စွိုးခွိုꩻဝွန်ႏထူႏပအိုဝ်ႏမူႏ

"စွိုးခွိုꩻဝွန်ႏထူႏ ပအိုဝ်ႏမူႏ" ပွိုင်းလဲင်ႏခါ မဟာမစာႏနောဝ်ꩻ ဟံႏတန်တဗီႏလောင်းကီယို လိုꩻမျိုꩻမုဲင်ꩻ၊ ဘာႏသာႏမုဲင်ꩻ၊ ခမ်းမုဲင်ꩻ၊ ထီမုဲင်ꩻခန်းတယောဝ်း ပွိုးစွဉ်ႏခွယ်ꩻဝင်ꩻအခိုအမူႏ ထာꩻယူႏထာꩻတွေꩻနောဝ်ꩻတဗာႏတဲင် အာႏပေႏဗာႏ၊ ပွို့ꩻပနဲဉ်ႏဖူးဖဲ့သား လိုꩻမူႏယို ခံႏဗာႏမွေး အာႏတလာခြေင်းကတွောင် ဆွော့ꩻကတဲ့ꩻသား လိုꩻခိုဖုံႏ တေက်ꩻနျꩻအံႏနွောင်ꩻနောဝ်ꩻသွူ။ လိုꩻမူႏဘဝယို ခံႏဗာႏလိုꩻခို တေက်ꩻနျꩻအံႏနွောင်ꩻခရာႏ အောဝ်ႏရဲပါႏခါꩻအရန်းရန်းနောဝ်ꩻ နေင်ႏပေါင်ꩻညကျာႏလဲဉ်း၊ တယ်ႏစွဉ်ႏကမ္ဘာႏဦꩻကိုကာႏတွော့ꩻ ကထွာလိုꩻမူႏဖုံႏ အခွင်ꩻအရေꩻ ထဲ့သွုမ်ꩻအာမွေးငါႏနောဝ်ꩻသွူ၊ နောဝ်ꩻအကို နီပအိုဝ်ႏမူႏဘဝယိုလဲ့ တွိုႏထံယိုခါ အွော့ꩻကတူႏခုဲင်ႏဗွိုန်ႏဒွိုန်း၊ လိုꩻမူႏအခွင်ꩻအရေꩻ အောဝ်ႏထဲ့သွုမ်ꩻနေကဒွိုန်းဒျာႏနောဝ်ꩻသွူ။ တယ်ႏစွဉ်ႏလမ်းကို ဝါꩻခိုမာမူႏအစ နားဟွိုန်ꩻဗူႏတဗာႏ ဖေႏကသာႏယာႏ ထင်ႏထိုတသွောင်းရေꩻအတာႏ လိုꩻမူႏယို နာႏဗာႏဒျာႏ ဝါꩻခိုငေါဝ်းကွေႏကွေႏ၊ လိုꩻခိုမာႏတယောဝ်း မဲဉ်ႏတယောဝ်း အွဉ်ႏထွာတရာꩻနွောင်ꩻကဲဉ်းအာအာ၊ မာမူႏကဒေါ့ꩻသွဉ်ဖေႏယို ဝါꩻလိုꩻခို ကအီႏနာႏဗာႏနောဝ်ꩻ တယိုꩻတောဝ်းလာꩻလာꩻသွူ။ လမ်းကို၊ ဒုံကို၊ အမျာꩻကို၊ ပွယ်ꩻအုံကွံကို ထွိုင်ႏရဲပေ့ꩻငါႏ လိုꩻမူႏငေါဝ်းနောဝ်ꩻ ကထွာလိုꩻမူႏဖုံႏလဲ့ အကျံႏဉာဏ်ႏယံ၊ ကတူႏခီးတန်စွဉ်ႏယောဝ်း တဒေါ့ꩻထန်ႏတောဝ်းဒွုမ်၊ အုံသူႏအုံနွေႏ၊ အုံယေန်ကတစ်ꩻလို့ဒျာႏထာꩻနောဝ်ꩻမꩻ အာႏကွိုꩻစွဉ်ႏလိုꩻခိုမာꩻကွေႏကွေႏတွော့ꩻ လိုခိုစူထွိုင်ႏတထွꩻဗွို့ꩻနွောင်ꩻလို့တောဝ်းနောဝ်ꩻ ထာꩻမာꩻထဲ့သွုမ်ꩻအာငါႏ၊ ဘဝဆင်ႏအရန်းလဲ့ ထဲ့ဖွိုႏပါစွဉ်ႏဒျာႏနောဝ်ꩻသွူ။ ခေတ်တသာပြောင်ꩻလုဲင်ႏငါလဲဉ်းသွူ ခင်ႏတကာထွူတကာ နုဲင်းယိုခါနောဝ်ꩻ ဌာႏနဆဲင်ႏရာꩻကို၊ စက်ယွုံႏ၊ ထာꩻမာꩻယွုံႏ၊ တရာꩻရွုမ်ꩻကို၊ အွဉ်ႏစွꩻထင်ႏလိုꩻယံခင်ႏလမ်းကို (လွှတ်တော်)ဖုံႏ၊ စဲ့ꩻ၊ ယဲꩻကိုအစ ယိုခါနောဝ်ꩻ လိုꩻမူႏဖုံႏ ဝင်ꩻဖေႏသော့ꩻတသွိုန်တွောင်းလဲဉ်း အခွင်ꩻအရေꩻတဲင် နီပအိုဝ်ႏမူႏဖုံႏလဲ့ အောဝ်ႏလိုႏနွို့ထူႏသော့ꩻငါႏလဲဉ်းဝင်ꩻ ခင်ႏလမ်းဖုံႏနောဝ်ꩻသွူ။ ဝင်ꩻလိုꩻမျိုꩻနောဝ်ꩻ ဝင်ꩻမူႏဝင်ꩻခိုဝင်ꩻယို အုံမွန်းအုံကွံဒျာႏ တလီꩻလောင်း အာႏကာႏခွင်ႏကို၊ နီပအိုဝ်ႏမူႏနောဝ်ꩻ အောဝ်ႏအုံမွန်းက မေႏဖါႏထျꩻအရန်းလဲ့ ဖေႏကထွာဗာႏပုဲင်ႏဒွုမ်၊ မွိုးဖါဖေႏမို့ပညာႏ၊ ဆရာႏဖေႏသဲင်ꩻတွမ်ႏဘွဲ့ဖုံႏ၊ စွိုးခွိုꩻတာႏဝွန်ႏ တဖဲ့ꩻတခေါဝ် ဖေႏကသဲင်ꩻနွို့မာꩻညီꩻကိုနွောင်ꩻဗဲင်းဝင်ꩻနောဝ်ꩻ အခိန်ႏတွိုႏလွဉ်လဲဉ်း၊ ခေတ်ဒေါ့ꩻလွဉ်လဲဉ်းငေါဝ်းနောဝ်ꩻသွူ။ လိုꩻမူႏလဲ့ စူခင်ႏနီပင်၊ ကတူႏတဖြုံႏ အင်္ဂါႏလက္ခဏာႏ အောဝ်ႏစွုမ်ႏလင်ႏဒျာႏနေနေ၊ မာꩻဒါႏတောဝ်း၊ မာꩻနွောင်ꩻတောဝ်း၊ မာꩻဗွိုန်ႏတောဝ်းကရိုꩻနောဝ်ꩻ အောဝ်ႏဒျာႏလိုꩻမူႏလွꩻလွုမ်ꩻ၊ ဒါႏတောဝ်း သေတောဝ်း နီပအိုဝ်ႏငေါဝ်းယိုနောဝ်ꩻ အတေက်ꩻနျꩻထဲ့ဖွိုႏအီမွေးငါႏ အဗွေႏပညာႏဂွုဏ်ႏသိက္ခာႏနောဝ်ꩻသွူ။ အောဝ်ႏသေငါႏ၊ အောဝ်ႏဒါႏငါႏလဲ့ တဒေါ့ꩻဗွိုန်ႏတောဝ်း နုဲင်းခေတ်ကရီးခါနောဝ်ꩻ ကထွာလိုꩻမူႏခေတ်ယိုခါ အောဝ်ႏလိုႏတွိုက်ꩻထန်ႏလꩻလꩻငါႏ၊ ကရီးခါနောဝ်ꩻ ဒေါ့ꩻခွင်ꩻအောဝ်ႏတောဝ်း၊ ဝင်ꩻဖေႏဒေါ့ꩻတောဝ်းတွော့ꩻ ဒေါ့ꩻလꩻတောဝ်း