ဟော်ꩻတရာꩻအာအနယ်ꩻထွာ
ဟော်ꩻတရာꩻထွာ အနယ်ꩻအာ လွေꩻငါဖျင် "ဟော်ꩻတရာꩻထွာ အနယ်ꩻအာ"၊ "ဟော်ꩻတရာꩻထွာ အနယ်ꩻအာ"တဲ့။ နဝ်ꩻမꩻ ခွေသွဉ်းကသဲင်ꩻဗွောင်စ လိတ်သွဉ်တွိုက် ဇဝနာရာမသီႏသဲင်ႏ တယ်ႏနေင်ႏ ၁၃၃၂-ဗာႏ၊ သဲင်ꩻဗွောင်လိတ်သွဉ်တွိုက်တဲ့ အဝ်ႏအွိုးလိတ်သွဉ်တွိုက်ဘဝ သဲင်ꩻဗွောင်လိတ်သွဉ်တွိုက်တဲင်တွော့ꩻ သဲင်ꩻမော့ꩻရီးရီးဗာႏစွဉ်ႏထမုဲင်ꩻတဲ "ဟော်ꩻတရာꩻကိစ္စ"၊ သဲင်ꩻတလူႏဗာႏသွူးစွဉ်ႏနဝ်ꩻ။ အတွင်ꩻမော့ꩻနဝ်ꩻနဝ်ꩻ တရာꩻဦꩻပအိုဝ်ႏတဲ့ အဲဉ်ထဝ်း၊ ယပ်ꩻနမ်းဆျာꩻထီပအိုဝ်ႏတဲ့ အဲဉ်ထဝ်း၊ နဝ်ꩻမꩻ ခွေသွဉ်း တရာꩻဦꩻပအိုဝ်ႏတဲ့ ကျမ်ႏတဲမ်းဗာႏဒျာႏ၊ ယပ်ꩻနမ်းဆျာꩻထီပအိုဝ်ႏတဲ့ ကျမ်ႏမာꩻဗာႏဒျာႏ၊ တရာꩻဟော်ꩻပအိုဝ်ႏတဲ့ မွေးတစိꩻ၊ မွေးတဝ်းတစိꩻတွော့ꩻ ကျမ်ႏဟော်ꩻဗာႏဒျာႏ၊ တယ်ႏစအွိုးနဝ်ꩻ၊ တယ်ႏစစွဉ်ႏ သက်တောႏ(၃၀)၊ ယိုခါ(၇၂)နေင်ႏပေါင်ꩻအနေႏနဝ်ꩻ (၄၂)နေင်ႏလဲဉ်းသွူ။ ကွပ်ပွိုးနဝ်ꩻမꩻတဲင် နေင်ႏပေါင်ꩻ(၄၂)အကို ခွေသွဉ်းကမော့ꩻလွဉ်ဗာႏ၊ ကတလူႏလွဉ်ဗာႏ အယပ်ꩻအခုဲင်ႏဖုံႏ၊ အဆင်ႏပြေႏရာꩻဖုံႏနဝ်ꩻ ဟန်ႏသနီꩻယို ခွေသွဉ်းလူႏတေား နီဗွေႏသီးဖုံႏသွူ။ ကွပ်ပွိုးနဝ်ꩻမꩻတဲင်တွော့ꩻ (၄၂)နေင်ႏအကို ခွေသွဉ်းကမော့ꩻလွဉ်၊ ခွေသွဉ်းကတလူႏလွဉ်ဗာႏ အယပ်ꩻအခုဲင်ႏတွမ်ႏ အဆင်ႏကပြေႏဖုံႏ ဟော်ꩻတရာꩻနယ်ꩻနဝ်ꩻ- ခွေသွဉ်းတိန်ႏယူႏချာတွော့ꩻ ထွာ(၉)မျိုꩻနုဲင်းယိုသွူ။ အမုဲင်(၁)"ဟော်ꩻတရာꩻနယ်ꩻ"၊ "ရွစ်ပါဠိ၊ ဖေႏအနက်၊ ခြုဲင်းအဓိပ္ပါယ်ႏ၊ ဟော်ꩻတရာꩻ"။ နဝ်ꩻမꩻတဲင်တွော့ꩻ နီဗွေႏသီး သွဉ်တန်ꩻတာႏ နီဗွေႏစင်ꩻတန် "ဗွေႏစန္ဒာဝရ"ကတဲမ်းဒါႏလိတ်အုပ် နီဗွေႏသီးထွားမွိုင်ႏ၊ လိတ်မဲ့ငါ(၇၈)၊ လိတ်မဲ့ငါ(၇၈)ဒါႏနအချုက်၊ "ရွစ်ပါဠိ"တဲ့။ ရွစ်ပါဠိယိုနဝ်ꩻ- (က) ရွစ်ရိုꩻရိုꩻ ထွို့ꩻတဝ်းငဝ်းတဲ့အဝ်ႏ၊ (ခ) နဝ်ꩻမꩻတဲင် ထွို့ꩻပသာႏသာႏ၊ နာႏဖေႏနေးကဟဝ်နုဲင်းနဝ်ꩻတဲ့အဝ်ႏ၊ (ဂ) ထွို့ꩻဆွာꩻလွဉ်ꩻငဝ်း နုဲင်းစွဉ်ႏငဝ်းသချင်ꩻပုံႏနဝ်ꩻတဲ့အဝ်ႏ။ နဝ်ꩻသွံမျိုꩻနဝ်ꩻ ဆရာႏတောႏတန်သီးဖုံႏနဝ်ꩻ သုံꩻအနယ်ꩻ(၁)ဗာႏ ရွစ်ရိုꩻရိုꩻ- ဒါနံ သဂ္ဂဿ သောပါနံ၊ ဒါနံ ပါထေယျ မုတ္တမံ။ ဒါနံ ဥဇုဂတံ မဂ္ဂံ၊ ဒါနံ မောက္ခပဒံ ဝရံ။ ရွစ်ရိုꩻရိုꩻနုဲင်းနဝ်ꩻတဲ့အဝ်ႏ၊ နဝ်ꩻမꩻတဲင် ဗွေႏဆရာႏတောႏသီးဖုံႏနဝ်ꩻ ရွစ်ရိုꩻရိုꩻနုဲင်းနဝ်ꩻ၊ ကွပ်ပွိုးနဝ်ꩻမꩻ နီဗွေႏသီး နေးတွမ်ႏတရာꩻယိုတွော့ꩻ ပူႏဇောႏဘုရာꩻတဲ့ ဖေႏကမွေးတွော့ꩻ ရွစ်ရိုꩻရိုꩻစံꩻမွိုင်၊ ဖတ်ရိုꩻရိုꩻစံꩻမွိုင်(ဗွေႏသံဃာႏတောႏသီး ရွစ်သွိုလို့ဝင်ꩻ-၁လဲင်ႏ)၊ နဝ်ꩻနဝ်ꩻ ရွစ်ရိုꩻရိုꩻ၊ နဝ်ꩻနဝ်ꩻအမုဲင်(၁)။ နဝ်ꩻမꩻတဲင် "ရွစ်ထွို့ꩻပသာႏသာႏငဝ်းတဲ့အဝ်ႏ"တဲ့၊ နဝ်ꩻမꩻတဲင် ဝင်ꩻကသုံꩻအာနဝ်ꩻ ရဟန်ꩻပေႏ၊ ရဟန်ꩻဆားဖုံႏ လဲင်ႏခါ ကရိုꩻတနယ်ႏထွူတနယ်ႏ၊ တဝေင်ꩻလွေꩻ တဝေင်ꩻအုံ၊ တဒုံနွို့တဒုံထန်ႏ ဝွေꩻဗွေႏသီးကဟော်ꩻနဝ်ꩻ အသုံꩻအာအမုဲင်(ခ) ထွို့ꩻပသာႏသာႏငဝ်းနဝ်ꩻသနယ်။ နဝ်ꩻမꩻတဲင်တွော့ꩻ နီဗွေႏသီးတဲ့ ထင်ႏသွဉ်တန်ꩻကရိုꩻနဝ်ꩻနဝ်ꩻ အဝ်ႏအွိုးယိုမဉ်ႏသဲင်ꩻနဝ်ꩻ ဟော်ꩻတရာꩻဖေႏနေးကဒါႏ ခွေသွဉ်းကဒါႏသမျပေႏတဲ့ ခွေသွဉ်းသွဉ်ဖေႏ နီဗွေႏသီး၊ "ထွို့ꩻပသာႏသာႏငဝ်းကရိုꩻ"နုဲင်းမုဲင်ꩻတွော့ꩻ (ဗွေႏဆရာႏတောႏနမ်း ထွို့ꩻနယ်)၊ နာႏစဲင်းစဲင်းသွော့၊ (ထွို့ꩻနယ်ယင်း ၂-လဲင်ႏ)။ နီဗွေႏသီး ကဒါႏလဲဉ်းသားတဲး မွေးဒျာႏ၊ တဒါႏတဝ်းသား ဖေႏနေးကဒါႏတွော့ꩻ ရွစ်လွဉ်ꩻခွေသွဉ်းတလဲင်ႏမွိုင်၊ (သွဉ်ရွစ်ထွို့ꩻနယ်ဖေႏ၊ သံဃာႏရွစ်လွဉ်ꩻ ၃-လဲင်ႏ)။ ကဉ်းရွစ်စံꩻ (၃)လဲင်ႏမွိုင်၊ (သံဃာႏရွစ် ၁-လဲင်ႏ)၊ အွိုးအဆုဲင်ꩻသွတ်ꩻ "ဒါနံ"၊ ဒါနံ-အွဉ်ႏလင်ꩻငဝ်းတွော့ꩻ "ဒါနံ မောက္ခပဒံ ဝရံ"၊ ရွစ်ယင်းတလဲင်ႏမွိုင်၊ (သံဃာႏရွစ်ယင်းတလဲင်ႏ)၊ အူးဒူ ယံမွေးစွဉ်ႏထာꩻ၊ ရွစ်ယင်းတလဲင်ႏဟုဲင်း၊ (သံဃာႏရွစ်ယင်းတလဲင်ႏ)၊ အူး ဒူဒူ ယံနုဲင်းလဲဉ်းနဝ်ꩻနောႏ။ အမုဲင်(၂) "ဟော်ꩻတရာꩻနယ်ꩻ" နဝ်ꩻမꩻတဲင်တွော့ꩻ ထွားအမုဲင်(၂) "ရွစ်ပါဠိလွုမ်ꩻ၊ ဖေႏတဝ်းအနက်၊ ခြုဲင်းအဓိပ္ပါယ်ႏ၊ ဟော်ꩻတရာꩻ"။ မဉ်ႏဒေါ့ꩻခꩻတနယ်ꩻနဝ်ꩻ ပါဠိတွမ်ႏအဓိပ္ပါယ်ႏနဝ်ꩻ အွဉ်ႏတွယ်ꩻဝင်ꩻတွော့ꩻ ဟော်ꩻတရာꩻ။ နဝ်ꩻမꩻ ထွားယင်းဗော့ꩻယို၊ "ရွစ်ပါဠိလွုမ်ꩻ"တဲ့၊ နီဗွေႏသီး တဲမ်းသေꩻခါꩻဟုဲင်း၊ "ဒါနံ သဂ္ဂဿ သောပါနံ"အဓိပ္ပါယ်ႏအချုက်နဝ်ꩻ- "ဒါႏနနဝ်ꩻ ထွာလူꩻခမ်းတဒေါင်"၊ ရွစ်ပါဠိ "ဒါနံ သဂ္ဂဿ သောပါနံ"၊ အဝ်ႏနဝ်ꩻတွော့ꩻ အဓိပ္ပါယ်ႏအချုက်နဝ်ꩻ- "ဒါႏနနဝ်ꩻ ထွာလူꩻခမ်းတဒေါင်"။ နဝ်ꩻတွော့ꩻ "ဒါနံ ပါထေယျ မုတ္တမံ-ဒါႏနနဝ်ꩻ ထွာစရိပ်ဟဝ်"၊ ဥတ္တမံ-နဝ်ꩻ "မျတ်"ကရိုꩻနဝ်ꩻ စရိပ်မျန်နုဲင်းနဝ်ꩻစား မဲ့ꩻသေနာႏတဝ်းတွော့ꩻ ထွာစရိပ်ဟဝ်၊ နဝ်ꩻမꩻ အမုဲင်(၃) "ဒါနံ ဥဇုဂတံ မဂ္ဂံ-ဒါႏနနဝ်ꩻ ထွာတဖူꩻစွဉ်ႏ"၊ ဒါႏနနဝ်ꩻ ထွာတဖူꩻစွဉ်ႏ။ နဝ်ꩻမꩻ အမုဲင်(၄)နဝ်ꩻ "ဒါနံ မောက္ခပဒံ ဝရံ-ဒါႏနနဝ်ꩻ လꩻယိုꩻအီနိဗ္ဗာန်ႏ"၊ ဒါႏနနဝ်ꩻ လꩻယိုꩻအီနိဗ္ဗာန်ႏ။ နဝ်ꩻထွူတွော့ꩻ အမုဲင်(၂)အလꩻ "ဖေႏတဝ်းအနက်"တဲ့၊ ထူႏပါဠိ ဒေါ့ꩻအဓိပ္ပါယ်ႏ၊ ပါဠိတွမ်ႏအဓိပ္ပါယ်ႏ အွဉ်ႏတွယ်ꩻဝင်ꩻတဲ့၊ နီဗွေႏသီးကတဲမ်းခါꩻအတွိုင်ꩻနဝ်ꩻ ဖတ်နယ်ချာမွိုင်၊ ဒါနံ သဂ္ဂဿ သောပါနံ(ဗွေႏဆရာႏရွစ်နယ်ရီး၊ သံဃာႏသီး ရွစ်နယ်ချာ တယ်ႏအထျꩻ)၊ အွိုနဝ်ꩻ ယံတန်မွေးနေ?။ အမုဲင်(၃) "ဟော်ꩻတရာꩻနယ်ꩻ"။ နဝ်ꩻမꩻတဲင် အမုဲင်(၃) "ပါဠိရွစ်တဝ်းတဲ့၊ အနက်ဖေႏတဝ်း၊ ထူႏအဓိပ္ပါယ်ႏခြေင်ခြေင် ဟော်ꩻတရာꩻ"။ ထူႏအဓိပ္ပါယ်ႏခြေင်ခြေင် နဝ်ꩻဟွဉ်ႏနဝ်ꩻ၊ ပါဠိရွစ်တဝ်း၊ အနက်ဖေႏတဝ်း၊ ထူႏအဓိပ္ပါယ်ႏခြေင်ခြေင်။ = ဒါႏနနဝ်ꩻ ထွာလူꩻခမ်းတဒေါင်။ = ဒါႏနနဝ်ꩻ ထွာစရိပ်ဟောဝ်။ = ဒါႏနနဝ်ꩻ ထွာတဖူꩻစွဉ်ႏ။ = ဒါႏနနဝ်ꩻ လꩻယိုꩻအီနိဗ္ဗာန်ႏ။ "ဒါႏနနဝ်ꩻ ထွာလူꩻခမ်းတဒေါင်"နဝ်ꩻ နီဗွေႏသီး အဝ်ႏလိုႏထေဖေႏ ဥပမာႏ၊ ဥပမာႏ- အဝ်ႏအွိုးလ မဉ်ႏထင်ႏကီနဝ်ꩻ တဒေါင်ပါတဝ်း လꩻတဝ်း၊ ထင်ႏဗာႏနေးတွမ်ႏတဒေါင်မꩻ၊ အဝ်ႏနဝ်ꩻထွူနဝ်ꩻမꩻတွော့ꩻ ယိုတဲ့နုဲင်းနဝ်ꩻနေနေ၊ လူꩻခမ်းနဝ်ꩻ အဝ်ႏကီ၊ နိဗ္ဗာန်ႏခမ်းနဝ်ꩻ ထိုလဲဉ်းကလောကနဝ်ꩻက၊ အဝ်ႏအွိုးလ အီႏထင်ႏကီဗာႏ၊ ကွပ်ပွိုးနဝ်ꩻမꩻတဲင် ဒါႏနယိုနဝ်ꩻ တွမ်ႏတဒေါင်ပီဝင်ꩻ၊ ထင်ႏကီအီနုဲင်းနဝ်ꩻ။ နဝ်ꩻမꩻတဲင်တွော့ꩻ "ဒါႏနနဝ်ꩻ ထွာစရိပ်ဟဝ်"၊ လိုꩻလွေꩻတဖသူꩻညာꩻယို နီသွဉ်းသီးနဝ်ꩻ အဝ်ႏယိုကို အီႏလွေꩻနိဗ္ဗာန်ႏနဝ်ꩻက၊ နဝ်ꩻမꩻ ဗော့ꩻလိုꩻလွေꩻတဖူꩻညာꩻတဲ့ အဝ်ႏလိုႏစရိပ်က၊ နဝ်ꩻမꩻ စရိပ်တဲ့ စရိပ်ဟဝ်အဝ်ႏ၊ စရိပ်ညမ်းအဝ်ႏ၊ "စရိပ်ညမ်း"ကရိုꩻနဝ်ꩻနုဲင်းမုဲင်ꩻတွော့ꩻ တကွို့ꩻအီတဝ်း၊ တထွာအီတဝ်းအာႏ၊ တထွာအီတဝ်းရဲင်ꩻ၊ နဝ်ꩻနဝ်ꩻ စရိပ်ညမ်းနဝ်ꩻသနဲ့။ "စရိပ်ဟဝ်"ကရိုꩻနဝ်ꩻ နုဲင်းဒဲဉ်အွီႏ၊ ဟန်ႏဟဝ်ဖုံႏနဝ်ꩻ ထွာအီအာႏ၊ ထွာအီရဲင်ꩻနုဲင်းနဝ်ꩻစားဖုံႏ၊ ကွပ်ပွိုးနဝ်ꩻမꩻတဲင် "ဒါႏနယိုနဝ်ꩻ ထွာအီစရိပ်ဟဝ်"ဥပမာႏနေးနဝ်ꩻ၊ ဥပမာႏအလောင်ႏအလင် မဉ်ႏအဝ်ႏတဲ့ နီဗွေႏသီး ဥပမာႏထဲင်းထဲင်းနဝ်ꩻသနယ်၊ ယိုနဝ်ꩻ အွဉ်ႏဒေါ့ꩻလေႏကွို့ꩻ ဟော်ꩻဖေႏနေးကဒါႏတွော့ꩻ အခရာႏအဲဉ်ႏအဲဉ်ႏပေႏလွုမ်ꩻ။ နဝ်ꩻမꩻတဲင် "ဒါႏနနဝ်ꩻ ထွာတဖူꩻစွဉ်ႏ"တဲ့၊ နဝ်ꩻမꩻ လွေꩻထာꩻဖေႏနေးကတွိုႏလွေꩻ အရပ်တရပ်၊ ဖေႏနေးကတွိုႏလွေꩻ အထွောင်းတထွောင်းနဝ်ꩻ လွေꩻတဖူꩻကဲင်ႏတွမ်ႏ လွေꩻတဖူꩻစွဉ်ႏနဝ်ꩻ ခꩻမုဲင်ꩻတွိုႏရီး?၊ ခꩻမုဲင်ꩻယိုꩻ? ခမုဲင်ꩻသာႏ?မဉ်ႏရိုꩻနဝ်ꩻ လွေꩻတဖူꩻစွဉ်ႏနဝ်ꩻ တွိုႏရီး၊ လွေꩻတဖူꩻစွဉ်ႏနဝ်ꩻ ယိုꩻ၊ လွေꩻတဖူꩻစွဉ်ႏနဝ်ꩻ သာႏ-စတဲင် ဥပမာႏစားနဝ်ꩻစားတဲ့ ဖေႏသွော့။ နဝ်ꩻမꩻတဲင် "ဒါနံ မောက္ခပဒံ ဝရံ"နဝ်ꩻ လꩻယိုꩻအီနိဗ္ဗာန်ႏ၊ "လꩻယိုꩻအီနိဗ္ဗာန်ႏ"ကရိုꩻနဝ်ꩻ နုဲင်းမုဲင်ꩻ? နီဗွေႏသီးစဉ်ꩻစာꩻစံꩻ၊ "ဒါနတော ဘောဂဝါ-ပေါႏလူႏတန်ꩻထာꩻတဲ့ မဉ်ႏလꩻနိဗ္ဗာန်ႏတဲ့လꩻ၊ မဉ်ႏလꩻတဝ်းနိဗ္ဗာန်ႏတဲ့ ဘဝမုဲင်ꩻတရိုꩻတဝ်း၊ စိုးမုဲင်ꩻတရိုꩻတဝ်း အံႏတာႏတဲ့ခွꩻ၊ အွꩻတာႏတဲ့လုမ်းနဝ်။ လိုꩻသီးယို သဲစ်ကအဲ့ꩻမဲ့တွော့ꩻ ယောက်ꩻယောက်ꩻယဲက်ꩻယဲက်ꩻ၊ သောက်ꩻသောက်ꩻသဲက်ꩻသဲက်ꩻ ကလွေꩻနဝ်လွေꩻထင်ꩻဗာႏနဝ်ꩻ၊ ယူးတဲ့နဝ်ꩻ၊ ဝါးတဲ့နဝ်ꩻ ပေါႏထာꩻလေသွူတဲင်တွော့ꩻ ကျောင်ႏချာကျောင်ႏငါ၊ လွေꩻချာလွေꩻငါနဝ်ꩻ အမာꩻထမုဲင်ꩻ? ဟို့ꩻဆာႏ၊ လိုꩻသီးတဲ့ သောက်ꩻသောက်ꩻသဲက်ꩻသဲက်ꩻ၊ ယောက်ꩻယောက်ꩻယဲက်ꩻယဲက်ꩻ ကလွေꩻငါလွေꩻချာဗာႏထာꩻနဝ်ꩻ ထမုဲင်ꩻ? ပွိုးဟို့ꩻဆာႏ၊ အံႏတာႏအွꩻတာႏ။ ကွပ်ပွိုးနဝ်ꩻမꩻတဲင်တွော့ꩻ လိုꩻတဖြာꩻတဖြာꩻယို ဒါႏနမဉ်ႏပါလွဉ်၊ ဇာတ်ရီးပွန်အွဉ် မွေးနေႏ? ဒါႏနမဉ်ႏပါလွဉ်နဝ်ꩻ ထုမ်ႏရွဉ်တဲ့ လꩻယိုꩻလဲဉ်းဝင်ꩻ။ = စိုးရီးပန်အွဉ်၊ မဉ်ႏလူႏလွဉ်၊ ထုမ်ႏရွဉ်ယိုꩻလဲဉ်းဝင်ꩻ။ နဝ်ꩻတွော့ꩻ လိုꩻယို စူအဝ်ႏနုဲင်းနုဲင်းဝင်ꩻ၊ ခင်ႏအဝ်ႏနုဲင်းနုဲင်းဝင်ꩻ၊ ထုမ်ႏရွဉ်နုဲင်းနုဲင်းဝင်ꩻ ယဟန်ႏသား မွော့လꩻအာ၊ ယဟန်ႏသားလꩻဆေ့ꩻ ပွိုးတမုဲင်ꩻဟောင်း? နဝ်ꩻ ကွပ်စွဉ်ႏဒျာႏ အဒါႏန ပါ/ပါတဝ်းနဝ်ꩻ အကွာႏနုဲင်းနဝ်ꩻ-စတဲင်စားနဝ်ꩻဖုံႏ နီဗွေႏသီး ဟော်ꩻလုဲင်းလုဲင်း၊ ခြုဲင်းစွုမ်ႏစွုမ်ႏသွော့။ လိုꩻတဖြာꩻယို ဗော့ꩻဒဲဉ်အံႏလုမ်း၊ ဗော့ꩻအခြွေဗော့ꩻအခြာႏ၊ ဗော့ꩻအချမ်ꩻသာႏနဝ်ꩻ ဒါႏနတဲ့ ကမ်းသꩻမာꩻလꩻဒျာႏ၊ သီႏလတဲ့ ကမ်းသꩻဆောက်တယ်ႏ ဆောက်တယ်ႏနွောင်ꩻဒျာႏ၊ ဘာႏဝနာႏတရာꩻတဲ့ မဉ်အုံတလာနဲ့၊ နီလာနဲ့၊ တနေင်ႏနဲ့ နန်းခရာႏတလိုႏတဝ်း အုံနွောင်ꩻဒျာႏ၊ ဗော့ꩻမာꩻနွောင်ꩻဟဝ်ဟဝ်ဒါႏန၊ ဗော့ꩻမာꩻနွောင်ꩻဟဝ်ဟဝ် သီႏလ၊ ဗော့ꩻမာꩻနွောင်ꩻဟဝ်ဟဝ်ဘာႏဝနာႏနဝ်ꩻ၊ နဝ်ꩻနဝ်ꩻတဖြာꩻ။ ပါꩻတဖြာꩻနဝ်ꩻ ဒါႏနတဲးတဲးဝါးဝါးတဲ့ လူႏဗာႏတဝ်း၊ နဝ်ꩻမꩻတဲင် သီႏလတဲးတဲးဝါးဝါးတဲ့ အီႏဆောက်တယ်ႏတဲ့ အခိန်ႏအဲဉ်ထဝ်း၊ ဘာႏဝနာႏတရာꩻ-ကရိုꩻနဝ်ꩻတဲ့ တန်ꩻတဝ်း၊ ပါꩻတဖြာꩻနဝ်ꩻ မာꩻတဲးတဲးဝါးဝါးဗာႏ၊ တွမ်ႏပါꩻတဖြာꩻနဝ်ꩻ တမာꩻတဲးတဲးဝါးဝါးတဝ်း၊ ဝွေꩻသီးဝင်ꩻနီနဝ်ꩻ ခꩻမုဲင်ꩻအီႏလꩻယိုꩻနိဗ္ဗာန်ႏ? ခဉ်ႏထွားစံꩻနဝ်ꩻ၊ ပါꩻကမာꩻတဲးတဲးဝါးဝါးဗာႏနဝ်ꩻ လꩻယိုꩻနိဗ္ဗာန်ႏ။ ကမာꩻတဲးတဲးဝါးဝါးဗာႏ အထျꩻအထောင်ꩻ၊ အမောင်ꩻအွိုးအမော့ꩻနဝ်ꩻ ထမုဲင်ꩻအဝ်ႏ? ဒါႏနအဝ်ႏ။ = ဒါႏနပန်အွဉ်၊ ကွပ်ပါလွဉ်၊ ထုမ်ႏရွဉ်လꩻလွိုဝင်ꩻ။ တဲမ်းသေꩻခါꩻနဝ်ꩻတငွါ "ဒါႏနပန်အွဉ်၊ ကွပ်ပါလွဉ်၊ ထုမ်ႏရွဉ်လꩻလွိုဝင်ꩻ"(ဗွေႏဆရာႏရွစ်နယ် နီလဲင်ႏ)၊ ရွစ်စံꩻတလဲင်ႏမွိုင် (သံႏဃာႏရွစ် ၁-လဲင်ႏ)၊ နဝ်ꩻနဝ်ꩻ ဒါနံ၊ ယိုနဝ်ꩻ ဟော်ꩻဒါႏနခရာႏက၊ ကွပ်ပွိုးနဝ်ꩻမꩻ အွဉ်ႏလွောက်ꩻတွမ်ႏ ဒါႏနနဝ်ꩻ။ အမုဲင်(၄) "ဟော်ꩻတရာꩻနယ်ꩻ" နဝ်ꩻမꩻတဲင်တွော့ꩻ အမုဲင်(၄) "ပါဠိ၊ အဓိပ္ပါယ်ႏနဝ်ꩻ စန်ႏနေးလင်္ကာႏ ခြုဲင်းအဓိပ္ပါယ်ႏ ဟော်ꩻတရာꩻ"တဲ့။ နဝ်ꩻ ထွားချာဗော့ꩻ သွဉ်တန်ꩻနီဗွေႏစန္ဒာဝရက တဲမ်းနဝ်ꩻမွိုင်၊ ယိုနဝ်ꩻ စန်ႏနေးလင်္ကာႏတဲင် ဟော်ꩻတရာꩻ၊ "ဒါနံ သဂ္ဂဿ သောပါနံ"နဝ်ꩻ ဝွေꩻဗွေႏစန်ႏနုဲင်းမုဲင်ꩻ? = ဒါႏနလူႏငါ၊ ပီဗွန်ထွာ၊ ခင်ႏကာတဒေါင်သွူ။ နဝ်ꩻလင်္ကာႏ- = "ဒါနံ ပါထေယျ မုတ္တမံ"နဝ်ꩻ- ဒါႏနလူႏဗာႏ၊ ပီဗွန်ငါႏ၊ ရိက္ခာႏဒဲဉ်လွမ်ꩻသွူ။ နဝ်ꩻမꩻတဲင် "ဒါနံ ဥဇုဂတံ မဂ္ဂံ"နဝ်ꩻ ပါဠိတဲ့ ရွစ်တဝ်း၊ အနက်တဲ့ ဖေႏတဝ်း၊ စန်ႏနေးအလင်္ကာႏနဝ်ꩻ။ = ဒါႏနထွာမဲဉ်ႏ၊ တဖူꩻစွဉ်ႏ၊ တွိုႏစွဉ်ႏခမ်းဟဝ်သွူ။ ခွေသွဉ်းဥယျောဇန ဩဝါဒဂါႏထာႏကိုနဝ်ꩻ "လင်္ကာႏတဖဲစ်"ကရိုꩻနဝ်ꩻပါ၊ ယိုသွူသနယ် လင်္ကာႏတဖဲစ်၊ "တဖဲစ်"နုဲင်းမုဲင်ꩻနဲးတဲင်တွော့ꩻ "မဲဉ်ႏ"တွမ်ႏ"စွဉ်ႏ"နဝ်ꩻ အမန်ႏတဗာႏနဝ်ꩻ ကာရန်တဗွန်တဝ်းလို့ဝင်ꩻ၊ အွိုးသူꩻနဝ်ꩻ "စွဉ်ႏ"ဒျာႏ၊ ယိုနဝ်ꩻ "မဲဉ်ႏ"ဒျာႏ၊ နဝ်ꩻမꩻ အွဉ်ႏအံႏနွိုင်ႏနေးနဝ်ꩻ ထွာလင်္ကာႏတဖဲစ်၊ အွဉ်ႏတဖဲစ်ဗာႏနေးလွုမ်ꩻ၊ အဓိပ္ပါယ်ႏနဝ်ꩻ သမ်းလꩻနုဲင်းယို၊ လဲ့ꩻတလွစ်တဝ်းမꩻ စန်ႏဗာႏနုဲင်းယို၊ နဝ်ꩻနဝ်ꩻ လင်္ကာႏတဖဲစ်။ = ဒါႏနထွာမဲဉ်ႏ၊ တဖူꩻစဲဉ်ႏ၊ တွိုႏရဲဉ်ႏခင်ႏလမ်းဟဝ်။ မဉ်ႏမာꩻစားနဝ်ꩻစားတဲ့ လꩻဒျာႏ၊ ကွဲႏတွော့ꩻ အဓိပ္ပါယ်ႏ သမ်းတယံတဝ်းနုဲင်းယို၊ ယိုနဝ်ꩻ "ဒါႏနထွာမဲဉ်ႏ၊ တဖူꩻစွဉ်ႏ"ထိုꩻဝင်ꩻ၊ တဖူꩻစွဉ်ႏဒျာႏနော၊ တဖူꩻမဲဉ်ႏမွေးတဝ်း၊ တဖူꩻစွဉ်ႏဒျာႏ၊ "ဥဇု-လွေꩻဗာႏစွဉ်ႏစွဉ်ႏနဝ်ꩻ ဂတ၊ လွေꩻဗာႏစွဉ်ႏစွဉ်ႏနဝ်ꩻ ယိုနဝ်ꩻစွဉ်ႏဒျာႏ၊ စဲဉ်ႏမွေးတဝ်းနဝ်၊ ကွပ်ပွိုးနဝ်ꩻမꩻ လင်္ကာႏယိုတဲ့ လꩻနုဲင်းယိုလွုမ်ꩻ၊ လင်္ကာႏတဖဲစ်။ နဝ်ꩻမꩻတဲင် "ဒါနံ မောက္ခပဒံ ဝရံ"နဝ်ꩻ- "ဒါႏနပင်ႏကီ၊ လꩻယိုꩻအီ၊ ဖျော်ကီနိဗ္ဗာန်ႏသွူ။" မဉ်ႏနုဲင်းအမုဲင်(၄)စန်းနေးလင်္ကာႏ၊ ခြုဲင်းအဓိပ္ပါယ်ႏနဝ်ꩻ စန်ႏလင်္ကာႏနယ်ꩻတဲ့ နီဗွေႏသီးသမ်းအဝ်ႏလိုႏသေ၊ တဲမ်းမွိုင်စန်ႏလင်္ကာႏနယ်ꩻ- အနယ်ꩻယိုအတွိုင်ꩻပေႏနဝ်ꩻသနယ်၊ အနယ်ꩻတဲး အဝ်ႏအာတန်တွော့ꩻ ယိုအတွိုင်ꩻပေႏနဝ်ꩻသနယ်။ "လစ်ꩻဖြုံႏအစ" ခွေသွဉ်း အွိုးတမုဲင်ꩻသူꩻတဲ့ပါ၊ ဥယျောဇနဂါႏထာႏကိုသူꩻတဲ့ပါ။ "လစ်ꩻဖြုံႏအစ၊ ထဝသွံငွါ" (ရွစ်နယ် ၂-လဲင်ႏ)။ "လစ်ꩻဖြုံႏအစ၊ ထဝသွံငွါ၊ အနာငတ်ꩻ-နွုတ်ꩻ"လိတ်အုပ်ယို လိတ်မဲ့ငါ(၁၂)ကိုနဝ်ꩻပါ။ "လစ်ꩻဖြုံႏအစ၊ ထဝသွံငွါ၊ အနာငတ်ꩻ-နွုတ်ꩻ" ဖတ်စံꩻဖွိုင်ꩻ-လစ်ꩻဖြုံႏအစ (သံဃာႏဖုံႏဖတ်နယ်ချာ)၊ နဝ်ꩻမꩻ ထွားယင်း ခွေသွဉ်းဩဝါဒ ဟန်ႏရဝ်ꩻနဝ်ꩻ။ အမုဲင်(၃) "ပိဋကတ်ကို၊ ပါတဝ်းယို၊ မုဲင်ꩻကိုဟော်ꩻမွုန်းနေား"။ "ပိ-ဋ-ကတ်-ကို" လစ်ꩻဖြုံႏ၊ "ပါ-တဝ်း-ယို"သွံဖြုံႏ၊ "မုဲင်ꩻ-ကို-ဟော်ꩻ-မွုန်း-နေား"ငတ်ꩻဖြုံႏ၊ နဝ် "လစ်ꩻဖြုံႏအစ၊ ထဝသွံငွါ၊ အနာငတ်ꩻ"သနယ်။ တိန်ႏတွိုႏအနာနွတ်ꩻနဝ်ꩻ ထွားအမုဲင်(၄)နဝ်ꩻဟုဲင်း၊ "ဟော်ꩻတရာꩻမား"လစ်ꩻငွါ၊ "ကေားကနာႏ"သွံငွါ၊ "ထွာဒါႏမိစ္ဆာႏဒိဋ္ဌိနေား"နွုတ်ꩻ။ ကွပ်ပွိုးနဝ်ꩻမꩻတဲင်တွော့ꩻ "လစ်ꩻဖြုံႏအစ၊ ထဝသွံငါ"အနာနဝ်ꩻ အွဉ်ႏထန်ႏ၊ အနာနဝ်ꩻ မာꩻလွေꩻငတ်ꩻလꩻဒျာႏ၊ အနာနဝ်ꩻ အွဉ်ႏနွုတ်ꩻနုဲင်းယိုတဲ့ လꩻဒျာႏ၊ ဩဝါဒငတ်ꩻပုဒ်ကိုယိုနဝ်ꩻနဝ်ꩻ အနာငတ်ꩻနဝ်ꩻနဝ်ꩻ လစ်ꩻပုဒ်၊ အနာနွုတ်ꩻနဝ်ꩻ ထွာအမုဲင်(၄)နဝ်ꩻသနယ်၊ "ထွာဒါႏ မိစ္ဆာႏဒိဋ္ဌိနေား"။ နဝ်ꩻ ဗွေႏစင်ꩻတန် စန္ဒာဝရ ကတဲမ်းတဲ့နုဲင်းနဝ်ꩻနေနေ၊ ယထွောင်းထွောင်းနဝ်ꩻ အွဉ်ႏသွတ်ꩻငတ်ꩻငွါ၊ ယထွောင်းထွောင်းတဲ့ အွဉ်ႏသွတ်ꩻနွုတ်ꩻငွါနုဲင်းနဝ်ꩻတဲ့အဝ်ႏ၊ အနယ်ꩻနဝ်ꩻသွူ။ နဝ်ꩻနဝ်ꩻ မဲ့ꩻနီဗွေႏသီး အုံထာꩻစန်ႏပဆိုးသွော့ လင်္ကာႏစန်ႏနဝ်ꩻစားနဝ်ꩻ၊ "ဟော်ꩻအီဖေႏကဒါႏ စန်ႏလင်္ကာႏ ဖေႏနေးကထွာ၊ ဟော်ꩻအီဖေႏနေးကဒါႏ စန်ႏလင်္ကာႏဖေႏကထွာ"နဝ်။ နဝ်ꩻတွော့ꩻ ဒေါ့ꩻရိုꩻရိုꩻအဓိပ္ပါယ်ႏနုဲင်းအမုဲင်(၂)နဝ်ꩻဟွဉ်ႏတရိုꩻတဝ်း၊ အမုဲင်(၃)တွော့ꩻ စန်းလင်္ကာႏတရိုꩻတဝ်းနဝ်ꩻ ထေဖေႏသွော့ ဥပမာႏ၊ ဥပမာႏတဒေါင် ဥပမာႏဗာႏနုဲင်းမုဲင်ꩻ?၊ နဝ်ꩻမꩻ နီစရိပ်-ရိက္ခာႏ ဥပမာႏဗာႏနုဲင်းမုဲင်ꩻ?။ နဝ်ꩻမꩻတဲင်တွော့ꩻ တဖူꩻစွဉ်ႏကရိုꩻနဝ်ꩻ "တဖူꩻစွဉ်ႏ"ကရိုꩻနဝ်ꩻနုဲင်းမုဲင်ꩻ?၊ နဝ်ထင်ꩻတွို့ꩻကွဉ်ႏ တဖူꩻစွဉ်ႏနဝ်ꩻသနယ်၊ တဖူꩻစွဉ်ႏတဖူꩻဟဝ်-စတဲင်စားနဝ်ꩻ "လꩻယိုꩻအီနိဗ္ဗာန်ႏ"နုဲင်းမုဲင်ꩻ?စတဲင်နဝ်ꩻဟွဉ်ႏ ခွေသွဉ်းကခြုဲင်းနယ်အတွိုင်ꩻ ဟော်ꩻသွော့နုဲင်းနဝ်ꩻ။ အမုဲင်(၅) ဟော်ꩻတရာꩻနယ်ꩻ။ နဝ်ꩻတွော့ꩻ ဟော်ꩻတရာꩻအနယ်ꩻ အမုဲင်(၅) "ခြုဲင်းလို့ဝတ္ထုတွဲꩻ ဟော်ꩻတရာꩻ"တဲ့။ ခြုဲင်းလို့ဝတ္ထုတွယ်ꩻ ဟော်ꩻတရာꩻ၊ ဥပမာႏ- အနာႏထပိဏ်ႏသဌေꩻ အပိုခိုကာဠအခန်ꩻ အွဉ်ႏဒေါ့ꩻခန်းပုံႏစံႏဟုဲင်း၊ အဝ်ႏနဝ်ꩻထွူတွော့ꩻ ဝတ္ထုနဝ်ꩻတတွယ်ꩻနဝ်ꩻ ခြုဲင်းအပိုခရာႏလွုမ်ꩻတကာႏတဝ်းတွော့ꩻ ခြုဲင်းပါစွဉ်ႏ၊ ခြုဲင်းလို့ခြုဲင်းလစွဉ်ႏ၊ နဝ် အဖါခရာႏတဲ့ပါ၊ အမွိုးခရာႏတဲ့ပါ၊ အဖါကလူႏဒါႏ ကျောင်ꩻဇေႏတဝွန်ႏနဝ်ꩻတဲ့ အခရာႏနဝ်ꩻတဲ့ပါ-စတဲင် စားနဝ်ꩻစားဖုံႏ။ တယ်ႏအထျꩻဗꩻအနာ ကသေထွိုက်၊ ကသေသင်ꩻဒါႏ လို့လို့စင်စင်ဖုံႏနဝ်ꩻ ခြုဲင်းလွေꩻနုဲင်းနဝ်ꩻ၊ မဉ်ႏခြုဲင်းလွေꩻနုဲင်းနဝ်ꩻတဲ့ ထွာဒျာႏတရာꩻတပုဒ်နေနေ၊ ထွာဒျာႏတရꩻတပုဒ်နေနေ၊ အမုဲင်(၅)နဝ်ꩻ ခြုဲင်းလို့ဝတ္ထုတွယ်ꩻဟော်ꩻတရာꩻ။ ဝတ္ထုတွဲꩻမုဲင်ꩻမုဲင်ꩻတဲ့ယဝ်း ဘုရာꩻကဟော်ꩻသေꩻခါꩻအတွိုင်ꩻ၊ အဋ္ဌကထာႏဆရာႏ ကဗွောင်သေꩻခါꩻအတွိုင်ꩻ တယ်ႏအထျꩻ ဗꩻအနာတွော့ꩻ ဟော်ꩻခြုဲင်းလွေꩻစားနဝ်ꩻစားနဝ်ꩻ၊ နဝ်ꩻတဲ့ ထွာဒျာႏတရာꩻနေနေ။ နုဲင်းခွေသွဉ်းကရိုꩻ နဝ်ꩻဟွဉ်ႏနဝ်ꩻသနယ် အနာႏထပိဏ်ႏသဌေꩻ၊ အနာႏထပိဏ်ႏသဌေꩻ ကခွဲးတွမ်ႏဘုရာꩻ၊ ကမော့ꩻတွမ်ႏဘုရာꩻနဝ်ꩻ အခိန်ႏမုဲင်ꩻ?၊ ကလူႏဗာႏဇေႏတဝွန်ႏကျောင်ꩻ၊ ကဖြေꩻထွိုက် ကဖြေꩻတန်ႏဗာႏဟံႏနဝ်ꩻ ပွိုးအကျောင်ꩻခရာႏထမုဲင်ꩻ?၊ နဝ်ꩻမꩻတဲင် အနာႏထပိဏ်ႏသဌေꩻယိုနဝ်ꩻ အမော့ꩻဗာႏ ထာꩻဒုက္ခဘဝနုဲင်းမုဲင်ꩻ? နဝ်ꩻမꩻ အနာႏထပိဏ်ႏသဌေꩻမာတွမ်ႏ သဌေꩻတမုဲင်ꩻမာနဝ်ꩻ တဖူးဝေးဝင်ꩻနုဲင်းမုဲင်ꩻ? စတဲင်အခရောင်ꩻခရာႏစားနဝ်ꩻဖုံႏ ကသေထွိုက်သေသင်ꩻ ဟော်ꩻလို့ဟော်ꩻစင်စားနဝ်ꩻနဝ်ꩻ တယ်ႏအထျꩻဗꩻအနာ ဟော်ꩻလွေꩻတရာꩻနုဲင်းနဝ်ꩻတဲ့ ထွာဒျာႏတရာꩻတပုဒ်နေနေ။ အမုဲင်(၆)ဟော်ꩻတရာꩻနယ်ꩻ "ထူႏတဝ်းဝတ္ထု၊ ထူႏကွို့ꩻအအဲဉ်ႏချုက်ဟော်ꩻတရာꩻ"။ နီဗွေႏသီး ဟော်ꩻတရာꩻဖေႏကဒါႏ ဥပမာႏ ထေနယ်ဝတ္ထုနီပုဒ်ငါ- ခွန်ဗိမ္ဗိသာရတွမ်ႏ အနာႏထပိဏ်ႏသဌေꩻ၊ ခွန်ဗိမ္ဗိသာရတွမ်ႏ အနာႏထပိဏ်ႏသဌေꩻ၊ ခွန်ဗိမ္ဗိသာရတဲ့ သောႏတာႏပန်ႏပုဂ္ဂိုလ်ႏနေနေ၊ လꩻတမဂ်တဖိုလ်ႏ သောႏတာႏပန်ႏပုဂ္ဂိုလ်ႏ၊ အနာႏထပိဏ်ႏသဌေꩻတဲ့ လꩻတမဂ်တဖိုလ်ႏ သောတာႏပန်ႏပုဂ္ဂိုလ်ႏနေနေ။ နဝ်ꩻထွူတွော့ꩻ ဗိမ္ဗိသာရနဝ်ꩻ ခွန်တန်၊ ပေါႏရိုꩻခွန်တဲ့ တခြိုꩻ၊ ပစ္စေꩻ၊ ဥစ္စာႏ လွိုင်ႏခြွေခြာႏ၊ အနာႏထပိဏ်ႏသဌေꩻနဝ်ꩻတဲ့ ခွန်တမွေးတဝ်းစွဉ်ႏတဲ့ ဝင်ꩻသဌေꩻတန်တန်နေနေ၊ ပစ္စေꩻ၊ ဥစ္စာႏလွိုင်ႏခြွေခြာႏနေနေ။ နဝ်ꩻတွော့ꩻ ဗိမ္ဗိသာရနဝ်ꩻ အပိုခိုအဝ်ႏတဖြာꩻ၊ အပိုခိုနဝ်ꩻ အဇာတသတ်၊ မဉ်ႏထွာပါဠိနဝ်ꩻ "အဇာတသတ္တု"၊ အဇာတ-ခါးလားကလွူးကာႏ၊ သတ္တု-ထွာအဖါရန်ႏသူႏ၊ အဇာတ-ခါးလားကလွူးကာႏ၊ သတ္တု-ထွာအဖါရန်ႏသူႏ၊ ထွာအဖါရန်ႏသူႏနဝ်ꩻနဝ်ꩻ ပုဏ္ဏာꩻသီးဟော်ꩻလဲဉ်းသွူ။ နဝ်ꩻတွော့ꩻ ဝွေꩻနဝ်ꩻ အဖါနဝ်ꩻ ရက်ငါႏအပိုတဲင် 'လိုꩻပေႏကွို့ꩻလွုမ်ꩻက၊ လွူးစွဉ်ႏဝွေꩻနဝ်ꩻသနယ်၊ အွိုးအမာနဝ်ꩻ ကျမ်ႏယားနဝ်၊ အဖါဖေႏယားတဝ်း၊ ဖါသီးမေတ္တာႏ၊ ဟော်ꩻနဝ်ꩻတဲ့ လꩻဒျာႏသွူ၊ ဖါသီးမေတ္တာႏနဝ်ꩻ လွူးဒျာႏ၊ 'ပိုဒျာႏ လိုꩻပေႏလွုမ်ꩻက၊ ခွေနဝ်ꩻ လိုꩻတန်ဟ သွဉ်တဲ့ လꩻဗာႏနေနေမတဝ်'ဖေႏယားတဝ်း၊ အဇာတသတ်။ အဝ်ႏနဝ်ꩻထွူတွော့ꩻ အနာႏထပိဏ်ႏသဌေꩻတဲ့ ပိုခိုနဝ်ꩻ 'ကာဠ'၊ တဲက်ထွားလို့ဝင်ꩻဟုဲင်း၊ အဖါရွဉ်သားနုဲင်းနုဲင်းဝင်ꩻ၊ 'အဇာတသတ်-ကာဠ'၊ နဝ်ꩻတွော့ꩻ ယူႏလွေꩻ ဗိမ္ဗိသာရပို အဇာတသတ်နဝ်ꩻ၊ အဇာတသတ်ယိုနဝ်ꩻ ဒေဝဒတ်တိန်ႏလွဉ်ချောက်၊ ဖန်ဆင်ꩻလွဉ်နေးအနမ်းမင်ꩻသာꩻ၊ ဗဲဉ်တွမ်ႏရူးတန်၊ နီဗွေႏသီးအဝ်ႏသေဒျာႏအတွိုင်ꩻနဝ်ꩻတွော့ꩻ ဒေါ့ꩻဒွုမ်အလုဲင်းခြုဲင်းဒွုမ်အစွုမ်ႏ။ တွော့ꩻ နဝ်ꩻတခန်ꩻနဝ်ꩻ အထူꩻထူꩻကိုနဝ်ꩻ မာꩻနေးထမုဲင်ꩻ၊ ခြုဲင်းလို့တဝ်းတဲ့၊ ထူႏသွဉ်ခန်ꩻတာႏလွုမ်ꩻ၊ အအဲဉ်ႏချုက်၊ နဝ်ꩻထွူတွော့ꩻ ခွန်အဇာတသတ် ဒေဝဒတ်လွဉ်ချောက်စားနဝ်ꩻစားနဝ်ꩻ အဖါသေတဝ်းနဲ့?၊
