အွဉ်ငါသားတွမ်ႏခမ်းသားသီး
"အွဉ်ငါသားတွမ်ႏခမ်းသားသီး ဖြွမ်းဖြွမ်းဗူႏဗူႏဝင်ꩻတဲင် ထူႏပအိုဝ်ႏခမ်းထီ အခိန်ႏတွိုႏလဲဉ်း" အခိန်ႏခါႏကျာꩻကာႏလကို ဒေႏသအလွောက်ꩻ အစွိုꩻအဗူႏပငါပရာꩻ၊ လိုꩻမျိုꩻအလွောက်ꩻ ပငါပရာꩻယို အဝ်ႏသောင်မာꩻလွေꩻ လိုꩻမျိုꩻအလွောက်ꩻ အုံကိုမ်ပွယ်ꩻ၊ ဒေႏသအလွောက်ꩻ အုံကိုမ်ပွယ်ꩻ၊ အကျောင်ꩻခရာႏအလွောက်ꩻ အုံကိုမ်ပွယ်ꩻဖုံႏနဝ်ꩻသွူ၊ ကအဝ်ႏမာꩻလွေꩻနုဲင်းယိုနဝ်ꩻ ထွာဖျင်ဆင်သေꩻ၊ စုရွမ်လွေꩻ ဒုတိယအလဲင်ႏ ခမ်းခြွဉ်းဗူႏညိမ်ꩻချံꩻရေꩻညီႏလာႏခံႏ ၂၁ ရျာꩻဗူႏပင်ႏလုံအတာႏ အီႏထင်ႏဒင်ႏသွင်ꩻအုံကိုမ်အီအချက်ဖုံႏနဝ်ꩻသွူ။ နုဲင်းယိုခါနဝ်ꩻ ဖူးဝေးခမ်းရင်ꩻသားသီး စွုမ်ႏစွိုꩻစွိုꩻ စွုမ်ႏအမျိုꩻမျိုꩻဖုံႏလဲ့ အဝ်ႏမာꩻလွေꩻလဲဉ်း စွုမ်ႏနယ်ႏနယ်ႏနဝ်ꩻ ထီႏဟွုန်ဗာႏနဝ်ꩻသွူ၊ ဖူးဝေးဖြဝ်ꩻသီးလဲ့ ဖူးဝေးဖြဝ်ꩻသီးခမ်းသားသီး ကအဝ်ႏအုံဒါႏ ဖြဝ်ꩻခမ်းနယ်ႏ၊ ခင်ခမ်းနယ်ႏ၊ စောက်ꩻတနျာႏခမ်းနယ်ႏ၊ မန်ꩻတလေꩻတွိုင်ႏတန်တွမ်ႏ စစ်ကိုင်းတွိုင်ႏတန်ကို ဝေင်ꩻနယ်ႏကိုဖုံႏယို အီႏလင်ꩻကွင်ꩻ မော့ꩻခွဲးလွေꩻတာႏ အဝ်ႏဖျင်ခါꩻမာꩻလဲဉ်း အုံကိုမ်ပွယ်ꩻအကျိုႏ ဒီဇင်ဘာလာကိုနဝ်ꩻသွူ။ ဗွိုန်နုဲင်းနဝ်ꩻနေနေ ဖူးဝေးစောက်ꩻသီးလဲ့ ဖူးဝေးစောက်ꩻခမ်းသားသီး ကအဝ်ႏအုံခမ်းနယ်ႏကိုတဲ့ ဝေင်ꩻနယ်ႏကိုဖုံႏယို အဝ်ႏမာꩻလွေꩻလဲဉ်း မာꩻကဝ်းရီးဖျင် ဆင်အုံကိုမ်ပွယ်ꩻဖုံႏနဝ်ꩻသွူ၊ တွမ်ႏယင်း နယ်ႏလောင်ႏလင်ကို တွိုင်ႏဒေႏသတန်ကို ကအဝ်ႏဒါႏ ဖူးဝေးခမ်းရင်ꩻသား အလောင်ႏအလင်လဲ့ ဆဲင်ႏရာꩻဒေႏသအလွောက်ꩻ၊ လိုꩻမျိုꩻဗူႏအလွောက်ꩻ အဝ်ႏမာꩻလွေꩻအုံကိုမ်ပွယ်ꩻဖုံႏနဝ်ꩻသွူ။ နဝ်ꩻအကို ပအိုဝ်ႏစွိုးခွိုꩻလိုꩻမျိုꩻအနေႏလဲ့ ပအိုဝ်ႏနဲင်ႏငံႏရေꩻပါတီတွမ်ႏ ပအိုဝ်ႏခုမ်စူခြွိုင်း