အပဲ့စ်ဘဝယိုဘဝငါ
"ဝဇ္ဇသုတ် (အပဲ့စ်ခံႏဗာႏဘဝယို၊ အပဲ့စ်ခံႏဗာႏဘဝငါ)"
အွိုးခꩻတလဲင်ႏ- နီဗွေႏဘုရာꩻအဝ်ႏအုံ သာဝတ္ထိခမ်း၊ ကျောင်ꩻဇေႏတဝွန်ႏကိုအတွင်ꩻ ဟော်ꩻဖေႏရဟန်ꩻသီး တရာꩻနုဲင်းယို- "ရဟန်ꩻသီးဖုံႏဟွေး- 'အပဲစ်'ကရိုꩻနဝ်ꩻ အဝ်ႏနီမျိုꩻ၊ နီမျိုꩻကရိုꩻနဝ်ꩻ- ၁။ ဒိဋ္ဌိ ဓမ္မိက ဝဇ္ဇ - အပဲစ်ခံႏဗာႏ ဘဝယိုခါ ၂။ သမ္ပရာယိက ဝဇ္ဇ- အပဲစ်ခံႏဗာႏ ဘဝငါ၊ အဝ်ႏနီမျိုꩻ နုဲင်းနောဝ်ꩻသွူ။ ရဟန်ꩻသီးဖုံႏဟွေး- 'ဒိဋ္ဌဓမ္မိကဝဇ္ဇ-အပဲစ်ခံႏဗာႏ ဘဝယို'ကရိုꩻနဝ်ꩻ- ရာဇာနော စောရံ ဂဟေတွာ ဝိဝိဓာ ကမ္မကာရဏာ-ခွန်ဆွမ်ꩻလꩻတခွန်ꩻတဲင် နိစ္စက်အမျိုꩻမျိုꩻ၊ တွဲႏတွမ်ႏခွဉ်းတဲ့နဝ်ꩻ၊ တို့ပ်ꩻတွမ်ႏစူတဲ့နဝ်ꩻ၊ ပတ်ꩻတွမ်ႏခင်ႏတဲ့နဝ်ꩻ၊ တွာႏတရွစ်ꩻတဲ့နဝ်ꩻ၊ ယမ်းအကတူႏတဲ့နဝ်ꩻ၊ ယမ်းအငွဉ်ꩻတဲ့နဝ်ꩻ၊ စွိုင်တွမ်ႏတဖြွီꩻတဲ့နဝ်ꩻ၊ စွိုင်တွမ်ႏပသီႏတဲ့နဝ်ꩻ၊ အမဲ့ငါယော့ꩻ အမဲ့ငါသွီႏ၊ ထီႏဗာႏဘဝယိုခါ။ ရဟန်ꩻသီးဖုံႏဟွေး- ယင်ဟန်ႏနဝ်ꩻ တဒွေါ့ꩻထိုꩻအစူတဲ့အဝ်ႏ၊ တဒွေါ့ꩻထိုꩻအခင်ႏတဲ့အဝ်ႏ၊ သွို့ꩻထိုꩻအနားလာႏတဲ့အဝ်ႏ၊ တွဲႏတိုအကတူႏတဲ့အဝ်ႏ၊ အွာထန်ႏအမဲ့ခူꩻတဲ့အဝ်ႏ၊ သွို့ꩻထိုꩻအနေ့ꩻဖူတဲ့အဝ်ႏ၊ သွို့ꩻထိုꩻအဖြောင်းဗီႏတဲ့အဝ်ႏ၊ ပွာႏထိုꩻအကတူႏပီတဲ့အဝ်ႏ-စတဲင်နဝ်ꩻဖုံႏတဲ့ ထီႏဗာႏဘဝယိုခါနောဝ်ꩻသွူ။ ရဟန်ꩻသီးဖုံႏဟွေး- ယင်ဟန်ႏနဝ်ꩻ ဝင်ꩻရွတ်ꩻတွမ်ႏထီလျားတဲ့အဝ်ႏ၊ ဝင်ꩻဆူတွမ်ႏထီလျားတဲ့အဝ်ႏ၊ ဝင်ꩻရွတ်ꩻတွမ်ႏနားမန်ꩻလျားတဲ့အဝ်ႏ၊ ဝင်ꩻထောက်ꩻလူးတွမ်ႏ နားမန်ꩻလျားတဲ့အဝ်ႏ၊ အွဉ်ႏဗေင်ႏတအာထွူတဲင် အဖြောင်းကိုနဝ်ꩻ ဝင်ꩻဆျာꩻသော့ꩻထီလျားတဲ့အဝ်ႏ၊ အဖြောင်းကိုနဝ်ꩻ ဝင်ꩻဆျာꩻသော့ꩻနားမန်ꩻလျားတဲ့အဝ်ႏ-စတဲင်နုဲင်းနဝ်ꩻတဲ့ ထီႏဗာႏဘဝယိုခါနောဝ်ꩻသွူ။ ရဟန်ꩻသီးဖုံႏဟွေး- ယင်ဟန်ႏနဝ်ꩻ ဝင်ꩻကျꩻပေါက်သေင်ႏမွူး၊ အစူဝင်ꩻစွိုင်ခါꩻ၊ အခင်ႏဝင်ꩻစွိုင်ခါꩻ၊ ဝင်ꩻဆဲ့ꩻတွမ်ႏပသီႏစျူ၊ ဝင်ꩻထောင်းတွမ်ႏဗင်၊ ဝင်ꩻထောင်းတွမ်ႏနꩻ၊ ဝင်ꩻခꩻတွမ်ႏခြီႏ၊ ဝင်ꩻတွဲႏတွမ်ႏပသီႏ၊ ဝင်ꩻလဲမ်ႏတွမ်ႏမေႏ၊ ဝင်ꩻနိစ္စက်-စတဲင်နုဲင်းနဝ်ꩻတဲ့ ထီႏဗာႏဘဝယိုခါနောဝ်ꩻသွူ။ ရဟန်ꩻသီးဖုံႏဟွေး- ကထင်ႏထီႏဗာႏနုဲင်းနဝ်ꩻတဲင် လိုꩻကသူႏသေထာꩻသားဖုံႏနဝ်ꩻ ဟွုန်ငမ်းသꩻဝꩻ လꩻသံႏဝွေႏဂပငါပရာꩻ၊ ခွေမဉ်ႏမာꩻ ထာꩻတဟဝ်တဝ်း အကုသိုလ်ႏဒုစရဲက်မျိုꩻနဝ်ꩻ မဲ့ꩻခွေအီႏခံႏဗာႏနုဲင်းသူꩻ၊ မဲ့ꩻဝင်ꩻနိစ္စက်ခွေနုဲင်းပါꩻသူꩻ၊ မဲ့ꩻဝင်ꩻမာꩻသီထိုꩻခွေနုဲင်းပါꩻသူꩻ-စတဲင်ယူႏဝွေႏဖန်ႏ နေးတွမ်ႏဉာဏ်ႏ မာꩻဒျာႏအဟောဝ်၊ ဒေါ့ꩻဒျာႏအဟောဝ်၊ ကျံႏဒျာႏအဟောဝ်၊ ထိုမ်ႏမာꩻအာအာဒျာႏ ကုသိုလ်ႏနောဝ်ꩻသွူ။ ရဟန်ꩻသီးဖုံႏဟွေး- သမ္ပရာယိကဝဇ္ဇ-အပဲစ်ခံႏဗာႏ ဘဝငါကရိုꩻနဝ်ꩻ နမ်းတဲ့ မာꩻဒျာႏအကုဲင်၊ ဖြောင်းတဲ့ဒေါ့ꩻဒျာႏအကုဲင်၊ သꩻတဲ့ကျံႏဒျာႏအကုဲင်၊ မာꩻဒျာႏဒုစရဲက်၊ မာꩻအကုသိုလ်ႏတွော့ꩻ ခန္ဓာႏကုဲင်လီ ကထင်ႏသီနဝ်ꩻ လွေꩻထွာတိရစ္ဆာန်ႏ၊ လွေꩻထွာပိတ္တာႏ၊ လွေꩻထွာအသူႏရကာယ်ႏ၊ လင်ꩻထဲ့ငါးရုဲင်ꩻ-စတဲင်နုဲင်းနဝ်ꩻနဝ်ꩻ အပဲ့စ်အီႏလွေꩻခံႏဗာႏ ဘဝငါတာႏနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ ဒုကနိပါတ်၊ ဝဇ္ဇသုတ်)[၁][၂]