ခွိုꩻစုပ်တသာပွုံႏတာႏ(၂)

"ခွိုꩻစုပ်တသာလိုꩻယွဲးတွမ်ႏ သမဲင်ꩻဖေႏပွုံႏတာႏ(၂)" ခေတ်အစုပ်မုဲင်ꩻမုဲင်ꩻယောဝ်း နီပအိုဝ်ႏပေႏလိုꩻယွဲးယို ကအီႏနွို့ထူႏကိုဖေႏဒါႏ စွိုးခွိုꩻပွုံႏတာႏ (တာႏဝွန်ႏ)နောဝ်ꩻ အောဝ်ႏဆေ့ꩻငါႏ၊ သꩻပါရောင်လွတောဝ်းဝင်ꩻဖုံႏ၊ သꩻမဉ်နွို့ထူႏကို စွိုးခွိုꩻပွုံႏတာႏအဲဉ်ထောဝ်းဝင်ꩻဖုံႏ၊ သꩻဓာတ်ရုဲင်းထင်လိုꩻယွဲးယံသားဖုံႏ ယဟန်ႏအောဝ်ႏမဉ်နွို့မာꩻကိုဒျာႏလဲ့ မာꩻသော့ꩻငီꩻခွင်ꩻ တလꩻတောဝ်းဖုံႏ၊ အဆုံꩻကို ထကွာမေႏရီးလိုꩻတန်သားထွိုင်ႏအဲဉ်ထောဝ်းနောဝ်ꩻ ကအီႏနွို့မာꩻငီꩻ စွိုးခွိုꩻထာꩻမာꩻလဲ့ အခွင်ꩻဝင်ꩻတဖေႏတောဝ်းဖုံႏစတဲင် စတဲင်အကျောင်ꩻလံꩻခရာႏ အပွိုးပါႏအောဝ်ႏအာငါႏနောဝ်ꩻမꩻ လိုꩻယွဲဖုံႏ တနွို့မꩻငီꩻကိုတောဝ်း စွိုးခွိုꩻထာꩻမာꩻဖုံႏနောဝ်ꩻသွူ။ ခွိုꩻစုပ်တသာလိုꩻယွဲးပေႏဖုံႏ မဉ်ႏတနွို့မာꩻငီꩻကိုတောဝ်း စွိုးခွိုꩻထာꩻမာꩻ၊ သꩻမဉ်နွို့မာꩻ စွိုးခွိုꩻထာꩻမာꩻကို မဉ်ႏအဲဉ်ထောဝ်းနောဝ်ꩻ နီလိုꩻတန်ယံ အီႏပေါႏဗာႏယို တယိုꩻတောဝ်းနောဝ်ꩻသွူ၊ လိုꩻပေꩻသꩻမဉ်ဗုဲင်သျင်ႏ မဉ်ႏတအဲဉ်ထောဝ်းလဲ့ သꩻမဉ်ထွာဗွေႏဗွန်တအဲဉ်ထောဝ်းနောဝ်ꩻသွူ။ ပွိုင်းလဲင်ႏခါ နီခွိုꩻပအိုဝ်ႏ ဘဝနောဝ်ꩻ ပွိုးစွဉ်ႏခံႏဗာႏအာငါႏ စဲ့ꩻဘေꩻစဲ့ꩻတံႏတဖဲ့ꩻ၊ ထီႏဗာႏဟွိုန်ဗာႏအာငါႏ ဝင်ꩻမာꩻသီထိုꩻလို့ ပအိုဝ်ႏလိုꩻသေလိုꩻဒါႏ ပညာႏအောဝ်ႏသားဖုံႏတဖဲ့ꩻ၊ လိုꩻပေႏဒေါ့ꩻထာꩻခွင်ꩻ၊ လိုꩻမူႏဒေါ့ꩻထာꩻခွင်ꩻ အဲဉ်ထောဝ်းတဖဲ့ꩻ၊ အရေꩻမျိုꩻမုဲင်ꩻခန်းတယောဝ်း လိုꩻအာႏဏာႏအောဝ်ႏသား မဉ်ႏဒေါ့ꩻမꩻထွူ၊ အာႏဏာႏအောဝ်ႏသား မဉ်ႏဒေါ့ꩻသွူနောဝ်ꩻ ရော့ꩻရော့ꩻမာႏမာႏ အွဉ်ႏထွူအီဗာႏဒျာႏနောဝ်ꩻမꩻ လိုꩻပေႏဖုံႏ သꩻကမဉ်မာꩻတောဝ်း ဝင်ꩻအကဲႏအတန်နောဝ်ꩻသွူ။ နုဲင်းခေတ်ယိုခါ ဒီမိုကရေစီတဖူꩻရဲဉ်ႏ ဝင်ꩻလိုꩻမျိုꩻဘာႏသာႏ အောဝ်ႏထူႏသွုံꩻအီလဲဉ်းဒျာႏလဲ့ နီပအိုဝ်ႏခွိုꩻနွယ်ႏ အောဝ်ႏခံႏဗာႏစွူစွူကဒျာႏ အာႏဏာႏဗွေႏသီး စူခြဲမ်ဆꩻလ၊ အောဝ်ႏတဗျစွူစွူကဒျာႏထာꩻ၊ မဉ်မာꩻ၊ မဉ်ဒေါ့ꩻ၊ မဉ်တဲမ်းတွိုင်ꩻလဲ့ ခွင်ꩻတအောဝ်ႏလို့တောဝ်းနောဝ်ꩻသွူ။ ၂၀၁၀-မဲကာႏလတဗာႏ၊ ၂၀၁၅-မဲကာႏလတဗာႏ၊ မဲကာႏလနီဗာႏလဲဉ်းသွူမွေးတဲ့ လိုꩻယွဲသအောင်ခါႏနောဝ်ꩻ အောဝ်ႏတဖော့ဖင်ꩻဗာႏစွူစွူကဒျာႏ ထာꩻငမ်းဘဝ၊ အောဝ်ႏခံစွူစွူဗာႏကဝင်ꩻဝင်ꩻတေက်ꩻနျꩻ၊ ရုဲင်ꩻသန်ထာꩻတခုဲင်ႏလꩻဒွိုန်းတွိုင်ꩻတွိုင်ꩻ အောဝ်ႏတအွိုက်ꩻမွန်ꩻဗာႏနေက အာႏဏာႏဗာႏသား တအွိုစွူႏခြာနောဝ်ꩻသွူ။ မဲကာႏလယိုတဗာႏ လိုꩻယွဲးဖုံႏမဉ်ႏအောဝ်ႏခံဗာႏစွူစွူနေဒွိုန်း အာႏဏာႏဗာႏသားအစွူႏနောဝ်ꩻ ထဲင်းခြာ ၂၀၂၀-မဲကာႏလခိန်ႏခါႏသူꩻ နီပအိုဝ်ႏတာႏ သꩻထွူႏခရာႏတန်နောဝ်ꩻသွူ။ ထွားဟော်ꩻဒျာႏ လိတ်သေသင်ꩻ အလာမုဲင်ꩻမုဲင်ꩻလဲ့ ခမ်းသားမွိုးဖါမဲ့ထီရီႏခန်း ဝင်ꩻအောဝ်ႏတဲမ်းသော့ꩻပါသေႏသေႏ၊ အွိုးနီဒုံခြင်ခါႏကိုလဲ့ အောဝ်ႏဟွိုန်ခွိုꩻခွိုꩻဗာႏစွဉ်ႏ ဝင်ꩻအံႏတေက်ꩻနျꩻ နီစွိုးခွိုꩻလိုꩻမျိုꩻနောဝ်ꩻမꩻ အုံသော့ꩻပအိုဝ်ႏအုပ်ချွုတ်ခွင်ꩻလꩻဒေႏသယို ကံႏဟောဝ်ကံႏဆꩻတပါꩻသဲင်တောဝ်းဒျာႏဟောင်း။ နေင်ႏဟာနေင်ႏစာႏ ဟွိုန်ထွꩻဗာႏသွူ ဝင်ꩻလွောင်ႏဗူႏလဲဉ်း ပအိုဝ်ႏလိုꩻယွဲစွိုꩻ (PYN)တဲ့ နုဲင်းနောဝ်ꩻနောဝ်ꩻ သꩻရေꩻကိုငါႏ မရေႏမရာႏလဲ့ သꩻထာꩻယူႏမာႏတဗာႏနောဝ်ꩻ အောဝ်ႏခံႏတေက်ꩻသော့ꩻနေက သꩻအောင်ခါႏကို နုဲင်းမုဲင်ꩻနဲတဲင် "ပအိုဝ်ႏပေႏလိုꩻယွဲစွိုꩻ"ယိုနောဝ်ꩻ "ပါတီလိုꩻယွဲနဲ့""ခမ်းသားလိုꩻယွဲနဲ့"ကရိုꩻဒါႏ ထာꩻယူႏထာꩻထင်း ဒွိဟနောဝ်ꩻ အောဝ်ႏနေကဒွိုန်းသွူ။ ခတလဲင်ႏ တဲမ်းလိတ်သား လယ်ႏလွူꩻထွားလွဉ်ꩻဗာႏ "ခင်ႏလမ်းပညာႏရေꩻ"အကို တွိုႏဝေင်ꩻထာꩻရျိုး