ဥစ္စာႏ ၄ ပါꩻ

ဟန်ႏသနီꩻ လမ်ႏဗွေႏသီႏကမာꩻဒါႏ အလူႏဒါႏန နုဲင်ႏဟန်ႏသနီꩻယိုနဝ်ꩻ ခွေသွဉ်းမဲဉ်ခြုဲင်ႏနယ်ငါႏ အလူႏဗွေႏသီး၊ ခုဒ္ဒက ပါဌပါဠိတောႏကို ကလွဉ်အတွိုင်ꩻ နိမိကဏ္ဏ သုတ္တန်ႏ အွဉ်ႏအခေႏခံႏတဲင်၊ ဗွေႏမျတ်ဘုရာꩻကဟော်ꩻခါꩻဒါႏတရာꩻတောႏ အကို ဥစ္စာႏ ၄ မျိုꩻတရာꩻယိုနဝ်ꩻအောဝ်ႏသွူ။

• ၁၊ ထာဝရ ဥစ္စာႏ၊
• ၂ ၊ ဇင်္ဂမဥစ္စာႏ ၊
• ၃၊ အင်္ဂမ ဥစ္စာႏ ၊
• ၄၊ အနုဂါမိက ဥစ္စာႏ ၊ အောဝ်ႏလစ်ပါꩻ ယိုဖုံႏသွူ၊

ထာဝရ ဥစ္စာႏ −ကရိုꩻနဝ်ꩻ အသက်တအ​အောဝ်ႏတောဝ်း ဥစ္စာႏ ၊ လမ်ႏ၊ ကာꩻ၊ ဆိုင်ကယ် ၊ သွို့ꩻခြံ လုဲင်းယာႏ၊ စတွမ်ႏ နဲင်းယိုဖုံႏနဝ်ꩻဟဲ့ꩻ ထာဝရ ဥစ္စာႏသွူ၊ ပေါႏအောဝ်ႏထွာသွူလိုꩻ သဲင်ꩻစိုꩻမနုသာႏ နဝ်ꩻ ထွုမ်ႏလွꩻဝင်ꩻ ဥစ္စာႏ စွုမ်ႏဖြာꩻဖြာꩻဖုံႏသွူ၊ ကထွုမ်ႏလွဉ်လဲဉ်း ဥစ္စာႏဖုံႏနဲင်းယိုနဝ်ꩻလဲ့ꩻ ၊ ကလꩻလဲဉ်းသားတဲ့ အောဝ်ႏ ၊ တခုဲင်ႏလꩻတောဝ်း ဒွိုင်းသားလဲ့ꩻ အောဝ်ႏနဝ်ꩻသွူ၊ နဝ်ꩻမꩻတဲင် ကွပ်ပွိုးအေဝ်ႏလိုႏလွူးနမ်းမွီႏသက်တဲင်၊ ဖေႏကလꩻနဝ်ꩻလဲ့ ကျိုꩻစာꩻ ကျမ်ႏစဲႏလွꩻဝင်ꩻ ပငါပရာꩻဖုံႏသွူ၊

ဇင်္ဂမ ဥစ္စာႏ − ကရိုꩻနဝ်ꩻ အသက်ကအောဝ်ႏဒါႏ ဖိုးပနား ၊ လိုꩻ ပိုမူႏ /ခို လမ်းသားမာမူႏ အိန်သူႏနင်ꩻဖုံႏ မွိုး/ဖါ စတွမ်ႏ အသက်ကအောဝ်ႏဒါႏ မန်ႏသမျဖုံႏနဝ်ꩻထွာ ဇင်္ဂမ ဥစ္စာႏသွူ၊

အင်္ဂမ ဥစ္စာႏ − ကရိုꩻနဝ်ꩻ နီကသွဉ်လွဉ်ဒါႏပညာႏ အမျိုꩻမျိုꩻဖုံႏ သꩻပညာႏ ၊ လက်မှုပညာႏ ၊ ထာꩻသေထာꩻဒါႏ ပညာႏ အစွိုးစွိုးဖုံႏယို ကပါလွဉ်ဒါႏ နီနမ်ႏလောင်းဖုံႏယိုနဝ်ꩻ ၊ ဟဲ့ꩻ အင်္ဂမ ဥစ္စာႏ ရိုꩻဗာႏနုဲင်းနဝ်ꩻသွူ၊

