P.Y.N ဩဝါဒ

"P.Y.N"ဩဝါဒ နေင်ႏ ၁၃၇၆-ဗာႏ၊ ဒဲဉ်သီႏလာဆန်ꩻ(၅)နီꩻ (၂၂-၂-၂၀၁၅) မွူးနီꩻ-တနင်္နွေႏ၊ ကျောက်တလုံꩻတန်ဝေင်ꩻနယ်ႏဖြယ်၊ အွိုင်ႏနားရီꩻ၊ နားရီꩻကျောင်ꩻကို ကမာꩻလွေꩻဒါႏ (P.N.O)သား ပွယ်ꩻလွိုက်ဒင်ႏ "ပအိုဝ်ႏလိုꩻယွဲးအာႏရဲင်ꩻ"(P.Y.N)အကို ဝေင်ꩻသီႏသဲင်ႏ၊ ဇဝနာရာမလိတ်သွဉ်တွိုက် ဗွေႏဗွန်ကောဝိဒ ဩဝါဒငဝ်းငွါ- အာႏရဲင်ꩻကသန်လွဒါႏ မူႏမောင်ႏစွိုꩻသီးဖုံႏ- "ကွန်ယက်"ကရိုꩻဒါႏငဝ်းဝေါဟာရယို "ဗိုန်ပီနုဲင်းခြယ်နဝ်ꩻအတွိုင်ꩻ ဆꩻဆွိုင်ꩻဝင်ꩻပဉ်ကွက်ꩻကွက်ꩻ"အဓိပ္ပါယ်ႏလꩻနုဲင်းနဝ်ꩻအကျောင်ꩻ မန်းအဘိဓာန်ႏကိုဗွောင်သေꩻခါꩻနုဲင်းနဝ်ꩻသွူ၊ မဉ်ႏဒေါ့ꩻဗာႏ မူႏမောင်ႏသီးအနေႏနဝ်ꩻ တဖြာꩻတွမ်ႏတဖြာꩻ၊ တဒုံတွမ်ႏတဒုံ၊ တဝေင်ꩻတွမ်ႏတဝေင်ꩻ ဖေႏနေးကစပ်ဆွိုင်ꩻငီꩻဗာႏလို့ဝင်ꩻတဲင် လွောင်ႏဗူႏအစွိုꩻ-အဓိပ္ပါယ်ႏလꩻနုဲင်းနဝ်ꩻသွူ။ လက်ခံႏထွာနွို့အစွိုꩻကရိုꩻဒါႏ အပွိုက်(၆) အပွိုက်ဖြယ်(င)ကိုနဝ်ꩻ ကွပ်အွဉ်ႏထွော့သေꩻခါꩻ "အကျင်ꩻစာရိတ္တဖေႏကဟဝ်ဗာႏ"နုဲင်းနဝ်ꩻတဲင် လိုꩻယွဲးကပါသော့ꩻ အစွိုꩻယိုကိုနဝ်ꩻ ထွာဒျာႏလိုꩻယွဲးအကျင်ꩻစာရိတ္တဟဝ်ဖုံႏ-သေဗာႏနုဲင်းနဝ်ꩻသွူ။ အပွိုက်ဖြယ် (စ)အကိုနဝ်ꩻ- ကွပ်အွဉ်ႏထွော့သေꩻခါꩻ "ထွာဒျာႏလိုꩻနွို့ပါသော့ꩻဒျာႏ တွမ်ႏနမ်းဆန္ဒအလꩻ"နုဲင်းနဝ်ꩻတဲင် လိုꩻယွဲးဖုံႏ ကပါသော့ꩻ အစွိုꩻကိုယိုနဝ်ꩻ ထွာဒျာႏ လိုꩻယွဲးအာႏရဲင်ꩻဗွေဖုံႏ၊ လိုꩻသွောင်ဖွီတလျူဖုံႏ၊ လိုꩻယွဲးဝင်ꩻထွဉ်ႏနွို့နွိုင်ႏဆေꩻနေးသား တမွေးတဝ်းကရိုꩻနဝ်ꩻလဲ့ သေထွꩻဗာႏနဝ်ꩻသွူ။ အပွိုက်ဖြယ် (ဆ)အကိုနဝ်ꩻ- ကွပ်အွဉ်ႏထွော့သေꩻခါꩻ "ဖေးနေး ကပါသော့ꩻဗာႏမွုန်း နဲင်ႏငံႏရေꩻပါတီလင်တဗာႏဗာႏ"နုဲင်းနဝ်ꩻတဲင် လိုꩻယွဲးဖုံႏ ကပါသော့ꩻအစွိုꩻကိုယိုနဝ်ꩻ ထွာဒျာႏ ခံႏပါတီတဗာႏဗာႏဩဇာႏမွေးတဝ်း၊ နမ်းထာꩻရေႏမိုးချက်အတွိုင်ꩻ၊ နမ်းမူဝါဒဖုံႏအတွိုင်ꩻ လွစ်လွစ်တခြင်ခြင် ခွုမ်မာꩻလွဒျာႏ တွမ်ႏနမ်းပညာႏဖုံႏကရိုꩻနဝ်ꩻ သေထွꩻဗာႏနုဲင်းနဝ်ꩻသွူ။ အပွိုက် ၁၂၊ အပွိုက်ဖြယ် (ဂ)အကိုနဝ်ꩻ- အွဉ်ႏထွော့သေꩻခါꩻ အွိုင်ႏဥက္ကဋ္ဌ၊ ဒု-ဥက္ကဋ္ဌ၊ အွဉ်အကိုရေꩻ၊ တွယ်ꩻဖက်အွဉ်အကိုရေꩻသီး အထီအသွီႏ "ပညာႏအထီအသွီႏနဝ်ꩻ အဆေ့ꩻသွတ်ꩻ ၈-တန်ꩻ (မွေးတဝ်းတဲ့) ဖေႏကထွာဗာႏ လိုꩻအောင်ႏထွူလဲဉ်း အလတ်တန်ꩻသား"နုဲင်းနဝ်ꩻသွူ။ အပွိုက် ၁၆၊ အပွိုက်ဖြယ် (ဃ)အကိုနဝ်ꩻ- အွဉ်ႏထွော့သေꩻခါꩻ အစွိုꩻခွုမ်မာꩻဝေင်ꩻနယ်ႏ ဥက္ကဋ္ဌ၊ ဒု-ဥက္ကဋ္ဌ၊ အွဉ်အကိုရေꩻ၊ တွယ်ꩻဖက်အွဉ်အကိုရေꩻသီး အထီအသွီႏ "ပညာႏအထီအသွီႏနဝ်ꩻ လိုꩻလꩻတက္ကသိုလ်ႏဘွဲ့တဗာႏဗာႏသား (မွေးတဝ်းတဲ့) ဖေႏကထွာဗာႏ လိုꩻအောင်ႏထွူလဲဉ်း ပရိယတ္တိအကြီးတန်ꩻသား"နုဲင်းနဝ်ꩻသွူ။ အပွိုက် ၁၉၊ အပွိုက်ဖြယ် (ဃ)အကိုနဝ်ꩻ- အွဉ်ႏထွော့သေꩻခါꩻ အစွိုꩻခွုမ်မာꩻ ဗဟိုႏဥက္ကဋ္ဌ၊ ဒု-ဥက္ကဋ္ဌ၊ အွဉ်အကိုရေꩻ၊ တွယ်ꩻဖက်အွဉ်အကိုရေꩻသီး အထီအသွီႏ "ပညာႏအထီအသွီႏနဝ်ꩻ လိုꩻလꩻထွူတက္ကသိုလ်ႏဘွဲ့တဗာႏဗာႏသား (မွေးတဝ်းတဲ့) ဖေႏကထွာဗာႏ လိုꩻအောင်ႏထွူလဲဉ်း ဓမ္မာစရိယသား"နုဲင်းနဝ်ꩻသွူ။ ကွပ်အွဉ်ႏထွော့သေꩻခါꩻနုဲင်းနဝ်ꩻတဲင် ပုဂ္ဂိုလ်ႏကအွဉ်ငါဖေႏဒါႏ အစွိုꩻယိုသားဖုံႏနဝ်ꩻ ထွာဒျာႏ ပုဂ္ဂိုလ်ႏအထီအသွီႏအဝ်ႏဖုံႏ-သေဗာႏနုဲင်းနဝ်ꩻသွူ၊ ပုဂ္ဂိုလ်ႏနွို့အစွိုꩻသား