ခင်ႏလမ်းဗေင်ႏတယ်ꩻတထွောင်း ထွိုင်ႏအုံကွံဒေါ့ꩻရီဝင်ꩻ လွေꩻတဖူꩻမတ်တန်ꩻ "အွဉ်ႏထွူထွာအီ တဖူꩻရဲဉ်ႏ"(ခရီးစဉ် လေ့လာရေးဆုံးဖြတ်ချက်)နောဝ်ꩻ လိုꩻလောင်ႏလင် မဉ်ႏဒေါ့ꩻနုဲင်းမုဲင်ꩻဒေါ့ꩻလဲ့ တစူꩻတောဝ်း အောဝ်ႏထွူအီဗာႏတွမ်ႏပါတီလိုꩻယွဲသားဖြာꩻငေါဝ်းနောဝ်ꩻသွူ။ မဉ်ႏထွားဒျာႏ အဟောဝ်အကုဲင်နုဲင်းယိုနောဝ်ꩻ နီလိုꩻယွဲယို ထွာဒျာႏ ပါတီလိုꩻယွဲတဲင် နမ်းခြောင်ꩻတင်ဖေႏတွမ်ႏ ခမ်းသားမွေးတောဝ်းကရိုꩻနောဝ်ꩻ တဲမ်းလိတ်သား ရိက္ခေႏလꩻနုဲင်းနောဝ်ꩻသွူ။ မဉ်ႏလွေꩻစွူစွူတွမ်ႏအနယ်ꩻယိုနောဝ်ꩻ ပါတီမဉ်ႏထဲ့လဲ့ လိုꩻယွဲအဲဉ်ထောဝ်းဒွုမ် သဖော်ꩻထန်ႏထိုꩻဒျာႏနုဲင်းနောဝ်ꩻသွူ။ ဟန်ႏနေင်ႏယို ဟွိုန်သေထွꩻဗာႏ ပအိုဝ်ႏလိုꩻယွဲဖုံႏ အီႏမာꩻညီႏလာႏခံႏနုဲင်းနောဝ်ꩻတဲင် ဖေႏကထွာဗာႏမွိုန်း ပါတီလိုꩻယွဲးညီႏလာႏခံႏ၊ ဖေႏကထွာဗာႏဒျာႏသွော့ ခမ်းသားလိုꩻယွဲးညီႏလာႏခံႏကရိုꩻနောဝ်ꩻ တဲမ်းလိတ်သား မဉ်ဒေါ့ꩻဖေႏငါႏနုဲင်းနောဝ်ꩻသွူ။ မဉ်ႏထွာဒျာႏ ခမ်းသားလိုꩻယွဲးညီႏလာႏခံႏနောဝ်ꩻမꩻ အီႏနမ်းခြောင်ꩻတင်လွေꩻအီ ပအိုဝ်ႏအနာႏဂတ် ပွိုင်ဆင်လွေꩻသားပိုလီꩻဟောဝ် ရတနာႏတဲင် ပအိုဝ်ႏလိုꩻမျိုꩻတွက်တာႏ ထာꩻလေရောင်ႏအာႏရုဏ်ႏတသာ အီႏထန်ႏလွဉ်ဗာႏအမန်ႏနောဝ်ꩻသွူ။ ခမ်းကောင်ခမ်းဒွမ် ခမ်းကိုခမ်းထန်ႏ ခွိုင်းကားတဲင် ဟံႏတဗီႏလောင်းကီ ကအောဝ်ႏအုံသော့ꩻဒါႏ ပအိုဝ်ႏပေႏလိုꩻယွဲဖုံႏလို့လို့စင်စင် လွူးထင်ထင်သွော့ဝင်ꩻသꩻဓာတ်၊ မာꩻယံယံနက်ရုဲင်းရုဲင်း၊ အွဉ်ကုဲင်းကုဲင်း ဒေါ့ꩻရီရော့ꩻရော့ꩻ၊ လွဉ်ခွဲမော့ꩻဝင်ꩻပွယ်ꩻအုံကွံကို အခိုလဲ့ လွောင်ႏလွောင်ႏဗူႏ၊ အမူႏလဲ့ ဖြွမ်းညီꩻညီꩻဝင်ꩻ၊ ပအိုဝ်ႏချင်ꩻချင်ꩻ ဖေတောဝ်းဝင်ꩻ၊ ဖွို့ꩻပြေင်သီႏငွဉ်ꩻ ဆွန်ꩻတဉ်ႏဝင်ꩻစူတဲင် မာꩻညီꩻထွူထွူသွော့ဝင်ꩻ ညီႏလာႏခံႏယိုနော။ ပအိုဝ်ႏလိုꩻယွဲးညီႏလာႏခံႏသဘင်ႏ ပွယ်ꩻတန်အကိုယို အခိုလဲ့ သꩻလွောင်ႏဗူႏ၊ အမူႏလဲ့ သꩻဗွိုန်ပီ အုံကွံဒေါ့ꩻရီစေ့ꩻထန်ႏဝင်ꩻကတူႏခီး၊ သေကရီးတဲ့ဒေါ့ꩻ မော့ꩻခရီးလဲ့ စေ၊ ကဒေါ့ꩻကစေ ကသေကဒါႏ ပညာႏပါပါ၊ မဉ်ငါယံယံ ပွိုင်ဆင်တရေꩻရေꩻ ဒင်ႏသေꩻသမဲင်ꩻ၊ ယံသဲင်ꩻသွူကွေးနေား။ ခေတ်ကရီးခါနောဝ်ꩻ လိုꩻယွဲဖုံႏ မဉ်ႏထွိုင်ႏအွဉ်ငါဒျာႏ၊ မဉ်ႏထူႏကိုဒျာႏစွိုးခွိုꩻပွုံႏတာႏလဲ့ ပွိုးစွဉ်ႏဖူးဝေးတပါသော့ꩻတောဝ်း လိုꩻတန်ကိုတဲင် ဖြောင်းအောဝ်ႏဒျာႏ ပညာႏလꩻဘွဲ့လဲ့ ထွာဗာႏဒျာႏလိုꩻဖြောင်းတအာႏ၊ ပညာႏထိုꩻသိုႏလို့ဒျာႏနောဝ်ꩻမꩻ ခွိုꩻပအိုဝ်ႏဘဝ အောဝ်ႏဒုက္ခဗာႏထာꩻနောဝ်ꩻ သꩻပေႏတလွိုးကိုငါႏနောဝ်ꩻသွူ။ ခေတ်ယိုတဗာႏ လိုꩻယွဲဖုံႏ ဒါႏရောင်မို့ဝင်ꩻပညာႏ၊ ချာႏကမ္ဘာႏလဲင်ꩻတဗန်ႏ၊ ထာꩻသေဉာဏ်ႏ ကဆꩻရောင်မို့ဝင်ꩻနောဝ်ꩻ ပအိုဝ်ႏကံႏယို ဖေႏကလꩻအီသွော့ ပအိုဝ်ႏဟံႏ၊ ဖေႏကအံႏအီနွောင်ꩻခမ်းထီတာႏ "ညီႏလာႏခံႏ"ယို တလဲင်ႏ အီႏဖောႏထန်ႏနယ်သွူ ပအိုဝ်ႏအမန်ႏတရာꩻကွေးနေား။ ခွိုꩻစုပ်တသာ ပအိုဝ်ႏပေႏလိုꩻယွဲးသီးဖုံႏဟွေး- သမဲင်ꩻဖေႏပွုံႏတာႏအတွိုင်ꩻ ထေရဲင်ꩻအာႏပငါပရာꩻတဲင် ကလိုႏဒါႏဖဲ့ꩻမုဲင်ꩻယောဝ်း ဗဲ့ꩻမွိုန်းတောဝ်းနမ်း၊ ငမ်းမွိုန်းတောဝ်းပါꩻ၊ ထဲ့ရာꩻသင်ꩻရာꩻပွုံႏတာႏ တွမ်ႏစေႏတနာႏဗွာဗွာ အွဉ်ငါရုဲင်းရုဲင်း၊ မာꩻလုဲင်း၊ ထွိုင်ႏဟုဲင်း၊ နဲစ်ကုဲင်း၊ ဗွောင်ခြုဲင်း၊ ထွားနုဲင်း၊ မာꩻမွေးမုဲင်းသွော့ဝင်ꩻအကျောင်ꩻ---။ တွမ်ႏမေတ္တာႏတဲင် နမ်းသꩻနီပါꩻ ယံချံꩻသာႏ ခွိုꩻစုပ်တသာ ပအိုဝ်ႏပေႏလိုꩻယွဲးဖုံႏ ထူႏခွုမ်သွုပ်သွော့ဝင်ꩻ စွိုးခွိုꩻပွုံႏတာႏ ပငါပရာꩻတွော့ꩻ ထွိုင်ႏကွီးဆို့ꩻတယ်ႏဗွော့ꩻသွော့ ပအိုဝ်ႏဟံႏ၊ ပအိုဝ်ႏခမ်းထီ၊ ပအိုဝ်ႏဟော်နန်ꩻအကျောင်ꩻ-