အသုဘလင်္ကာႏဆီပါꩻ
အသုဘဆီခန်ꩻ ကမ္မဋ္ဌာန်ꩻ၊ သွင်ꩻသꩻဝင်ꩻနော စွုမ်ႏဖြာꩻဩ ၁။ ဥဒ္ဓုမာတကံ= ဥဒ္ဓုမာတကံႏ ယိုတဆင်ႏ၊ ရိုꩻထင်ႏခွေသီ နာꩻတွမ်ႏနီ၊ ကသီကမား ဖြားတွမ်ႏဆား၊ ခန္ဓာႏခြုံယ အသုဘ၊ လꩻတဲင်နီသာ တွမ်ႏသွံသာ၊ တလီꩻဝါယော ဆောင်ႏထွူနော၊ ယော့ꩻဖေါ်ꩻပွစ်ꩻလန် စူခင်ႏတန်၊ ပွံပမ်ခြေင်းပူႏ နွုမ်ꩻသေင်တူႏ၊ ယူႏတဲင်ပသို့ꩻ ခန္ဓာႏစု၊ ပုံႏတုနုဲင်းမွဉ် ခြေင်းကတွောင်၊ အပွိုင်ခန္ဓာႏ ပေါႏသီပြာႏ၊ မော့ꩻဗာႏရင်ꩻရင်ꩻ ယော့ꩻလွိုင်လင်ꩻ၊ တကင်ꩻတဝ်းမွေး နီနမ်းဟွေး၊ သီယွေးမုဲင်ꩻခါ စွုမ်ႏဖြာꩻထွာ၊ နွုမ်ꩻအွာနွုမ်ꩻသူႏ နီထူꩻဖူႏ၊ ယူႏတဲင်ပသို့ꩻ ခန္ဓာႏစု၊ ဥဒ္ဓုမာတကံႏ ကမွေးမန်ႏ၊ ဧကန်ႏမွော့နော နီယိုဩ။
၂။ ဝိနီလကံ= ဝိနီလကံ ယိုတပင်၊ ပွစ်ꩻလန်ထွူမꩻ အရောင်ႏဗꩻ၊ အီႏပꩻဝီႏဝါး ကြိုႏဗွာလွား၊ တနျာႏတကျောင်ႏ ဖြေင်းသဉ်သွမ်ႏ၊ အရောင်ႏထန်ႏခဉ် ထုဲင်ႏဒွေမဉ်၊ ပဉ်ပြောင်းပဉ်ကွက် ပဉ်ရပ်ရပ်၊ တငက်ထေꩻသဲင်ႏ အမဉ်အဲင်ႏ၊ လုံႏရဲဉ်ႏဖြောင်းစောက် မီႏထူꩻကွပ်၊ ပြောက်ပြက်ဟုမ်ဗူႏ ပွိုးအီႏဖြူႏ၊ ခိုမူႏနာꩻနီ တွိုႏမီႏသီ၊ ကွိုꩻအီခရာႏ မအဝ်ႏဒါႏ၊ ဟဝ်ယာႏတဝ်းမွေး နီနမ်းကွေး၊ မီႏသီးယွေးပြာႏ အီႏမော့ꩻဗာႏ၊ ခန္ဓာႏခြုံယ ငမ်းကျကျ၊ ဝိနီလကံ ဘုရာꩻဖန်၊ ပသံငါႏနောႏ နီယိုဩ။
၃။ ဝိပုဗ္ဗကံ= ဝိပုဗ္ဗကံ သမ်းရိုꩻဖျင်၊ ပေႏတန်မူႏမောင်ႏ ခန္ဓာႏလောင်ႏ၊ အရောင်ႏထန်ႏဗꩻ ထွူတဲင်ပꩻ၊ ကီလကွံႏကီႏ အမဉ်ရီႏ၊ အစီႏထီယုဲင် တဟျာႏပြုဲင်၊ ဗွေဗုဲင်တဖြွတ်ꩻ ထန်ႏလထွတ်ꩻ၊ ဆွတ်ꩻဒါႏယာႏကို အဖြို့ꩻတို၊ နမ်းကြိုတဗာႏ ပြွꩻတနျာႏ၊ တပွါႏလန်လဉ် နံးလွိုင်မဉ်၊ ပတ်ဗဲဉ်အောက်ꩻအဲက်ꩻ စဝ်ႏစွစ်ꩻစဲစ်ꩻ၊ ဖြဲစ်ႏထန်ႏဖြောင်းစောက် နီမဲ့အောက်၊ ပြောက်နေ့ꩻဖူငွါ နားအိုပါ၊ ဒွါရပေါက်ꩻကွတ်ꩻ တဟျာႏထွတ်ꩻ၊ တဖြွတ်ꩻဗဲ့ဗဲ့ ဗို့ꩻယဲ့ယဲ့၊ ပသို့ꩻအဲ့မွေး နီနမ်းဟွေး၊ ဖူးဝေးအမျာꩻ ရုပ်တရာꩻ၊ ခန္ဓာႏခြုံယ ငမ်းကျကျ၊ ဝိပုဗ္ဗကံ ဘုရာꩻဖန်၊ ပသံငါႏနော နီယိုဩ။
၄။ ဝိစ္ဆိဒ္ဒကံ= ဝိစ္ဆိဒ္ဒကံ သမ်းဟော်ꩻဖျင်၊ ခွန်နင်ꩻတွိုးပဲဉ် ကထွာခဲဉ်၊ အမဉ်ထန်ႏထီ ထဲ့ပြုဲင်လီ၊ နီကွို့ꩻနီတွန်း ဖြတ်ꩻနီထွောင်း၊ ထွုန်းငင်းကဒေင် ဖြေ့ပြုဲင်သေင်၊ တရေင်စွိုင်တူႏ လင်ꩻပဉ်ဗူႏ၊ ပုံႏတုပါꩻယား ဖိုးပနား၊ ဖြေ့ဆားသွုန်ႏသိုႏ ထန်ႏကြိုႏကြိုႏ၊ တအိုႏတမွစ် သွမ်ႏရျင်းရွစ်၊ ဒွုန်ခွုတ်အသွုန်ႏ ပြုဲင်ပြင်ꩻတွုန်ႏ၊ တနျာႏပဉ်ဖဲ့ꩻ ငင်းဒေင်ထဲ့၊ ဗော့ꩻလဲ့ꩻအေႏဆား ကျင်ကြီးဖြား၊ အလားယိုနော နီနမ်းဩ၊ ထာꩻခေါဖြီႏဖြီႏ တွာစူမီႏ၊ ထီႏတဝ်းရင်ꩻရင်ꩻ မီႏပြုဲင်ပြင်ꩻ၊ အခန်ꩻနုဲင်းယို မူႏတွမ်ႏခို၊ နမ်းကြိုတဗာႏ တွာနံရာႏ၊ ဟဝ်ယာႏငထဝ်း မန်ႏမွေးတဝ်း၊ ပဉ္စဝ်းဟော်ꩻပျꩻ ငမ်းကျကျ၊ ဝိစ္ဆိဒ္ဒကံ ဘုရာꩻဖန်၊ ပသံငါႏနော နီယိုဩ။
၅။ ဝိက္ခာယိတကံ= ဝိက္ခာယိတကံ သမ်းနယ်ဖျင်၊ ပေႏတန်ခွေနာꩻ ရုပ်တရာꩻ၊ ထင်ႏထွာနီကွို့ꩻ ဟို့ꩻငင်းရွို့၊ ထွီႏဟုမ်ထွို့ꩻရွံ စောက်အာႏဟုမ်၊ ယꩻအွံအဲင်ႏစောက်ꩻ မဲ့ဖြုံႏအောက်ꩻ၊ ကနောက်ꩻခီးလန် ဖြေ့ဆွဉ်ဆန်၊ ထွို့ꩻကန်အဲင်ႏသဲ့ ငင်ႏပွါႏအဲ့ꩻ၊ ပြုဲင်ထဲ့လီဟူႏ ပဉ်လောင်ႏဒူႏ၊ ဖြင်းဖြူႏစဝ်ႏဗျက် လုံႏပြောက်ပြက်၊ စက်စက်ထီလင်ꩻ ဟို့ꩻခြွိုင်းပြင်ꩻ၊ ယွိုင်ꩻယင်ꩻယုဲင်ꩻလဲ့ ဖြေ့ပြုဲင်ထဲ့၊ ကတောင်ခြဲ့ဆွတ်ꩻ သꩻရာႏလွတ်ꩻ၊ စွတ်ꩻစတ်ꩻအယာႏ ထွီႏအံႏပွါႏ၊ တနျာႏတဲက်ꩻထံ ရွို့ꩻတအင်၊ လန်လဉ်ပဉ်ခြုံး အလွီးဖုံး၊ အသုံးမကျ သေင်ဖြွို့ဖြ၊ ကာယနီနမ်း ခန္ဓာႏဖြင်း၊ ဟဝ်ငမ်းကျကျ အသုဘ၊ လိုႏလꩻတဝ်းငါႏ မဟဝ်ယာႏ၊ သတ္တဝါႏမူႏခို နီနမ်းကြို၊ နုဲင်းယိုစွုမ်ႏဖြာꩻ ခွေတွမ်ႏနာꩻ၊ တရာꩻထေပျꩻ နီကာယ၊ ဝိက္ခာယိတက ဘုရာꩻဖန်၊ ပသံငါႏနော နီယိုဩ။
၆။ ဝိက္ခိတ္တကံ= ဝိက္ခိတ္တကံ သမ်းနယ်လင်၊ ပေႏတန်နီနမ်း ကဖြူႏဖြင်း၊ ထွီႏအံႏထွူမꩻ ကပြုဲင်ပꩻ၊ အဲင်ႏယꩻဖူꩻလီ လွင်းထိုꩻအီ၊ နီသွံဗာႏထွို့ꩻ စူခင်ႏကွို့ꩻ၊ တွို့ꩻကွဉ်ႏနဝ်ထင်ꩻ ဖူꩻလွဝင်ꩻ၊ ပြုဲင်ပြင်ꩻလီလာ ဖြတ်ꩻချာငါ၊ ထာꩻခြာလဲင်ꩻစွစ်ꩻ နွုမ်ꩻသေင်အွစ်ꩻ၊ တရွစ်ꩻတွာႏထွို့ꩻ အငင်းရွို့၊ အဝ်ႏဗွို့ꩻသေင်ႏနာ အဝ်ႏထဲ့ပြာ၊ စောက်ꩻအာႏဠင်းတ ကိပ်ꩻဖူꩻယꩻ၊ အကွို့ꩻစျꩻခဝ် လဲဉ်းထင်ꩻနဝ်၊ ဖျောဝ်စွစ်ꩻတိုးတား မီꩻလဲင်ꩻဆား၊ ထာꩻခြာသားရောင် ဖီးထူꩻဟုမ်၊ စူနုံထဲ့ဟူႏ လင်ꩻပဉ်ဗူႏ၊ ကတူႏတခြွီႏ လင်းတစွီႏ၊ ထွီႏဟံႏအီထိုꩻ ရုပ်အမျိုꩻ၊ နီလိုꩻအနမ်း ကထင်းဖြင်း၊ စန်းငါႏနဲးလောင်ꩻ ပသို့ꩻခြောင်ꩻ၊ အကောင်ကာယ ဒွတ္တိံသ၊ လိုႏလꩻဖြီႏဖြီႏ အဝ်ႏတဝ်းအွီႏ၊ ထီႏတဝ်းငါႏငါႏ အဟဝ်ယာႏ၊ ခန္ဓာႏခြုံယ ဟဝ်ငမ်းကျ၊ ဝိက္ခိတ္တက ဘုရာꩻဖန်၊ ပသံငါႏနော နီယိုဩ။
၇။ ဟတဝိက္ခိတ္တကံ= ဟတဝိက္ခိတ္တက သမ်းပျာꩻလင်၊ ပေႏတန်နာꩻနီ ရုပ်ခွေသီ၊ ထင်ႏလီလာပꩻ အခဝ်စျꩻ၊ တွမ်ႏနꩻကဖျက်ꩻ ပဲစ်ကနဲစ်ꩻ၊ စွစ်ꩻစဲစ်ꩻအယာႏ ကရီႏပြာႏ၊ တနျာႏလင်းဆား စောက်ꩻအာႏယား၊ ထာꩻသားထွို့ꩻလီ အဖြို့ꩻပီ၊ မထီႏအခြုံး အလွီးဖုံး၊ ဗွို့ꩻလုံးစပ်သေင်ႏ အခဝ်ခေင်ႏ၊ တဝေင်ႏပဉ်ကွဉ်း ပြင်ꩻပဉ်ထွောင်း၊ စုခြွဉ်းပဉ်ပွုမ်ႏ အဝ်ႏသေင်ပြုံႏ၊ ပုံႏတုပါꩻသွို့ꩻ ဒွေါ့ꩻပဉ်ကွို့ꩻ၊ ဖြွို့ဖြဖြင်းဖြူႏ ပြုဲင်ပြင်ꩻဟူႏ၊ ကတူႏမဲ့ငါ စောက်အာႏအွာ၊ ချာငါတလွုန်း အယာႏတွုန်း၊ ဟွုန်းရောင်အောႏအာႏ ပြုဲင်လီလား(အားအား)၊ ယပ်ꩻယားကသာႏ ထွို့ꩻငင်ႏတွာႏ၊ တခါႏတောင်ဗဉ် ဖီးထူꩻသဉ်၊ ကထွာခဉ်ငါႏ နီခန္ဓာႏ၊ ဟံႏယာႏလဲင်ꩻစဝ်ႏ နီနမ်းကဝ်ႏ၊ အဝ်ႏထီႏအဝ်ႏသေ ငမ်းလဲဉ်းကေ၊ နာꩻခွေအရုပ် ခြောင်ꩻစက်ဆုပ်၊ အကောင်ပုပ်ခြုံး ငှက်ပျောတုံး၊ အသုံးမကျ ဟဝ်ငမ်းကျ၊ ဟတဝိက္ခိတ္တက ဘုရာꩻဖန်၊ ပသံငါႏနော နီယိုဩ။
၈။ လောဟိတကံ= လောဟိတကံ နယ်ဖျင်ဖျင်၊ ပေႏတန်ခွေနာꩻ ရုပ်တရာꩻ၊ ထွာခန်းအသွီႏ မဉ်ဖြီႏဖြီႏ၊ ရီႏထွတ်ꩻပြုဲင်လင်ꩻ ယုဲင်ယွိုင်ꩻယင်ꩻ၊ အဆင်ꩻဗိုန်ပီ နုဲင်းဆွို့ထီ၊ နာꩻနီဒွေပꩻ ပမာႏန၊ ယာႏစျꩻရေꩻရဲး ပဉ်တွဲးတွဲး၊ အဝ်ႏခွဲးအဝ်ႏခွင် စဝ်ႏပဲ့ꩻထံ၊ လုံႏလင်ꩻဟူႏရီႏ အမဉ်သွီႏ၊ ထီႏဒွုမ်ဆွုမ်ႏနံႏ ကတူႏခင်ႏ၊ ဗဉ်ႏထင်ႏဖြောင်းမဲ့ ဗို့ꩻဗဲ့ဗဲ့၊ စော့စဲ့အငဝ်း လဲင်ꩻသင်ႏလဝ်း၊ ငထဝ်းဒွုမ်ဗာႏ ကွိုꩻခရာႏ၊ ခန္ဓာႏနာꩻနီ ထွာလိုꩻသီ၊ သွံဆီနီမျိုꩻ ပြုဲင်ပြင်ꩻပြိုꩻ၊ ဝန်ꩻထိုꩻမဗွုန်ႏ ယာႏလဲင်ꩻတွုန်ႏ၊ ဟွုန်ႏဟန်ႏဖီးထူꩻ ကဒီးစူꩻ၊ လူꩻအခြုံယ ဟဲ့ꩻဖန်လွ၊ အနတ္တတော ငဝ်းဒွါနော၊ ခေါတဝ်းငါႏရင်ꩻ ရုပ်ပြုဲင်ပြင်ꩻ၊ ကမ္မဋ္ဌာန်ꩻပျꩻ ဟဝ်ငမ်းသꩻ၊ လောဟိတကံ ဘုရာꩻဖန်၊ ပသံငါႏနော နီယိုဩ။