အထီအသွီႏနဝ်ꩻတဲးတဲ့ တအွဉ်ႏထွော့ခါꩻတဝ်းသွူ၊ ခွုမ်မာꩻခြွဉ်းငီꩻလို့ဝင်ꩻထာꩻမာꩻ အဓိပ္ပါယ်ႏလꩻနုဲင်းနဝ်ꩻသွူ။ ယိုကိုခြာနဝ်ꩻ တဖြာꩻတွမ်ႏတဖြာꩻ အဝ်ႏလိုႏခံႏနောမ်ꩻလို့ဝင်ꩻ၊ အဆင်းရန်းစွုမ်ႏ ကခွုမ်မာꩻခြွဉ်းငီꩻလို့ဝင်ꩻထာꩻမာꩻနုဲင်းယိုနဝ်ꩻ ထွာဒျာႏလောကသဘာဝ' လောကနိယာမတဗာႏတန်သွူ၊ စဉ်ꩻစာꩻလွစမ်ꩻ ကခွုမ်မာꩻဒါႏနဲင်ႏငံႏအကိုသူꩻ ထာꩻမာꩻဉာဏ်ႏသား၊ ထာꩻမာꩻနမ်းအာႏသာႏ-စတဲင် အဝ်ႏလွအရန်းရန်းနုဲင်းနဝ်ꩻ၊ ဉာဏ်ႏသားကမာꩻယို နမ်းအာႏသား တမာꩻဖေႏဒါႏတဝ်း၊ နမ်းအာႏသား ထာꩻမာꩻယိုလဲ့ ဉာဏ်ႏသားမာꩻဖေႏတဒါႏတဝ်း၊ ဉဏ်ႏသားတွမ်ႏ နမ်းအာႏသား ခွုမ်မာꩻခြွဉ်းငီꩻလို့ဝင်ꩻ-ကရိုꩻနဝ်ꩻ မူႏမောင်ႏသီး အဝ်ႏသေထွူလဲဉ်းဒျာႏ၊ ဝွေꩻဉာဏ်ႏတွမ်ႏဝွေꩻဉာဏ်ႏ အဝ်ႏထဲ့မဲဉ်ႏဒျာႏ၊ ဝွေꩻထာꩻမာꩻတွမ်ႏဝွေꩻထာꩻမာꩻ အဝ်ႏမွေးဒျာႏနဝ်ꩻသွူ။ ကွပ်နဝ်ꩻမꩻ တဖြာꩻအလောင်း တဖြာꩻအဝ်ႏလိုႏခံႏနောမ်ꩻမွေးငါႏလို့ဝင်ꩻ၊ တဖြာꩻနဝ်ꩻ အာႏကွိုꩻဗာႏ အွိုးတဖြာꩻသား အဉာဏ်ႏတန်ႏဖိုꩻ၊ အွိုးတဖြာꩻနဝ်ꩻလဲ့ အာႏကွိုꩻချာဗာႏ တဖြာꩻနမ်းအာႏသားထာꩻမာꩻနဝ်ꩻသွူ၊ နဝ်ꩻမꩻ ဖေႏနေးသဖော်ꩻကယိင်းဖြောင်တဲင် မဉ်သျင်ꩻနယ်ဖေႏငါႏ တွမ်ႏဂဏန်ꩻဥပမာႏ၊ ဂဏန်ꩻကရိုꩻနဝ်ꩻ အဝ်ႏအဖြုံႏ(၁၀)၊ တဲႏတာ-ဗꩻ သုည- တာ-နဝ်ꩻ အတန်ႏဖိုꩻပေႏ၊ ကွတ်ꩻ-နဝ်ꩻ အတန်ႏဖိုꩻတန်၊ သုညနဝ်ꩻ တမုဲင်ꩻမုဲင်ꩻတအဲဉ်ထဝ်း-အွဉ်ႏထွော့ခါꩻနုဲင်းနဝ်ꩻဖုံႏ၊ မဉ်ႏထွားနေး ဂဏန်ꩻတဖြုံႏစီႏ အတန်ႏဖိုꩻနဝ်ꩻတဲး အဆေ့ꩻအအာကွာႏဒျာႏရင်ꩻ၊ ကွဲႏတွော့ꩻ တဖြုံႏတွမ်ႏတဖြုံႏ မဉ်ႏအွဉ်ႏဆွိုင်ꩻလို့ဝင်ꩻနဝ်ꩻ အတန်ႏဖိုꩻထင်ႏလွဉ်စွဉ်ႏနဝ်ꩻသွူ။ ဥပမာႏ- တာ-ယို မဉ်ႏအုံဝွေꩻတဖြုံႏလွုမ်ꩻနဝ်ꩻ ဝွေꩻတန်ႏဖိုꩻ အဝ်ႏတာလွုမ်ꩻ၊ နီ-မဉ်ႏအုံတဖြုံႏလွုမ်ꩻတဲ့ ဝွေꩻတန်ႏဖိုꩻ အဝ်ႏကွို့ꩻနီလွုမ်ꩻ၊ တာတွမ်ႏနီထွိုင်ႏအွဉ်ႏဆွိုင်ꩻဗော့ꩻလို့ဝင်ꩻခိန်ႏနဝ်ꩻ ထွာတေားစွဉ်ႏ တဆီနီနဝ်ꩻသွူ၊ အရင်ႏခံꩻတာတွမ်ႏနီယို မဉ်ႏဗဲ့ꩻထိုꩻလို့လို့နဝ်ꩻ အမဲစ်အဝ်ႏကုဲင်ကွတ်ꩻ၊ နီနဝ်ꩻ အွဉ်ႏဆꩻငါ တာ-ယိုမဉ်ႏအွဉ်ႏသွုပ်ဆꩻချာနဝ်ꩻ ထွာတေားစွဉ်ႏ နီဆီပုဲင်၊ နီဆီပုဲင်အကို မဉ်ႏဗဲ့ထိုꩻချာ တဆီနီနဝ်ꩻ အမဲစ်ထွာယင်းကွတ်ꩻ၊ လꩻအဗွောင်ကွတ်ꩻနုဲင်းနဝ်ꩻသွူ။ သုညယို ရိုꩻလွ တမုဲင်ꩻမုဲင်ꩻအဲဉ်ထဝ်း၊ ကွဲႏတွော့ꩻ တာတွမ်ႏသုည မဉ်ႏအွဉ်ႏဆွိုင်ꩻလို့ဝင်ꩻနဝ်ꩻ ထွာတေားစွဉ်ႏ တဆီ၊ တဆီအကိုယို မဉ်ႏဗဲ့ထိုꩻချာတာ-နဝ်ꩻ အမဲစ်အဝ်ႏကုဲင်ကွတ်ꩻ၊ အတန်ႏဖိုꩻကအာဒါႏ ဂဏန်ꩻဖုံႏ မဉ်ႏအွဉ်ႏဆွိုင်ꩻတွမ်ႏသုညနဝ်ꩻ တန်ႏဖိုꩻအာတဲ့ တန်ႏဖိုꩻကအာအလွောက်ꩻ အတန်ႏဖိုꩻထင်ႏလွဉ်ထင်ႏလွဉ်စွဉ်ႏ၊ ခွုင်းကားတဲင် သုညအဆေ့ꩻအအာအလွောက်ꩻ တန်ႏဖိုꩻထင်ႏလွဉ်ထင်ႏလွဉ်စွဉ်ႏနဝ်ꩻသွူ၊ "မဉ်ႏခြွဉ်းငီꩻနဝ်ꩻ-ယံမွေးစွဉ်ႏထာꩻ"သဖော်ꩻဖြောင်နုဲင်းနဝ်ꩻတွော့ꩻ သꩻရေꩻလွသွော့။ တမျိုꩻယင်း မဉ်ႏဖေႏယင်းငါႏ "၃+၄"ဥပမာႏ၊ "၃"တွမ်ႏ"၄"ယို မဲ့ငါချင်ꩻ မဉ်ႏတခွဲႏတောႏထေ့တဝ်း၊ ခွဲးတဝ်းလဲ့ ထွိုင်ႏအုံငီꩻဝင်ꩻနဝ်ꩻ အတန်ႏဖိုꩻအဝ်ႏကွို့ꩻ "သိုမ်ဆီလစ်ꩻ"လွုမ်ꩻ၊ မဲ့ငါချင်ꩻ ခွဲႏတောႏထွိုင်ႏအုံလင်ꩻခိန်ႏနဝ်ꩻ ထွာတေားစွဉ်ႏ"၄၃"(လစ်ꩻဆီသိုမ်)တဲင် တန်ႏဖိုꩻယိန်းတန်တန်လွဉ်စွဉ်ႏနဝ်ꩻသွူ၊ ခါးလား မဲ့ချင်ꩻခွဲႏတောႏ ကအုံလင်ꩻခိန်ႏနဝ်ꩻ တန်ႏဖိုꩻအဝ်ႏကွို့ꩻ သိုမ်ဆီလစ်ꩻဒျာႏ၊ ထွိုင်ႏအုံလင်ꩻမဲ့ငါခွဲႏတောႏခိန်ႏတွော့ꩻ ထွာစွဉ်ႏလစ်ꩻဆီသိုမ်၊ လစ်ꩻဆီသိုမ်နဝ်ꩻအကို မဉ်ႏဗဲ့ꩻထိုꩻချာ သိုမ်ဆီလစ်ꩻနဝ်ꩻ အမဲစ်အဝ်ႏကုဲင်ကွတ်ꩻ၊ မဲ့ငါထွိုင်ႏခွဲႏတောႏ (မွေးတဝ်းလဲ့) ထွိုင်ႏမာꩻနီတုဲင်ဆဲင်ႏနဝ်ꩻ အမဲစ်အဝ်ႏစွဉ်ႏကွတ်ꩻ၊ ထွာအနွောင်ꩻကွတ်ꩻနုဲင်းနဝ်ꩻသွူ။ ကထိုမ်ႏပျဿနာႏအဖြေႏ ခေတ်ယိုခါ ဝင်ꩻမဲ့ဗꩻခိန်ႏနဝ်ꩻ ပေါႏခွေဒေါ့ꩻဝွေꩻအပဲစ်၊ ပေါႏဝွေꩻဒေါ့ꩻခွေအပဲစ် ငင်းအုံႏမဉ်ႏခွဲႏတောႏလို့ဝင်ꩻနဝ်ꩻ တန်ႏဖိုꩻဆေ့ꩻ၊ ထွိုင်ႏမာꩻခန်း "တတုဲင်ဆဲင်ႏ"နဝ်ꩻမꩻ "ပဲင်ႏအခွင်ꩻ"တဲင် အမဲစ်အဝ်ႏလွဉ်စွဉ်ႏ၊ လꩻလွဉ်စွဉ်ႏအဖြေႏနဝ်ꩻသွူ။ လိုꩻယွဲး-ကွန်ယဲစ် ကထင်ႏထိုဒါႏ မူႏမောင်ႏသီးဖုံႏ- "မင်္ဂလာႏ"ကရိုꩻဒါႏငဝ်းယို ထွာဒျာႏ လိုꩻတွိုင်ꩻကမဉ်ဟွုန် ငဝ်းတငွါတန်နဝ်ꩻသွူ၊ ဟန်ႏနီꩻယိုနဝ်ꩻ မွူးနီꩻမင်္ဂလာႏအဝ်ႏငါႏ၊ မင်္ဂလာႏအဝ်ႏမွူးနီꩻအကို မဉ်ႏဟော်ꩻနယ်ဖေႏငါႏ မူႏမောင်းသီး မင်္ဂလာႏတရာꩻ တစူးတစိꩻပေႏငါ၊ မင်္ဂလာႏတရာꩻ ၃၈-ပါꩻအကို အထျꩻထျꩻတပါꩻနဝ်ꩻ "အသေဝနာ စ ဗာလာနံ- မဉ်ႏတပေါင်ꩻကွိုက်ꩻတဝ်း တွမ်ႏလိုꩻမွိုက်ဖုံႏနဝ်ꩻ ထွာမင်္ဂလာႏ"ဗွေႏဘုရာꩻဟော်ꩻခါꩻနုဲင်းနဝ်ꩻသွူ၊ "ဗာလ-လိုꩻမွိုက်"ကရိုꩻနဝ်ꩻ လိုꩻနုဲင်းမုဲင်ꩻစားနဲးတဲင်- ၁။ ဒုစ္စိန္တိတ စိန္တီ - ကျမ်ႏဒျာႏ ထာꩻကုဲင် ၂။ ဒုဗ္ဘာသိတ ဘာသီ - ဒေါ့ꩻဒျာႏ ထာꩻကုဲင် ၃။ ဒုက္ကဋ ကမ္မ ကာရီ - မာꩻဒျာႏ ထာꩻကုဲင် ယိုသိုမ်မျိုꩻအကို တမျိုꩻလွုမ်ꩻတရိုꩻတဝ်း၊ နီမျိုꩻစွဉ်ႏတဲ့သင်၊ သိုမ်မျိုꩻလို့လို့တရိုꩻတဝ်း လိုꩻကကျမ်ႏစဲႏ ကဒေါ့ꩻ ကမာꩻသားနဝ်ꩻ "ဗာလ-လိုꩻမွိုက်" ဗွေႏဘုရာꩻဟော်ꩻခါꩻနုဲင်းနဝ်ꩻ။ မူႏမောင်ႏသီးအစွိုꩻနဝ်ꩻ ထွာအစွိုꩻအာႏတလာတစွိုꩻတန်၊ "အာႏတလာ"ယို လိုꩻကေား"မဉ်ကဝ်ꩻငါ"သားလဲ့ အဝ်ႏလွဉ်နွောင်ꩻဒါႏ၊ "အာႏတလာ"ယို လိုꩻကေား"မဉ်ကွိုက်ꩻကျွား"သားလဲ့ အဝ်ႏလွဉ်နွောင်ꩻဒါႏ၊ "သတိꩻမူႏမောင်ႏ-သေတဝ်းယောင်ႏဒါႏ"၊ မူႏမောင်ႏသီး လိုႏအွဉ်ႏသတိꩻသေႏသေႏ၊ မဉ်ႏအွဉ်ႏတဝ်းသတိꩻ မဉ်ႏတသေတဝ်းနဝ်ꩻ ထန်ႏယောင်ႏယဲင်ဒါႏထာꩻ၊ "အုံဆꩻချာတဲင် စမ်ꩻလိုꩻသွီႏ-မဉ်ႏထီႏအသဲ့ ဒီးဒါႏ"တဲ့၊ "လိုꩻလက်တဲးနဝ်ꩻ - ကာဒင်ႏဒါႏလိုꩻယွဲး"ကရိုꩻနဝ်ꩻ အွဉ်ႏသတိꩻသေႏသေႏသွော့။ မင်္ဂလာႏတပါꩻယင်းနဝ်ꩻ- "ဉာတကာနဉ္စ သင်္ဂဟော-ပင်ႏထို စွဲးကမ်းဖေႏ ဖူးဝေးစွိုးခွိုꩻနဝ်ꩻ ထွာမင်္ဂလာႏတပါꩻ" ဗွေႏမျတ်ဘုရာꩻ ဟော်ꩻခါꩻနုဲင်းနဝ်ꩻသွူ။ "သင်္ဂဟ-စွဲးကမ်းဖေႏ"ကရိုꩻနဝ်ꩻ ဗွေႏမျတ်ဘုရာꩻ ဟော်ꩻခါꩻလစ်ꩻပါꩻ၊ လစ်ꩻပါꩻကရိုꩻနဝ်ꩻ- ၁။ ဒါနသင်္ဂဟ - စွဲးကမ်းဖေႏ ဖူးဝေးစွိုးခွိုꩻဖုံႏ ၂။ ပေယျာဝဇ္ဇ - ဒေါ့ꩻဒျာႏငဝ်းစိုမ်ꩻရက် နစ်သက်ခရာႏ ၃။ အတ္ထစရိယ - ခွုမ်မာꩻဖေႏ အကျိုꩻစီꩻပွါꩻ ၄။ သမာနတ္တတာ - အရန်းအွဉ်ႏတသွုန်တွမ်ႏနီနမ်း-နုဲင်းနဝ်ꩻဖုံႏသွူ။ မူႏမောင်ႏသီး ကအီႏမာꩻဗာႏထာꩻမာꩻနဝ်ꩻ အရန်းအဝ်ႏ(၄)ရန်း၊ ၄-ရန်းကရိုꩻနဝ်ꩻ - ၁။ ထာꩻမာꩻ လမ်းကိုအံႏအွꩻကွဉ်ကꩻအီတာႏ ၂။ ထာꩻမာꩻ ဒုံ/ဝေင်ꩻ ဖေႏကကွုန်ꩻဟွိုင်ꩻသာႏယာႏအီတာႏ ၃။ ထာꩻမာꩻ ဒေႏသဖေႏကပြွူႏဖြိုအီတာႏ ၄။ နဲင်ႏငံႏတောႏအတွက် (က) ခမ်းပေါင်ꩻဗူႏ ဖေႏကပြုဲင်ပြင်ꩻဗာႏမွုန်း (ခ) ခမ်းရင်ꩻသားထာꩻလွောင်ႏဗူႏ ဖေႏကပြုဲင်ပြင်ꩻဗာႏမွုန်း (ဂ) ခွုမ်သဲဉ်ꩻအထျꩻအထောင်ꩻအာႏဏာႏ ဖေႏကတဉ်ႏခွေါင်အီ-စတဲင် ထာꩻမာꩻဖုံႏနဝ်ꩻသွူ။ အရန်းမုဲင်ꩻကို မာꩻဗာႏတမုဲင်ꩻကရိုꩻနဝ်ꩻ မူႏမောင်ႏသီးကွန်ယဲစ်နဝ်ꩻ စျူထင်တရုဲင်ထွူလဲဉ်းဒျာႏ၊ ဒေါ့ꩻထဲင်းခရာႏ တပေါႏလိုႏဒွုမ်သွူ။ မင်္ဂလာႏတပါꩻယင်းနဝ်ꩻ- "မဇ္ဇပါနာ စ သံယမော-သျေင်ႏထိုꩻတသီႏမွန်ꩻတဖေင်ꩻနဝ်ꩻ မင်္ဂလာႏတပါꩻ"ဗွေႏမျတ်ဘုရာꩻ ဟော်ꩻခါꩻနုဲင်းနဝ်ꩻသွူ။ နမ်းကျင်ꩻတရာꩻ သီႏလငတ်ꩻပါꩻအကိုနဝ်ꩻလဲ့ ဗွေႏဘုရာꩻဆꩻငါ၊ ရဟန်ꩻသံႏဃာႏသီးဆꩻငါ မူႏမောင်ႏသီး အဝ်ႏအာမခံႏခါꩻ "သုရာမေရယ မဇ္ဇပမာဒဋ္ဌာနာ ဝေရမဏိ သိက္ခာပဒံ သမာဒိယာမိ" "အာမ ဘန္တေ"ခံႏအွꩻတဝ်း ဒဝ်၊ ဗီယာ၊ ခံႏသုံꩻစွယ်ꩻတဝ်း ယာမ၊ ယာဗွာ၊ ယာဖြေင်း" အလဲင်ႏပေါင်ꩻအာငါႏလဲဉ်းဒျာႏနဝ်ꩻသွူ။ မူႏမောင်ႏသီးဝေင်ꩻကို၊ ဒုံကို၊ သွꩻခွဖုံႏခြာအကို လိုꩻကအွꩻဒဲဉ်ဒဝ်၊ ဘီယာ၊ လိုꩻကသုံꩻ၊ ကစွယ်ꩻလွဒါႏ ယာမ၊ ယာဖြေင်း၊ ယာဗွာ-အာလွဉ်လဲဉ်းတကားမုဲင်ꩻကရိုꩻနဝ်ꩻ မူႏမောင်ႏသီး အသေသွတ်ꩻနဝ်ꩻသွူ။ သုံꩻနေးစွုန်ꩻ-ယမ်ꩻ-ဗုံးတွော့ꩻ ကတွိုက်ꩻနဝ်ꩻ "အငဝ်းသင်ႏတွိုက်ꩻပွယ်ꩻ"၊ ဖေႏနေးရောႏဂါႏကထွာအီ ထာꩻအွꩻထာꩻအံႏအကို သောꩻ့နေးဓာတုတသီႏအမျိုꩻမျိုꩻ၊ ဖေႏကစွယ်ꩻဒဝ်၊ ဗီယာ၊ ယာမ၊ ယာဗွာ၊ ယာဖြေင်း-ကမာꩻနုဲင်းနဝ်ꩻနဝ်ꩻ "အငဝ်းတသင်ႏတဝ်းစဲ့ꩻပွယ်ꩻ"၊ အငဝ်းတသင်ႏတဝ်းတွိုက်ꩻပွယ်ꩻအကို လိုꩻကလꩻတံႏ ထာꩻဆာသား အာလဲဉ်းတခွုင်းမုဲင်ꩻ၊ လိုꩻယွဲးလွုမ်ꩻတကာႏတဝ်း မွိုးဖါဆရာႏသီးလဲ့ လိုꩻမော့ꩻတသီႏသား အာလွဉ်လဲဉ်း-ကရိုꩻနဝ်ꩻ တွမ်ႏမေတ္တာႏတဲင် ဖေႏသတိꩻ မဉ်အွဉ်ႏဟွုန်ငါႏနုဲင်းနဝ်ꩻသွူ။ စွိုးခွိုꩻဘာႏသာႏ သာႏသနာႏအတွက် အန္တရာယ်ႏတန်လွဉ်ငါႏလဲဉ်းသွူ၊ ဆရာႏတကာႏ လွောင်ႏလွောင်ႏဗူႏဗူႏ အဝ်ႏလိုႏရဲးပေ့ꩻခါꩻငါႏလဲဉ်း အန္တရာယ်ႏနုဲင်းနဝ်ꩻဖုံႏအကျောင်ꩻ၊ "ကွန်ယဲစ်-အဝ်ႏလိုႏတရုဲင်နဲစ်"ငါႏအကျောင်ꩻ၊ ကွန်ယဲစ်ယို ပေါႏမက်ငါႏရွဉ်ခံꩻ၊ မဉ်ႏမက်ငါႏ အရာႏအာႏဏာႏနဝ်ꩻ အဝ်ႏကွန်ယဲစ်- ထွာပြောင်ꩻထိုꩻဒါႏ "သွဉ်းစဲစ်"အကျောင်ꩻ၊ ဖေႏနေးကထွာပြောင်ꩻထိုꩻဗာႏမွုန်းနုဲင်းနဝ်ꩻတဲင် အွဉ်ႏတဉ်ႏတဉ်ႏခွေါင်ခွေါင်လွသွော့ စွိုးခွိုꩻဘာႏသာႏ သာႏသနာႏလောင်း-ကရိုꩻနဝ်ꩻ မဉ်ဒေါ့ꩻဖေႏမွေးမွေးငါႏနုဲင်းနဝ်ꩻသွူ။ "ယိုခါလိုꩻယွဲး-ဆုဲင်ꩻနဲးလိုꩻတန်"ကရိုꩻငဝ်းနဝ်ꩻအတွိုင်ꩻ ဆုဲင်ꩻတနီꩻခါ မဉ်ႏတွိုႏလွဉ်သော့ꩻ လိုꩻတန်ခင်ႏလမ်းခိန်ႏ ယံကထွာ လိုꩻနပ်ငိမ်၊ သꩻအောင်ခါႏ တဲႏသော့ꩻဒျာႏစေႏတီႏသားနဝ်ꩻ အဝ်ႏလိုႏလွူꩻသေႏငါႏ' ဟော်ꩻလွငါႏ' တောင်ꩻခါꩻလွငါႏ ဗုဒ္ဓဝင်ႏ' မင်္ဂလသုတ်' သိင်္ဂါလောဝါဒသုတ်-စတဲင် လောကုတ္တရာႏလိတ်လုဲင်ꩻဖုံႏနဝ်ꩻသွူ။ လိုꩻယွဲးကွန်ယဲစ်-ထင်စဲစ်လွသွော့ လိုꩻယွဲးကွန်ယဲစ်-ထင်ႏနဲစ်လွသွော့ ကုသိုလ်ႏတရာꩻဖုံႏလဲ့ ယံဖေႏကကျိုꩻစာꩻမာꩻနွောင်ꩻလွသွော့၊ ကျိုꩻစာꩻခွုမ်မာꩻနွောင်ꩻလွထွူတဲင် ဖေႏကလꩻမွိုင်မွိုင်နွောင်ꩻလွသွော့ မဂ်တရာꩻ၊ ဖိုလ်ႏတရာꩻ၊ နိဗ္ဗာန်ႏချမ်ꩻသာႏတရာꩻဖုံႏ ပငါပရာꩻနေား။ (ဗွေႏဗွန်ကောဝိဒ) ဇ၀နာရာမလိတ်သွဉ်တွိုက်၊ ဝေင်ꩻသီႏသဲင်ႏ။ ၁၃၇၅-ဗာႏ၊ ဒဲဉ်သီႏဆန်ꩻ(၅)နီꩻ၊ (၂၂-၂-၂၀၁၅)(ဝွန်ႏခံႏချက်- ဩဝါဒယိုနဝ်ꩻ တဲမ်းမန်းနေးဒျာႏ ယိုကိုခြာနဝ်ꩻ ပြန်ႏပအိုဝ်ႏဖေႏနေး၊ ငဝ်းမဉ်ႏတချော်ꩻပြေတဝ်းလဲ့ သေနာႏစွꩻခွင်ꩻပါသွော့အကျောင်ꩻ ဝွန်ႏခံႏဗာႏနုဲင်းယိုသွူ)