အနာထပိဏ္ဍိကသုတ်

"အနာထပိဏ္ဍိသုတ် (ဗွေႏသာရိပုတ္တရာႏ ဟော်ꩻဖေႏအနာႏထပိဏ်ႏသဌေꩻတရာꩻ)"

အတွင်ꩻနဝ်ꩻခါ ဇေႏတဝွန်ႏကျောင်ꩻတကာႏ အနာႏထပိဏ်ႏသဌေꩻနဝ်ꩻ အုံဟောဝ်တဝ်းတဲင် ထွဉ်ႏအလိုႏထင်ႏပင်ꩻ ဗွေႏသာရိပုတ္တရာႏ၊ ဗွေႏသာရိပုတ္တရာႏတွမ်ႏ ဗွေႏအာနန္ဒာႏကျွꩻသဲင်ꩻ အနာႏထပိဏ်ႏသဌေꩻလမ်းနဝ်ꩻသွူ။ "ကျောင်ꩻတကာႏ ထာꩻဆာသက်သာႏနေဟောင်း" "သက်သာႏတဝ်းဗွေႏ အဝ်ႏတောဝ်စွဉ်ႏတိတ်ꩻတိတ်ꩻ ဗွေႏဩ" "ကျောင်ꩻတကာႏ ယူႏသွော့နုဲင်းယိုလုဲင်း- တကေႏညိုႏတဝ်းဘုရာꩻ၊ တမာꩻတဝ်းကုသိုလ်ႏသား၊ ကမာꩻအကုသိုလ်ႏသားနဝ်ꩻ မဉ်ႏသီတွိုႏဆုဲင်ꩻ ထဲ့ငါးရုဲင်ꩻ၊ ခွေယိုနဝ်ꩻ ကေႏညိုႏဒျာႏဘုရာꩻ၊ မာꩻဒျာႏကုသိုလ်ႏ၊ မာꩻတဝ်းအကုသိုလ်ႏ ယူႏချာနမ်းနုဲင်းနဝ်ꩻဟုဲင်း၊ 'ဝွေႏဒနာႏ-သက်သာႏ'ထိုꩻစွဉ်ႏသနယ်။ တယွုမ်းတဝ်းရာꩻ၊ တမာꩻတဝ်းကုသိုလ်ႏ၊ ကမာꩻအကုသိုလ်ႏသားနဝ်ꩻ မဉ်ႏသီသူꩻ လွေꩻဗာႏအပါယ်ႏလစ်ꩻခမ်း၊ ခွေယိုနဝ်ꩻ ယွုမ်းအံႏဒျာႏတရာꩻ၊ မာꩻဒျာႏကုသိုလ်ႏ၊ မာꩻတဝ်းအကုသိုလ်ႏ ယူႏချာနမ်းနုဲင်းနဝ်ꩻလုဲင်း၊ 'ဝွေႏဒနာႏ-သက်သာႏ"ခဲဉ်ꩻထိုꩻစွဉ်ႏသနယ်။ တရိုႏသေႏတဝ်းသံဃာႏ၊ မာꩻဗာႏတဝ်းကုသိုလ်ႏ၊ မာꩻဗာႏဒျာႏအကုသိုလ်ႏလွုမ်ꩻနဝ်ꩻ ကုဲင်သောဝ်ꩻခန္ဓာႏ လွေꩻဗာႏဒုဂ္ဂတိဘဝ၊ ထဲ့လဘွုံႏဖွိုႏ၊ တွိုꩻလွေꩻဗာႏအပါယ်ႏခမ်း၊ ခွေယိုနဝ်ꩻ ရိုႏသေႏဒျာႏသံဃာႏ၊ မာꩻဒျာႏကုသိုလ်ႏလွုမ်ꩻ၊ မာꩻတဝ်းအကုသိုလ်ႏ ယူႏချာနမ်းနုဲင်းနဝ်ꩻဟုဲင်း၊ 