အန္တိမအဂ္ဂိဈာပနကုသိုလ်ႏဝင်ႏ

ငဝ်းဆုꩻဖေႏ ကုသိုလ်ႏဝင်ႏ ၁။ သာဓုကီဠန ပွယ်ꩻသဘင်ႏ၊ သံႏဝွေႏဂဉာဏ်ႏ ယံကထွာ၊ ကျွꩻထင်ႏကူꩻငါ ဖေႏသဘော်ꩻ၊ ဘဝင်ႏစိတ်ဇော်ꩻ ဘိဇ္ဇန၊ မယ်ꩻတဝ်းအနိစ္စ ဘုံႏလောကီႏ၊ ဒုက္ခဖြီႏဖြီႏ ဆင်ꩻရယ်ꩻခြွဉ်း၊ အနတ္တလွဉ်းလွဉ်း ခန္ဓာႏခြုံ၊ လောကလိုꩻဒုံ မနုဿာႏ၊ လိုꩻလူꩻဗျဟ္မာႏ ခမ်းလောက၊ အဇ္ဇသွေဝ သုဝေဝါ၊ ပေါႏအဝ်ႏသဲင်ꩻထွာ ဝိညာဏ်ႏသား၊ စိမ်ပေႏစိမ်ဆား စိမ်တလောင်ꩻ၊ လိုꩻလမ်းလိုꩻကျောင်ꩻ မရိုꩻဗာႏ၊ အနိစ္စခန္ဓာႏ စွဉ်ႏခြေင်ခြေင်၊ ပါꩻမုဲင်ꩻကဲးထေင် ဆန်မလꩻ၊ ဘုရာꩻဆုမ္မꩻ ဩဝါဒ၊ ရူပံဘိဇ္ဇန ပꩻပြုဲင်ပြင်ꩻ၊ သံႏဝွေႏဂခန်ꩻ အဲ့ꩻမဲ့ထွား၊ ဆရာႏတောႏဗွေႏဗွန်ဖြား ပွယ်ꩻသင်္ဂျိုဟ်ႏ၊ ဝင်ႏဗာႏကုသိုလ်ႏ ကလူႏတန်ꩻ၊ မဂ်ဖိုလ်ႏဝေင်ꩻခံꩻ ခမ်းနိဗ္ဗာန်ႏ၊ မန်ႏမန်ႏယံကလꩻဗာႏဝင်ꩻကွိုနဲးဟွေး----။

၂။ အန္တိမဆုဲင်ꩻသွတ်ꩻ သွဉ်တမာ၊ ကုသိုလ်ႏယံထွာ သွဉ်နိုꩻဆောႏ၊ ဗွေႏဗွန်ဖြားဆရာႏတောႏ ပွယ်ꩻဖစ်ပင်ꩻ၊ ရူပံအနိစ္စံ ပဿတိ၊ ယူႏသော့ꩻအောက်မေ့ ထာꩻသေဉာဏ်ႏ၊ မယ်ꩻတဝ်းရုပ်နာမ်ႏ အတ္တဘော၊ ဘိဇ္ဇနဓမ္မော ကုဲင်ပꩻလီ၊ လွစ်တဝ်းထာꩻသီ လောကဓံႏ၊ ထွာကုဲင်ဖေါက်ပြန်ႏ ခွဲးခူꩻလိမ်ꩻ၊ အဲဉ်ထဝ်းထာꩻငိမ်ꩻ လောကကို၊ စိမ်မူႏစိမ်ခို ကိုယ်ကာႏယ၊ ဒုက္ခအနတ္တ ဘုရာꩻဟော်ꩻ၊ ထာꩻသေသဘော်ꩻ ပညာႏဉာဏ်ႏ၊ ပွာꩻသော့ꩻဆင်ႏချင်ႏ ဝင်ꩻလုဲင်းနော၊ စွုမ်ႏဖြာꩻကူꩻကော နီခန္ဓာႏ၊ သဗ္ဗေသင်္ခါရာႏ အနိစ္စ၊ ဒုက္ခအနတ္တ လက္ခဏာႏ၊ ဒင်ႏဝင်ꩻသိက္ခာႏ နီကိုယ်ႏကောင်ꩻ၊ သံႏဝွေႏဂခြောင်ꩻ အွဉ်ႏနယ်ထွား၊ ဆရာႏတောႏဗွေႏဗွန်ဖြား ကူꩻထင်ႏစံႏ၊ ဘဝလူꩻခွင်ႏ နိဗ္ဗာန်ႏပွယ်ꩻ၊ ကလွဉ်အံႏခွယ်ꩻ ဝုဲင်ႏကေႏညိုႏ၊ ဝင်ႏဗာႏကုသိုလ်ႏ ခမ်းနိဗ္ဗာန်ႏ၊ မန်ႏမန်ႏယံကလꩻဗာႏဝင်ꩻကွိုနဲးဟွေး---။

