အပရိဟာနိယ-တရာꩻနွုတ်ꩻပါꩻ
"သာရန္ဒဒသုတ် (အပရိဟာနိယ-တရာꩻနွုတ်ꩻပါꩻ)" အွိုးခꩻတလဲင်ႏ- နီဗွေႏဘုရာꩻအောဝ်ႏအုံ ဝွေႏသာႏလီႏခမ်း 'သာရန္ဒ-စေႏတီႏ'ထျꩻတွင်ꩻ ခွန်နင်ꩻဝွေႏသာႏလီႏခမ်းသား၊ ဖြားဆားတန်ပေႏ၊ လွဉ်ရိုႏသေႏ၊ ဝုဲင်ႏဘုရာꩻထွူခါ အုံလင်ꩻချာ ပငါပရာꩻနဝ်ꩻသွူ။ နီဗွေႏဘုရာꩻရိုꩻ- "တကာႏလိစ္ဆဝီႏသီးဖုံႏဟွေး- ခွေအီႏဟော်ꩻဖေႏသီ 'အပရိဟာနိယ'တရာꩻနွုတ်ꩻပါꩻ၊ အွဉ်ႏသꩻဒါႏဒါႏ၊ နာႏလွသွော့တရာꩻနဝ်ꩻဟုဲင်း" "မွေးသွူဗွေႏ- နီသွဉ်းသီး သꩻရေꩻငါႏ၊ တန်တန်ပေႏပေႏ-ရိုႏရိုႏသေႏသေႏ နာႏလွဒျာႏ ဗွေႏဩ" "ခွန်လိစ္ဆဝီႏသီးဖုံႏဟွေး- တဆွုတ်ယွုတ်နွောင်ꩻတဝ်း 'အပရိဟာနိယ'တရာꩻနွုတ်ꩻပါꩻကရိုꩻနောဝ်ꩻ- ၁။ တကာႏခွန်သီးဖုံႏနဝ်ꩻ အုံကွံ(စီꩻဝွေꩻ)သေႏသေႏသွော့လို့ဝင်ꩻလုဲင်း၊ အလဲင်ႏပေါင်ꩻအာအာ မဉ်ႏအဝ်ႏအုံကွံသေႏသေႏနေကလို့ဝင်ꩻနောဝ်ꩻ အောဝ်ႏစီꩻပွါꩻတိုꩻတက်တာႏလွုမ်ꩻ၊ ဆွုတ်ယွုတ်ခရာႏအဲဉ်ထောဝ်း၊ 'အုံကွံသေႏဒျာႏ-တိုꩻတက်ဗာႏ'ယွုမ်းအံႏသွော့နုဲင်းနောဝ်ꩻဟုဲင်း။ ၂။ လွောင်ႏလွောင်ႏဗူႏဗူႏ အုံကွံသွော့လို့ဝင်ꩻ၊ လွောင်ႏလွောင်ႏဗူႏဗူႏ အုံကွံ(စီꩻဝွေꩻ-ဆွေꩻနွေꩻ၊ တွိုင်ႏပင်ႏ)လွသွော့ ခမ်းတွက်ထီတာႏဖုံႏလုဲင်း၊ ပွယ်ꩻအုံကွံမဉ်ႏထွူမꩻ ထွိုင်ႏသဲင်ꩻ(သဲင်ꩻတရတ်တရစ်မွုန်းထာꩻ)ဟုဲင်း၊ ပေါႏမာꩻနုဲင်းနဝ်ꩻနဝ်ꩻ အဝ်ႏစီꩻပွါꩻတိုꩻတက်တာႏလွုမ်ꩻ၊ ဆွုတ်ယွုတ်ခရာႏအဲဉ်ထောဝ်း။ ၃။ (အကျိုꩻအာအာ၊ အမျိုꩻကထွာထွာ) အထွုံꩻဟောဝ်စခါ (စီꩻကန်ꩻဟောဝ်စခါ)ဖုံႏနဝ်ꩻ ယားကုဲင်ထိုꩻမွုန်း၊ လွောက်ꩻနာႏလွဉ်ꩻသွော့ဟုဲင်း၊ ပေါႏသီအဝ်ႏလွောက်ꩻနာႏလွဉ်ꩻ ထွုံꩻဟောဝ်(စီꩻကန်ꩻဟောဝ်)စခါနောဝ်ꩻ အဝ်ႏစီꩻပွါꩻတိုꩻတက်လွုမ်ꩻ၊ ဆွုတ်ယွုတ်ခရာႏအဲဉ်ထောဝ်း။ ၄။ ရိုႏသေႏလွသွော့ ခွန်ဖြားခွန်တန်၊ လိုꩻဖြားလိုꩻတန်ဖုံႏနဝ်ꩻလုဲင်း၊ နာႏလွသွော့ လိုꩻဖြားလိုꩻတန်ငေါဝ်းဖုံႏနဝ်ꩻဟုဲင်း၊ ပေါႏသီအဝ်ႏရိုႏသေႏ လိုꩻဖြားလိုꩻတန်၊ ပေါႏအီအဝ်ႏနာႏ လိုꩻဖြားလိုꩻတန်ငေါဝ်းနောဝ်ꩻ အဝ်ႏစီꩻပွါꩻတိုꩻတက်လွုမ်ꩻ၊ ဆွုတ်ယွုတ်ခရာႏအဲဉ်ထောဝ်း။ ၅။ သိမ်ꩻနွိုင်ႏမွုန်း ဝင်ꩻပိုမူႏ၊ ထူႏနွိုင်ႏမွုန်း ဝင်ꩻပိုမာဟုဲင်း၊ ပေါႏသီမ်ꩻနွိုင်ႏတဝ်း ဝင်ꩻပိုမူႏနဝ်ꩻ အဝ်ႏစီꩻပွါꩻတိုꩻတက်လွုမ်ꩻ၊ ဆွုတ်ယွုတ်ခရာႏအဲဉ်ထောဝ်း။ ၆။ သီသာႏသနာႏခြေင်ႏ၊ သီလူꩻခြေင်ႏဖုံႏနဝ်ꩻတဲ့ တင်ႏစွူစွူဒျာႏ နုဲင်းစခါအတွိုင်ꩻလုဲင်း၊ (လူႏတန်ꩻသွော့ထာꩻဟုဲင်း)၊ ပေါႏသီလူႏတန်ꩻထာꩻနဝ်ꩻ အဝ်ႏစီꩻပွါꩻတိုꩻတက်လွုမ်ꩻ၊ ဆွုတ်ယွုတ်ခရာႏအဲဉ်ထောဝ်း။ ၇။ တကျွꩻလွဉ်ဒွိုန်း ရဟန္တာႏ (ရဟန်ꩻသံဃာႏ)ဖုံႏနဝ်ꩻတဲ့ ဖေႏကကျွꩻလွဉ်၊ ကကျွꩻလွဉ်ဒါႏ ရဟန္တာႏ(ရဟန်ꩻသံဃာႏ)ဖုံႏနဝ်ꩻတဲ့ ဖေႏကအုံဗာႏ ချမ်ꩻချမ်ꩻသာႏသာႏနဝ်ꩻ ပွေါးရဲ့ပ်ကာႏကွယ်ႏဖေႏ၊ ရိုႏရိုႏသေႏသေႏ ဝွတ်ပတ်ဖေႏသွော့ဟုဲင်း၊ ပေါႏသီမာꩻနုဲင်းနဝ်ꩻနဝ်ꩻ အဝ်ႏစီꩻပွါꩻတိုꩻတက်တာႏလွုမ်ꩻ၊ ဆွုတ်ယွုတ်ခရာႏအဲဉ်ထောဝ်းနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ သတ္တကနိပါတ်၊ သာရန္ဒဒသုတ်)[၁][၂]