အနုဂါမိက ဥစ္စာႏ- ကရိုꩻနဝ်ꩻ၊ထွာဒျာႏ ဒါန ၊ သီလ၊ သမာဓိ ၊ပညာႏ ၊ နုဲင်းနဝ်ꩻသွူ။

ငေါဝ်းလင်္ကာႏ =

သဲင်ꩻထွာဗာႏလိုꩻယိုꩻတောဝ်းယပ်ꩻငါႏ၊ ဒါႏန၊သီႏလ၊ သမထ ဝိပဿနာႏ၊ ထွုမ်ႏသေꩻခန်း ၊ယံထန်ႏသံသရာႏ။

ဗွေႏမျတ်ဘုရာꩻဟော်ꩻသေꩻခါꩻဒျာႏ ဥစ္စာႏအစဲစ်မဲဉ်ႏနဝ်ꩻ ထွာဒျာႏ အနုဂါမိက ဥစ္စားဖုံႏယိုမꩻထွာ ဥစ္စာႏအစဲစ်မဲဉ်ႏသွူ။

ကွပ်ပွိုးနဝ်ꩻမꩻတဲင် ပေါႏသဲင်ꩻထွာသွူလိုꩻနဝ်ꩻ ၊ဘဝယိုလွုမ်ꩻတကာႏတောဝ်း ၊ဘဝငါတဲ့ ကလားကလꩻနိဗ္ဗာန်ႏ ၊အတောႏတွင်ꩻကို ၊ယံဖေႏကသဲင်ꩻအုံဗာႏဒျာႏ ခြွိုင်ႏခြွိုင်ႏသန်ꩻသန်ꩻ ၊ချမ်ꩻချမ်ꩻသာႏသာႏနဝ်ꩻ ၊အွဉ်ႏဖိန်ꩻမာꩻမွော့ꩻကုသိုလ်ႏ ၊ ဒါနကုသိုလ်ႏ သီႏလကုသိုလ်ႏ ၊ သမထကုသိုလ်ႏ ဖုံႏယိုမꩻ ၊ ဘဝယိုလွုမ်ꩻတကာႏတောဝ်း ၊ဘဝငါတာႏလဲ့ အကျိုꩻအီႏအအောဝ်ႏအာငါႏနဝ်ꩻသွူ၊

ငေါဝ်းလင်္ကာႏ = သဲင်ꩻထွာဗာႏလိုꩻယိုꩻတောဝ်းယပ်ꩻငါႏ ၊ ထွာလဲဉ်းသွူနေား၊ ကူးကေားစွုမ်ႏဖြာꩻ ၊ ဒါႏန သီႏလ သမထ ဘာႏဝနာႏ ၊ ထုမ်ႏသေꩻခန်း ယံထန်ႏသံသရာႏ။

သဲင်ထွာဗာႏလိုꩻ ကွပ်ပွိုးစွဉ်ႏတယိုꩻတောဝ်းတဲင် ဟန်ႏသနီꩻတရာꩻနာႏပရိတ်သတ်သီး ပါတွမ်ႏ တရာꩻဗွေႏသီးယို ထွာလွဉ်လဲဉ်းသွူလိုꩻနဝ်ꩻမတဲင် ၊ အောဝ်ႏလိုႏထူႏလꩻလꩻသဲင်လွꩻသွော့ꩻဝင်ꩻ သဲင်ဟေဝ်ရတ္တနာႏသွူ၊ ဒါန ပါမ ဆုဲင်ꩻဘဝယို ထွာလꩻထာꩻအာႏကွိုꩻ ၊ သီႏလကွိုꩻမꩻ ထွာအီလꩻ ဒုက္ခလွစ်ကင်ꩻလိုꩻ ၊ ဘာႏဝနာႏပါမꩻ ဆုဲင်ꩻဘဝယံကျ သဲင်ꩻထွာလိုꩻ၊