေခိန်ႏခါႏ
"ပေါတလိယသုတ် (သဲ့ꩻသွမ်ꩻအံႏဖြာႏ သေခိန်ႏခါႏ၊ ဟောဝ်ငါႏယိန်းယံကျ)" အွိုးခꩻတလဲင်ႏ 'ပေါတလိယပရိဗိုဇ်'နဝ်ꩻ ဖျော်လွဉ်နီဗွေႏဘုရာꩻထျꩻ၊ သꩻရေꩻနစ်သက် စွော့ꩻတက်ထွူခါ အုံလင်ꩻချာ ကသင်ꩻရာꩻခင်ႏလမ်း တထွောင်းကို၊ နီဗွေႏဘုရာꩻရိုꩻ- "ပေါတလိယဟွေး- လောကကိုယို လိုꩻအဝ်ႏလစ်ꩻမျိုꩻ၊ လစ်ꩻမျိုꩻကရိုꩻနဝ်ꩻ- ၁။ အဝဏ္ဏံ ဘာသိတာ ဘူတံ ကာလေန၊ နော စ ဝဏ္ဏံ- လောကကိုယို လိုꩻယင်ဟန်ႏနဝ်ꩻ အခိန်ႏအခါႏတွိုႏတဲင် အမွေးအမဲဉ်ႏအတွိုင်ꩻ ကလိုႏသဲ့ꩻသွမ်ꩻပါꩻနဝ်ꩻ သဲ့ꩻသွမ်ꩻ၊ တွိုႏကလိုႏအံႏဖြာႏပါꩻနဝ်ꩻ သမ်းတအံႏဖြာႏတဝ်း၊ နဝ်ꩻနဝ်ꩻ လိုꩻတမျိုꩻ။ ၂။ ဝဏ္ဏံ ဘာသိတာ ဘူတံ ကာလေန၊ နော စ အဝဏ္ဏံ- လောကကိုယို လိုꩻယင်ဟန်ႏနဝ်ꩻ အခိန်ႏအခါႏတွိုႏတဲင် အမွေးအမဲဉ်ႏအတွိုင်ꩻ ကလိုႏအံႏဖြာႏပါꩻနဝ်ꩻ အံႏဖြာႏ၊ တွိုႏကလိုႏသဲ့ꩻသွမ်ꩻပါꩻနဝ်ꩻ သမ်းသဲ့ꩻသွမ်ꩻတဝ်း၊ နဝ်ꩻနဝ်ꩻ လိုꩻတမျိုꩻ။ ၃။ နေဝ အဝဏ္ဏံ ဘာသိတာ ဘူတံ ကာလေန၊ နော စ ဝဏ္ဏံ- လောကကိုယို လိုꩻယင်ဟန်ႏနဝ်ꩻ အခိန်ႏအခါႏတွိုႏတဲင် အမွေးအမဲဉ်ႏအတွိုင်ꩻ ကလိုႏသဲ့ꩻသွမ်ꩻပါꩻနဝ်ꩻ တသဲ့ꩻသွမ်ꩻတဝ်း၊ ကလိုႏအံႏဖြာႏပါꩻနဝ်ꩻတဲ့ တအံႏဖြာႏတဝ်း၊ နဝ်ꩻနဝ်ꩻ လိုꩻတမျိုꩻ။ ၄။ အဝဏ္ဏံ စ ဘာသိတာ ဘူတံ ကာလေန၊ ဝဏ္ဏံ စ ဘာသိတာ- လောကကိုယို လိုꩻယင်ဟန်ႏနဝ်ꩻ အခိန်ႏအခါႏတွိုႏတဲင် အမွေးအမဲဉ်ႏအတွိုင်ꩻ ကလိုႏသဲ့ꩻသွမ်ꩻပါꩻနဝ်ꩻ သဲ့ꩻသွမ်ꩻ၊ ကလိုႏအံႏဖြာႏပါꩻနဝ်ꩻတဲ့ အံႏဖြာႏစွဉ်ႏ၊ နဝ်ꩻနဝ်ꩻ လိုꩻတမျိုꩻ၊ လောကကိုယို လိုꩻ(ပုဂ္ဂိုလ်ႏ)အဝ်ႏလစ်ꩻမျိုꩻနုဲင်းနောဝ်ꩻသွူ။ ပေါတလိယဟွေး- ပုဂ္ဂိုလ်ႏလစ်ꩻမျိုꩻ-လိုꩻလစ်ꩻစားကိုနဝ်ꩻ ပုဂ္ဂိုလ်ႏအဖြာꩻမုဲင်ꩻနဝ်ꩻ ယိန်းယံ၊ လိုꩻအမျိုꩻနုဲင်းမုဲင်ꩻနဝ်ꩻ ယိန်းကျ၊ နာꩻနစ်သက်အဖြာꩻမုဲင်ꩻ၊ နာꩻထာꩻယူႏ အဝ်ႏနုဲင်းမုဲင်ꩻ"။ "ဩဗွေႏ ဂေါတမဗွေႏဩ- 'ကလိုႏသဲ့ꩻသွမ်ꩻပါꩻနဝ်ꩻတဲ့ တသဲ့ꩻသွမ်ꩻတဝ်း၊ ကလိုႏအံႏဖြာႏပါꩻနဝ်ꩻတဲ့ တအံႏဖြာႏတဝ်း' လိုꩻနဝ်ꩻတမျိုꩻနဝ်ꩻ ယိန်းယံ ယိန်းကျ၊ ခွေသွဉ်းနစ်သက်၊ ကွပ်ပွိုးထမုဲင်ꩻနဲတဲ့ 'အုံတေ့ꩻတေ့ꩻထာꩻနဝ်ꩻ အဟောဝ်သွတ်ꩻ'ခွေသွဉ်းယူႏနုဲင်းနဝ်ꩻဗွေႏဩ။ ပေါတလိယဟွေး- 'ကလိုႏသဲ့ꩻသွမ်ꩻတဲ့ သဲ့ꩻသွမ်ꩻစွဉ်ႏ၊ ကလိုႏအံႏဖြာႏတဲ့ အံႏဖြာႏစွဉ်ႏ'နဝ်ꩻ ယိန်းယံ ယိန်းကျ၊ ကွပ်ပွိုးတမုဲင်ꩻနဲတဲင် 'သေအခိန်ႏခါႏ-သေနာႏကလိုႏ'နဝ်ꩻ ယိန်းယံ ယိန်းကျနောဝ်ꩻသွူ"။ နီဗွေႏဘုရာꩻ ကထင်ႏသျင်ꩻနယ်နုဲင်းနဝ်ꩻတဲင် ပေါတလိယတဲ့ သꩻရေꩻ၊ ခံႏထူႏလွေꩻပါစွဉ်ႏ ဗုဒ္ဓဘာႏသာႏ ဥပါႏသကာႏတဖြာꩻနေႏနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ စတုက္ကနိပါတ်၊ ပေါတလိယသုတ်)[၁][၂]