စဲ့ꩻစွိုꩻအွဉ်ငါမာꩻလွေꩻ ဖျင်ဆင်အုံကိုမ်ပွယ်ꩻအကျိုႏ လင်ꩻကွင်ꩻမော့ꩻခွဲး ခမ်းသားထံꩻသာꩻဖုံႏ၊ ခြုဲင်းဖြောင်နယ် ပအိုဝ်ႏခမ်းသား ညိမ်ꩻချံꩻရေꩻထာꩻစဲဉ်ႏ၊ ပအိုဝ်ႏတစွိုးခွိုꩻ တမျိုꩻသာꩻလုမ်းအတာႏ ထွာထွိုက်ထွာသင်ꩻ၊ အဝ်ႏထွိုက်အဝ်ႏသင်ꩻ၊ လꩻထွိုက်လꩻသင်ꩻဒါႏ အခွင်ꩻအရေꩻဖုံႏယို ပအိုဝ်ႏခမ်းသားသီး သဘော်ꩻထာꩻအဝ်ႏနုဲင်းမုဲင်ꩻ ထိုမ်ႏထူႏဗော့ꩻခွဲး အုံကိုမ်ပွယ်ꩻနဝ်ꩻ ပအိုဝ်ႏခမ်းသား ကအဝ်ႏဒါႏဒေႏသကို စွုမ်ႏနယ်ႏနယ်ႏမာꩻလွေꩻ ပနဲးထွူအာလဲဉ်း အခေႏနေႏကို အဝ်ႏနဝ်ꩻသွူ။ တနီꩻထွူတနီꩻ အဝ်ႏမာꩻလွေꩻသွုပ်သွုပ်တဲင် ခမ်းကောင်ခမ်းဒွမ် ပအိုဝ်ႏခမ်းသားကအဝ်ႏဒါႏ ဒေႏသကို တလာအတွင်ꩻ တွိုႏစွစ်ꩻထွူအာလွေꩻနဝ်ꩻ ထီႏဗာႏနဝ်ꩻသွူ။ ကမာꩻလွေꩻ မော့ꩻခွဲးခမ်းသား ဖျင်ဆင်အုံကိုမ်ပွယ်ꩻအကျိုႏနဝ်ꩻ ခမ်းကောင်ခမ်းဒွမ် စွုမ်ႏနယ်ႏတွိုႏထွူစွစ်ꩻလဲဉ်းတဲင် ယိုနဝ်ꩻ တွိုႏလွဉ်လဲဉ်း ပအိုဝ်ႏစွိုးခွိုꩻအရန်း အုံကိုမ်နဲင်ႏငံႏရေꩻပွယ်ꩻနဝ်ꩻသွူ၊ ပအိုဝ်ႏစွိုးခွိုꩻအရန်း အုံကိုမ်နဲင်ႏငံႏရေꩻပွယ်ꩻယို ခါးလား ၂၁-ရျာꩻဗူႏပင်ႏလုံ ညီႏလာႏခံႏကတွိုႏအီႏမာꩻလွေꩻ ဖေဖော်ဝါရီလာကို အဝ်ႏယီးခါꩻနုဲင်းနဝ်ꩻ သေထွꩻဗာႏနဝ်ꩻသွူ။ ကမာꩻလွေꩻ ဖျင်ဆင်မုအရန်းတွမ်ႏ ပအိုဝ်ႏခမ်းသားအုံကိုမ်ပွယ်ꩻနဝ်ꩻ ကတွိုႏအတွိုင်ꩻ မာꩻထွူလွေꩻလဲဉ်းရိုꩻလဲ့ ကမာꩻလွဉ်အကို ပအိုဝ်ႏနဲင်ႏငံႏရေꩻပါတီတွမ်ႏ ပအိုဝ်ႏခုမ်စူခြွိုင်းစဲ့ꩻစွိုꩻပါဝင်ႏမု တစွုမ်ႏလို့တဝ်းဒွုန်းနဝ်ꩻသွူ။ နဝ်ꩻမꩻ ယိုနဝ်ꩻ အီႏမာꩻသွူပအိုဝ်ႏစွိုးခွိုꩻအရန်း အုံကိုမ်နဲင်ႏငံႏရေꩻပွယ်ꩻတဲင် ပါဝင်ႏမုတစွုမ်ႏတဝ်းတဲ့ အီႏမာꩻလွေꩻဗော့ꩻနုဲင်းယိုဟောင်း။ ထုဲင်ႏဖူးဝေးဖြောဝ်ꩻနဝ်ꩻ အစွိုꩻခြွဉ်းအဝ်ႏတဆီငတ်ꩻစွိုꩻလဲ့ ပါတီစွိုꩻ၊ လိုꩻမုစွိုꩻ ခုမ်စူခြွိုင်းစွိုꩻ ကားကအဝ်ႏ အစွိုꩻရေꩻအွဉ်းကုဲင်သွူတွော့ꩻ မာꩻလွေꩻရီးဒျာႏ ခမ်းသားတာႏ စွိုးခွိုꩻအရန်း အုံကိုမ်ပွဲꩻအကျိုႏနဝ်ꩻ ထီႏမော့ꩻဗာႏသွူ။ ပအိုဝ်ႏလိုꩻမျိုꩻနဝ်ꩻ အီႏမာꩻနွောင်ꩻသွူ စွိုးခွိုꩻအရန်းလဲ့ ခလုဲင်ႏပါလို့တဝ်းဒွုန်းသွူ။ ကအဝ်ႏမာꩻလွေꩻအွဉ်လဲဉ်းသားလဲ့ တပါဝင်ႏလွဉ်တဝ်းဒွုန်းသား ဖေႏကပါဝင်ႏလွဉ်စွုမ်ႏလို့လို့နဝ်ꩻ အဝ်ႏလိုႏမာꩻလွေꩻနဝ်ꩻသွူ။ ကထွာဒါႏ တပါဝင်ႏဗာႏတဝ်းဒွုန်းသားလဲ့ ကအဝ်ႏမာꩻလွေꩻငါနေဒါႏ ပအိုဝ်ႏတစွိုးခွိုꩻလုမ်းအရေꩻယို ဖြွမ်းဖြွမ်းဗူႏဗူႏတဲင် အဝ်ႏလိုႏမာꩻလွေꩻငါႏနဝ်ꩻသွူ။ အရေꩻတန်ကိုအခိန်ႏခါႏ ပအိုဝ်ႏစွိုးခွိုꩻအတာႏ အခွင်ꩻအရေꩻ ဖေႏကသွုမ်ꩻဗာႏမွိုန်းနဝ်ꩻ အစွိုꩻချင်ꩻအခါႏ၊ တဖြာꩻတွမ်ႏတဖြာꩻ လိုꩻပုဂ္ဂိုလ်ႏချင်ꩻအခါႏ အာဃာတတရာꩻယို အဝ်ႏလိုႏအွဉ်ႏချာထိုꩻနဝ်ꩻသွူ၊ ခံႏထူႏလဲဉ်းပအိုဝ်ႏခမ်းသားအတာႏ ခုမ်မာꩻလဲဉ်းပအိုဝ်ႏခမ်းသားနဲင်ႏငံႏရေꩻ ခံႏထွာလဲဉ်းပအိုဝ်ႏခမ်းသားနမ်းခြောင်ꩻတဲင် အဝ်ႏလိုႏမာꩻဒျာႏ ပအိုဝ်ႏခမ်းသားတာႏ ထာꩻမာꩻနဝ်ꩻသွူ။ ကွပ်ဒျာႏ လိုꩻပုဂ္ဂိုလ်ႏချင်ꩻအတ္တမာႏနတဲင် ကအဝ်ႏလိုႏမာꩻသင်ꩻဒါႏ ပအိုဝ်ႏစွိုးခွိုꩻအရေꩻယို ဖြွမ်းဗူႏမုလွောင်ႏဗူႏမုဖုံႏ အီႏကုဲင်ထိုꩻဗာႏတေားနဝ်ꩻ အဝ်ႏလိုႏထွာသင်ꩻတဝ်းငါႏသွူ၊ နီကမာꩻနဲင်ႏငံႏရေꩻယို မာꩻဖေႏဒျာႏ ပအိုဝ်ႏခမ်းသားအတာႏ၊ ခံႏထူႏဒျာႏ ပအိုဝ်ႏခမ်းသားအတာႏ၊ သုံꩻအံႏတွမ်ႏ ပအိုဝ်ႏခမ်းသား-ပအိုဝ်ႏခမ်းသား ကတူႏစဲဉ်ႏနုဲင်းနဝ်ꩻတဲင် ဖေႏကထွာဗာႏမွုန်းတဝ်း ငဝ်းလဲဉ်ပအိုဝ်ႏခမ်းသားနဝ်ꩻသွူ။ အွဉ်ငါသားတွမ်ႏ ခမ်းသားသီး ဖြွမ်းဖြွမ်းဗူႏဗူႏဝင်ꩻတဲင် ထူႏပအိုဝ်ႏခမ်းထီ အခိန်ႏတွိုႏလဲဉ်းနဝ်ꩻသွူ။[၁][၂]