လွေꩻလူႏဒေဝဒတ်သွမ်ꩻ တနီꩻတနီꩻယိုနဝ်ꩻ ကားမုဲင်ꩻဖွိုင်ꩻ? ကားမုဲင်ꩻဖွိုင်ꩻနဝ်ꩻ အဖါသေတဝ်းနဲ့? နဝ်ꩻ အဖါသေဗာႏသနဲ့။ အဖါအဝ်ႏသေသွူနုဲင်းနဝ်ꩻနဝ်ꩻ အဖါမွော့ ဆုံꩻမꩻတဝ်း? ရီခရာႏအဝ်ႏအာတန်၊ ပွိုးထမုဲင်ꩻ? အဖါမွော့ ဆုံꩻမꩻတဝ်း၊ နဝ်ꩻ၊ အဝ်ႏနဝ်ꩻထွူတွော့ꩻ ဒေဝဒတ်တိန်ႏချောက်လꩻထွူတွော့ꩻ ဒေဝဒတ်ရိုꩻနုဲင်းမုဲင်ꩻ? "အုံပွေါးသီဖါသီထွူမꩻ နာꩻအီႏထွာဗာႏခွန်နဝ်ꩻ တောႏတောႏနာꩻတထွာဗာႏတဝ်းကွေး၊ မာꩻသီ သီဖါဟုဲင်း၊ ထွာသော့ꩻခွန်ဟုဲင်း၊ ခွေမာꩻသီဘုရာꩻ ခွေထွာသော့ꩻဘုရာꩻ"ဒေဝဒတ် အော်ကုဲင်နုဲင်းနဝ်ꩻတဲ့။ ဒေဝဒတ် ကအော်ကုဲင်ခါꩻအတွိုင်ꩻနဝ်ꩻထ အဇာႏတသတ်နဝ်ꩻ ယွုမ်း၊ ယွုမ်းမွေးစွဉ်ႏ ဒေဝဒတ်၊ ပညာႏအဲဉ်ထဝ်းဟ၊ လိုꩻပေႏလွုမ်ꩻဟနော၊ "လိုꩻပေႏ"ကရိုꩻနဝ်ꩻ သက်(၁၆)/(၁၇)ရပ်လဲဉ်းနေနေ၊ အကျမ်ႏသီအဖါတွော့ꩻ မာꩻနုဲင်းမုဲင်ꩻတွော့ꩻ နꩻပေႏတဗာႏနဝ်ꩻ စွိုင်ပြောက်အကီႏသူꩻ၊ ဝင်ꩻအဝ်ႏအုံလင်ꩻ ပွယ်ꩻအုံကွံတွင်ꩻကိုတန်နဝ်ꩻ နွို့လွဉ်၊ အလောင်ႏလွိုးသမ်းကြာꩻ၊ အမူꩻအမတ်ဖုံႏ ရိက္ခေႏလꩻနဝ်၊ တိန်ႏရိက္ခေႏလꩻတွော့ꩻ ဝွေꩻသီးသောက်၊ တိန်ႏသောက်တွော့ꩻ မော့ꩻနꩻပေႏနဝ်။ မော့ꩻနꩻပေႏနဝ်ꩻ- "မာꩻအီထမုဲင်ꩻယို?"၊ "မာꩻသီအီနီဖါ" ဝွေꩻတဲ့ ဒေါ့ꩻစွဉ်ႏတရွဉ်းစွဉ်ႏ၊ "တိန်ႏမာꩻသီနီဖါတွော့ꩻ"နဝ်ꩻကိုဖုံႏနဝ်ꩻ၊ ပရိသတ်ဖုံႏနဝ်ꩻ ရိုꩻနုဲင်းမုဲင်ꩻတွော့ꩻ ယဟန်ႏသားနဝ်ꩻ "လွေꩻဒေါ့ꩻဟွုန်က အဖါမꩻ"၊ ယဟန်ႏသား "ဒေါ့ꩻဟွုန်ခရာႏလိုႏတဝ်း၊ နီစီႏရင်ႏလွေꩻနေးစွဉ်ႏယို"နုဲင်းနဝ်ꩻတဲ့အဝ်ႏ၊ အွဉ်ႏဒေါ့ꩻဒွေါင်ႏဒွေါင်ႏငါတွော့ꩻ လွေꩻအွဉ်ႏဒေါ့ꩻဟွုန်အဖါ နဝ်ꩻစားဖုံႏနဝ်ꩻ အနွောင်ꩻထိုꩻ၊ အစွိုꩻနဝ်ꩻ နွောင်ꩻထိုꩻတွော့ꩻ လွေꩻအွဉ်ႏဒေါ့ꩻဟွုန်အဖါ။ တိန်ႏအွဉ်ႏဒေါ့ꩻဟွုန်အဖါတွော့ꩻ အဖါရိုꩻ"ပိုခို- နာꩻမာꩻထမုဲင်ꩻ ကျမ်ႏသီတွိုႏခွေ"၊ "မဉ်ထွာခွန်"၊ "မဉ်ထွာခွန်တဲ့ လꩻဒျာႏပို"နဝ်၊ အဖါချꩻစွဉ်ႏ အနမ်းအရာႏ၊ ရာႏဇာႏအရန်းနဝ်ꩻ အပ်တေားစွဉ်ႏအပို၊ စဉ်ꩻစာꩻဟုဲင်း၊ နဝ်၊ "လွောက်ꩻငါႏပိုအလိုႏ"ရိုꩻဗာႏနုဲင်းနဝ်ꩻသနယ်၊ "လွောက်ꩻမွေးစွဉ်ႏ ပိုအလိုႏ"ရိုꩻပနဝ်ꩻသနယ်။ နဝ်ꩻတွော့ꩻ မဉ်ႏထွာနုဲင်း၊ မဉ်ႏတလွောက်ꩻတဝ်း ပိုအလိုႏနဝ်ꩻ "ခွေပိုယိုနဝ်ꩻ အပညာႏအဝ်ႏတကားမုဲင်ꩻ?"၊ အဆင်ႏအရန်း အဝ်ႏတကားမုဲင်ꩻ?၊ အသက်အရွယ်ႏ အဝ်ႏတကားမုဲင်ꩻ? အီႏအုပ်ချုက်ခမ်း၊ အီႏအုက်ချုပ်ထီယိုနဝ်ꩻ နွောင်ꩻနဲ့?၊ နွောင်ꩻတဝ်းနဲ့၊ ဒါႏနဲ့? ဒါႏတဝ်းနဲ့?၊ ခမ်းသားထီသား ထာꩻကွိုꩻ အီႏထွာနဲ့? ထွာတဝ်းနဲ့၊ ခမ်းသားအကျိုꩻ၊ ထီသားအကျိုꩻ အီႏမာꩻနွောင်ꩻနဲ့? မာꩻနွောင်ꩻတဝ်းနဲ့?။ ခမ်းသားထီသား အီႏခိုးလျားလွဉ်ꩻဗာႏနဲ့? ခိုးလျားလွဉ်ꩻဗာႏတဝ်းနဲ့? လိုꩻကအီႏထွာလွဉ်ခွန်တဖြာꩻယို ကအီႏအုပ်ချုက်ဒါႏခမ်း၊ ကအီႏအုပ်ချုက်ဒါႏထီ လိုꩻတဖြာꩻယို အထီအသွီႏ ဖေႏနေးကဗွေနဝ်ꩻ အင်္ဂါႏလက္ခဏာႏနဝ်ꩻ လိုႏအာတန်ဟ၊ ယိုတဲ့လိုႏ၊ ယိုတဲ့လိုႏ၊ ယိုတဲ့လိုႏ-ယိုတဲ့လိုႏ-စတဲင် ကလိုႏလိုႏဖုံႏနဝ်ꩻ အဇာတသတ်၊ အပိုလောင်းနဝ်ꩻ အဝ်ႏနဲ့? အဝ်ႏတဝ်းနဲ့နဝ်ꩻ ခွန်နဝ်ꩻ အဝ်ႏလိုႏယူႏနဝ်။ ပွိုးထမုဲင်ꩻယူႏတဝ်း? "အရက်လွဉ်ꩻငါႏအပို၊ လွောက်ꩻလွဉ်ꩻငါႏ အပိုအလိုႏ"ရိုꩻဗာႏနုဲင်းနဝ်ꩻသနယ်၊ ကွပ်ပွိုးနဝ်ꩻမꩻ အပ်ခမ်းအပ်ထီ၊ တိန်ႏအပ်ခမ်းအပ်ထီနဝ်ꩻ ထွာသွူခွန်နဝ်၊ တိန်ႏထွာသွူခွန်တွော့ꩻ လွေꩻဒေါ့ꩻအဆရာႏဒေႏဝဒတ် "ဗွေႏ-နဝ်ꩻ နီဗွေႏကဖေႏကျံႏဉာဏ်ႏအတွိုင်ꩻ ယိုခါ ခွေသွဉ်းထွာဗာႏလဲဉ်းခွန်နဝ်၊ နီဗွေႏမွော့ မာꩻသီတဝ်းဘုရာꩻအီ?"၊ နီဗွေႏမွော့ ထွာတဝ်းဘုရာꩻအီ?"။ ဒေႏဝဒတ်နဝ်ꩻ သမ်းကြဲစ်ဖျင်နဝ်ꩻ "မောင်ႏပေႏ- ခွန်သီးအမျိုꩻနဝ်ꩻ ပရိယာယ်ႏအာတန်ကွေး၊ အအပ်နာꩻကရိုꩻနဝ်ꩻတဲ့ မဲ့ꩻအပ်လဲဉ်းထာꩻမဲ့ꩻ၊ အပ်ဆောင်းကွို့ꩻထꩻလွုမ်ꩻမဲ့ꩻ၊ ဗွော့ꩻသီဖါ အဝ်ႏကနေးနဝ်ꩻနဝ်ꩻ သꩻတဆွော့ꩻလꩻတဝ်း၊ မာꩻသီ သီဖါဟုဲင်း"။ နဝ် သွဉ်ကုဲင်ဖျင်နုဲင်းနဝ်ꩻ "မာꩻသီ သီဖါဟုဲင်း"တဲ့၊ နဝ်ꩻမဉ်ႏတဲ့ အဇာတသတ်နဝ်ꩻတဲးတဲ သꩻမျတ်ပေႏနဝ်ꩻ အဝ်ႏဒျာႏနေနေ၊ "အား- ဖါတန်နဝ်ꩻဟ မာꩻသီဗွုန်ႏတဝ်းဗွေႏ" အငဝ်းနုဲင်းနဝ်ꩻပေႏ အဝ်ႏထန်ႏနဝ်၊ မဉ်ႏယူႏနဝ်ꩻကိုနဝ်ꩻ မွိုက်တရွိုက်ငါႏ မရေႏမရာႏတဲ့ မွေးတဝ်း၊ ဝင်ꩻသွဉ်ကုဲင်ဒျာႏ၊ ပါꩻအော်ကုဲင်ဒျာႏနဝ်ꩻ။ "မာꩻသီဗွုန်ႏတဝ်းတဲ့ ခြင်နေးဝေꩻသနယ်ဟွေး၊ ခြင်ဒျာႏဝွေꩻ၊ ကွဲးညည အံႏဗာႏတဝ်းအာဟာရ၊ မဲ့ꩻအသီဒျာႏ"နဝ်ꩻ ကွပ်ပွိုးနဝ်ꩻမꩻတဲင် အွဉ်ႏသော့ꩻနေးထောင်ႏနဝ်၊ တိန်ႏအွဉ်ႏသော့ꩻထောင်ႏတွော့ꩻ အမွိုးနဝ်ꩻ နေႏသာႏတဝ်းတွော့ꩻ အီလွေꩻဖေႏအဒဲဉ်၊ ပသာဖေႏအဒဲဉ်၊ နဝ်ꩻတွော့ꩻ အဇာတသတ်နဝ်ꩻရိုꩻ- "နီဖါသီလဲဉ်းနဲ့?"၊ "သီတဝ်း"၊ "အွို ပွိုးတမုဲင်ꩻ သီတဝ်းအီ?"၊ "အံႏဗာႏဒျာႏဒဲဉ်ဟ၊ မွိုးအီႏလွေꩻဖေႏဒျႏဟ၊ ပေါႏနဝ်ꩻတဲ့ မွိုး- အီလွေꩻဖေႏဒဲဉ် လꩻတဝ်းကွေး"၊ နဝ်။ အဝ်ႏနဝ်ꩻတွော့ꩻ မွိုးမာꩻနုဲင်းမုဲင်ꩻတဲ့ ဝါꩻလဲဉ်းသွူဟ၊ ပိုနဝ်ꩻ သမ်းထွာခွန်၊ ခွန်သီးမျိုꩻယိုထ အဩဇာႏ၊ အာႏဏာႏထ မွိုးခကီ၊ ဖါခကီတဲ့ လဲဉ်းလို့ဒျာႏကနေား၊ ကားတဲင်ခမ်းခကီထီခကီနဝ်၊ ထဩဇာႏအာႏဏာႏနဝ်ꩻ အဝ်ႏသော့ꩻလို့ဝွေꩻစူကိုဟ။ "သင်ႏခဲင်ꩻအဝ်ႏ ဝွေꩻနꩻနာ၊ ပင်စားအဝ်ႏဝွေꩻနꩻလောင်း"ကရိုꩻနဝ်ꩻ ပအိုဝ်ႏငဝ်းနဝ်ꩻအတွိုင်ꩻ နီပအိုဝ်ႏငဝ်းနဝ်ꩻအတွိုင်ꩻ ငမ်းဗာႏလို့ဝွေꩻနဝ်။ နဝ်ꩻ၊ အီလွေꩻလꩻတဝ်းရိုꩻနဝ်ꩻလဲ့ အမွိုးနဝ်ꩻ ပေါႏအီလွေꩻတဝ်းတဲ့ အဖါသီးအီႏအံႏမထာꩻနဝ်၊ ကွပ်နဝ်ꩻမꩻ နီဗွေႏသီးအဝ်ႏသေဒျာႏအတွိုင်ꩻ သော့ꩻလွေꩻနေးခင်ႏဖါႏကိုနဝ်၊ ကွဲးညညတဲ့ "ဖါသမ်းအံႏဗာႏဒျာႏအီ၊ မာꩻနုဲင်းမုဲင်ꩻတန်နဝ်"တဲ့၊ အမတ်ခွဉ်ႏဆေ့ꩻဖုံႏနဝ်ꩻ အဝ်ႏနဝ်ꩻဟ၊ လိုꩻထောင်ႏထိန်ꩻသားဖုံႏနဝ်ꩻ အခွဉ်ႏဆေ့ꩻဖုံႏနဝ်ꩻအဝ်ႏဒျာႏ၊ နေႏရာႏသီႏ ဝင်ꩻလိုႏလဲဉ်ကိုတဲ့ လဲဉ်တဝ်းဟ၊ လွေꩻဒေါ့ꩻစွဉ်ႏတရွဉ်း-"အသော့ꩻလွေꩻနေး ခင်ႏဖါႏကိုကဗွေႏ"၊ "နီမွိုး အီလွေꩻဖေႏ နီဖါဒဲဉ်လꩻတဝ်း၊ ထုမ်းလွေꩻခင်ႏဖါႏ လꩻတဝ်းကွေး"။ နဝ်ꩻတဲ့ အမွိုးနဝ်ꩻ စိက္ကူꩻ ကွဲးညပေါက်ဒွုမ်၊ သူႏလွေꩻနေးအနမ်း၊ စတုမဓုဖုံႏ၊ တနေထီ၊ တဝတ်ꩻထီ တိုးဒျာႏအနမ်း၊ တွိုႏလွေꩻအွိုးထောင်ႏကိုနဝ်ꩻ လွေꩻဗွောင်ႏခွမ်ꩻလာꩻ၊ အဝါꩻနဝ်ꩻ အံႏမွစ်ꩻဗာႏနေး၊ နီဗွေႏသီး စဉ်ꩻစာꩻယွယွ၊ ပိုမွိုက်တဖြာꩻ၊ တွိုႏအဖါနဝ်ꩻ အဗာႏမာꩻသီ အွိုးကအဝ်ႏ သန္ဓေႏခါကာႏနဝ်ꩻ အဖါဖေႏမာꩻသီတဝ်း။ နဝ်ꩻမꩻတဲင်တွော့ꩻ မဉ်ထွာခန်တဲ့ အဖါလဲင်ꩻဖေႏလဲဉ်းခွန်၊ နေႏရာႏသီႏနဝ်ꩻ ဝင်ꩻအဝ်ႏလိုႏကေႏနပ်ငါႏလဲဉ်းသွူ၊ "ခွေထွာဗာႏလဲဉ်းခွန်ယို"နဝ်၊ လိုႏကေႏနပ်လဲဉ်း၊ ကေႏနပ်တဝ်းဒွိုန်း၊ လွေꩻယွုမ်းတမွိုꩻတမာꩻတေားဒျာႏ ဒေဝဒတ်ငဝ်း၊ စဉ်ꩻစာꩻဟုဲင်း၊ တိန်ႏတွိုႏနဝ်ꩻတွော့ꩻ ခွန်တဖြာꩻလဲ့ ကွပ်ပိုမွိုက်တဖြာꩻတဲင် လွေꩻအံႏမွစ်ꩻဗာႏနေးအမာ ကအွဉ်ႏပြောက်လွဉ်ဒါႏ စတုမဓုပေႏ၊ တနေထီ၊ တဝတ်ꩻထီပေႏနဝ်ꩻ စဉ်ꩻစာꩻယွယွ၊ သꩻဆာခရာႏတန်။ နဝ်ꩻတွော့ꩻ သမ်းတသီတဝ်းနဝ်ꩻဟ၊ တိန်ႏသီတဝ်းနဝ်ꩻတွော့ꩻ အမူꩻအမတ် လိုꩻခွဉ်ႏဆေ့ꩻသားနဝ်ꩻ အွဉ်ႏဒေါ့ꩻစွဉ်ႏတရွဉ်းဖျင်စွဉ်ႏဒျာႏ "အသူႏလွေꩻအနမ်း"တဲ့၊ "အား- နီမွိုးယို ပေါႏဖေႏလွေꩻထေ့နီဖါနဝ်ꩻ တမျိုꩻတဝ်းတဲ့တမျိုꩻ အဝ်ႏမာꩻစွဉ်ႏတိတ်ꩻတိတ်ꩻ၊ မွိုး- ကားယိုမာꩻငါ လွေꩻထေ့နီဖါ လꩻတဝ်းကွေး"နဝ်၊ အမိန်းနဝ်ꩻ တွိုႏလွဉ်စွဉ်ႏ။ တွိုႏနဝ်ꩻမꩻ အမွိုးနဝ်ꩻ ငွိုးဒေါ့ꩻ၊ ငွိုးဒေါ့ꩻထာꩻ "ခွန်တန်ဗွေႏ- ကွပ်စွဉ်ႏပိုပေႏမွိုက် အွိုးအစကာႏ၊ ကအဝ်ႏသန္ဓေႏခါကာႏ ကွီယားကုဲင်နဝ်ꩻ နီဗွေႏဖေႏယားတဝ်း၊ ယိုခါ ထွာလဲဉ်းသွူ နီဗွေႏရန်ႏသူႏနဝ်ꩻဗွေႏ၊ တယ်ႏဟန်ႏနီꩻယိုမာꩻငါ၊ တယ်ႏယိုခါမာꩻလွေꩻ လွဉ်ထေ့နီဗွေႏထျꩻ လꩻတဝ်းဒွုမ်တဲ့"၊ နဝ်ꩻ ဒေါ့ꩻငွိုးဒေါ့ꩻငွိုးထာꩻနဝ်။ နဝ်ꩻမꩻတဲင်တွော့ꩻ ထောင်ႏထိန်ꩻသားဖုံႏနဝ်ꩻတဲ့ ပေ့ꩻစဝ်းခန်းဒျာႏတခါꩻ၊ ဗိမ္ဗိသာရခွန်တဲ့ စဉ်ꩻစာꩻယွယော့ထာꩻ၊ "အား- လွူလွူ လဲင်ႏခါ ခွေအီႏအံႏဒွုမ်ထမုဲင်ꩻယို၊ ဝင်ꩻဖေႏအံႏဒွုမ်ခွေတဲ့ယို"၊ အဝ်ႏနဝ်ꩻတွော့ꩻ ဝွေꩻနဝ်ꩻနဝ်ꩻ လꩻတမဂ်တဖိုလ်ႏ၊ တိန်ႏလꩻတမဂ်တဖိုလ်ႏတွော့ꩻ မတ်ဒျာႏအတရာꩻ၊ ရှုဒျာႏအတရာꩻ၊ ထောင်ချာထောင်ငါ၊ တရာꩻဗွန်နဝ်ꩻ သမ်းအဝ်ႏကုမ်းဖျင်နဝ်ꩻဟ၊ တောႏတောႏသမ်းတသီတဝ်းဟ၊ အဝ်ႏနဝ်ꩻ အပိုနဝ်ꩻ ရီနဝ "နီဖါနဝ်ꩻ မာꩻတမုဲင်ꩻ မွော့သီဒါႏတဝ်းထာꩻ?"။ "အဝ်ႏထောင်ချာထောင်ငါဒျာႏ၊ အဝ်ႏမတ်ဒျာႏတရာꩻတန်ဗာႏ"။ "အား- နီဖါဗော့ꩻထောင်ဒါႏထာꩻ တောႏတောႏတသီတဝ်း" အဝ်ႏနဝ်ꩻထွူတွော့ꩻ "နီဖါ ဖေႏကထောင်ဒါႏမွုန်းထာꩻနဝ်ꩻ အခင်ႏနဝ်ꩻ ဖြဲ့ꩻဟုဲင်း၊ ဖြဲ့ꩻတွမ်ႏနꩻ၊ ဖြဲ့ꩻထွူတွော့ꩻ သူႏတသာႏ ပိန်းမေႏနဝ်ꩻ"ပိုစဉ်ꩻစာꩻဟုဲင်း နီဗွေႏသီး၊ ယိုကိုနဝ်ꩻ နီဗွေႏသီး မဉ်ႏဟော်ꩻတလွိုးလွိုးထာꩻ၊ ပိုမွိုက်တဖြာꩻယို အနိစ္စက်ဖါတကားမုဲင်ꩻ?၊ ပိုမွိုက်တဖြာꩻယို နီဗွေႏသီး ကထီႏဒါႏလောကလက်ခံႏ အနိစ္စက်မွိုးတကားမုဲင်ꩻ?။ ကနိစ္စက်ဗာႏဖါနဝ်ꩻ ကွပ်ပွိုး၊ ကနိစ္စက်ဗာႏမွိုးနဝ်ꩻ ကွပ်ထမုဲင်ꩻ? ကွပ်ယာအဝ်ႏ၊ ကွပ်ဒဝ်အဝ်ႏ၊ ကွပ်ထာꩻတောႏအဝ်ႏ၊ ကွပ်ထာꩻလောင်ꩻအဝ်ႏ-စတဲင် နီဗွေႏသီးကထီႏထွꩻ၊ နီဗွေႏသီးကသေထွꩻနဝ်ꩻ ယိုကို မဉ်ႏဟော်ꩻသော့ꩻနဝ်ꩻ ဖေႏနေးမွိုးတဖြာꩻ၊ ဖါတဖြာꩻ ကခံႏစာꩻဗာႏစွဉ်ႏ၊ ပိုမွိုက်မဉ်ႏအဝ်ႏမွေး၊ လီꩻမွိုက်မဉ်ႏအဝ်ႏမွေးတဲ့ ဖေႏကထီႏစွဉ်ႏ အပိုမွိုက်၊ အလီꩻမွိုက်မဲ့ငါနဝ်ꩻ နီဗွေႏသီး အဝ်ႏနီဗွေႏသီးထာꩻဟောင်ꩻလောင်း၊ အဝ်ႏနီဗွေႏသီး ထာꩻဒေါ့ꩻလောင်း၊ နီဗွေႏသီး ထာꩻခြုဲင်းလောင်း၊ ဟော်ꩻနုဲင်းနဝ်ꩻ။ တိန်ႏဟော်ꩻနုဲင်းနဝ်ꩻတဲင်တွော့ꩻ အွိုးကမွိုက်သားတဲ့ သံႏဝွေႏဂ ဖေႏနေးကလꩻ၊ နောင်ႏတတရာꩻ ဖေႏနေးကလꩻစွဉ်ႏ၊ နဝ် အဝ်ႏလိုႏဖေႏနုဲင်းနဝ်ꩻ၊ အဝ်ႏနဝ်ꩻတွော့ꩻ ပါꩻဖြဲ့ꩻမွေးအခင်ႏ၊ ခြဲ့ꩻခင်ႏတွော့ꩻ လဲမ်ႏမေႏ၊ အဝ်ႏတဝျာႏတဝီႏစွဉ်ႏထာꩻ၊ စဉ်ꩻစာꩻဟုဲင်း၊ နဝ်ꩻတွော့ꩻ အွဉ်ႏဒေါ့ꩻဒွေါင်ႏဒွေါင်ႏငါတွော့ꩻ သီထိုꩻမွေးစွဉ်ႏတဲ့၊ လဲꩻထိုꩻမွေးစွဉ်ႏဒျာႏ ခွန်နဝ်ꩻ။ အဝ်ႏနဝ်ꩻထွူတွော့ꩻ အမတ်နီစွိုꩻနဝ်ꩻ တစွိုꩻနဝ်ꩻ အီထင်ႏလိတ်နီစောင်ႏ၊ အထင်ႏခွဲးလို့ဝင်ꩻဟော်ကီ တခါꩻငွါ၊ တစောင်ႏနဝ်ꩻ လိတ်မင်္ဂလာႏတဲ့၊ တစောင်ႏနဝ်ꩻ လိတ်အမင်္ဂလာႏနဝ်၊ အဝ်ႏနဝ်ꩻတွော့ꩻ အမတ်တန်ရိုꩻ-"သီနဝ်ꩻ အမင်္ဂလာႏ၊ သီကပ်ဆုဲင်ꩻဟုဲင်း၊ နီလိတ်မင်္ဂလာႏယို ကပ်ရီး"နဝ်၊ ကပ်လွေꩻခန်းလိတ်။ အဇာတသတ် တိန်ႏဖတ်လိတ်တွော့ꩻ "နီဗွေႏ ပိုခိုပေႏ လွူးဖွာꩻလင်ꩻလဲဉ်းသွူ ဗွေႏဩ"၊ သဲစ်ထီႏလိတ်တဲ့"အော- ပိုခိုပေႏတန်ႏရိုꩻနဝ်ꩻ သꩻကိုတဲ့ "ရွူး"စွဉ်ႏနဝ်၊ သꩻရေꩻမွးစွဉ်ႏထာꩻတဲ့၊ "အောႏ- နီဖါ၊ နီမွိုးကလွူးစခွေတဲ့ နီဖါအလွိုးသꩻရေꩻနုဲင်းယိုနေနေဗာႏ" တိန်ႏတွိုႏခန်ꩻနဝ်ꩻမꩻ ယူႏလꩻဖါ။ "ဟွေ့- အမူꩻအမတ်ဖုံႏနဝ်ꩻ လွေꩻဟုဲင်း၊ လွေꩻအွဉ်ႏစွꩻမွိုင်မွိုင် နီဖါသူꩻ၊ အွဉ်ႏစွꩻချာယင်းနီဖါသူꩻ"၊ တွိုႏနဝ်ꩻမꩻ ထွဉ်ႏအွဉ်ႏစွꩻချာအဖါတဲ့၊ တွိုႏဝွေꩻကအွဉ်ႏဖြဲ့ꩻအခင်ႏဖုံႏနဝ်ꩻ ယူႏလꩻယူႏလိꩻဒွုမ်ဟ၊ တွိုႏနဝ်ꩻတွော့ꩻ အမတ်တဖြာꩻနဝ်ꩻ နွို့ငါလွေꩻ၊ လွေꩻကပ်ယင်းလိတ်တစောင်ႏ၊ တိန်ႏဖတ်လိတ်တွော့ꩻ "နီဗွေႏသီး ကေꩻဇူꩻတန်အာ ဖါခွန်တန်ဗိမ္ဗိသာရ လဲꩻထိုꩻလဲဉ်း ဗွေႏဩ"နဝ်၊ တိန်ႏတွိုႏနဝ်ꩻတွော့ꩻ အူး-ဒူး-ဒူး ငွိုးဖြုန်းငွိုးဖြင်းစွဉ်ႏထာꩻ။ နောင်ႏတတရာꩻ လꩻမွေးမုဲင်းစွဉ်ႏထာꩻ၊ အဝ်ႏနဝ်ꩻထွူတွော့ꩻ တိန်ႏလွေꩻထွားအဖါတဲ့ ဝင်ꩻပိန်းမေႏနဝ်ꩻဟ ဖြေင်းကရစ်ꩻ၊ ယော့ꩻတဖိုꩻကြိုꩻတဖိုꩻကြာꩻနေးစွဉ်ႏ၊ နဝ်၊ အဝ်ႏနဝ်ꩻတွော့ꩻ လောႏလွေꩻထေ့အမွိုးနဝ်၊ "တမွိုး-တမွိုး"စွဉ်ႏဒျာႏ၊ "နီဖါ ရက်နေခွေဟောင်းမွိုး?"