၃။ အာဗာဓာယ နီခန္ဓာႏ၊ ထာꩻဆာရောႏဂါႏ အခြုံးခယ်ꩻ၊ အဲဉ်ထဝ်းအမယ်ꩻ မပုံႏသေႏ၊ တန်ထွူတဲင်ပေႏ ဖြားတဗျ၊ အိုနာဇိဏ္ဏ ဖြားယုတ်ယွမ်ꩻ၊ ဗူႏဗန်ႏသောင်ꩻပြောင်ꩻ သာနွို့ထန်ႏ၊ ခန္ဓာႏဝိညာဏ်ႏ ထိုꩻပေႏဖြီ၊ အာပေါဓာတ်ထီ ပထဝီႏ၊ လွေꩻသဲင်ꩻမထီႏ ဓာတ်တေဇော၊ ဆောင်ႏကန်ဝါယော တလီꩻထွာႏ၊ နီနမ်းခန္ဓာႏ အတ္တဘော၊ တမယ်ꩻတဝ်းနော နီတွမ်ႏနာꩻ၊ မူႏခိုစွုမ်ႏဖြာꩻ ဗွန်ဗွန်ပီ၊ ဘုံႏတန်သွံဆီ ပုဲင်တလွာႏ၊ လိုꩻလူꩻဗျဟ္မာႏ ဝွေႏနေႏယျ၊ ဗျာဓိမရဏ မလွယ်ꩻကင်ꩻ၊ မော့ꩻဗာႏရင်ꩻရင်ꩻ မန်ႏစိက္ချ၊ ကူꩻထန်ႏနယ်ပျꩻ ရပ်ဘုံႏပျန်ႏ၊ ဘဝလူꩻခွင်ႏ နိဗ္ဗာန်ႏဒုံ၊ မရဏထေရ်ႏဗွန် ပွယ်ꩻသင်္ဂျိုဟ်ႏ၊ ကလွဉ်လူႏတွိုႏ ဝင်ႏကုသိုလ်ႏ၊ ချမ်ꩻသာႏမဂ်ဖိုလ်ႏ ခမ်းနိဗ္ဗာန်ႏ၊ မန်ႏမန်ႏယကလꩻဗာႏဝင်ꩻကွိုနဲးဟွေး----။

၄။ ရူပံ ဘိက္ခဝေ အနတ္တာ၊ တပဲ့ꩻဖုံႏအာ အွိုးရဟန်ꩻ၊ ဘုရာꩻဟော်ꩻလင်ꩻ အွိုးဘိက္ခူႏ၊ သံႏဝွေႏထာꩻယူႏ နိကာယ၊ ထွာစွဉ်ႏအနတ္တ သုံꩻမဝင်ႏ၊ အခွဉ်ႏမထန်ႏ နုဲင်းညိုႏတိုမ်၊ ခန္ဓာႏနမ်းခြုံ အဇ္ဈတ္တ၊ အပြင်တွမ်ႏအပ ကိုတွမ်ႏထန်ႏ၊ စွိုးနုဲင်းဝါႏဗင်ႏ တဝေ့ꩻသဲင်၊ အဲဉ်ထဝ်းအကဲဉ် နုဲင်းငခြုံး၊ တလောကလိုမ်း လူꩻတွမ်ႏလိုꩻ၊ ဝိညာဏ်ႏသားမျိုꩻ သတ္တဝါႏ၊ ငတ်ꩻပါꩻခန္ဓာႏ မန်ႏသမျ၊ ပေါႏအဝ်ႏလꩻနေက မတယ်ꩻမယ်ꩻ၊ ဒုက္ခဆင်ꩻရယ်ꩻ ဗာႏခြေင်ခြေင်၊ ဖြူႏဖြွို့ဖြင်းသေင် အနတ္တ၊ အနျအစ ထိုမ်ႏမမော့ꩻ၊ ခြူႏခြီႏတဗော့ꩻ မသျင်ꩻလျင်ꩻ၊ ဥဒ္ဓုမာတကံ အကောင်ပုတ်၊ ပသံစက်စုတ် နီခန္ဓာႏ၊ သိုမ်ပါꩻလက္ခဏာႏ ဒင်ႏဝင်ꩻလုဲင်း၊ ပွာꩻသွော့ကုဲင်းကုင်း နလုံꩻသွင်ꩻ၊ ဘာႏဝနာႏကမ္မဋ္ဌာန်ꩻ ဒွတ္တိံသ၊ သာဓုကီဠန သံႏဝွေႏခန်ꩻ၊ ကလွဉ်လူႏတန်ꩻ ပွယ်ꩻသင်္ဂျိုဟ်ႏ၊ ဝင်ႏဗာႏကုသိုလ်ႏ ခမ်းနိဗ္ဗာန်ႏ၊ မန်ႏမန်ႏယံကလꩻဗာႏဝင်ꩻကွိုနဲးဟွေး---။

