အီႏသီခိန်ႏခါႏနာႏဗာႏတရာꩻ

"ဖဂ္ဂုနသုတ် (အီႏသီခိန်ႏခါႏ နာႏဗာႏတရာꩻအကျောင်ꩻ အကျိုꩻအဝ်ႏသူမျိုꩻ)" ဗွေႏဖဂ္ဂုန အုံဟောဝ်တဝ်းတဲင် ဗွေႏအာနန္တာႏ လောဝ်းနယ်ဗွေႏဘုရာꩻ၊ တောင်ꩻပြန်ႏဗွေႏဘုရာꩻ ယံကကျွꩻလွေꩻဟော်ꩻဖေႏ ဗွေႏဖဂ္ဂုနတရာꩻ၊ ဗွေႏမျတ်ဘုရာꩻကျွꩻ ဗွေႏဖဂ္ဂုနထျꩻ၊ ဗွေႏဖဂ္ဂုနကျံႏထွိုင်ႏတွော့ꩻ ဗွေႏဘုရာꩻဖေႏထွိုင်ႏတဝ်း၊ ထွဉ်ႏကိန်ꩻစွူစွူကူႏလောင်း၊ ဗွေႏဘုရာꩻနဝ်ꩻ သင်ꩻရာꩻအုံလင်ꩻ ခင်ႏလမ်းဒါကိုထွူတဲင် ရီနုဲင်းယို- "ဖဂ္ဂုန- ထွာနုဲင်းမုဲင်ꩻ၊ သက်သာႏနေဟောင်း၊ တတဝ်ထဲင်းတဝ်း၊ ဟောဝ်သဲင်ꩻနေဟောင်း" "ဩဗွေႏ ဘုရာꩻမျတ်ဗွေႏဩ- သက်သာႏတဝ်း ဗွေႏဩ၊ အောဝ်ႏတဝ်သဲင်ꩻတိတ်ꩻတိက်ꩻစွဉ်ႏ ဗွေႏဩ" ဗွေႏဘုရာꩻဟော်ꩻဖေႏတရာꩻ၊ ဖေႏအာႏ ဖေႏသꩻဆွော့ꩻထွူတွော့ꩻ ကျွꩻသဲင်ꩻထိုꩻဆꩻချာ တပေါႏညငါႏတဝ်း၊ ဗွေႏစောဝ်းဖဂ္ဂုန လွဉ်ႏထိုꩻခန်းဒျာႏနောဝ်ꩻသွူ။ ဗွေႏအာႏနန္တာႏ လွေꩻလောဝ်းဗွေႏဘုရာꩻနုဲင်းယို- "ဩဗွေႏ ဘုရာꩻမျတ်ဗွေႏဩ- ဗွေႏဘုရာꩻကျွꩻသဲင်ꩻထွူ တပေါႏညငါႏတဝ်း ဗွေႏစောဝ်းဖဂ္ဂုန လွဉ်ႏထိုꩻစွဉ်ႏ၊ ဝွေꩻဗွေႏကအီႏလွဉ်ႏတွင်ꩻနဝ်ꩻ ဣန္ဒြေႏသူပါꩻ စွူဖြွိုးမွေးစွဉ်ႏထာꩻဗွေႏဩ" "အာႏနန္တာႏ- ဖဂ္ဂနနဝ်ꩻ ဣန္ဒြေႏသူပါꩻ စွူဖြွိုးဗာႏဗာႏ၊ ကွပ်ထမုဲင်ꩻနဲတဲင် ခါးလားခွေကဟော်ꩻဖေႏ ဝွေꩻတရာꩻနဝ်ꩻ သံယော်ꩻဇဉ်ႏ ဆလငတ်ꩻပါꩻ (သက္ကာယဒိဋ္ဌိ၊ ဝိစိကိစ္ဆာ၊ သီလဗ္ဗတပရာမာသ၊ ကာမရာဂ၊ ပဋိဃ) အဝ်ႏစွိုင်ခါꩻအသꩻ တလွစ်လꩻတဝ်းဒွိုန်း၊ အဝ်ႏထွာနေကပုထုဇဉ်ႏ။ နာႏဗာႏခွေတရာꩻထွူမꩻ ဝွေꩻသꩻနဝ်ꩻ အဝ်ႏဖွို့တဝ်းဒွုမ် သံယော်ꩻဇဉ်ႏဆလငတ်ꩻပါꩻ၊ ဝွေꩻသꩻလွစ်ထန်ႏလꩻ သံယော်ꩻဇဉ်ႏ(ထွာအနာႏဂါမ်ႏ)နဝ်ꩻမꩻ ဣန္ဒြေႏစွူဖြွိုးထိုꩻစွဉ်ႏနောဝ်ꩻသွူ"။ အခိန်ႏခါႏနာႏတရာꩻ၊ အခိန်ႏခါႏဆင်ႏချင်ႏတရာꩻ၊ ပေါႏနာႏတရာꩻ၊ ပေါႏဆင်ႏချင်ႏတရာꩻနဝ်ꩻ (အကျောင်ꩻ)အကျိုꩻအဝ်ႏသူမျိုꩻ၊ သူမျိုꩻကရိုꩻနဝ်ꩻ (အဝ်ႏထွာပုထုဇဉ်ႏတွင်ꩻ) ၁။ အီႏသီခိန်ႏခါႏ ပေါႏနာႏဗာႏ နီဗွေႏဘုရာꩻတရာꩻနဝ်ꩻ ဝွေꩻသꩻလွစ်လꩻ သံယော်ꩻဇဉ်ႏငတ်ꩻပါꩻ၊ ၂။ အီႏသီခိန်ႏခါႏ ပေါႏနာႏဗာႏ ခွေတပဲ့ꩻသာဝကတရာꩻနဝ်ꩻ ဝွေꩻသꩻလွစ် သံယော်ꩻဇဉ်ႏငတ်ꩻပါꩻ၊ ၃။ အီႏသီခိန်ႏခါႏ ပေါႏဝွေꩻဆင်ႏချင်ႏချာ ဝွေꩻကနာႏဗာႏတရာꩻနဝ်ꩻ ဝွေꩻသꩻလွစ်ထန်ႏလꩻ သံယော်ꩻဇဉ်ႏဆလငတ်ꩻပါꩻ (ထွာအနာႏဂါမ်ႏပုဂ္ဂိုလ်ႏ) ထွာအနာႏဂါမ်ႏပုဂ္ဂိုလ်ႏတွင်ꩻ- ၄။ အီႏသီခိန်ႏခါႏ ပေါႏနာႏဗာႏ နီဗွေႏဘုရာꩻတရာꩻနဝ်ꩻ ဝွေꩻသꩻလွစ်လꩻ သံယော်ꩻဇဉ်ႏဆကီငတ်ꩻပါꩻ၊ ၅။ အီႏသီခိန်ႏခါႏ ပေါႏနာႏဗာႏ ခွေတပဲ့ꩻသာဝကတရာꩻနဝ်ꩻ ဝွေꩻသꩻလွစ် သံယော်ꩻဇဉ်ႏဆကီငတ်ꩻပါꩻ၊ ၆။ အီႏသီခိန်ႏခါႏ ပေါႏဝွေꩻဆင်ႏချင်ႏချာ ဝွေꩻကနာႏဗာႏတရာꩻနဝ်ꩻ ဝွေꩻသꩻလွစ်ထန်ႏလꩻ ဥပဓိတရာꩻ (ဝွေꩻသꩻအဝ်ႏဖွို့တဝ်းဒွုမ် သံယော်ꩻဇဉ်ႏဆကီငတ်ꩻပါꩻ၊ ရူပရာဂ၊ အရူပရာဂ၊ မာန၊ ဥဒ္ဓစ္စ၊ အဝိဇ္ဇာ) ထွာရဟန္တာႏ၊ (အကျောင်ꩻ)အကျိုꩻ အဝ်ႏသူမျိုꩻနုဲင်းနဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ ဆက္ကနိပါတ်၊ ဖဂ္ဂုနသုတ်)