တဲ့။ "ဟူး- ရက်ကာႏဒွုမ်ဟောင်း ပိုခို၊ ပိုခိုမွိုက်ဟွေး ခꩻတလဲင်ႏ နာꩻစူနုံနာနဝ်ꩻ နာꩻမော့ꩻထာꩻဆာအွံအမဉ်နဝ်၊ အွဉ်ႏနုဲင်းမုဲင်ꩻအွဉ်ႏနဲဉ်းတဲ့ တေ့ꩻတဝ်း၊ သီဖါသမ်းအဝ်ႏလွေꩻထင်ႏဒျာႏရွုမ်ꩻ၊ လွေꩻတွိုႏစွဉ်ႏအွိုးရွုမ်ꩻကို၊ သီဖါနဝ်ꩻ ထာꩻဆာဖေႏနေးကသက်သာႏတွော့ꩻ အွံစွဉ်ႏနာꩻစူနုံပို၊ အဝ်ႏနဝ်ꩻတွော့ꩻ ကွဲးလွံꩻကွဲးလွံꩻတွော့ꩻ ထာꩻဆာနဝ်ꩻပꩻ၊ ပꩻတွော့ꩻ အမဉ်နဝ်ꩻထန်ႏ၊ အမဉ်ထွိုင်ႏထန်ႏနဝ်ꩻ မဉ်ႏပထူထိုꩻတဲ့ ငမ်းနာꩻမဲ့သေ၊ သီဖါမျောႏထမ်စွဉ်ႏ နာꩻစူနုံအမဉ်နဝ်ꩻသနယ်ပိုခို၊ သီဖါရက်နာꩻ တကားနဝ်ꩻ"အမွိုးတိန်ႏခြုဲင်းနယ်မꩻ ဝွေꩻနောင်ႏတရာꩻ ယိန်းလꩻစွဉ်ႏဒျာႏ။ အဝ်ႏနဝ်ꩻ ဆုဲင်ꩻနဝ်ꩻမꩻ ဗေင်ႏထာꩻတဲ့အွီႏဒွုမ်၊ ထွိုင်ႏထာꩻတဲ့အွီႏဒွုမ်၊ အဝ်ႏနဝ်ꩻမꩻ "အီႏဆယ်ꩻကပ်ဗာႏဆရာႏအပါꩻမုဲင်ꩻယို"၊ ဆရာႏဇီဝက တိန်ႏအွဉ်ႏနယ်လွေꩻ ဆယ်ꩻကပ်ယင်းနီဗွေႏဘုရာꩻ၊ တိန်ႏထီႏဘုရာꩻတပဲ့ꩻတပန်ꩻ ရဟန်ꩻသံဃာႏ ယေန်ႏကေႏငါႏနဝ်ꩻတွော့ꩻ ဝွေꩻယူႏလꩻသဲင်ꩻစွဉ်ႏဝွေꩻပိုနဝ်၊ ဥဒယဘဒ္ဒနဝ်၊ အဝ်ႏနဝ်ꩻထွူနဝ်ꩻမꩻတဲင်တွော့ꩻ ဘုရာꩻဟော်ꩻဖေႏတရာꩻ။ ဝွေꩻတိန်ႏသဲင်ꩻချာ ဘုရာꩻရိုꩻ- "အဇာတသတ်ယိုနဝ်ꩻ အမဉ်ႏတပဲစ်မာႏတဝ်းအဖါနဝ်ꩻ ယိုခါ လꩻစွဉ်ႏတရာꩻသနယ်"နဝ်၊ ကွပ်ပွိုးနဝ်ꩻမꩻတဲင် နဝ်ꩻနဝ်ꩻတပုဒ်နဝ်ꩻ မဉ်ႏထုတ်သင်္ခန်းစာနဝ်ꩻ-ခြုဲင်းဗော့ꩻအရေꩻကီꩻကီꩻတဲ့ မဉ်ႏထုတ်သင်္ခန်းစာနဝ်ꩻ- (၁) မွိုးဖါသီးအမျိုꩻယိုနဝ်ꩻ ပိုခိုအအုံအဝ်ႏ၊ အလွေꩻအသဲင်ꩻ ထွားသေႏသေႏဗာႏ-စတဲင်စားနဝ်ꩻစားသနဲ့၊ ယိုမဉ်ႏတဲမ်းတဲ့ တမုဲင်ꩻတဝ်းဒွုမ်၊ အွဉ်ႏဒေါ့ꩻနယ်ဒျာႏအပုံႏစံႏ၊ အတ်ႏနဝ်ꩻထွူတဲင်တွော့ꩻ- (၂) ပိုခိုမဉ်ႏမာꩻထာꩻ မဉ်ႏတမွေးတဝ်းတဲ့ ကထွာမွိုးကထွာဖါနဝ်ꩻ မာꩻဗာႏနုဲင်းမုဲင်ꩻတွော့ꩻ ဆုံꩻမꩻဗာႏ၊ အန္တရာယ်ႏကရထွာဒါႏအမျိုꩻကရိုꩻနဝ်ꩻ ရဲးစဝ်းစဝ်းဗာႏ။ (၃) ပိုတဖြာꩻယိုနဝ်ꩻ ဗော့ꩻမဉ်ႏမွိုက်လꩻသွူနဝ်ꩻ မွိုးတဲ့ဒုက္ခလွဉ်ꩻ၊ ဖါတဲ့ဒုက္ခလွဉ်ꩻ၊ ထွာဒါႏမွိုးရန်ႏသူႏ၊ ဖါရန်ႏသူႏ၊ ခမ်းရန်ႏသူႏ၊ ထီရန်ႏသူႏ- စတဲင်စားနဝ်ꩻစား၊ ထေ အွိုသွဉ်တန်ꩻတာႏ၊ ထေသွဉ်ခန်ꩻတာႏတွော့ꩻ ဟော်ꩻလွေꩻနုဲင်းနဝ်ꩻတဲ့အဝ်ႏ။ နုဲင်းဒေဝဒတ်တဲ့ နုဲင်းနဝ်ꩻနေနေသနဲ့၊ မဉ်ႏထေသွဉ်ခန်ꩻတဲ့ ဒေဝဒတ်နဝ်ꩻ လꩻအာတန်သွူ၊ ဥပမာႏမွိုင် နုဲင်းဒေဝဒတ်နဝ်ꩻ တွမ်ႏဘုရာꩻသီးနဝ်ꩻ ဗော့ꩻစွိုးဗော့ꩻခွိုꩻ၊ ဗော့ꩻဖူးဝေးဒျာႏ၊ ဗော့ꩻနုဲင်းမုဲင်ꩻတဲ့ နီဗွေႏသီးအဝ်ႏသေဒျာႏ။ နဝ်ꩻဟ ဝင်ꩻမဉ်ႏရီမွိုင် "ဒေဝဒတ် မဉ်ႏနွို့ထင်ႏသာႏသနာႏကိုယိုနဝ်ꩻ အအီႏမာꩻကွယ်ꩻသံဃာႏ၊ အအီႏရန်ႏသူႏချာဘုရာꩻနေးနဝ်ꩻနဝ်ꩻ နီဗွေႏဘုရာꩻသေတဝ်းနဲ့? ဥပမာႏ- ဝင်ꩻမဉ်ႏရီနဝ်ꩻသနဲ့၊ မဉ်ႏရိုꩻသေတဝ်းနဝ်ꩻ နုဲင်းနဝ်ꩻဟ နီဗွေႏဘုရာꩻနဝ်ꩻ သဗ္ဗညုတမွေးတဝ်းမတဝ်၊ သမ်းရိုꩻသေလို့တရာꩻနဝ်ꩻက၊ နုဲင်းနဝ်ꩻပေႏငါတဲ့ သေတဝ်းနဝ်ꩻ မွေးတဝ်းမတဝ်?၊ နဝ် အငဝ်းလွစ်တဝ်း။ နဝ်ꩻတွော့ꩻ အီႏမာꩻကွယ်ꩻသံဃာႏ၊ အီႏရန်ႏသူႏချာ ဆရာႏဘုရာꩻနဝ်ꩻ နီဗွေႏဘုရာꩻ အဝ်ႏသေသေဒျာႏ၊ ဗော့ꩻနုဲင်းနဝ်ꩻဟ အဝ်ႏသေသေဒျာႏနေးနဝ်ꩻ မွော့အဝ်ႏလွေꩻလက်ခံႏတွိုး? ဒေဝဒတ်နဝ်ꩻ မာꩻကွယ်ꩻသံဃာႏ၊ ရန်ႏသူႏချာ ဆရာႏဘုရာꩻနဝ်ꩻ အီႏလင်ꩻထဲ့ဗာႏငါးရုဲင်ꩻနဝ်ꩻ မွော့အွဉ်ႏလင်ꩻထဲ့တွိုႏငါးရုဲင်ꩻ၊ မာꩻထမုဲင်ꩻမွော့ အလင်ꩻထဲ့တွိုးငါးရုဲင်ꩻ? နီဗွေႏဘုရာꩻနဝ်ꩻ သမ်းရိုꩻမေတ္တာႏ၊ ကရုဏာႏသားတဲ့၊ ဗော့ꩻနုဲင်းနဝ်ꩻဟ ထီႏဒေဝဒတ်နဝ်ꩻ သညင်ꩻတဝ်း၊ ရက်တဝ်းသနယ်နဝ်၊ အွဉ်ႏထဲ့ထိုꩻငါးရုဲင်ꩻဟ၊ နဝ်၊ နဝ်ꩻတဲ့ အပဲစ်သမ်းတလွစ်ဖျင်တဝ်းနဝ်၊ အိႏမာꩻဗာႏနုဲင်းမုဲင်ꩻ?နဝ်၊ နဝ်ꩻနဝ်ꩻ အဖြေႏနဝ်ꩻ အဝ်ႏနုဲင်းမုဲင်ꩻတွော့ꩻ- "ဒေဝဒတ်ယိုနဝ်ꩻနဝ်ꩻ အုံစွဉ်ႏလမ်းတဲ့နဝ်ꩻ၊ နွို့ထင်ႏသာႏသနာႏကိုတဲ့နဝ်ꩻ လိုႏအီႏထဲ့ငါးရုဲင်ꩻဒျာႏရင်ꩻ"တဲ့ တောင်ꩻသွော့နဝ်ꩻတချက်။ လိုꩻအီႏထဲ့ဒျာႏ ငါးရုဲင်ꩻဒျာႏရင်ꩻရင်ꩻဝွေꩻနဝ်ꩻ၊ နဝ်ꩻတွော့ꩻ အုံကျောင်ꩻထဲ့ငါးရုဲင်ꩻတွမ်ႏ အုံလမ်းထဲ့ငါးရုဲင်ꩻနဝ်ꩻ အကွာႏနုဲင်းမုဲင်ꩻတွော့ꩻ ဝွေꩻနဝ်ꩻ မဉ်ႏအုံလမ်းထဲ့ငါးရုဲင်ꩻနဝ်ꩻ ထဲ့သွူတလဲင်ႏ လွစ်ထန်ႏငါးရုဲင်ꩻ၊ တွိုႏဆုဲင်ꩻဆုဲင်ꩻ ထဲ့ဖျင်၊ လွစ်ထန်ႏဖျင်၊ ဆုဲင်ꩻဆုဲင်ꩻထဲ့ဖျင်၊ အဝ်ႏထဲ့သွုပ်သပ်လွေꩻစွဉ်ႏနုဲင်းနဝ်ꩻ အသွတ်ꩻအဲဉ်ထဝ်းတဲ့။ မဉ်ႏနွို့ထင်ႏသာႏသနာႏယိုတဲင်တွော့ꩻ တွိုႏအဆုဲင်ꩻသွတ်ꩻ ဝွေꩻနောင်ႏတတရာꩻတိန်ႏလꩻနဝ်ꩻ အီႏလွဉ်ကွဉ်းတော့ꩻချာ နီဗွေႏဘုရာꩻ၊ အီႏလွဉ်ဝုဲင်ႏချာ နီဗွေႏဘုရာꩻနဝ်၊ လွဉ်၊ တွမ်ႏအတပဲ့ꩻ ကောကာလိကသီးဖုံႏနဝ်ꩻ ထမ်ႏလွဉ်နဝ်၊ တိန်ႏအီႏတွိုႏလွဉ် ဇေႏတဝွန်ႏကျောင်ꩻငွါသူꩻနဝ်ꩻ ရဟန်ꩻသီးဖုံႏရိုꩻ- "ဗွေႏ- ဒေဝဒတ် အအီႏလွဉ်ကွဉ်းတော့ꩻ နီဗွေႏဘုရာꩻ"၊ နီဗွေႏဘုရာꩻရိုꩻ-"ဒေဝဒတ်နဝ်ꩻ အပဲစ်တန်ငါႏ၊ မာꩻနုဲင်းမုဲင်ꩻမုဲင်ꩻတဲ့ယဝ်း ခွေထျꩻယို တွိုႏနွောင်ꩻတဝ်း"၊ "သူꩻဗွေႏ အဗော့ꩻလွဉ်လဲဉ်းသူꩻ၊ အတွိုႏလဲဉ်းသွူ ဇေႏတဝွန်ႏကျောင်ꩻငွါသူꩻ"၊"ရဟန်ꩻသီးဖုံႏ- ဒေဝဒတ်နဝ်ꩻ အပဲစ်တန်ငါႏ မာꩻနုဲင်းမုဲင်ꩻမုဲင်ꩻတဲ့ ခွေထျꩻတွိုႏနွောင်ꩻတဝ်း"နီဗွေႏဘုရာꩻ အွဉ်ႏဒေါ့ꩻဗော့ꩻငဝ်းနုဲင်းနဝ်ꩻလွုမ်ꩻ။ တိန်ႏအီႏတွိုႏ နီဗွေႏဘုရာꩻထျꩻ၊ တိန်ႏအီႏဗꩻနီဗွေႏဘုရာꩻငါတွော့ꩻ ဇေႏတဝွန်ႏကျောင်ꩻငွါနဝ်ꩻ ထီယေႏကန်ႏအဝ်ႏက၊ အရိုꩻနုဲင်းမုဲင်ꩻတွော့ꩻ "အား- တပဲ့ꩻကောကာလိကသီးဖုံႏ- အွဉ်ႏလင်ꩻဆောင်းတဆင်ႏငါ၊ ခွေလူးဗာႏတဝ်းဒွုမ်ထီတဲ့ ညငါႏလဲဉ်းသွူ၊ နီဗွေႏဘုရာꩻနဝ်ꩻ အကြောင်းအစင်၊ ခွေနွုမ်ꩻသူနွုမ်ꩻသေင်ငါႏ၊ ခွေဟွာႏဆောင်းကခင်ႏယို" ဝွေꩻသီးကထမ်ႏသားနဝ်ꩻ အရွိုးအလွား မဉ်လူးဒျာႏထီပေႏ၊ တမုဲင်ꩻပေႏနဝ်ꩻတဲ့ ပါနဝ်ꩻသနဲ့"။ ဝွေꩻကုသိုလ်ႏပေႏနဝ်ꩻ လꩻလွေꩻနဝ်ꩻပေႏသနယ်နဝ်၊ ကွပ်နဝ်ꩻမꩻ ဟံႏမျောႏလ၊ ကွပ်စွဉ်ႏအဆုဲင်ꩻသွတ်ꩻအနေႏ ဝွေꩻရိုႏသေႏဗာႏ နီဗွေႏဘုရာꩻ တွမ်ႏအဆွတ်ꩻပေႏနဝ်ꩻ ဝွေꩻမတ်ကဝ်ႏ၊ မတ်ဗို ဝွေꩻရိုႏသေႏ ဗွေႏဘုရာꩻတဲင် အဝ်ႏအွိုးအပဲစ်ယို မဉ်ႏကေႏထိုꩻတနီꩻခါနဝ်ꩻ ဝွေꩻဗွေႏနဝ်ꩻ အီႏသဲင်ꩻထွာချာယင်းလိုꩻတဲ့၊ အီႏသဲင်ꩻထွာ ပစ္စေကဗုဒ္ဓါႏ၊ အမဉ်ꩻနဝ်ꩻ "အဋ္ဌိဿရ"တဲ့။ အဋ္ဌိဿရ-အဋ္ဌိ+ဣဿရ၊ အဋ္ဌိ-နဝ်ꩻ ဆွတ်ꩻ၊ ဣဿရ-နဝ်ꩻနဝ်ꩻ အစိုႏရ၊ ပဲင်ႏဆွတ်ꩻရိုꩻပနဝ်ꩻသနဲ့၊ "ပဲင်ႏဆွတ်ꩻ-ရိုꩻပနဝ်ꩻသနဲ့"၊ နဝ်ꩻတွော့ꩻ သဲင်ꩻဖြေႏသျင်ꩻချာယင်း၊ လိုꩻတဖြာꩻယို ထဲ့ငါးရုဲင်ꩻ တလဲင်ႏလွုမ်ꩻကာႏတဝ်း၊ အဝ်ႏထဲ့သွုပ်ထဲ့သွုပ်နဝ်ꩻတနယ်ꩻ၊ ထဲ့ဗာႏတလဲင်ႏလွုမ်ꩻတဲင်တွော့ꩻ ခွꩻထိုꩻ၊ ရျူႏထိုꩻ၊ ရောင်းထိုꩻ၊ ကြောင်းထိုꩻ၊ စင်ထိုꩻနဝ်ꩻ တနယ်ꩻ။ နဝ်ꩻနီနယ်ꩻနဝ်ꩻ အနယ်ꩻခမုဲင်ꩻဟဝ်?