ရိုꩻခန်းနုဲင်းနောဝ်ꩻလုဲင်း၊ ခေတ်ယိုတဗာႏ ဒေါ့ꩻခွင်ꩻတဲ့ အောဝ်ႏဒျာႏ၊ ဒေါ့ꩻတဲ့ လꩻဒျာႏမွော့ ပွိုးတမုဲင်ꩻ တဒေါ့ꩻတောဝ်းနောဝ်ꩻ အပါႏနီဟောင်း။ နီပအိုဝ်ႏမူႏယိုခါ အောဝ်ႏလိုႏထွိုင်ႏအွဉ်ငါ ရုဲင်းရုဲင်းငါႏလဲဉ်း၊ စွိုးခွိုꩻလိုꩻမျိုꩻ၊ နီပအိုဝ်ႏမူႏယံ၊ နီပအိုဝ်ႏမူႏရုဲင်းထင်၊ နီပအိုဝ်ႏမူႏတဲဝါး၊ နီပအိုဝ်ႏမူႏဒါႏကရိုꩻနောဝ်ꩻ အောဝ်ႏလိုႏကေႏညာႏနယ်ရုဲင်းရုဲင်းလဲဉ်း နဲင်ႏငံႏကမ္ဘာႏဆꩻကီသွူ။ လိုꩻမူႏနောဝ်ꩻ ခံႏလွူးဗော့ꩻပို၊ ခံႏထွာဗော့ꩻလိုꩻခိုသွဉ်းကွေႏကွေႏလွုမ်ꩻနောဝ်ꩻ တမွေးတောဝ်း၊ ချာႏမို့ꩻဖေႏကတဗန်ႏ၊ ချာႏဟံႏဖေႏကတအာ၊ နုဲင်ႏလာဖေႏကတထွူး၊ ဝေါင်းမွူးဖေႏကတလေင်ႏစွဉ်ႏနောဝ်ꩻ ယိုခါ အခိန်ႏတွိုႏလွဉ်လဲဉ်းနောဝ်ꩻသွူ။ နီပအိုဝ်ႏခို ကတွိုးလွေꩻ ရက်ခွိုꩻသꩻ ကတွိုးဆေ့ꩻ၊ မွိုင်းအောဝ်ႏမွန်ꩻတလေ့ꩻထေ့သော့ꩻဒျာႏ ဒေါဝ်ပင်ခြာ၊ ယာလူးခါႏနောဝ်ꩻ သီထွာလိုꩻမူႏ မဉ်ႏတထွိုင်ႏထူႏကိုတောဝ်း စွိုးခွိုꩻတာႏတွန်ႏဖုံႏတဲ့ နီပအိုဝ်ႏဘဝယို မဲ့ꩻထွာဝင်ꩻသွဉ်း တပဲတောဝ်းနောဝ်ꩻသွူ။ နောဝ်ꩻမꩻ လွူးဗဲင်းသꩻရက်ခွိုꩻအာႏ တလာလာ၊ ထီႏငါဗဲင်း အနာႏဂတ်စွိုးခွိုꩻ ထင်ႏထိုတသွောင်းရေꩻတွော့ꩻ နီပအိုဝ်ႏမူႏဖုံႏ နွို့ထူႏကိုသွော့ စွိုးခွိုꩻပွုံႏတာႏ ပငါပရာꩻ၊ ကွီးဆို့ꩻကိုသွော့ ပအိုဝ်ႏခမ်းထီထွန်ႏ၊ ထွိုင်ႏယွိုင်ႏကိုဗဲင်း ပအိုဝ်ႏအောင်ႏပွယ်ꩻအလံႏတောႏအကျောင်ꩻ မဲဉ်တမာငါႏ နီပအိုဝ်ႏမူႏသီး နုဲင်းနောဝ်ꩻသွူဩ။ နမ်းသꩻနီပါꩻ ယံချံꩻသာႏ၊ နွောင်ꩻရာꩻအာႏ၊ ဒါႏရာꩻကို နွို့စီꩻဒိုဖြွဉ်ဖေႏခန်း ခွိုꩻပအိုဝ်ႏအခွင်ꩻအရေꩻတွမ်ႏ အဆင်ႏရန်းထိုထိုအကျောင်ꩻ-။ တွမ်ႏမေတ္တာႏတဲင်-