၉။ ပုဠုဝကံ= ပုဠုဝကံ တပ်ဖေႏဖျင်၊ ပေႏတန်ခွေနာꩻ ရုပ်တရာꩻ၊ ထွာလို့ခန်းလုံႏ ဖီးထူꩻပြုံႏ၊ ပဉ်ဖုံႏပဉ်စွိုꩻ ရုဲင်တသွိုး၊ စွိုးနုဲင်းဟံႏပြွန် ကဒူအွန်၊ ပဉ်ဒူပဉ်ဗာႏ ရေ့ꩻခူႏခါႏ၊ ယာႏလီꩻမထီႏ လုံႏဖြီႏဖြီႏ၊ အဝ်ႏစီႏအဝ်ႏပြဲဉ် ဒိုတနဲဉ်၊ ရိမ်ရံနွို့ထန်ႏ ငဗူႏဗန်ႏ၊ လဲင်ꩻသင်ႏစော့ꩻစဲ့ꩻ လုံႏအွာခြဲ့ꩻ၊ မဲ့အောင်နားအောင် စီꩻအဲင်ႏရောင်၊ ဖြောင်လို့ကဒေါက်ꩻ ပြန်ႏကနောက်ꩻ၊ ကတူႏကြောက်ꩻတန် လဲင်ꩻဗွေထံ၊ တအင်ပြေင်တူႏ ပဉ်ဗူႏဗူႏ၊ တဒူႏလီလာ ပြုဲင်းချာငါ၊ ထွာလုံႏအစွိုး ဖီးထူꩻပွိုး၊ ပသွိုးယိပ်ꩻယိပ်ꩻ အဝ်ႏခြပ်ꩻခြိပ်ꩻ၊ ဗဉ်ႏပိစ်ꩻထံထိမ် ဖီးထူꩻသဉ်၊ ကခဉ်ငါႏငါႏ နီခန္ဓာႏ၊ ပသို့ꩻငါႏလောင်ꩻ တွိုႏမဉ်ႏပြောင်ꩻ၊ အခြောင်ꩻနုဲင်းယို မကင်ꩻဖို၊ စွုမ်ႏဖြာꩻကြိုနမ်း ကဟဝ်ငမ်း၊ လိုꩻခမ်းလောက အွဉ်နယ်ပျꩻ၊ ပုဠုဝကံ ဘုရာꩻဖန်၊ ပသံငါႏနော နီယိုဩ။
၁၀။ အဋ္ဌိကံ= အဋ္ဌိကဉ္စ ဆုဲင်ꩻသွတ်ꩻပျ၊ ကာယနမ်းကြို နီနာꩻယို၊ (၃၂)(သွံဆီနီ)ကို ဒွတ္တိံသ၊ ဖြွို့ဖြလို့ထံ ဖြင်းသေင်သင်၊ စျꩻကင်သွီႏယာႏ ဖြွီꩻကသာႏ၊ ငထဝ်းဒွုမ်ဗာႏ လီဖွန်ႏကြောင်း၊ တငေါင်းခြုတ်ခြက် ဆွတ်ꩻပြုံႏခြပ်၊ ထပ်ထွိုင်ပဉ်ဗူႏ ညာꩻတတူႏ၊ ဟူႏလွတ်ꩻလီလာ ပလဲင်ꩻဗွာ၊ ထွာစွဉ်ႏဆွတ်ꩻဖြင်း လီဗွာလင်း၊ အနမ်းမအဲဉ် ထွာထာꩻလဲဉ်၊ အကဲဉ်ငထဝ်း ဒျာႏမွော့စဝ်း၊ ပဉ္စဝ်းဟော်ꩻပျ အဋ္ဌိက၊ ဆွတ်ꩻတူႏယဒျာႏ နီခန္ဓာႏ၊ နစ်သက်ခရာႏ ငထဝ်းမွော့၊ ယူႏသွော့သꩻကို မူႏတွမ်ႏခို၊ စွုမ်ႏဖြာꩻနုဲင်းယို လွဉ်းလွဉ်းဩ။
(အွဉ်ႏသေ/ အသုဘခန်ꩻယို မီႏထွားလင်္ကာႏလွေꩻနဝ်ꩻ စခွီလင်္ကာႏ၊ တဲမ်းသားမဉ်ꩻ တပါတဝ်းတဲင် မတ်ဗော့ꩻစခါနော။)[၁][၂][၃]