'ဝွေႏဒနာႏ-သက်သာႏ"ဖစွဉ်ႏသနယ်။ သီႏလတအဲဉ်ထဝ်းသား၊ ထာꩻယူႏမာႏမိစ္ဆာႏဒိဋ္ဌိသား၊ ထာꩻကျံႏမာႏ-မိစ္ဆာသင်္ကပ္ပသား၊ ထာꩻဒေါ့ꩻမာႏ-မိစ္ဆာႏဝါစာသား၊ ထာꩻမာꩻမာႏ-မိစ္ဆာႏကမ္မန္တသား၊ လွူးနမ်းမာႏ-မိစ္ဆာႏအာဇီဝသား၊ ထာꩻကျိုꩻစာꩻမာႏ-မိစ္ဆာႏဝါယာမသား၊ ထာꩻအွဉ်ႏသတိꩻမာႏ-မိစ္ဆာႏသတိသား၊ ထာꩻသꩻစွူမာႏ-မိစ္ဆာႏသမာဓိသားဖုံႏနဝ်ꩻ ကွပ်အမာႏဖုံႏနဝ်ꩻတဲင် ခန္ဓာႏကုဲင်လီ မဉ်ႏသီသူꩻနဝ်ꩻ "ငါးရုဲင်ꩻ၊ တိရစ္ဆာန်ႏ၊ ပိတ္တာႏ၊ အသူႏရကာယ်ႏ"အပါယ်ႏလစ်ꩻခမ်းကို တခမ်းခမ်း အီႏလွေꩻဗာႏ။ တကာႏ ယူႏချာသွော့နမ်းလုဲင်း- ခွေယိုနဝ်ꩻ ထာꩻယူႏမဲဉ်ႏ သမ္မာဒိဋ္ဌိသားဒျာႏ၊ ထာꩻကျံႏမဲဉ်ႏ-သမ္မာသင်္ကပ္ပသားဒျာႏ၊ ထာꩻဒေါ့ꩻမဲဉ်ႏ-သမ္မာဝါစာသားဒျာႏ၊ ထာꩻမာꩻမဲဉ်ႏ-သမ္မာကမ္မန္တသားဒျာႏ၊ လွူးနမ်းမဲဉ်ႏ-သမ္မာအာဇီဝသားဒျာႏ၊ ထာꩻကျိုꩻစာꩻမဲဉ်ႏ-သမ္မာဝါယာမသားဒျာႏ၊ အွဉ်ႏသတိꩻမဲဉ်ႏ-သမ္မာသတိသားဒျာႏ၊ သꩻစွူမဲဉ်ႏ-သမ္မာသမာဓိသားဒျာႏ၊ ကွပ်အမဲဉ်ႏဖုံႏနဝ်ꩻတွော့ꩻ ခန္ဓာႏကုဲင်လီ ခွေမဉ်ႏသီသူꩻနဝ်ꩻ လိုꩻခမ်း၊ လူꩻခမ်း၊ သုဂတိဘဝ ဘဝတဗာႏဗာႏ အီႏလွေꩻချမ်ꩻသာႏဒျာႏ ယူႏသွော့နုဲင်းနဝ်ꩻဟုဲင်း" ခြုဲင်းနယ်ဟော်ꩻဖေႏတရာꩻနုဲင်းနောဝ်ꩻသွူ။ ဗွေႏအာနန္ဒာႏ သဲင်ꩻလောဝ်းနယ် ဗွေႏဘုရာꩻတဲင် ဗွေႏဘုရာꩻအံႏဖြာႏမွေးစွဉ်ႏ ဗွေႏသာရိပုတ္တရာႏနောဝ်ꩻသွူ။ (သုတ္တန်ႏပိဋကတ်၊ မဟာဝဂ္ဂသံယုတ်ပါဠိ၊ အနာထပိဏ္ဍိကသုတ်)