အဿဇိပုနဗ္ဗသုက
"ရာဓမထေရ်ႏ"
၇၆။ ဂါႏထာႏပြန်ႏပအိုဝ်ႏခြေင်ခြေင်- ကဖောႏနယ်ဒါႏ အပဲစ်၊ ကဆွုံꩻမꩻတောက်သတ်ဒါႏ ပညာႏကအဝ်ႏဒါႏ ပညာႏသျိမုဲင်ꩻရိုꩻတဝ်း မဉ်ႏထီႏနဝ်ꩻ ပညာႏသျိနုဲင်းနဝ်ꩻနဝ်ꩻ မတ်နုဲင်းသွော့ ပါꩻကအွဉ်ႏနယ်ခံꩻဖွိုင်ꩻ၊ လွေꩻဗော့ꩻတရေ့လွဉ်အုံထေ့သွော့၊ လိုꩻကလွေꩻအုံထေ့ဒါႏ ပညာႏသျိနုဲင်းနောဝ်ꩻနဝ်ꩻ ထွာဒျာႏလိုꩻမျတ်၊ ထွာနွောင်ꩻတဝ်း လိုꩻယွုတ်နောဝ်ꩻသွူ။
"ဟော်ꩻထွားသွဉ်ဗာႏ ရာဓမထေရ်ႏဝတ္ထုယိုတဲင် လꩻဗဟုသုတ၊ လꩻသတိꩻနုဲင်းယို"
၁။ လိုꩻခြော လိုꩻဒုက္ခစွဉ်ႏတဲ့ ထီႏပေႏထင်းဖွီလꩻတဝ်း၊ ထွာနွောင်ꩻဒျာႏ ရဟန္တာႏအကျောင်ꩻ၊
၂။ ဝင်ꩻကမာꩻဖို နီကေꩻဇူꩻနောဝ်ꩻ တောင်ꩻတောင်ꩻခါꩻဗာႏအကျောင်ꩻ၊
၃။ ဝင်ꩻကမာꩻဖေႏကေꩻဇူꩻနဝ်ꩻ ဆေ့ꩻပေႏတဲ့ယဝ်း ဖြော်ချာဗာႏအကျောင်ꩻ၊
၄။ ဝင်ꩻမဉ်ႏဆွုံꩻမꩻ ငေါဝ်းဟဝ်ငွါဒါႏနဝ်ꩻ နာႏဗာႏ၊ နာႏငေါဝ်းဗာႏ၊ လိန်ႏမာႏဗာႏအကျောင်ꩻ၊
၅။ အပဲစ်နယ်ပျꩻ၊ ဆွုံꩻမꩻခွန်းဆာခန်းတဲ့ယဝ်း အွောင်ႏမွိုန်းတောဝ်းအကျောင်ꩻ၊
၆။ အပဲစ်နယ်ပျꩻ ဆွုံꩻမꩻတောက်သတ်-မတ်နုဲင်းဒျာႏသွော့ ပါꩻကအွဉ်ႏနယ် ခံꩻဖွိုင်ꩻအကျောင်ꩻ-စတဲင်နုဲင်းနဝ်ꩻ သေထွꩻလꩻအီသတိꩻအာတန်သွူ။
"အဿဇိပုနဗ္ဗသုကဝတ္ထု"
၇၇။ ဂါႏထာႏပြန်ႏပအိုဝ်ႏခြေင်ခြေင်- အပဲစ်နယ်ပျꩻ ဆွုံꩻမꩻလွေသွော့၊ အပဲစ်အဲဉ်ထဝ်းစွဉ်ႏတဲ့ ဒေါ့ꩻကဝ်းရီးလꩻ ဆွုံꩻမꩻခါꩻသွော့၊ တဟဝ်မာꩻတဝ်းလာꩻလာꩻ အကုသိုလ်ႏ ထာꩻမာꩻဖုံႏနဝ်ꩻတဲ့ ယံသေဟောဝ်ယွိုန်း ဖေႏမာꩻမွိုန်းသွော့၊ ငေါဝ်းမွေးမဲဉ်ႏစား ကဆွုံꩻမꩻသားနဝ်ꩻနဝ်ꩻ သူႏတောႏကောင်ꩻသီးဖုံႏ ဟွိုန်ဟောဝ်ပဲင်ꩻရက် နစ်သက်ဒျာႏသွူ၊ လိုꩻယွုတ်ဖုံႏနဝ်ꩻတဲ ဟွိုန်ဟဝ်ပဲင်ꩻရက် နစ်သက်အဲဉ်ထဝ်း တဲ့ꩻတဝ်းအသꩻ တစျꩻစျꩻစွဉ်ႏသွူ။
"လꩻဗဟုသုတ၊ လꩻသတိꩻနုဲင်းယို" ဟော်ꩻထွားသွဉ်ဗာႏ အဿဇိပုနဗ္ဗသုကဝတ္ထုယိုတဲင်-
၁။ ပညာႏသျိလိုꩻဒါႏ ရဟန္တာႏသီးတပဲ့ꩻခန်းတဲ့ယောဝ်း လိုꩻမွိုက်အောဝ်ႏဒျာႏအကျောင်ꩻ၊
၂။ လိုꩻမွိုက်လိုꩻယွုတ်ဖုံႏနဝ်ꩻ မာꩻမောင်းမာꩻခတ်ꩻဒါႏ၊ ခွန်းမောင်းရိုꩻခတ်ꩻဒါႏ လိုꩻဟောဝ်သီးအကျောင်ꩻ၊
၃။ နေးနေးလိုꩻဟောဝ်သီး အာႏရဲင်ꩻတဲင် ဝါႏထန်ႏထိုꩻဗာႏလိုꩻမွိုက် လိုꩻယွုတ်ဖုံႏနောဝ်ꩻအကျောင်ꩻ၊
၄။ ကထွာဆရာႏ မွိုးဖါဖုံႏနဝ်ꩻ သွဉ်သင်ဆွုံꩻမꩻသႏသေႏဗာႏ တပဲ့ꩻပိုလီꩻဖုံႏအကျောင်ꩻ-စတဲင်နုဲင်းနဝ်ꩻ သေထွꩻလꩻအီသတိꩻအာတန်သွူ။
"ဟောဝ်တောင်ꩻခရာႏ အဓိပ္ပါယ်ႏ" ၁။ အပဲစ်နယ်ပျꩻ ကဆွုံꩻမꩻနဝ်ꩻ ဟဲ့ꩻ"ဩဝါဒ" ၂။ အပဲစ်အဲဉ်ထဝ်း ကဆွုံꩻမꩻကောဝ်းရီးနဝ်ꩻ ဟဲ့ꩻ"အနုသာသန" ၃။ ဖေႏတကာႏမူႏခိုသီးကောဝ်ႏ-စတဲင်နုဲင်းနဝ်ꩻတွော့ꩻ ကယားကုဲင် တကာႏမူႏခိုသီး သဒ္ဓါႏတရာꩻနဝ်ꩻ ဟဲ့ꩻ"ကုလဒူသန"နောဝ်ꩻသွူ။[၁][၂][၃]