အကျောင်ꩻ ၄-မျိုꩻ

"ဌာနသုတ် (အကျောင်ꩻ ၄-မျိုꩻ)" ဗွေႏဘုရာꩻဟော်ꩻဖေႏ ဗွေႏရဟန်ꩻသီး တရာꩻနုဲင်းယို- ရဟန်ꩻသီးဖုံႏဟွေး- နေးတွမ်ႏအကျောင်ꩻတရာꩻလစ်ꩻပါꩻတဲင် သေဗာႏထာꩻရာꩻလစ်ꩻမျိုꩻ၊ သေဗာႏနုဲင်းမုဲင်ꩻနဲတဲင်- ၁။ သံဝါသေန ဘိက္ခဝေ ဝေဒိတဗ္ဗံ- အုံညီꩻညညမꩻ သေထွꩻဝွေꩻသီႏလ။ ၂။ သံဝေါဟာရေန ဘိက္ခဝေ သောစေယျံ ဝေဒိတဗ္ဗံ- ဒေါ့ꩻရီအာအာမꩻ သေထွꩻဝွေꩻငေါဝ်းချာငါ။ ၃။ အာပဒါသု ဘိက္ခဝေ ထာမော ဝေဒိတဗ္ဗော- မဉ်ႏမော့ꩻဘေꩻရန်ႏမꩻ သေထွꩻ ဝွေꩻအစွန်ꩻ။ ၄။ သာကစ္ဆာယ ဘိက္ခဝေ ပညာ ဝေဒိတဗ္ဗာ- ဆွေꩻနွေꩻနေးမꩻ သေထွꩻ ဝွေꩻပညာႏ။ ရဟန်ꩻသီးဖုံႏဟွေး- ၁။ 'အုံညီꩻညညမꩻ သေထွꩻဝွေꩻသီႏလ'ကရိုꩻနဝ်ꩻ အုံညီꩻတဆူးတဆင်ႏတဲ့နဝ်ꩻ၊ အွဉ်ႏသတိꩻတဝ်းတဲ့နဝ်ꩻ၊ ပညာႏအဲဉ်ထဝ်းတဲ့နဝ်ꩻ၊ 'ဝွေꩻယိုသီႏလအဝ်ႏ၊ သီႏလအဲဉ်ထဝ်း'ကရိုꩻနဝ်ꩻ သေနွောင်ꩻတဝ်း၊ အုံညီꩻညညမꩻ၊ အွဉ်ႏသတိꩻမꩻ၊ ပညာႏအဝ်ႏမꩻ သေထွꩻဝွေꩻသီႏလအဝ်ႏ၊ သေထွꩻဝွေꩻ သီႏလအဲဉ်ထောဝ်းနောဝ်ꩻသွူ။ ၂။ 'ဒေါ့ꩻရီအာအာမꩻ သေထွꩻဝွေꩻငေါဝ်းချာငါ'ကရိုꩻနဝ်ꩻ ဒေါ့ꩻရီတဆူးတဆင်ႏတဲ့နဝ်ꩻ၊ အွဉ်ႏသတိꩻတဝ်းတဲ့နဝ်ꩻ၊ ပညာႏအဲဉ်ထဝ်းတဲ့နဝ်ꩻ 'ဝွေꩻယို ဒေါ့ꩻထာꩻငေါဝ်းချာ ငေါဝ်းငါ မဲဉ်ႏတနꩻနေဟောင်း၊ ဒေါ့ꩻပါꩻယိုထျꩻနဝ်ꩻ တမျိုꩻ၊ ရိုꩻပါꩻနဝ်ꩻထျꩻနဝ်ꩻ စား'စတဲင်နုဲင်းနောဝ်ꩻ သေတောဝ်း၊ ဒေါ့ꩻရီအာအာမꩻ၊ ဒေါ့ꩻရီညညမꩻ၊ အွဉ်ႏသတိꩻမꩻ၊ ပညာႏအဝ်ႏမꩻ သေထွꩻငေါဝ်းချာငါ၊ စင်ဗွာမဲဉ်ႏတနꩻ၊ မဲဉ်ႏတနꩻတောဝ်းနောဝ်ꩻသွူ။ ၃။ 'မဉ်ႏမော့ꩻဘေꩻရန်ႏမꩻ သေထွꩻဝွေꩻအစွန်ꩻ'ကရိုꩻနဝ်ꩻ အုံညီꩻညညမꩻ၊ အွဉ်ႏသတိꩻမꩻ၊ ပညာႏအဝ်ႏမꩻ 'ဝွေꩻယိုနဝ်ꩻ မဉ်ႏမော့ꩻလွဉ် လောကဓံႏနဝ်ꩻ ခံႏနွောင်ꩻနဲ့၊ ခံႏနွောင်ꩻတဝ်းနဲ့၊ အဖူးဝေးမဉ်ႏသီ၊ အတခြိုꩻမဉ်ႏကုဲင်လီ-စတဲင် မဉ်ႏတလူႏဗာႏတွမ်ႏ ဗျသနတရာꩻနဝ်ꩻ အခြင်ꩻနဲ့၊ ခြင်ꩻတဝ်းနဲ့၊ အမဲ့ထီလင်ꩻနဲ့၊ လင်ꩻတဝ်းနဲ့'စတဲင် ဝွေꩻထာꩻသယ်ꩻခံႏအစွန်ꩻ၊ 'ဝွေꩻတရာꩻအစိုန်ꩻအဝ်ႏ-ဝွေꩻတရာꩻအစွန်ꩻအဲဉ်ထဝ်း'နဝ်ꩻ သေဗာႏနဝ်ꩻသွူ။ ၄။ 'ဆွေꩻနွေꩻနေးမꩻ သေထွꩻဝွေꩻပညာႏ'ကရိုꩻနဝ်ꩻ ဒေါ့ꩻရီအာအာမꩻ၊ ရီချာရီငါညညမ၊ အွဉ်ႏသတိꩻမꩻ၊ ပညာႏအဝ်ႏမꩻ 'ဝွေꩻယိုနဝ်ꩻ အဒေါ့ꩻထာꩻနုဲင်းမုဲင်ꩻ၊ အရီနုဲင်းမုဲင်ꩻ၊ အဖြေႏနုဲင်းမုဲင်ꩻ၊ အထျꩻနုဲင်းမုဲင်ꩻ၊ အနာနုဲင်းမုဲင်ꩻ၊ အဖွိုꩻနုဲင်းမုဲင်ꩻ၊ အယော့နုဲင်းမုဲင်ꩻ၊ ဝွေꩻဒါႏတကားမုဲင်ꩻ၊ ဝွေꩻသတကားမုဲင်ꩻ၊ ဝွေꩻပညာႏအဝ်ႏတကားမုဲင်ꩻ-ဝွေꩻပညာႏ အဲဉ်ထဝ်းတကားမုဲင်ꩻ'နဝ်ꩻ သေဗာႏနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ စတုက္ကနိပါတ်၊ ဌာနသုတ်)