အနုဿတိ ၆-ပါꩻ

"မဟာနာမသုတ် (အနုဿတိ ၆-ပါꩻ၊ ယူႏလꩻတရာꩻ ၆-စွိုး)" အွိုးခꩻတလဲင်ႏ- နီဗွေႏဘုရာꩻအဝ်ႏအုံ ကပိလဝတ်ခမ်း၊ ကျောင်ꩻ'နိဂြောဓါရုံ'ကိုအတွင်ꩻ သာႏကီႏဝင်ႏ ခွန်မဟာႏနာမ်ႏနဝ်ꩻ ထင်ႏထေ့ဗွေႏဘုရာꩻ၊ ဝုဲင်ႏဗွေႏဘုရာꩻထွူခါ ရီပါနုဲင်းယို- "ဩဗွေႏ ဘုရာꩻမျတ်ဗွေႏဩ- လꩻလဲဉ်း (အရိယာႏ)ဖိုလ်ႏ၊ သေလဲဉ်းသာႏသနာႏ (သိက္ခာႏသွံပါꩻ) အရိယာႏတပဲ့ꩻနဝ်ꩻနဝ်ꩻ အအုံအာတွမ်ႏ အနယ်ꩻနုဲင်းမုဲင်ꩻဗွေႏဩ" မဟာႏနာမ်ႏဟွေး- ၁။ သာႏသနာႏကိုယို အရိယာႏတပဲ့ꩻနဝ်ꩻ အုံထာꩻအဝ်ႏယူႏလꩻ ခူꩻလိမ်ꩻခူꩻပြန်ႏ ဘုရာꩻဂွုဏ်ႏတောႏကွတ်ꩻပါꩻ၊ ဝွေꩻကယူႏလꩻ ဘုရာꩻဂွုဏ်ႏတောႏတွင်ꩻနဝ်ꩻ သꩻလောႏဘꩻ၊ သꩻဒေါႏသꩻ၊ သꩻမောႏဟꩻထွာတောဝ်း၊ သꩻရေꩻနစ်သက်၊ သꩻချမ်ꩻသာႏ၊ ဝွေꩻနဝ်ꩻ ရိုꩻဗာႏ အားထွုတ်"ဗုဒ္ဓါနုဿတိကမ္မဋ္ဌာန်ꩻ"နောဝ်ꩻသွူ။ ၂။ သာႏသနာႏကိုယို အရိယာႏတပဲ့ꩻနဝ်ꩻ အုံထာꩻအဝ်ႏယူႏလꩻ ခူꩻလိမ်ꩻခူꩻပြန်ႏ တရာꩻဂွုဏ်ႏတောႏသူပါꩻ၊ ကယူႏလꩻန၀်ꩻနဝ်ꩻ လောႏဘꩻ၊ ဒေါႏသꩻ၊ မောႏဟꩻထွာတဝ်း၊ သꩻရေꩻနစ်သက်၊ သꩻချမ်ꩻသာႏ၊ ဝွေꩻနဝ်ꩻ ရိုꩻဗာႏ အားထွုတ်"ဓမ္မာနုဿတိကမ္မဋ္ဌာန်ꩻ"နောဝ်ꩻသွူ။ ၃။ သာႏသနာႏကိုယို အရိယာႏတပဲ့ꩻနဝ်ꩻ အုံထာꩻအဝ်ႏယူႏလꩻ ခူꩻလိမ်ꩻခူꩻပြန်ႏ သံႏဃာႏဂွုဏ်ႏတောႏကွတ်ꩻပါꩻ၊ ကယူႏလꩻတွင်ꩻနဝ်ꩻနဝ်ꩻ လောႏဘꩻ၊ ဒေါႏသꩻ၊ မောႏဟꩻထွာတဝ်း၊ သꩻရေꩻ၊ သꩻချမ်ꩻသာႏ၊ ဝွေꩻနောဝ်ꩻ ရိုꩻဗာႏ အားထွုတ်"သံဃာနုဿတိကမ္မဋ္ဌာန်ꩻ"နောဝ်ꩻသွူ။ ၄။ သာႏသနာႏကိုယို