အရိယဝံသတရာꩻ
"အရိယဝံသသုတ် (အရိယဝံသတရာꩻ ၄-ပါꩻ)" ရဟန်ꩻသီးဖုံႏဟွေး- အရိယာႏသီး အခွိုꩻအနွယ်ႏ (အရိယဝံသ)တရာꩻနဝ်ꩻ အဝ်ႏလစ်ꩻပါꩻ၊ လစ်ꩻပါꩻကရိုꩻနဝ်ꩻ- ၁။ စီဝရေန သန္တုဋ္ဌော ဟောတိ- ကွို့ꩻသꩻသင်္ကန်ꩻ ၂။ ပိဏ္ဍပါတေန သန္တုဋ္ဌော ဟောတိ- ကွို့ꩻသꩻသွမ်ꩻ ၃။ သေနာသေန သန္တုဋ္ဌော ဟောတိ- ကွို့ꩻသꩻကျောင်ꩻ ၄။ ဘာဝနာရာမော ဟောတိ- ပျောႏလွဉ်ꩻဒျာႏ ဘာႏဝနာႏ ရဟန်ꩻသီးဖုံႏဟွေး- ပေါႏထွာငါသင်္ကန်ꩻ အပ်စပ်မျိုꩻငါ၊ ကားကွို့ꩻကလꩻ အွဉ်ႏသꩻကေႏကေႏနပ်နပ် ရွုံႏဗုဲင်၊ သင်္ကန်ꩻနုဲင်းယိုမꩻ၊ သင်္ကန်ꩻနုဲင်းနဝ်ꩻမꩻ၊ သင်္ကန်ꩻအငိုꩻကားမꩻ အွဉ်ႏသꩻတဝ်းနုဲင်းနဝ်ꩻ၊ စူꩻတဝ်းလောႏဘꩻ၊ စူꩻတဝ်းမာႏန၊ စူꩻတဝ်းထာꩻကျွား၊ ယထာလဒ္ဓ-ကားကလꩻ၊ ကွို့ꩻသꩻကေႏနပ်ဒျာႏဗော့ꩻ (သင်္ကန်ꩻ)နဝ်ꩻ။ အံႏဖြာႏဒျာႏထာꩻကေႏနပ် ဟွူန်မျတ်ဒျာႏထာꩻကွို့ꩻသꩻ၊ ဖေႏကလꩻသင်္ကန်ꩻဟောဝ်တဲင် ထုမ်ႏနေးတဝ်းထာꩻနယ်ꩻကဲက်ꩻ၊ ကော့ꩻမောင်ꩻတဝ်း သင်္ကန်ꩻနုဲင်းယို၊ သင်္ကန်ꩻနုဲင်းနဝ်ꩻ၊ ကလꩻလဲဉ်း သင်္ကန်ꩻနဝ်ꩻတဲ့ နေးတွမ်ႏလောႏဘꩻရွုံႏမွေးတဝ်း၊ နေးတွမ်ႏမောႏဟꩻဗုဲင်မွေးတဝ်း၊ လောႏဘꩻမောႏဟꩻ တအံႏနွောင်ꩻလꩻတဝ်းသꩻ၊ ငမ်းဒျာႏထွာအပဲ့စ်၊ နေးတွမ်ႏပညာႏ ဆင်ႏချင်ႏရွုံႏဗုဲင်ဒျာႏနောဝ်ꩻသွူ။ ရဟန်ꩻသီးဖုံႏဟွေး- သွမ်ꩻ(ဟန်ႏ)တဲ့ ကားကွို့ꩻကလꩻ၊ လꩻနုဲင်းမုဲင်ꩻတဲ့ သွုံꩻဒျာႏ၊ သွမ်ꩻနုဲင်းယိုမꩻ၊ ဟန်ႏနုဲင်းနဝ်ꩻမꩻ၊ ဒဲဉ်ဟောဝ်မꩻ၊ ဟန်ႏအွီႏမꩻ မွေးတဝ်း၊ စူꩻတဝ်းလောႏဘꩻ၊ စူꩻတဝ်းမာႏန၊ စူꩻတဝ်းထာꩻကျွား၊ ယထာလဒ္ဓ-ကားကွို့ꩻကလꩻ၊ ကွို့ꩻသꩻကေႏနပ်ဒျာႏ (သွမ်ꩻ)နောဝ်ꩻ။ အံႏဖြာႏဒျာႏထာꩻကေႏနပ်၊ ဟွူန်မျတ်ဒျာႏထာꩻကွို့ꩻသꩻ၊ ဖေႏကလꩻဒဲဉ်ဟောဝ် ဟန်ႏအွီႏတဲင် ထိုမ်ႏနေးတဝ်းထာꩻအနယ်ꩻကဲက်ꩻ၊ ကော့ꩻမောင်ꩻတဝ်း သွမ်ꩻနုဲင်းယို၊ ဟန်ႏနုဲင်းနဝ်ꩻ၊ ကလꩻလဲဉ်းသွမ်ꩻဟန်ႏနဝ်ꩻ နေးတွမ်ႏလောႏဘꩻသွုံꩻဟန်ႏ၊ နေးတွမ်ႏမောႏဟꩻ အံႏဒဲဉ်မွေးတဝ်း၊ နေးဒျာႏတွမ်ႏပညာႏ၊ ဆင်ႏချင်ႏသွုံꩻဒျာႏနဝ်ꩻသွူ။ ရဟန်ꩻသီးဖုံႏဟွေး- ကျောင်ꩻ၊ ခင်ႏလမ်းတဲ့ ကားကွို့ꩻကလꩻ၊ အုံသော့ꩻဒျာႏ၊ ကျောင်ꩻနုဲင်းယိုမꩻ၊ ခင်ႏလမ်းနုဲင်းနဝ်ꩻမꩻ မွေးတဝ်း၊ စူꩻတဝ်းလောႏဘꩻ၊ စူꩻတဝ်းမာႏန၊ စူꩻတဝ်းထာꩻကျွား၊ ယထာလဒ္ဓ-ကားကွို့ꩻကလꩻ၊ ကွို့ꩻသꩻကေႏနပ်ဒျာႏ (ကျောင်ꩻ)နောဝ်ꩻသွူ။ ရဟန်ꩻသီးဖုံႏဟွေး- ပျောႏဒျာႏတွမ်ႏ သမထဝိပဿနာႏ၊ ပျောႏလွဉ်ꩻဒျာႏတွမ်ႏ ကုသိုလ်ႏတရာꩻ၊ ပယ်ႏနွောင်ꩻထိုꩻလောႏဘꩻ-စတဲင် ကိလေႏသာႏနဝ်ꩻ ပျောႏငါႏ၊ အုံဒျာႏတွမ်ႏပညာႏ၊ နေးဒျာႏတွမ်ႏသတိꩻ၊ ပွိုင်းဝွို့တွမ်ႏသင်္ကန်ꩻ၊ သွမ်ꩻ၊ ကျောင်ꩻ၊ တရာꩻနဝ်ꩻ တအိုပ်ꩻချာတဝ်းနမ်း၊ တသွမ်ꩻသဲ့ꩻ တကဲ့ꩻရဲ့ꩻတဝ်းဝင်ꩻနောဝ်ꩻသွူ။[၁][၂]