အမျတ်သွတ်ꩻကေႏညိုႏခရာႏ
"အဂ္ဂပ္ပသာဒ (အမျတ်သွတ်ꩻ ကေႏညိုႏခရာႏလစ်ꩻမျိုꩻ)" ရဟန်ꩻသီးဖုံႏဟွေး- အမျတ်သွတ်ꩻ ကေႏညိုႏခရာႏနဝ်ꩻ အဝ်ႏလစ်ꩻမျိုꩻ၊ လစ်ꩻမျိုꩻကရိုꩻနောဝ်ꩻ- ၁။ တထာဂတော အရဟံ သမ္မာသမ္ဗုဒ္ဓေါ- ဗွေႏဘုရာꩻ ၂။ အရိယော အဋ္ဌင်္ဂိကော မဂ္ဂေါ- မဂ္ဂင်ႏသွစ်ꩻပါꩻ ၃။ တဏှာက္ခယော ဝိရာဂေါ နိရောဓေါ နိဗ္ဗာနံ- နိဗ္ဗာန်ႏ ၄။ တထာဂတ သာဝကသံဃော- ဘုရာꩻတပဲ့ꩻသံဃာႏ 'ဗွေႏဘုရာꩻ၊ မဂ္ဂင်ႏသွစ်ꩻပါꩻ၊ နိဗ္ဗာန်ႏ၊ သံဃာႏ'ယိုလစ်ꩻမျိုꩻနဝ်ꩻ အမျတ်သွတ်ꩻ ကေႏညိုႏခရာႏနဝ်ꩻသွူ။ ရဟန်ꩻသီးဖုံႏဟွေး- သတ္တဝါႏ အခင်ႏအဲဉ်ထဝ်းမျိုꩻ၊ သတ္တဝါႏ အခင်ႏအဝ်ႏနီပင်မျိုꩻ၊ သတ္တဝါႏ ခင်ႏအဝ်ႏလစ်ꩻပင်မျိုꩻ၊ သတ္တဝါႏ ထီႏအနမ်း၊ တထီႏတဝ်းအနမ်း-စတဲင် သꩻသားကားကဝ်ႏ (တဖြာꩻတောႏ)ကိုနဝ်ꩻ 'တထာဂတ အရဟံ သမ္မာသမ္ဗုဒ္ဓ-ဗွေႏဘုရာꩻနဝ်ꩻ ထွာအမျတ်သွတ်ꩻ ကေႏညိုႏခရာႏ'နောဝ်ꩻသွူ။ ရဟန်ꩻသီးဖုံႏဟွေး- ကံႏ၊ သꩻ၊ ဥတု၊ အာဟာႏရ နေးတွမ်ႏအကျောင်ꩻတရာꩻယိုလစ်ꩻပါꩻ ကခံႏဗာႏအမွဉ်းအဖျင်(ကခံႏဗာႏအပျုအပျင်ႏ) သင်္ခတတရာꩻ ကားကအဝ်ႏကိုနဝ်ꩻ 'သမ္မာဝါစာ-ထာꩻဒေါ့ꩻမဲဉ်ႏမွေး၊ သမ္မာကမ္မန္တ-ထာꩻမာꩻမဲဉ်ႏမွေး၊ သမ္မာအာဇီဝ-လွူးနမ်းမဲဉ်ႏမွေး၊ သမ္မာဝါယာမ-သောင်ႏသာကျိုꩻစာꩻမဲဉ်ႏမွေး၊ သမ္မာသတိ-အွဉ်ႏသတိꩻမဲဉ်ႏမွေး၊ သမ္မာသမာဓိ-သꩻစွူမဲဉ်ႏမွေး၊ သမ္မာသင်္ကပ္ပ-ယူႏ(နုဲင်းမုဲင်ꩻ-နုဲင်းမုဲင်ꩻ)မဲဉ်ႏမွေး၊ သမ္မာဒိဋ္ဌိ-သေလွဉ်ꩻ-သေလွဉ်ꩻမဲဉ်ႏမွေး-ကရိုꩻဒါႏ အရိယာႏတဖူꩻခြောင်ꩻ၊ သူႏတောႏကောင်ꩻတဖူꩻထင်ႏ၊ 'မဂ္ဂင်ႏသွစ်ꩻပါꩻ'နောဝ်ꩻ ထွာအမျတ်သွတ်ꩻ ကေႏညိုႏခရာႏနောဝ်ꩻသွူ။ ရဟန်ꩻသီးဖုံႏဟွေး- 'ကံႏ၊ သꩻ၊ ဥတု၊ အာဟာႏရ-အကျောင်ꩻတရာꩻယိုလစ်ꩻပါꩻ မွဉ်းဖျင်ခရာႏ တလိုႏတဝ်းဒွုမ်၊ (ပျုပျင်ႏခရာႏတလိုႏတဝ်းဒွုမ်) ကတထဲ့ꩻဒါႏ တဏှာႏရာႏဂ အဲဉ်ထဝ်းဒွုမ်၊ ကစွိုင်ခါꩻကျꩻတဉ်ႏ သံယော်ꩻဇဉ်ႏ အဲဉ်ထဝ်းဒွုမ်၊ နမ်းဒုက္ခ-သꩻခိုးလျား၊ ထာꩻဒုက္ခအစားစား၊ ထာꩻခိုးလျားအမျိုꩻမျိုꩻ အဲဉ်ထဝ်းဒွုမ်'ကရိုꩻဒါႏ'နိဗ္ဗာန်ႏ'နဝ်ꩻ ထွာအမျတ်သွတ်ꩻ ကေႏညိုႏခရာႏနောဝ်ꩻသွူ။ ရဟန်ꩻသီးဖုံႏဟွေး- တထာဂတ သာဝက၊ ဘုရာꩻတပဲ့ꩻသံဃာႏ လစ်ꩻခိုမ်ꩻသွစ်ꩻမျိုꩻ၊ ကရိုꩻအရိယာႏ အစွိုꩻအဗူႏ-ဂိုဏ်ꩻစတဲင် အလွောင်ႏအဗူႏ အမျိုꩻမျိုꩻကိုနဝ်ꩻ 'သံဃာႏ'နဝ်ꩻ ထွာအမျတ်သွတ်ꩻ ကေႏညိုႏခရာႏနဝ်ꩻသွူ။ ရဟန်ꩻသီးဖုံႏဟွေး- အဂ္ဂေ ပသန္နာနံ အဂ္ဂေါ ဝိပါကော ဟောတိ- အမျတ်သွတ်ꩻ ကေႏညိုႏခရာႏ၊ ကကေႏညိုႏဗာႏသားဖုံႏ ကလꩻဒါႏ အကျိုꩻနောဝ်ꩻတဲ့ ထွာဒျာႏအကျိုꩻမျတ်နောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ စတုက္ကနိပါတ်၊ အဂ္ဂပ္ပသာဒသုတ်)[၁][၂]