အရိယာႏတပဲ့ꩻနဝ်ꩻ အုံထာꩻအဝ်ႏယူႏလꩻ ခူꩻလိမ်ꩻခူꩻပြန်ႏ သီႏလဂွုဏ်ႏ၊ ကယူႏလꩻအတွင်ꩻနဝ်ꩻနဝ်ꩻ လောႏဘꩻ၊ ဒေါႏသꩻ၊ သꩻမောႏဟꩻထွာတဝ်း၊ သꩻရေꩻ၊ နစ်သက်၊ သꩻချမ်ꩻသာႏ၊ ဝွေꩻနဝ်ꩻ ရိုꩻဗာႏ အားထွုတ်"သီလာနုဿတိကမ္မဋ္ဌာန်ꩻ"နောဝ်ꩻသွူ။ ၅။ သာႏသနာႏကိုယို အရိယာႏတပဲ့ꩻနဝ်ꩻ အုံထာꩻအဝ်ႏယူႏလꩻ ခူꩻလိမ်ꩻခူꩻပြန်ႏ စာႏဂဂွုဏ်ႏ၊ ကယူႏလꩻအတွင်ꩻနဝ်ꩻနဝ်ꩻ လောႏဘꩻ၊ ဒေါႏသꩻ၊ မောႏဟꩻထွာတဝ်း၊ သꩻရေꩻ၊ သꩻချမ်ꩻသာႏ၊ ဝွေꩻနဝ်ꩻ ရိုꩻဗာႏ အားထွုတ်"စာဂါနုဿတိကမ္မဋ္ဌာန်ꩻ"နောဝ်ꩻသွူ။ ၆။ သာႏသနာႏကိုယို အရိယာႏတပဲ့ꩻနဝ်ꩻ ယူႏနုဲင်းယို 'လူꩻစတုမဟာႏရာဇ်၊ လူꩻတာႏဝတိံသာႏ၊ လူꩻယာႏမာႏ၊ လူꩻတုသိတာႏ၊ လူꩻနိမ္မာနရတိ၊ လူꩻပရနိမ္မိတ ဝသဝတ္တီသီးဖုံႏတဲ့နဝ်ꩻ၊ လူꩻဗျဟ္မာႏသီးဖုံႏတဲ့နဝ်ꩻ ကွပ်သဒ္ဓါႏတရာꩻအဝ်ႏ၊ ကွပ်သီႏလအဝ်ႏ၊ ကွပ်ကုသိုလ်ႏအဝ်ႏမꩻ ထင်ႏထွာလꩻလူꩻ၊ ထင်ႏထွာလꩻဗျဟ္မာႏ၊ ခွေတဲ့ သဒ္ဓါႏတရာꩻအဝ်ႏ၊ သီႏလအဝ်ႏ၊ ကုသိုလ်ႏအဝ်ႏ' ယူႏခူꩻလိမ်ꩻခူꩻပြန်ႏနုဲင်းနဝ်ꩻ၊ ကယူႏနုဲင်းနဝ်ꩻတွင်ꩻ လောႏဘꩻ၊ ဒေါႏသꩻ၊ မောႏဟꩻထွာတဝ်း၊ သꩻရေꩻ၊ သꩻချမ်ꩻသာႏ၊ ဝွေꩻနဝ်ꩻ အသက်သေႏ အွဉ်ႏလူꩻဗျဟ္မာႏ၊ တွေꩻတဲ့ သဒ္ဓါႏ၊ သီႏလ၊ စာႏဂအဝ်ႏ နုဲင်းလူꩻဗျဟ္မာႏနေနေ၊ ယူႏခူꩻလီမ်ꩻခူꩻပြန်ႏ နုဲင်းနဝ်ꩻတဲင်တွော့ꩻ ဝွေꩻနဝ်ꩻ ရိုꩻဗာႏ အားထွုတ် "ဒေဝတာနုဿတိကမ္မဋ္ဌာန်ꩻ"နောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ ဆက္ကနိပါတ်၊ မဟာနာမသုတ်)