ခွိုꩻဝွန်ႏလိုႏစွဲနီလိုꩻယွဲ

"ခွိုꩻဝွန်ႏလိုႏစွဲး နီလိုꩻယွဲး" "အနာႏဂတ်စွိုးခွိုꩻလိုꩻမျိုꩻ ခမ်းထီ ထင်ႏထိုတသါဗာင်းတာႏနောဝ်ꩻ သွီႏသက်အောဝ်ႏဒင်ႏ လိုꩻယွဲးယိုခါလောင်း"နောဝ်ꩻသွူ၊ "အနာႏဂတ် နီစွိုးခွိုꩻ၊ နီလိုꩻမျိုꩻ၊ နီခမ်းထီ အီႏတိုꩻတက်ထင်ႏထိုတသွောင်းနဲ့၊ အီႏထဲ့ဖွိုႏလင်ꩻလနဲ့ ကရိုꩻနောဝ်ꩻ ထွားဗော့ꩻလိုꩻယွဲးယိုခါ အထီသွီႏတွမ်ႏ အသꩻရက်ခွိုꩻအလောင်းငါတဲ့ သေထွꩻဒျာႏ"နောဝ်ꩻသွူ။ နုဲင်းယိုခါ ကအောဝ်ႏလွောင်ႏဗူႏလွေꩻဖေႏထွူလဲဉ်းဒါႏ ပအိုဝ်ႏပေႏလိုꩻယွဲးစွိုꩻ PYO PYN စတဲင်ဖုံႏယို စွိုးခွိုꩻလိုꩻမျိုꩻအလောင်း ဝွေꩻသီးသꩻဓာတ်ရက်စွိုးခွိုꩻ အောဝ်ႏတတွာမုဲင်ꩻ၊ ဝွေꩻသီးတဖြာꩻစီႏလဲ့နော်ꩻ၊ အစွုမ်ꩻစွိုꩻအကိုလဲ့နောဝ်ꩻ အထီသွီႏ တွူႏတရန်ဖေႏနွောင်ꩻ စွိုးခွိုꩻလိုꩻမျိုꩻတာႏ ပျဿနာႏအစွိုးစွိုး အဒေါဝ်ႏဒေါဝ်ႏ အောဝ်ႏတတွာမုဲင်ꩻ၊ လွောင်ႏဗူႏရေꩻအာႏ၊ အစွိုꩻရွဉ်တောင်ႏတာႏ ထုမ်ႏရွမ်သေꩻခါꩻ ရဲင်ꩻအာႏအောဝ်ႏလဲဉ်းတတွာမုဲင်ꩻကရိုꩻနောဝ်ꩻ- အနာႏဂတ်စွိုးခွိုꩻလိုꩻမျိုꩻ အကျိုꩻတွက်တာႏ ဖေႏကထူႏပွုံႏတာႏ ခွုမ်စံႏသော့ꩻနွောင်ꩻ စွိုးခွိုꩻဝွန်ႏနောဝ်ꩻ ယိုခါကာႏ ပွိုင်ဆင်ရဲဉ်ꩻသေꩻခါꩻ အောဝ်ႏလဲဉ်းအမျိုꩻမုဲင်ꩻ၊ ဝင်ꩻလိုꩻမျိုꩻ ဘာႏသာႏနဲင်ႏငံႏ ကမ္ဘာႏဆꩻကီ ခမ်းထီလိုꩻတန်ဖုံႏ တွမ်ႏခမ်းတန်သားအစွုမ်ꩻစွိုꩻပေါင်ꩻစွုမ်ႏဖုံႏ ဒေါ့ꩻရီအုံကွံနွောင်ꩻလဲဉ်း တတွာမုဲင်ꩻကရိုꩻနောဝ်ꩻ- နီပအိုဝ်ႏပေႏတော်ꩻကို ဝေင်ꩻကို ခမ်းကိုခမ်းထန်ႏ ဖေႏကထွာနီစွုမ်ꩻစွိုꩻ၊ ဖေႏကထွာအီ နီစွိုးခွိုꩻလိုꩻယွဲရဲင်ꩻအာႏနောဝ်ꩻ လွောင်ႏဗူႏဖေႏနွောင်ꩻလဲဉ်း တတွာမုဲင်ꩻ သောတုဇနပအိုဝ်ႏပေႏဖုံႏ၊ တက္ကသိုလ်ႏပအိုဝ်ႏပေႏကျောင်ꩻသားစွိုꩻဖုံႏယို အနာႏဂတ်နီစွိုးခွိုꩻတာႏ ယိုခါကာႏ နီလွောင်ႏဗူႏဖေႏအာႏလွေꩻလဲဉ်း တတွာမုဲင်ꩻ-။ အနာႏဂတ်နီစွိုးခွိုꩻလိုꩻမျိုꩻ ဖေႏကအုံထွိုင်ႏတနွောင်းနွောင်းအရေꩻ အဖဲ့ꩻပေါင်ꩻစွုမ်ႏ နီဖေႏကခွုမ်စံႏမာꩻနွောင်ꩻနောဝ်ꩻ နီရွဉ်တောင်ႏတာႏယို ပအိုဝ်ႏပေႏစွုမ်ႏဖြာꩻ တလာတရေင်နဲ့ တလာတစွဲနဲ့ စွုမ်ႏလာဖေႏကသော့ꩻနွောင်ꩻနောဝ်ꩻ နီအီႏပွိုင်ဆင်လွေꩻဗာႏနုဲင်းမုဲင်ꩻ။ ပအိုဝ်ႏပေႏတက္ကသိုလ်ႏကျောင်ꩻသား ကအောဝ်ႏသွဉ်ထူႏဒါႏ ဥပဒေႏဘာႏသာႏသားဖုံႏနောဝ်ꩻ နီအီႏဖေႏအာႏဗာႏနုဲင်းမုဲင်ꩻ၊ သွင်ꩻသꩻဗာႏနုဲင်းမုဲင်ꩻ၊ ဝွေꩻသီးတာႏ တနီꩻခါ နီအီႏဖေႏဗာႏ ခင်ႏလမ်းနုဲင်းမုဲင်ꩻ၊ ထာꩻမာꩻမျိုꩻမုဲင်ꩻကရိုꩻနောဝ်ꩻ ယိုခါကာႏ ပအိုဝ်ႏပေႏလိုꩻယွဲစွိုꩻဖုံႏ အောဝ်ယူႏကိုဖေႏ ဝွေꩻသီးတာႏနုဲင်းမုဲင်ꩻကရိုꩻနောဝ်ꩻ။ နီပအိုဝ်ႏ ဖေႏကျံႏဉာဏ်ႏယို တက္ကသိုလ်ႏကျောင်ꩻသားပေႏ ပညာႏရေꩻစွုမ်ꩻစွိုꩻ အောဝ်ႏလဲဉ်းဟောင်း၊ အောဝ်ႏဒွိုန်းဟောင်း၊ ပွိုးတမုဲင်ꩻနဲတဲင် အတန်ꩻတဆီ မဉ်ႏအောင်ႏ မဉ်ႏထင်ႏတက္ကသိုလ်ႏသူꩻ ဝွေꩻသီးသꩻဝါႏသနာႏမုꩻတွမ်ႏ ဝွေꩻသီးဘဝတွက်တာႏ အာႏကွိုꩻသꩻဆွော့ꩻခရာႏ ဖေႏကထွာ၊ ကအီႏသွဉ်ထူႏငါ ဘာႏသာႏယို ဖေႏကတနꩻလွေꩻအီနမ်းနောဝ်ꩻ အောဝ်ႏလိုႏဖေႏကျံႏဉာဏ်ႏကိုငါႏနောဝ်ꩻသွူ။ ဖေႏကျံႏဉာဏ်ႏလွုမ်ꩻတကာႏတောဝ်း ဝွေꩻသီးပညာႏရေꩻတွက်တာႏ အယပ်ꩻအခုဲင်ႏ မဉ်ႏအောဝ်ႏလွဉ်လဲ့ နေးတွမ်ႏနီစွိုးခွိုꩻ လိုꩻယွဲးရဲင်ꩻအာႏတဲင် ဖေႏကစွဲပင်ႏကိုနွောင်ꩻနောဝ်ꩻ အောဝ်ႏလိုႏငါႏနီလိုꩻယွဲရွဉ်တောင်ႏတာႏ အောဝ်ႏအာနောဝ်ꩻသွူ။ နေးတွမ်ႏနီလိုꩻယွဲး ရွဉ်တောင်ႏတာႏ မဉ်ႏထောက်ကမ်းဖေႏအာႏ ပင်ႏတသွောင်းထိုငီꩻဖေႏဗာႏ ဝွေꩻသီးပညာႏရေꩻတရိပ်နောဝ်ꩻ တနီꩻခါ ထွာအီယင်း နီစွိုးခွိုꩻရဲင်ꩻအာႏနောဝ်ꩻသွူ၊ ဒုံကိုလိုꩻယွဲး၊ အွိုင်ႏကိုလိုꩻယွဲး၊ နယ်ႏကိုလိုꩻယွဲးဖုံႏယို နီအောဝ်ႏလိုႏ လွောင်ႏဗူႏဖေႏငါႏအစွုမ်ꩻစွိုꩻ၊ နီအောဝ်ႏလိုႏ အွဉ်ႏအုပ်ချွုတ်ချာနွောင်ꩻနွောင်ꩻ နီလိုꩻယွဲးစွုမ်ꩻစွိုꩻနောဝ်ꩻသွူ။ ဒုံကိုလိုꩻယွဲး ကယံ ကထင် ကဒါႏ ကတရုဲင် ကတွူႏဖါႏနွောင်ꩻ ဝင်ꩻအဖြာꩻနောဝ်ꩻ လွိုက်ဒင်ႏကီဖေႏလုဲင်ႏ အွိုင်ႏလိုꩻယွဲးစွုမ်ꩻစွိုꩻကို၊ အွိုင်ႏလိုꩻယွဲး ကယံဖြာꩻလဲ့ ဒင်ႏကီဖေႏလုဲင်ႏ နယ်ႏလိုꩻယွဲး၊ အောဝ်ႏနယ်ႏလိုꩻယွဲး ကယံကထင်ဖြာꩻနောဝ်ꩻ ဒင်ႏကီဖေႏလုဲင်ႏသွော့ ဗဟိုႏလိုꩻယွဲးစတဲင် အရန်းရန်းနုဲင်းနောဝ်ꩻသွူ။ နီလိုꩻယွဲးယို နီမဉ်ႏပင်ႏတသွောင်းထိုဖေႏ၊ နီမဉ်ႏဖေႏအာႏဖေႏ၊ နီမဉ်ႏထွဉ်ႏအုပ်ချွုတ်ကျင်ꩻကျင်ꩻဖေႏ အစွုမ်ꩻစွိုꩻလဲ့ မဉ်ႏတန်လွဉ်တနီꩻခါ တွမ်ႏနီကလွိုက်ထွူလဲဉ်း နီလိုꩻတန်ယံနောဝ်ꩻ ပီဝင်ꩻသွူ။ ဒုံကို အွိုင်ႏကို နယ်ႏကို တအုပ်ချွုတ်ဖိုဖိုဒွိုန်းဝင်ꩻ၊ တခွုမ်စံႏဗာႏဖိုဖိုတောဝ်း စွိုးခွိုꩻထာꩻမာꩻ၊ တနွို့မာꩻဖိုဖိုတောဝ်းရွုမ်ꩻ၊ တကျင်ꩻဖိုဖိုတောဝ်း တစွိုးခွိုꩻထာꩻမာꩻယို နီမဉ်ႏလွိုက်ဒင်ႏမာႏ နီစွိုးခွိုꩻလိုꩻတန်လဲ့ ဒိုငါဝင်ꩻခြာဒါႏတောဝ်းတဲင် ပွစ်ချာဗော့ꩻစွိုးခွိုꩻလောင်းဖုံႏနောဝ်ꩻ အောဝ်ႏထီႏဗာႏငါႏ၊ စွိုးခွိုꩻအခွင်ꩻအရေꩻလဲ့ သွုမ်ꩻအာငါႏနောဝ်ꩻသွူ။ နောဝ်ꩻမꩻ နီပအိုဝ်ႏပေႏ လိုꩻယွဲးဖုံႏ အနာႏဂတ်ကို နီစွိုးခွိုꩻပွုံႏတာႏယို အီႏတွိုႏလွဉ်ဒျာႏရင်ꩻရင်ꩻ နီပြေင်လောင်းတွော့ꩻ နီစွိုးခွိုꩻတွန်ႏ မဉ်ႏတွိုႏလွဉ်လဲ့ ဖေႏကထွာနွောင်ꩻ အွဉ်ငါစွိုးခွိုꩻယံ (စံပြခေါင်းဆောင်ကောင်းတစ်ယောက်) ပအိုဝ်ႏလိုꩻတန်တဲးဝါး ဗွိုန်ပီနုဲင်းစင်္ကာပူ သမ္မတလီကွမ်ယုနောဝ်ꩻ ယိုခါကာႏ အောဝ်ႏလိုႏဖျင်ရဲဉ်ꩻတဲးတဲးဝါးဝါးသေꩻခါꩻငါႏဝင်ꩻ ပငါပရာꩻနောဝ်ꩻသွူ။ "လိုꩻတန်ပိုမꩻ ထွာလိုꩻတန်လꩻ"ကရိုꩻဒါႏ လိုꩻကရီးခါ ထာꩻယူႏထာꩻတွေꩻဖုံႏနောဝ်ꩻ နီပအိုဝ်ႏပေႏလိုꩻယွဲးစွုမ်ꩻစွိုꩻယိုခါ အောဝ်ႏလိုႏတွိုက်ꩻထန်ႏထိုနွောင်ꩻနွောင်ꩻလဲဉ်းနောဝ်ꩻသွူ၊ PYO PYN စွုမ်ꩻစွိုꩻနောဝ်ꩻလဲ့ ဖေႏကနမ်းခြောင်ꩻတင်နွောင်ꩻဒျာႏ ခမ်းသားတာႏ လိုꩻယွဲးနောဝ်ꩻ အရေꩻတန်ငါႏနောဝ်ꩻသွူ။ နမ်းသꩻနီပါꩻ ယံချံꩻသာႏ နီပအိုဝ်ႏပေႏလိုꩻယွဲးယံ ယိုခါနောဝ်ꩻ ဖေႏကထွာနွောင်ꩻဒျာႏသွော့ စွိုးခွိုꩻအာႏရဲင်ꩻအတာႏ အောဝ်ႏလိုႏနွို့ထူႏကိုငါႏလဲဉ်းသွူဝင်ꩻ စွိုးခွိုꩻပွုံႏတာႏ ပငါပရာꩻအကျောင်ꩻ---၊ တွမ်ႏမေတ္တာႏတဲင်-