အနာႏထပိဏ်ႏမော့ꩻစဘုရာꩻ
"အနာႏထပိဏ်ႏသဌေꩻဝတ္ထု (ကလွေꩻမော့ꩻစစ ဗွေႏဘုရာꩻ)"
ရာႏဇဂျိုဟ်ႏသဌေꩻတွမ်ႏ အနာႏထပိဏ်ႏသဌေꩻနဝ်ꩻ သွꩻပေႏဟောဝ်လို့ဝင်ꩻ၊ တွိုႏတလဲင်ႏ ကိစ္စအဝ်ႏတဲင် အနာႏထပိဏ်ႏသဌေꩻ လွေꩻရာႏဇဂျိုဟ်ႏခမ်း၊ ဖျော်လွေꩻ ရာႏဇဂျိုဟ်ႏသဌေꩻလမ်း၊ ရာႏဇဂျိုဟ်ႏသဌေꩻတွမ်ႏ အလိုꩻဖုံႏနဝ်ꩻ အဝ်ႏစီႏရင်ႏ ဒဲဉ်ဟောဝ်ဟန်ႏအွီႏဖုံႏ မွူးရောဝ်ꩻတာႏနောဝ်ꩻသွူ။ အနာႏထပိဏ်ႏသဌေꩻ စဉ်ꩻစာꩻယူႏတေ့ꩻနုဲင်းယို- "ပွိုင်းလဲင်ႏ ပေါႏခွေဖျော်ဟ ရာႏဇဂျိုဟ်ႏသဌေꩻ အွဉ်ႏရေꩻမွေးခွေ၊ သဲစ်ခွေကဖျော်တဲ့ လွဉ်ထေ့ဒေါ့ꩻရီခွေ၊ တွိုႏယိုတလဲင်ႏမွော့ ထီႏသွူခွေဖျော်တဲ့ ထွဉ်ႏဒျာႏအလိုꩻဖုံႏ 'ဒွိုႏထာꩻယိုဟုဲင်း၊ ဒွိုႏထာꩻနဝ်ꩻဟုဲင်း'-တဲ့၊ အလွိုးအပိုမူႏ-မင်္ဂလာႏသနယ်" ယူႏတေ့ꩻသꩻကိုနုဲင်းနောဝ်ꩻသွူ။ အနာႏထပိဏ်ႏသဌေꩻရီ- "မွူးရောဝ်ꩻ နာꩻပိုမူႏမင်္ဂလာႏနဲ့" "မွေးတောဝ်း၊ အီႏကပ်ဒျာႏ ဗွေႏဘုရာꩻသွမ်ꩻဒျာႏ" "နာꩻရိုꩻထမုဲင်ꩻလုဲင်ႏ၊ ဘုရာꩻနဲ့-ဘုရာꩻနဲ့" "မွေး-ဘုရာꩻ၊ သံဃာႏတဲ့ပါ" အနာႏထပိဏ်ႏသဌေꩻတဖြာꩻ "ဘုရာꩻ"သဲစ်ကဟွုန်နုဲင်းနဝ်ꩻတဲင် သꩻရာႏတဖွုန် နစ်သက်မွေးစွဉ်ႏထာꩻ၊ ကျံႏလွေꩻထေ့ဘုရာꩻ ယိုခါခါ၊ ရာႏဇဂျိုဟ်ႏသဌေꩻရိုꩻ "မွူးဟာလဲဉ်း၊ ထာꩻအီႏခေ့ꩻသွူ၊ မွူးရောဝ်ꩻမဲ့ꩻ ဗွေႏဘုရာꩻတွမ်ႏသံဃာႏ အီႏဖျော်လွဉ်ဒျာႏ ခွေလမ်းယို" မနဲဒေါ့ꩻဗာႏစွဉ်ႏနုဲင်းနောဝ်ꩻသွူ။ အနာႏထပိဏ်ႏတဖြာꩻ သꩻစွယ်ꩻငါႏဘုရာꩻတဲင် ထင်းထာꩻလေလဲဉ်းတွော့ꩻ ထွိုင်ႏမာႏစွော့ꩻစွဉ်ႏသွံလဲင်ႏ၊ တွိုႏသွံလဲင်ႏကိုနဝ်ꩻ ထင်းထာꩻလေလဲဉ်းတဲင် လွေꩻစွဉ်ႏ၊ တွိုႏဝေင်ꩻထန်ႏမꩻ ထာꩻခေ့ꩻနေအကျောင်ꩻကွဲသေ၊ လူꩻဟောဝ်လူꩻဒါႏဖုံႏ ဖေႏအာႏဝွေꩻ "လွေꩻငါငါ အကျိုꩻအာ၊ သဲင်ꩻချာ အကျိုꩻအဲဉ်ထောဝ်း"။ ဟွုန်လူꩻငေါဝ်းနုဲင်းနဝ်ꩻတဲင် ထီႏတဖြောဝ်းတဖြီးတဲ့ လွေꩻစွဉ်ႏဒျာႏ၊ ဗွေႏဘုရာꩻ ထွိုင်ႏထောင်စောဝ်းတဖူꩻ၊ ထီႏအနာႏထပိဏ်ႏသဌေꩻလွဉ်တဲင် လွေꩻအုံလင်ꩻ ခင်ႏလမ်းကို၊ ဗွေႏဘုရာꩻဟဲ့ꩻရီးစွဉ်ႏနုဲင်းယို- "တကာႏသုဒတ္တ- လွဉ်ယိုဟုဲင်း" ဗွေႏဘုရာꩻ ဟဲ့ꩻဝွေꩻမဉ်ꩻပေႏခါနုဲင်းနဝ်ꩻတဲင် သꩻယိန်းရေꩻရေꩻစွဉ်ႏ၊ သဲင်ꩻလိုꩻတစိုး ဝုဲင်ႏဗာႏဘုရာꩻမွန် အရီးသွတ်ꩻတလဲင်ႏတွော့ꩻ နစ်နစ်သက်သက် အကတူႏနဝ်ꩻ အွဉ်ႏတွစ်စွဉ်ႏ ဗွေႏဘုရာꩻခင်ႏတောႏ။ ဗွေႏဘုရာꩻ ဟော်ꩻဖေႏတရာꩻထွူ လꩻစွဉ်ႏတမဂ်တဖိုလ်ႏ၊ ထွာစွဉ်ႏသောႏတာႏပန်ႏပုဂ္ဂိုလ်ႏ၊ နုဲင်းမွူးရဝ်ꩻ ဝွေꩻကပ်နုဲင်းနုဲင်းသွမ်ꩻ ရာႏဇဂျိုဟ်ႏသဌေꩻလမ်းကို၊ ဗွေႏဘုရာꩻတွမ်ႏ ရဟန်ꩻသံဃာႏ "ယံဖေႏကကျွꩻလွဉ်မွေးမွေးသွော့-သာဝတ္ထိခမ်"အကျောင်ꩻ ပင်ꩻလောဝ်းခါꩻရီးရီးစွဉ်ႏ နုဲင်းနောဝ်ꩻသွူ။ (ဝိနယ်ꩻပိဋကတ်၊ စူဠဝဂ္ဂပါဠိတောႏ၊ သေနာသနက္ခန္ဓက)[၁][၂]