၊ မဉ်ႏရိုꩻနဝ်ꩻ တလဲင်ႏလွုမ်ꩻနဝ်ꩻ ဟဝ်၊ တလဲင်ႏလွုမ်ꩻတွော့ꩻ ကြောင်းထိုꩻ၊ စင်ထိုꩻနဝ်ꩻ ယံ၊ ကွပ်ပွိုးနဝ်ꩻမꩻတဲင်တွော့ꩻ နီဗွေႏဘုရာꩻ ထီႏဒေဝဒတ်နဝ်ꩻ ရက်တဝ်းမွေးတဝ်း၊ ရက်ငါႏမရေႏမရာႏ၊ အဝ်ႏရက်ရက်ထွူတွော့ꩻ အွဉ်ႏထဲ့တဝ်းငါးရုဲင်ꩻနဝ်ꩻ လꩻတဝ်း၊ အဗာႏထဲ့ငါးရုဲင်ꩻ၊ ဝွေꩻဝွဋ်၊ ဝွေꩻတံႏ ဝွေꩻအဗာႏခံႏအဝ်ႏ၊ နဝ်ꩻမꩻ ဝွေꩻထဲ့ဗာႏ။ ကွပ်ပွိုးနဝ်ꩻမꩻ အွဉ်ႏထဲ့တလဲင်ႏလွုမ်ꩻ၊ အွဉ်ႏထဲ့သွုပ်သွုပ်နေးနဝ်ꩻ မွေးတဝ်း၊ ကွပ်ပွိးနဝ်ꩻမꩻ နီဗွေႏဘုရာꩻနဝ်ꩻ သဗ္ဗညုတဉာဏ်ႏအစဲစ်အမန်ႏဒျာႏ၊ သေဒျာႏ၊ မေတ္တာႏဗွေႏ၊ ကရုဏာႏဗွေႏ အစဲစ်အမန်ႏမွေးဒျာႏ၊ ရက်ဒျာႏ၊ သညင်ꩻဒျာႏ၊ ဖြေႏသွော့နုဲင်းနဝ်ꩻ။ ကွပ်ပွိုးနဝ်ꩻမꩻတဲင်တွော့ꩻ ထူႏသွဉ်(တန်ꩻ)-(၁) နီလိုꩻသီးယို ဖူးဝေးခန်း လိုꩻခြွေ၊ လိုꩻခြာႏ၊ လိုꩻဒါႏ၊ လိုꩻယံတဲ့ယဝ်း ဗော့ꩻနီနမ်းဒျာႏတယမ်းတဝ်းနဝ်ꩻ တယံတဝ်းဒျာႏနေနေ။ (၂) ဖူးဝေးခန်းဘုရာꩻတဲ့ယဝ်း၊ ဖူးဝေးခန်း ရဟန္တာႏတဲ့ယဝ်း ဗွောနီတကံတဝ်း၊ ဗော့ꩻနီတကျင်ꩻတဝ်း၊ ဗော့ꩻနီတအားထုတ်တဝ်းနဝ်ꩻ တထွာတဝ်း ရဟန္တာႏနေနေ။ (၃) ကွပ်စွဉ်ႏဒျာႏ မဉ်လꩻငါႏ ဩဇာႏ၊ အာႏဏာႏတဲင်တွော့ꩻ အမျိုꩻတပဲစ်မာႏတဝ်း နီဗွေႏဘုရာꩻတဲ့ အပဲစ်မာႏထိုꩻဒါႏ။ (၄) ကွပ်ပွိုးနဝ်ꩻမꩻတဲင် 'လောဘ၊ အာဏာႏယိုနဝ်ꩻ အယားဒါႏလိုꩻဟွေး' စတဲင်စားနဝ်ꩻစားဖုံႏ။ ထေသွဉ်ခန်ꩻတာႏနုဲင်းနဝ်ꩻတွော့ꩻ ဟော်ꩻအီတရာꩻတဲ့၊ နဝ်ꩻနဝ်ꩻ အမုဲင်(၆)နဝ်ꩻ ခြုဲင်းလို့တဝ်းဝတ္ထု၊ ထူႏသွဉ်ခန်ꩻတာႏ အအဲဉ်ႏချုက်တွော့ꩻ ဟော်ꩻတရာꩻနယ်ꩻ။ ယိုနဝ်ꩻ ဒေဝဒတ်တွမ်ႏ အွို့ꩻအဇာတသတ်နဝ်ꩻ အွဉ်ႏပြဲင်ႏဝင်ꩻတွော့ꩻ အဖါတဲ့ ဗိမ္ဗိသာရတွမ်ႏ အနာႏထပိဏ်ႏသဌေꩻနဝ်ꩻ တဖြာꩻဟဝ်၊ တဖြာꩻဟဝ်တဝ်း၊ တဖဲ့ꩻဟဝ်-တဖဲ့ꩻဟဝ်တဝ်းတွော့ꩻ အွဉ်ႏဆဲင်ႏလို့ဝင်ꩻစားယိုစားနဝ်ꩻ၊ အွဉ်ႏပြဲင်ႏလို့ဝင်ꩻ စားယိုစားနဝ်ꩻ ဟော်ꩻလွေꩻနဝ်ꩻ လိုꩻတဲ့ သꩻတဲ့ဝင်ႏစာꩻနဝ်၊ ပွိုးထမုဲင်ꩻနဲးတဲင် နီသွဉ်းသီးလိုꩻအခမ်းကို လိုꩻဟဝ်အဝ်ႏ၊ လိုꩻကုဲင်အဝ်ႏနဝ်၊ လိုꩻဟဝ်တာႏတဲ့ပါဒျာႏ၊ လိုꩻကုဲင်တာႏတဲ့ပါဒျာႏ။ ကွပ်ပွိုးနဝ်ꩻမꩻ နီဗွေႏသီးမဉ်ႏဟော်ꩻဝတ္ထု၊ မဉ်ႏထူႏအနယ်ꩻ(၆)ယိုတွော့ꩻ မဉ်ႏဟော်ꩻလွေꩻနဝ်ꩻနဝ်ꩻ ထူႏသွော့ ဝတ္ထုတဖဲ့ꩻဟဝ်၊ တဖဲ့ꩻဟဝ်တဝ်းစားနဝ်ꩻစားနဝ်ꩻ၊ နုဲင်းဗိမ္ဗိသာရတွမ်ႏ အနာႏထပိဏ်ႏသဌေꩻနဝ်ꩻ နီဗွေႏသီးမဉ်ႏဟော်ꩻလွေꩻနဝ်ꩻနဝ်ꩻ ယံငါႏ၊ နဝ်ꩻတဲ့ ဟော်ꩻတရာꩻအနယ်ꩻတနယ်ꩻနေနေ။ အမုဲင်(၇) ဟော်ꩻတရာꩻနယ်ꩻ။ နဝ်ꩻမꩻတဲင် လွေꩻအမုဲင်(၇)၊ ဟော်ꩻတရာꩻနယ်ꩻအမုဲင်(၇)"ဝတ္ထုတပုဒ် အထူꩻထူꩻကို တဲမ်းနေးလင်္ကာႏ ဟော်ꩻတရာꩻ"တဲ့။ တဲမ်းနေးလင်္ကာႏ ဟော်ꩻတရာꩻ၊ နဝ်ꩻမꩻ နေင်ႏ ၁၃၇၄-ဗာႏ၊ ဒုတိယဝါႏဆိုႏဆန်ꩻ(၅)ဟာ၊ ခွေသွဉ်းလင်ꩻဟော်ꩻ အောင်ဗန်း။ ထူႏနေးအထူꩻထူꩻကိုတွော့ꩻ တဲမ်းလင်္ကာႏနဝ်ꩻ- ဥပမာႏ- = ဒေဝဒတ်ဖန်ဆင်ꩻ၊ ရူးသွူရင်ꩻ၊ ကျောင်ႏလင်ꩻ ခွန်ပေႏငါ။ (ထွို့ꩻနယ်ငဝ်းတလဲင်ႏ)။ = ခွန်ပေႏထီႏစွော့ꩻ၊ သꩻဝꩻတွော့ꩻ၊ တနွော့ꩻကျမ်ႏဆွတ်ꩻချာ။ = ထီႏဒေဝဒတ်၊ ထင်းလိုꩻမျတ်၊ လူႏကပ်သွမ်ꩻဒဲဉ်ဗွာ။ နဝ်ꩻနဝ်ꩻ စန်ႏနေးလင်္ကာႏနဝ်ꩻ၊ အဇာတသတ် ကျမ်ႏသီအဖါတဲ့။ = အီတွမ်ႏနꩻပေႏ၊ ထီႏဖါဗွေႏ၊ ဝွေꩻရေႏ မာꩻသီချာ။ = အဖါအပ်ခမ်း၊ ထွာခွန်နမ်း၊ ဝွေꩻငမ်းဖါထူႏချာ။ = ပိုခိုမွိုက်မောင်ႏ၊ သော့ꩻဖါထောင်ႏ၊ ယံအောင်ႏယိုခါခါ။ (စန်ႏနေးလင်္ကာႏနုဲင်းနဝ်ꩻ)။ = ထီႏပိုခိုပေႏ၊ ယူႏဖါဗွေႏ၊ ဝွေꩻရေႏအွဉ်ႏစွꩻချာ။ = ဖါဗွေႏသီလဲဉ်း၊ ပေႏသꩻကဲဉ်း၊ မာႏလဲဉ်း ငွိုးဖေါ့ဖါ။ = ယွုမ်းဒေဝဒတ်၊ ဇာတသတ်၊ ဖါမျတ်မာꩻသီချာ။ ထူႏအွိုးအထူꩻထူꩻကိုတွော့ꩻ စန်ႏနေးလင်္ကာႏ။ အဇာတသတ် အုံထာꩻပျောႏဒွုမ်။ = မာꩻသီဖါဗွေႏ၊ ယူႏလꩻသေႏ၊ သꩻပေႏစွုမ်ႏနီꩻဟာ။ = ဘုရာꩻဟော်ꩻဖေႏ၊ တရာꩻပေႏ၊ ရိုႏသေႏထွိုင်ႏသဲင်ꩻချာ။ = ထွာသာႏသနာႏ၊ ဒါႏယကာႏ၊ သက်သာႏ ငါးရုဲင်ꩻခြာ။ ဝွေꩻနဝ်ꩻ အတန်ႏအီႏထဲ့ အဝီစိတဲ့ ထဲ့ထွာတဝ်းတဲ့နဝ်ꩻ၊ ငါးရုဲင်ꩻ အသက်သာႏထိုꩻတဲ့၊ စတဲင်စားနဝ်ꩻစားဖုံႏ၊ အွို- စန်ႏနေးလင်္ကာႏနုဲင်းနဝ်ꩻတဲင် ဟော်ꩻအီသွော့တရာꩻတဲ့၊ နဝ်ꩻတဲ့ အနယ်ꩻတမျိုꩻနေနေ။ အမုဲင်(၈) ဟော်ꩻတရာꩻနယ်ꩻ နဝ်ꩻတွူတွော့ꩻ အမုဲင်(၈) ဟော်ꩻတရာꩻနယ်ꩻနဝ်ꩻ- "မာꩻနေးငဝ်းရီ၊ ဟော်ꩻအီတရာꩻ"တဲ့။ မာꩻနေးငဝ်းရီ ဟော်ꩻအီတရာꩻ၊ ဥပမာႏ- ပါꩻလူႏသင်္ကန်ꩻမွိုင်၊ သင်္ကန်ꩻကအဝ်ႏပဉ်ကွက်ꩻပဉ်ကွက်ꩻယိုနဝ်ꩻ နီဗွေႏ(ဘုရာꩻ) ထွားနုဲင်းတမုဲင်ꩻကွက်ꩻ?၊ နဝ်ꩻနဝ်ꩻ ငဝ်းရီတဗာႏ၊ နဝ်ꩻမꩻတဲင် ရဟန်ꩻသံဃာႏသီး ကရုံႏဒါႏ စီႏဝရာႏသင်္ကန်ꩻတွမ်ႏ လိုꩻလမ်းသီး ကကွဉ်ကꩻဒါႏ ခွမ်ꩻလာꩻနဝ်ꩻ၊ သင်္ကန်ꩻတွမ်ႏ ခွမ်ꩻလာꩻနဝ်ꩻ အကွာႏလို့ဝင်ꩻနုဲင်းမုဲင်ꩻ? စတဲင်စားနဝ်ꩻစားဖုံႏနဝ်ꩻ။ နီသွဉ်းသီး အခိန်ႏအီႏလꩻတကားမုဲင်ꩻ?၊ အီႏဟော်ꩻတရာꩻယိုနဝ်ꩻ အီႏလꩻကားမုဲင်ꩻမိနစ်? ပုစ္ဆာႏတပုဒ်တပုဒ်ယိုနဝ်ꩻ ခွေမဉ်ႏဟော်ꩻချာ အီႏလို့ကားမုဲင်ꩻမိနစ်?၊ နဝ်ꩻမꩻတဲင် နီဗွေႏသီး ချင်းအွိုးအခိန်ႏသူꩻတဲင်တွော့ꩻ ထေသွော့ငဝ်းရီ၊ အခိန်ႏမဉ်ႏလꩻအာအာတဲ့ ထေငဝ်းရီအာအာ၊ ဖြေႏသျင်ꩻချာဖေႏအာအာ၊ အခိန်ႏသူꩻ မဉ်ႏလꩻဆေ့ꩻဆေ့ꩻတဲ့ နီဗွေႏသီးထေပုစ္ဆာႏဆေ့ꩻဆေ့ꩻ ဖြေႏသျင်ꩻချာဖေႏဆေ့ꩻဆေ့ꩻ။ ဗွော့ꩻနေင်ႏဟာနဝ်ꩻ "ချယ်ရီအဲပ်အဲမ်"သား လွဉ်လူႏဝါႏဆိုႏသင်္ကန်ꩻ သုဲင်ꩻခဝ်နဝ်၊ ခွေသွဉ်းဟော်ꩻဖေႏတရာꩻနဝ်၊ အဝ်ႏနဝ်ꩻတဲင်တွော့ꩻ ဝွေꩻသီးအွဉ်ႏစွꩻလွဉ် ရေဒီယိုကို နီသွံလဲင်ႏလဲဉ်းရိုꩻနုဲင်းနဝ်ꩻ ဗွေႏစင်ꩻပေႏဖုံႏ၊ တကာႏဖုံႏ အထင်ႏလဝ်း ခွေသွဉ်းနုဲင်းနဝ်ꩻ၊ နီဗွေႏသီး ကနာႏရေဒီယိုသားဖုံႏတဲ့ အလွိုးဟွုန်သားတဲ့ အဝ်ႏဒျာႏနေနေ။ နဝ်ꩻနဝ်ꩻ ဟော်ꩻတွမ်ႏအနယ်ꩻမုဲင်ꩻတွော့ꩻ ဟော်ꩻတွမ်ႏအမုဲင်(၈)ယို၊ မာꩻနေးငဝ်းရီတဲင် ဟော်ꩻအီတရာꩻနဝ်ꩻသွူ၊ ဟော်ꩻအနယ်ꩻနဝ်ꩻသွူ။ အဝ်ႏနဝ်ꩻထွူတွော့ꩻ အမုဲင်(၉) "ခေတ်တခြိုꩻဝင်ꩻလူႏ၊ ယူႏယူႏဟော်ꩻဖေႏတရာꩻ"တဲ့။ "ခတ်တခြိုꩻဝင်ꩻလူႏ"ကရိုꩻနဝ်ꩻ ဥပမာႏ-နုဲင်းကွန်ပျူတာ၊ ကွန်ပျူတာနဝ်ꩻ ဘုရာꩻစိုးအဲဉ်ထဝ်းဟ၊ "အောက်စက်-အပေါ်စက်ဖုံႏ"ကရိုꩻစားနဝ်ꩻ စတဲင်စားနဝ်ꩻစားဖုံႏ ဘုရာꩻစိုးအဲဉ်ထဝ်းဟ၊ နုဲင်းကာꩻဖုံႏနဝ်ꩻ ဘုရာꩻစိုးအဲဉ်ထဝ်း၊ ကာꩻနဝ်ꩻ "ယာနဒါန"မဉ်ႏအံႏတဗွာနွိုင်ႏနွိုင်ႏနင်ႏနင်ႏတဲ့ အလွိုးအီႏလꩻဒျာႏနေနေ။ နုဲင်းကွန်ပျူတာဖုံႏနဝ်ꩻ အဲဉ်ထဝ်း၊ အောက်စက်-အပေါ်စက်= စက်ခလစက်ခကီဖုံႏ နီဗွေႏသီးကရိုꩻနဝ်ꩻ ဘုရာꩻစိုးအဲဉ်ထဝ်း၊ နေးနဝ်ꩻစားနဝ်ꩻ မာꩻနုဲင်းမုဲင်ꩻအီႏဟော်ꩻ? မွေးနေႏ? မဉ်ႏတွိုႏလွဉ်နုဲင်းနဝ်ꩻစားတဲ့ ဟော်ꩻဖေႏဗာႏ၊ "တကာႏ- ယိုနဝ်ꩻ ဘုရာꩻစိုးအဲဉ်ထဝ်း၊ ဟော်ꩻဖေႏသူႏသေတဝ်းတန်၊ ဝင်ꩻကလူႏတန်ꩻသားနဝ်ꩻတဲ့ မျိုꩻနစ်သက်ခရာႏ မျိုꩻအဝ်ႏဒွုမ်နဲ့?