အွဉ်ငါသားကရိုꩻနဝ်ꩻ
"အွဉ်ငါသား"ကရိုꩻဒါႏငဝ်းယို မန်းအဘိဓာန်ႏကိုနဝ်ꩻ "ထွာအတန်အကဲႏ"၊ "အွဉ်ငါသား" ဗွောင်သေꩻခါꩻ အခရာႏနုဲင်းနဝ်ꩻသွူ၊ အွဉ်ငါသားတဖြာꩻ အထီအသွီႏနဝ်ꩻ သေနာႏအကျောင်ꩻတရာꩻ အကျိုꩻတရာꩻဖုံႏထွူတဲင် အွဉ်ႏထွော့ဖေႏနွောင်ꩻ အွဉ်ႏထွော့ချက်နဝ်ꩻစားဒျာႏ၊ မာꩻဖေႏဝင်ꩻအွဉ်သားယို အခေႏနေႏနုဲင်းမုဲင်ꩻမုဲင်ꩻတဲ့ယဝ်း အရေꩻတန် အဝ်ႏလိုႏဖြေႏသျင်ꩻနွောင်ꩻဖေႏ ပျဿနာႏဖုံႏ အထျꩻထျꩻအဝ်ႏနုဲင်းနဝ်ꩻသွူ။ အွဉ်ငါသားဖုံႏနဝ်ꩻ ပိုမာဖုံႏအတာႏ တဖေႏနွောင်ꩻလွတဝ်းအခိန်ႏ နုဲင်းလိုꩻရိုꩻရိုꩻ၊ အွဉ်ငါသားတွိုင်ꩻ လိုႏငါႏထာꩻထီႏမဲဉ်ႏအဝ်ႏသွူ၊ လိုႏငါႏထာꩻယူႏထာꩻတွေꩻအဝ်ႏ၊ လိုႏငါႏအဒေါ့ꩻအဖြဝ်ႏမဲဉ်ႏ၊ လွူးနမ်းသက်လဲ့ အဝ်ႏလိုႏမဲဉ်ႏ(လိုႏတရာꩻ)ငါႏ၊ ထာꩻကျိုꩻစာꩻမဲဉ်ႏ၊ ထာꩻယူႏလꩻမဲဉ်ႏ၊ ထာꩻယွုမ်းအံႏမဲဉ်ႏဖုံႏလဲ့ အဝ်ႏလိုႏငါႏနဝ်ꩻသွူ။
အွဉ်ငါဖေႏစွဉ်ႏ အရန်းမုဲင်ꩻမုဲင်ꩻတဲ့ယဝ်း သမာႏဓိ လိုႏအဝ်ႏကယ်ꩻထဲင်း ပုဂ္ဂိုလ်ႏလင်ဖုံႏ၊ အထီႏအဟွုန်ဖုံႏ လွိုင်ႏအာဗာႏ၊ နမ်းသꩻသတ္တိꩻ အဝ်ႏလိုႏထင်တရုဲင်ငါႏ၊ ဖေႏနေး ကအွဉ်ႏထွော့ထွူထဲ့မွိုင်နွောင်ꩻဗာႏ၊ ထာꩻယွုမ်းအံႏသꩻဆွော့ꩻ ဖေႏကအဝ်ႏဗာႏ၊ တခြွိုက်ချင်ႏ ဉာဏ်ႏဒိုဖြွဉ်နွောင်ꩻ အဝ်ႏလိုႏအဝ်ႏငါႏ၊ ထာꩻရာꩻအမျိုꩻမုဲင်ꩻတရိုꩻတဝ်း တရာꩻရာꩻတတွာတွာ အဝ်ႏလိုႏအဝ်ႏငါႏနဝ်ꩻသွူ။ သꩻအွဉ်ႏတရုဲင်ထင်ဗာႏသေႏသေႏ၊ အအုံအအဝ်ႏတွမ်ႏ ကဒေါ့ꩻဒေါ့ꩻတာႏသွုပ်ဆွိုက်မုꩻအကိုလဲ့ နမ်းဖြောင်းအငုဲင်ꩻ ပနဲဉ်ႏချော်ꩻ အဝ်ႏလိုႏငါႏ၊ အွဉ်ငါသားတွိုင်ꩻ ကအဝ်ႏလိုႏငါႏငါႏနဝ်ꩻ သစ္စာႏအဝ်ႏတွမ်ႏ ခံႏနွောင်ꩻအာႏအဝ်ႏနုဲင်းနဝ်ꩻဖုံႏသွူ၊ အွဉ်ငါသားဖုံႏ ကအဝ်ႏလိုႏငါမွေး အထီအသွီႏနဝ်ꩻ နမ်းထာꩻမာꩻယို တွမ်ႏထာꩻယွုမ်းအံႏတွော့ꩻ နမ်းတွမ်ႏနမ်း အဝ်ႏလိုႏထူႏတာႏဝွန်ႏ ဖြေႏသျင်ꩻနွောင်ꩻဖေႏနဝ်ꩻဒျာႏသွူ။ နမ်းတွမ်ႏနမ်းထာꩻယွုမ်းလဲ့ အဗွေတဗာႏဖေႏကအဝ်ႏမꩻ၊ နမ်းထာꩻမာꩻဖက်အလောင်းဖုံႏလဲ့ ထာꩻစာႏနာႏသꩻ ထာꩻဆင်ႏချင်ႏအဝ်ႏလိုႏအွဉ်ႏ၊ သꩻရက် နမ်းနားဟွိုန်ꩻလောင်း၊ နမ်းဒုံလောင်း၊ နမ်းဒေႏသလောင်း၊ နမ်းလိုꩻမျိုꩻလောင်း၊ ခမ်းထီအလောင်းအဝ်ႏလိုႏအဝ်ႏငါႏနဝ်ꩻသွူ။ ကဖြေႏသျင်ꩻဖေႏဒါႏ ပျဿနာႏပေႏတန်အလောင်း အွဉ်ႏဗာႏသꩻခွေါင်ခွေါင်ခံႏခံႏ၊ ပျဿနာႏတွိုင်ꩻယို ဖြေႏသျင်ꩻဖေႏဗာႏ ငိမ်ꩻငိမ်ꩻချမ်ꩻချမ်ꩻ၊ သွူတကာႏတဝ်း ပျဿနာႏအလောင်း ကျမ်ႏထွင်ႏယူႏတွေꩻဒါႏဗာႏနဝ်ꩻသွူ။ အွဉ်ငါသားတွိုင်ꩻ ကျိုꩻစာꩻရိုꩻရိုꩻသာꩻသာꩻထွူတွော့ꩻ အဝ်ႏလိုႏလွူးတဝ်း သꩻဟဝ်နမ်းတဖြာꩻစား၊ တွမ်ႏကနွို့သော့ꩻနမ်းအစွိုꩻသားဖုံႏယို ခြွဉ်းဝင်ꩻထွူတွော့ꩻ ခွုမ်မာꩻထေလွေꩻ အနမ်းအခြုံ ဖေႏကဒါႏဗာႏ၊ နမ်းတွမ်ႏနမ်းလဲ့ နေးတွမ်ႏထာꩻသေတရာꩻ ထိန်ꩻသိမ်ꩻပွေါးရဲပ်ခါꩻထွူတွော့ꩻ ဖေႏနေးကတလွတ်ꩻထန်ႏဗာႏမွုန်း စီꩻကန်ꩻတဖူꩻခြောင်ꩻနဝ်ꩻ အဝ်ႏလိုႏလွောက်ꩻနာႏဒါႏဒါႏဗာႏနဝ်ꩻသွူ။
ကွပ်နဝ်ꩻမꩻ အွဉ်ငါသားနဝ်ꩻ သီႏလဖေႏကအဝ်ႏကယ်ꩻထဲင်းဗာႏ ခမ်းသားထံꩻသာꩻ၊ သတ္တိလဲ့ ဖေႏကအဝ်ႏကယ်ꩻထဲင်းဗာႏ ခမ်းသားလိုꩻအာ၊ ထာꩻသယ်ꩻခံႏလဲ့ လွိုကယ်ꩻဗာႏခမ်းသားဖုံႏ၊ နမ်းတွမ်ႏနမ်းလဲ့ အွဉ်ႏချꩻဖွိုႏသေႏသေႏဗာႏ၊ အုံထွိုင်ႏနွောင်ꩻဖေႏသေႏသေႏဗာႏ ခမ်းသားလိုꩻအာဆꩻငါ၊ မော့ꩻခွဲးခွိုꩻခွိုꩻဗာႏ တွမ်ႏခမ်းသားလိုꩻအာ၊ အွဉ်ႏရေꩻထွူႏထွူႏတွုမ်တွုမ်ဗာႏ ခမ်းသားလိုꩻအာသီး သဘော်ꩻဆန္ဒနဝ်ꩻသွူ။ နမ်းကအွဉ်ငါမာꩻလွေꩻယို ခမ်းသားလိုꩻအာသီး လက်ခံႏတလက်ခံႏတဝ်းနဝ်ꩻ အဝ်ႏလိုႏထိုမ်ႏစမ်ꩻနပ်ခန်ꩻသေႏသေႏငါႏ၊ အွဉ်ငါသားတွိုင်ꩻ အခိန်ႏအဝ်ႏလိုႏမဲဉ်ႏ၊ အွဉ်ငါသားတွိုင်ꩻနဝ်ꩻ ဖြောင်းတဉ်ႏဗာႏ၊ ထိန်ꩻသိမ်ꩻနွောင်ꩻဗာႏ ထာꩻတရာꩻရာꩻတတွာတွာ၊ လွောက်ꩻနာႏဗာႏ အစွိုꩻအဗူႏအွိုးဆꩻကီသား ကမိန်းကယီးထွဉ်ႏဒါႏ အချက်ဖုံႏနဝ်ꩻသွူ၊ အရေꩻအတန်လွိုသွတ်ꩻသွတ်ꩻနဝ်ꩻ အွဉ်ငါသားတွိုင်ꩻ အဝ်ႏလိုႏဖုဲင်းထိုꩻလꩻလꩻငါႏ ထာꩻမာꩻကလွိုဆန်ဒါႏ တွမ်ႏဥပဒေႏဖုံႏကရိုꩻနဝ်ꩻ တဲမ်းဒင်ႏပျꩻနယ်ဗာႏနုဲင်းယိုသွူ။[၁][၂]