၅။ သဗ္ဗေသင်္ခါရာ အနိစ္စ၊ ဒုက္ခအနတ္တ ဘုရာꩻဟော်ꩻ၊ သင်္ခါရသဘော်ꩻ လို့လို့စင်၊ ဇမ္ဗူႏကျွန်ꩻကင် ကပ်ကမ္ဘာႏ၊ လိုꩻလူꩻဗျဟ္မာႏ ဝွေႏနေႏယျ၊ သွံဘုံႏလောက ပုဲင်တနယ်ႏ၊ လစ်ꩻပါꩻအပါယ်ႏ ဝိညာဏ်ႏသား၊ စိမ်ပေႏစိမ်ဖြား စိမ်တလောင်း၊ လိုꩻလမ်းလိုꩻကျောင်ꩻ မရိုꩻဗာႏ၊ မန္ဓတ်စက္ကျာႏ ပွိုင်ႏလစ်ꩻကျွန်ꩻ၊ မလွိုဆန်ꩻနွောင်ꩻ သင်္ခါႏရ၊ ဘင်္ဂက္ခဏ ရုပ်တွမ်ႏနာမ်ႏ၊ ထွာကုဲင်ဖေါက်ပြန်ႏ ခွဲးခူꩻလိမ်ꩻ၊ တမဲ့ထဲင်းဆိမ်ꩻ ဝွေꩻမအုံ၊ ခန္ဓာႏရုပ်ခြုံ နိကာယ၊ မယ်ꩻတဝ်းအနိစ္စ မပုံႏသေႏ၊ ခွိုးလျားစွဉ်ႏနုဲင်းမေႏ ကညိုးညယ်ꩻ၊ ထွာစွဉ်ႏထာꩻဆင်ꩻရယ်ꩻ ကဒုက္ခ၊ နီနမ်းကာႏယ ခန္ဓာႏခြုံ၊ ဘဝလိုꩻဒုံ တဆူးဆင်ႏ၊ သံႏဝွေႏဂဉာဏ်ႏ ယံကထွာ၊ ကျွꩻကူꩻအွဉ်ငါ ဗွေႏဗွန်ဖြား၊ အဲ့ꩻမဲ့ဗွောင်နား ထွားသွော့ဝင်ꩻ၊ နမ်းရင်ꩻတာႏရင်ꩻ တန်တွမ်ႏပေႏ၊ သွင်ꩻဝင်ꩻသံႏဝွေႏ နီဘဝ၊ ဇာတိဒုက္ခ ယံလွစ်ထန်ႏ၊ သင်္ခါႏရဝဋ်ကံႏ ယံကင်ꩻညာꩻ၊ ဒါႏနလိုႏမာꩻ သီႏလကံ၊ ဘာႏဝနာႏငဝ်းယံ ကမ္မဋ္ဌာန်ꩻ၊ ဝိဿနာႏနမ်းရင်ꩻ လိုႏအာႏထုတ်၊ ဆာဆီဖြားကွုတ် ကလွဉ်တွိုႏ၊ ပွယ်ꩻဖစ်သင်္ဂျိုဟ်ႏ သမဏ၊ သာဓုကီဠန ပွယ်ꩻသဘင်ႏ၊ ကုသိုလ်ႏလွဉ်ဝင်ႏ လူႏဗာႏဝင်ꩻ၊ မဂ်ဖိုလ်ႏဝေင်ꩻခံꩻ ခမ်းနိဗ္ဗာန်ႏ၊ မန်ႏမန်ႏယံကလꩻဗာႏဝင်ꩻကွိုနဲးဟွေး---။