၊ တွိုႏဆုဲင်ꩻဆုဲင်ꩻတဲ့ ပါꩻမျိုꩻလူႏဒွုမ်ဟောင်း?"။ မဉ်ႏတွိုႏလွဉ် အယပ်ꩻအခုဲင်ႏစားနဝ်ꩻစားနဝ်ꩻ ယူႏမဉ်ႏတသူႏသေတဝ်းနဝ်ꩻ ကတောင်စီႏထန်ႏဒါႏ၊ တွမ်ႏဖေါက်ဝါႏဗွာတဲင် ဆင်ႏဆင်ႏဒွုတ်ꩻဗာႏမဲ့ငါသနဲ့၊ ကွပ်ပွိုးနဝ်ꩻမꩻတဲင် နီဗွေႏသီး ဖေႏကတွမ်ႏဒွုတ်ꩻဗာႏမွုန်းမဲ့ငါ၊ ကတောင်စီႏ ဖေႏနေးကတွမ်ႏထန်ႏမွုန်းတဝ်းတွော့ꩻ ခွေသွဉ်းအီႏဒေါ့ꩻနယ်ဖေႏအနယ်ꩻ၊ တဲမ်းခါꩻဟုဲင်း- အမုဲင်(၁)ဗာႏနဝ်ꩻ ဒါႏနကုသိုလ်ႏ ထွာသေႏချာႏ၊ ထာꩻလူႏလဲဉ်းဟ "ထာꩻလူႏ"ကရိုꩻနဝ်ꩻ ဒါႏနနဝ်၊ ဒါႏနကုသိုလ်ႏ ထွာသေႏချာႏ။ နဝ်ꩻမꩻတဲင် အမုဲင်(၂)ဟုဲင်း၊ ပယ်ႏထိုꩻလောဘ၊ နဝ်ꩻနီချက်တဲးတဲ့ မာꩻနုဲင်းမုဲင်ꩻမုဲင်ꩻတဲးတဲ့ လဲ့ꩻတလꩻတဝ်းဒွုမ်။ နဝ်ꩻမꩻ အမုဲင်(၃) လꩻဗာႏအကျိုꩻအမန်ႏ၊ လꩻအကျိုꩻမုဲင်ꩻတဲး သေတဝ်း၊ လꩻဗာႏအကျိုꩻအမန်ႏ။ အမုဲင်(၁)နဝ်ꩻ ထွာဒါႏနသေႏချာႏ။ အမုဲင်(၂)နဝ်ꩻ ပယ်ႏထိုꩻလောဘသေႏချာႏ။ အမုဲင်(၃)နဝ်ꩻ လꩻဗာႏအကျိုꩻသေႏချာႏ။ အကျိုꩻနဝ်ꩻတဲး ကားနီကဆုတောင်ꩻနဝ်ꩻသနဲ့၊ ဆုတောင်ꩻလောကီꩻအကျိုꩻနဲ့?၊ ဆုတောင်ꩻလောကုတ္တရာႏအကျိုꩻနဲ့? နဝ်ꩻတွော့ꩻ အမုဲင်(၂)ကိုနဝ်ꩻ ပယ်ႏထိုꩻလောဘ၊ အွဉ်ႏနယ်သက်သေႏဟုဲင်း ကုဒါလပဏ္ဍိတ"ကုဒါလပဏ္ဍိတ"ကရိုꩻနဝ်ꩻ ကွပ်စွဉ်ႏအနမ်ႏယနဝ်ꩻနဝ်ꩻ ထွက်ထွက်ထွူ ထင်ႏဗုဲင်ယင်း၊ ထွက်ထွက်ထွူ ထင်ႏဗုဲင်ယင်း ကားမုဲင်ꩻလဲင်ႏ? သူလဲင်ႏ။ တွိုႏဆုဲင်ꩻတွော့ꩻ ဖေႏနေးကလွစ်၊ ဖေႏကလွစ်ထွက်တဲင် လွေꩻစွဉ်ႏအွိုးထီခြောင်တန်ထျ၊ သဲင်ꩻစွဉ်ႏအနမ်ႏထိုး၊ တဝစ်ꩻစွဉ်ႏအနမ်း သွံလဲင်ႏထွူတွော့ꩻ အွဉ်ႏစွꩻငါလွေꩻထီကို "ဗြွုန်"၊ အနမ်ႏယတန် လဲဉ်းသော့ꩻထီ "ဗြွုန်"၊ "ဇိတံ မေ၊ ဇိတံ မေ"တဲ့၊ "မေ ဇိတံ-မေ-ခွေ၊ ဇိတံ-အောင်ႏလဲဉ်း၊ "ခွေအောင်ႏလဲဉ်း၊ ခွေအောင်ႏလဲဉ်း-တဲ့"၊ ယွိုင်ႏအစူဗောင်တွော့ꩻ ခြဝ်အငဝ်းတန်နဝ်။ အဝ်ႏနဝ်ꩻတွော့ꩻ ခွန်နဝ်ꩻ အောင်ႏသဲင်ꩻစဲ့ꩻပွယ်ꩻတဲ့ သမ်းတွိုႏသဲင်ꩻ နဝ်ꩻကိုရပ်ဟ၊ "အွို- ခွေနဝ်ꩻ အောင်ႏသဲင်ꩻစဲ့ꩻပွယ်ꩻတွော့ꩻ အောင်ႏ၊ ပါꩻသူꩻနဝ်ꩻ အောင်ႏတမုဲင်ꩻတန်နဲး?"လွေꩻရီနဝ်၊ "နာꩻ အောင်ႏထမုဲင်ꩻ?- နီနဝ်ꩻ အောင်ႏသဲင်ꩻစဲ့ꩻယို၊ ကုဒါလပဏ္ဍိတ အွဉ်ႏဒေါ့ꩻကျထာꩻနဝ်။ "ဆီး- သီအောင်ႏစဲ့ꩻတဲ့ ဆုဲင်ꩻနဝ်ꩻ စဲ့ꩻမဉ်ႏအာတဲ့ အနွောင်ꩻချာဒျာႏသီနေနေ၊ သီအောင်ႏယို့ꩻကွို့ꩻထာꩻလွုမ်ꩻ၊ ခွေအောင်ႏခွေလောဘယိုနဝ်ꩻမꩻ၊ ခွေအောင်ႏဒျာႏရန်ႏသူႏ၊ ကိလေႏသာႏရန်ႏသူႏ၊ အောင်ႏဒျာႏရန်ႏသူႏအကိုယိုမꩻ ခွေအောင်ႏတငါစွဉ်ႏသနယ်"နဝ်။ "နမ်းလောင်းကအဝ်ႏဝွို့ဒါႏ ခွေလောဘယိုတန်နဝ်ꩻ ခွေအောင်ႏထိုꩻလဲဉ်း၊ နမ်းတဲ့ တအဲဉ်ထဝ်းဒွုမ်၊ နမ်းလောင်းကအဝ်ႏပြောက်ဒါႏ လောဘနဝ်ꩻတဲ့ အဝွစ်ထိုꩻလဲဉ်း၊ အဗိမ်သော့ꩻလဲဉ်းထီသူꩻ၊ တွမ်ႏနမ်ႏတွမ်ႏနိမ်ႏတန်နဝ်ꩻ အွို- အပေါ်ချာတဝ်းဒွုမ်နဝ်ꩻသနဲ့"။ "တကာႏ- တကာႏကွန်ပျူတာယို တန်ႏကားမုဲင်ꩻ?"၊ "ငတ်ꩻသိန်ႏ"၊ "တကာႏကွန်ပျူတာ ငတ်ꩻသိန်ႏယိုနဝ်ꩻ၊ ရွဉ်ငတ်ꩻသိန်ႏယိုနဝ်ꩻ တကာႏမဉ်ႏတလူႏတဝ်းနဝ်ꩻ အလောက်ꩻကာႏစွဉ်ႏ လိုꩻယဖြာꩻ၊ ကွန်ပျူတာတန်ႏငတ်ꩻသိန်ႏ၊ ကွန်ပျူတာလောင်း ရွဉ်ငတ်ꩻသိန်ႏယိုနဝ်ꩻ မဉ်ႏတလူႏတဝ်း၊ ဝွေꩻလောဘမဉ်ႏအဝ်ႏပြောက်စွူစွူဒျာႏ ကွန်ပျူတာလောင်းငတ်ꩻသိန်ႏနဝ်ꩻ လူႏနွောင်ꩻတဝ်းသနဲ့။ ဝွေꩻကလူႏနွောင်ꩻနုဲင်းယိုစားနဝ်ꩻနဝ်ꩻ ကွပ်စွဉ်ႏဒျာႏ ဝွေꩻပယ်ႏနွောင်ꩻ လောဘငတ်ꩻသိန်ႏနဝ်ꩻမꩻ ဝွေꩻလူႏနွောင်ꩻ၊ ပယ်ႏနွောင်ꩻလောဘငတ်ꩻသိန်ꩻ၊ တွမ်ႏနမ်ႏယနဝ်ꩻဟွဉ်ႏနဝ်ꩻ ပီဝင်ꩻ၊ နမ်ႏယနဝ်ꩻ ပွိုင်းလဲင်ႏနဝ်ꩻ နမ်ႏယအလောင်း ဝွေꩻသံႏယော်ꩻဇဉ်ႏ၊ ဝွေꩻလောဘ၊ ဝွေꩻဥပါဒါန်ႏ အဝ်ႏစွယ်ꩻလမ်ꩻနဝ်ꩻကိုမꩻ ဝွေꩻဆင်ႏဆင်ႏအဝ်ႏထွက်ဗာႏထာꩻနဝ်ꩻ၊ နမ်ႏနဝ်ꩻ ဝွေꩻတိန်ႏဝေါင်းသော့ꩻထီနုဲင်းနဝ်ꩻစားတဲင်တွော့ꩻ နမ်ႏနဝ်ꩻ မဉ်ႏတအဲဉ်ထဝ်းဒွုမ်၊ နမ်ႏတိန်ႏအဲဉ်ထဝ်းဒွုမ်တွော့ꩻ နမ်ႏလောင်းကဝွို့ဒါႏ သံယော်ꩻဇဉ်ႏဖုံႏ၊ ဥပါဒါန်ႏဖုံႏ၊ လောဘဖုံႏနဝ်ꩻတဲ့ ကြောင်းကြဲ့ထိုꩻစွဉ်ႏ။ ယိုတဲ့ နုဲင်းနဝ်ꩻဒျာႏနေနေ၊ ကွန်ပျူတာလို့ငတ်ꩻသိန်ႏနဝ်ꩻ ကပ်လူႏဗာႏလဲဉ်းနီဗွေႏသီး၊ ကပ်လူႏလဲဉ်းသံဃာႏနဝ်၊ ကွပ်ပွိုးနဝ်ꩻမꩻတဲင် တကာႏနဝ်ꩻတဖြာꩻ ရွဉ်ငတ်ꩻသိန်ႏ လောဘတန်ႏရွဉ်ငတ်ꩻသိန်ႏစားနဝ်ꩻစားနဝ်ꩻ တွမ်ႏကပယ်ႏထိုꩻလောဘ ငတ်ꩻသိန်ႏတာႏနဝ်ꩻ ပီဝင်ꩻ-စတဲင်စားနဝ်ꩻစားဖုံႏ နီဗွေႏသီးဒါႏနေးမုဲင်ꩻတဲ့ နီဗွေႏသီးဖြုဲင်ꩻသွော့၊ ဟော်ꩻသွော့၊ မဉ်ႏဟော်ꩻနွောင်ꩻစားနဝ်ꩻ၊ မဉ်ႏဖြုဲင်ꩻနွောင်ꩻစားနဝ်ꩻစားတဲ့ တကာႏတဲ့ လွိုးပယွုမ်း၊ နစ်သက်စွဉ်ႏ။ "အား- နီဗွေႏစင်ꩻတဲ့ ဟော်ꩻတရာꩻယမ်တန်ဗာႏ၊ နီဗွေႏစင်ꩻ ဟော်ꩻတရာꩻ ဒါႏတန်ဗာႏ၊ နီဗွေႏစင်ꩻယို ခေတ်မှီတန်ဗာႏ" ထွာနဝ်စားနဝ်၊ ဆုဲင်ꩻမꩻ "အား- ဗွေႏစင်ꩻ အဝ်ႏလိုႏလူႏထဲင်းတမုဲင်ꩻအော်?၊ နီဗွေႏ အဝ်ႏလိုႏကတမုဲင်ꩻအော်?" ငဝ်းနုဲင်းနဝ်ꩻ ထန်ႏလွဉ်စွဉ်ႏဒျာႏ၊ မွေးနေဟောင်း? နဝ်ꩻမꩻ အယပ်ꩻအဲဉ်ထဝ်း၊ အခုဲင်ႏအဲဉ်ထဝ်းအကျောင်ꩻ- ခွေသွဉ်း အွို(၄၂)နေင်ႏအကို ခွေသွဉ်းကမော့ꩻဗာႏ၊ တလူႏဗာႏ အယပ်ꩻအခုဲင်ႏ အဆင်ႏပြေႏနယ်ꩻဖုံႏနဝ်ꩻ ခွေသွဉ်းတိန်ႏယူႏချာနဝ်ꩻ အဝ်ႏ(၉)ချက်နုဲင်းနဝ်ꩻသွူ။ ကွဲႏတွော့ꩻ- ဟော်ꩻတရာꩻနဝ်ꩻ အလို့(၉)နယ်ꩻယိုလွုမ်ꩻတကာႏတဝ်း၊ အနယ်ꩻလောင်ႏအနယ်ꩻလင်ဖုံႏတဲ့ အဝ်ႏဗောႏအဝ်ႏဗာႏနေကထာꩻ၊ ကွပ်ပွိုးနဝ်ꩻမꩻတဲင် နီဗွေႏသီး ဓမ္မကထိကသားဖုံႏနဝ်ꩻ အနယ်ꩻအလောင်ႏအလင်ဖုံႏမဉ်ႏအဝ်ႏတဲ့ နီဗွေႏသီး သွဉ်တေားတေားသွော့၊။ အွို- ထေတေားတေားသွော့ ဟော်ꩻတရာꩻနယ်ꩻ၊ "ဟော်ꩻတရာꩻထွာ အနယ်ꩻအာ"နဝ်ꩻ အွဉ်ႏထွူခန်းတကားနဝ်ꩻတွော့ꩻ။[၁][၂][၃]