ပအိုဝ်ႏချင်ꩻချင်ꩻ

"ပအိုဝ်ႏချင်ꩻချင်ꩻ လွောင်ႏဗူႏသွော့ဝင်ꩻ" ကမ္ဘာႏလောင်းကို လိုꩻမျိုꩻမုဲင်ꩻတယောဝ်း၊ ခမ်းထီအဖြုံႏမုဲင်ꩻတယောဝ်း မဉ်ႏလွောင်ႏဗူႏလွဝင်ꩻ၊ မဉ်ႏရက်ပဲင်ꩻလွဝင်ꩻ၊ မဉ်ႏနာႏချာငါလို့ဝင်ꩻငေါဝ်း မဉ်ႏအွဉ်ႏစီꩻကန်ꩻနောဝ်ꩻ လွိုင်ႏကွိုန်ꩻထင်ႏထို သာႏယာႏငိမ်ꩻချံꩻ စွုမ်ႏခမ်းခမ်း၊ လိုꩻကတရက်ချာတောဝ်း အလိုꩻမျိုꩻ လိုꩻကတရန်ချာတောဝ်း အခမ်းထီ အချင်ꩻချင်ꩻ ကတလွောင်ႏဗူႏတောဝ်းလို့ဝင်ꩻ၊ လိုꩻကလွူးဒါႏသꩻ ခွေတစွိုးနာꩻတမျိုꩻနောဝ်ꩻ လိုꩻမျိုꩻတွမ်ႏခမ်းထီ ထင်ႏထိုလွိုင်ႏကွိုန်ꩻတောဝ်းသွူတကာႏတောဝ်း အဆုဲင်ꩻသွတ်ꩻခံႏထိုꩻဗာႏဒါႏ ခမ်းထီပꩻလီနောဝ်ꩻသွူ။ ကွပ်စွဉ်ႏလိုꩻမျိုꩻချင်ꩻချင်ꩻ တဖြာꩻတွမ်ႏတဖြာꩻ၊ တစွိုꩻတွမ်ႏတစွိုꩻ နာႏချာငါတောဝ်းလို့ဝင်ꩻငေါဝ်း၊ လွောင်ႏဗူႏရက်ပဲင်ꩻတောဝ်းဝင်ꩻ၊ အွဉ်ႏတောဝ်းလိုꩻမျိုꩻစီꩻကန်ꩻတွော့ꩻ ပွိုင်းလဲင်ႏကမ္ဘာႏလောင်းကို ခမ်းထီကလီပꩻထိုꩻဗာႏသက်သေႏနောဝ်ꩻ မဲဉ်စေလီဖေႏ ထွားလိတ်ပရိသတ် ဂျာမနီခမ်း အခေႏနေႏ တစူးတစိꩻနောဝ်ꩻသွူ။ ပွိုင်းလဲင်ႏ ဥရောပတွိုက်ကို ကအောဝ်ႏဒါႏ ဂျာမနီခမ်းနောဝ်ꩻ ကွပ်စွဉ်ႏဝွေꩻသီးလိုꩻမျိုꩻချင်ꩻချင်ꩻ သွီႏထီꩻရက်ပဲင်ꩻတောဝ်းလို့ဝင်ꩻ အချင်ꩻချင်ꩻ နာႏတောဝ်းလို့ဝင်ꩻငေါဝ်း၊ လွူးတောဝ်းသꩻတဟို့ꩻခြုံ၊ သꩻတဒုံချင်ႏတဲင် အဆုဲင်ꩻသွတ်ꩻ လွောင်ႏဗူႏရေꩻအာႏရဲင်ꩻ လီထိုꩻတွော့ꩻ ဂျာမနီခမ်းနောဝ်ꩻ ပꩻလီထိုꩻနီခေါဝ်၊ တခေါဝ်နောဝ်ꩻ ထွာထိုꩻအခေါဝ်ကွဉ်ႏ ဂျာမနီခမ်း၊ တခမ်းတွမ်ႏတခမ်း ဖေႏကလွစ်ထီႏလို့ဝင်ꩻလွိုး၊ ဖေႏကလွစ်မော့ꩻခွဲလို့ဝင်ꩻနောဝ်ꩻ တခမ်းတွမ်ႏတခမ်းအခါႏကို ဖွောင်ꩻရဲခါꩻ တံꩻတွိုင်ꩻအွတ်ꩻ၊ တဖွောင်ꩻကထွိုင်ႏထွူနောဝ်ꩻ အခေါဝ်ကွဉ်ႏ ဂျာမနီခမ်းနောဝ်ꩻ ထွာထိုꩻရုရှားလိုꩻ၊ အခေါဝ်တွို့ꩻ ဂျာမနီခမ်းနောဝ်ꩻ ထွာထိုꩻအမေႏရိကန်ႏလိုꩻ ကထွာဗာႏနုဲင်းယိုနောဝ်ꩻ လိုꩻလင်မာꩻထွာမွေးတောဝ်း၊ ကွပ်စွဉ်ႏဂျာမနီ ခမ်းသားချင်ꩻချင်ꩻ လွောင်ႏဗူႏရေꩻကုဲင်တဲင် ခံႏထိုꩻဗာႏ လိုꩻကမဲဉ်လွူးတပဲ့ꩻသား ဒို့ꩻတခြို့လꩻထိုꩻနောဝ်ꩻသွူ။ ဂျာမနီခမ်းသား ဒင်ႏဆရာႏ ကမဲဉ်ႏအစွိုꩻနောဝ်ꩻ ခမ်းထီလွိုင်ႏကွိုန်ꩻသာႏယာာႏထင်ႏထို၊ အစွိုꩻဒင်ႏဆရာႏ တမဲဉ်ႏတောဝ်းသားနောဝ်ꩻ ခမ်းထီဆင်ꩻရယ်ꩻဒုက္ခ ထင်ႏထိုတောဝ်းကရိုꩻနောဝ်ꩻ လွူꩻထွားသေထွꩻဗာႏနောဝ်ꩻသွူ။ ဆုဲင်ꩻဝုဲင်ꩻ ဂျာမနီခမ်း ကပꩻထိုꩻဒါႏနီခေါဝ် ဖေႏကထွာချာယင်း တခမ်းချင်ႏနောဝ်ꩻ အခေါဝ်တွို့ꩻတွမ်ႏအခေါဝ်ကွဉ်ႏ ဂျာမနီလိုꩻတန် တွိုင်ႏပင်ႏဒေါ့ꩻရီ ဆွေꩻနွေꩻလို့ဝင်ꩻတွော့ꩻ တယ်ႏဆို့ꩻနွောင်ꩻချာယင်း လွောင်ႏဗူႏရေꩻတဲင် ကပꩻလီထိုꩻဒါႏ ဂျာမနီခမ်းအခါႏကို ကဖွောင်ꩻရဲခါꩻဒါႏ တံꩻတွိုင်ꩻတဖွောင်ꩻအွတ်ꩻနောဝ်ꩻ ယားကုဲင်ချာထွူတွော့ꩻ ထွာယင်းဂျာမနီခမ်း တခမ်းချင်ႏအုံညီꩻယင်းဝင်ꩻတွော့ꩻ ယိုခါ ဂျာမနီခမ်းနောဝ်ꩻ ကမ္ဘာႏလောင်းကိုပါသော့ꩻစွဉ်ႏဒျာႏ G-7 စက်မုꩻအထွန်ꩻကာꩻ ခမ်းတခမ်းကရိုꩻနောဝ်ꩻ လွူꩻထွားသေထွꩻဗာႏနောဝ်ꩻသွူ။ ကွပ်နောဝ်ꩻမꩻ ပအိုဝ်ႏလိုꩻမျိုꩻချင်ꩻချင်ꩻ တဖြာꩻတွမ်ႏတဖြာꩻ၊ တစွိုꩻတွမ်ႏတစွိုꩻ၊ တဒုံတွမ်ႏတဒုံ သွီႏမဉ်ႏထီတောဝ်းလို့ဝင်ꩻ၊ သꩻမဉ်ႏဗော့ꩻလို့တောဝ်းဝင်ꩻ၊ မဉ်ႏရက်ပဲင်ꩻလို့တောဝ်းဝင်ꩻ၊ မဉ်ႏလွောင်ႏဗူႏလို့တောဝ်းဝင်ꩻ၊ မဉ်ႏလွူးဒျာႏသꩻ ခွေတစွိုးနာꩻတမျိုꩻ မဉ်ႏတလွူးတောဝ်း သꩻတဟို့ꩻခြုံ တဒုံချင်ႏနောဝ်ꩻ လိုꩻစွိုꩻကတနာႏလိုႏတောဝ်းနီ လိုꩻသꩻတဗော့ꩻတောဝ်းနီ လိုꩻကမဲဉ်လွူးဒါႏ တပဲ့ꩻသားဖုံႏ မဉ်ႏလွဉ်ယားကုဲင်၊ မဉ်ႏလွဉ်သွေꩻကုဲင်၊ မဉ်ႏလွဉ်ခွယ်ꩻသွီႏနောဝ်ꩻ ယိုꩻငါႏ၊ လို့ဗာႏတောဝ်းအာႏရဲင်ꩻ၊ တွိုက်ꩻခꩻနေးတွမ်ႏ တနတ်ခရာႏ လိုႏတောဝ်းနောဝ်ꩻသွူ။ ခွိုင်းယိုမာꩻငါ နီပအိုဝ်ႏလိုꩻမျိုꩻ ဘဝဖေႏကတွိုႏဆွိုက်နုဲင်းမွိုန်း ဂျာမနီခမ်းပွိုင်းလဲင်ႏနောဝ်ꩻ ပအိုဝ်ႏစွိုးခွိုꩻ လိုꩻမျိုꩻတွိုင်ꩻစွုမ်ႏဖြာꩻ နေးတွမ်ႏရက်ခွိုꩻသꩻဓာတ်တဲင် အောဝ်ႏလိုႏဖြောင်သꩻလို့ဝင်ꩻ ပငါပရာꩻ၊ လိုꩻမျိုꩻတမျိုꩻယို လိုꩻဖြာꩻပေါင်ꩻ(လူဦးရေ)မဲဉ်အာခွိုင်းမုဲင်ꩻအာ လိုꩻမျိုꩻချင်ꩻချင်ꩻ မဉ်ႏတနာႏချာငါတောဝ်းလို့ဝင်ꩻငေါဝ်း၊ မဉ်ႏလွောင်ႏဗူႏရက်ပဲင်ꩻတောဝ်းလို့ဝင်ꩻ၊ မဉ်ႏအွဉ်ႏတောဝ်း လိုꩻမျိုꩻစီꩻကန်ꩻနောဝ်ꩻ အောဝ်ႏထာꩻအာ ထွာလွဉ်ဒါႏထာꩻဆေ့ꩻ၊ အောဝ်ႏထာꩻဆေ့ꩻ ထွာလွဉ်ဒါႏ ထာꩻထိုꩻမားနောဝ်ꩻသွူ။ "လိုꩻမျိုꩻတမျိုꩻယို လိုꩻဖြာꩻပေါင်ꩻ (လူဦးရေ) မဉ်ဆေ့ꩻခွိုင်းမုဲင်ꩻဆေ့ꩻ မဉ်ႏရက်ချာလိုꩻမျိုꩻ၊ မဉ်ႏလွောင်ႏဗူႏလို့ဝင်ꩻ၊ စီꩻကန်ꩻလဲ့မဉ်ႏယံ၊ ပညာႏလဲ့မဉ်ႏအောဝ်ႏနောဝ်ꩻ အောဝ်ႏထာꩻဆေ့ꩻ ထွာလွဉ်ထာꩻအာ၊ အောဝ်ႏထာꩻအာ တယ်ႏဆို့ꩻနွောင်ꩻဒါႏခမ်းထီနောဝ်ꩻသွူ"။ ကမ္ဘာႏလောင်းကို လိုꩻကရက်ချာ အလိုꩻမျိုꩻနောဝ်ꩻ လွိုတောဝ်းအစ္စရေးလ်လိုꩻမျိုꩻ၊ အစ္စရေးလ်လိုꩻမျိုꩻနောဝ်ꩻ အောဝ်ႏအုံသော့ꩻ သုဲင်ꩻကန္တာရခြာကိုသွူတကာႏတောဝ်း၊ ဝွေꩻသီးခမ်းထီနောဝ်ꩻ အောဝ်ႏစွဉ်ႏအာရပ်ကမ္ဘာႏနဲင်ႏငံႏ အခါႏကိုနောဝ်ꩻသွူ။ အစ္စရေးလ်ခမ်း စဲ့ꩻတပ်မဉ်ႏအောဝ်ႏ တဆနောဝ်ꩻ အာရပ်ကမ္ဘာႏစဲ့ꩻတပ်အာႏရဲင်ꩻ အောဝ်ႏအဆ(၄၀)၊ အစ္စရေးလ်လိုꩻဖြာꩻပေါင်ꩻ (လူဦးရေ)မဉ်ႏအောဝ်ႏတဆနောဝ်ꩻ အာရပ်ကမ္ဘာႏလိုꩻဖြာꩻပေါင်ꩻ (လူဦးရေ အောဝ်ႏအဆ(၁၀၀)၊ အစ္စရေးလ် စူခွုမ်(လက်နက်)အာႏရဲင်ꩻ မဉ်ႏအောဝ်ႏတဆနောဝ်ꩻ အာရပ်ကမ္ဘာႏစူခွုမ်(လက်နက်)အောဝ်ႏအဆ (၁၀၀)နောဝ်ꩻသွူ။ အစ္စရေးလ်လိုꩻမျိုꩻယို ရက်ခွိုꩻသꩻဓာတ်လဲ့ကျ၊ စီꩻကန်ꩻလဲ့ယံ၊ ပညာႏလဲ့ဒါႏ၊ နောဝ်ꩻမꩻ လိုꩻဖြာꩻပေါင်ꩻ(လူဦးရေ) ဆေ့ꩻစွဉ်ႏရိုꩻကီလဲ့ အာရပ်ကမ္ဘာႏ နွောင်ꩻအံႏဝွေꩻသီးတလꩻတောဝ်း၊ ယိုခါ အစ္စရေးလ်ခမ်းထီနောဝ်ꩻ ပါသော့ꩻညီꩻနွောင်ꩻလဲဉ်း ကမ္ဘာႏကုလသမဂ္ဂ နွို့အစွိုꩻ ခမ်းထီတဖြုံႏနောဝ်ꩻသွူ။ အစ္စရေးလ်လိုꩻမျိုꩻယို မဉ်ႏတရက်ချာတောဝ်း အလိုꩻမျိုꩻ၊ စီꩻကန်ꩻလဲ့ မဉ်ႏအွဉ်ႏတောဝ်း၊ ပညာႏလဲ့ မဉ်ႏအဲဉ်ထောဝ်းနောဝ်ꩻ ကမ္ဘာႏဟံႏပွုံႏ(ကမ္ဘာ့မြေပုံ)ကိုယို အစ္စရေးလ်လိုꩻမျိုꩻတွမ်ႏခမ်းထီနောဝ်ꩻ ထီႏဗာႏတောဝ်းဒွုမ်နောဝ်ꩻသွူ။ မန်းခမ်းဟံႏပွုံႏ(မြန်မာ့မြေပုံ)ကို နီပအိုဝ်ႏလိုꩻမျိုꩻ ဖေႏကအောဝ်ႏမွန်ဗန်တသေႏသေႏ၊ ပအိုဝ်ႏဒေႏသ ဖေႏကတဉ်ႏခွေါင်တသေႏသေႏနောဝ်ꩻ ခွိုင်းယိုမာꩻငါ ယံလွူးသွော့ သꩻဓာတ်နုဲင်းအစ္စရေးလ်လိုꩻမျိုꩻ၊ မဉ်ႏတလွူးတောဝ်း သꩻဓာတ်နုဲင်းအစ္စရေးလ်လိုꩻမျိုꩻ၊ အလွောင်ႏအဗူႏမဉ်ႏကုဲင်၊ မဉ်ႏထန်ႏခေါ်ဒျာႏ အဖုံႏနောဝ်ꩻ တနီꩻခါ မဲ့ꩻနီလိုꩻမျိုꩻယို မဲ့ꩻအလီလာထိုꩻမားဒါႏ။ လိုꩻမျိုꩻတမျိုꩻ ကပြုဲင်လီထိုꩻ၊ ကထိုꩻမားထိုꩻနောဝ်ꩻ တမွိုင်ဖွီတောဝ်း နုဲင်းမေႏခိုးယမ်ꩻ၊ အသွူꩻပြင်ꩻယွဒျာႏထာꩻ တလဲင်ႏတစိꩻစိꩻ နုဲင်းမေႏခိုးဖေတဲင် ကဲဉ်းအာအာနောဝ်ꩻ လိုꩻတွိုင်ꩻစွုမ်ႏဖြာꩻ တသေအွဉ်ႏရေꩻတောဝ်းနောဝ်ꩻမꩻ နီလိုꩻမျိုꩻထိုꩻမားနွောင်ꩻဒါႏ၊ နီလိုꩻမျိုꩻ ဖေႏကထိုꩻမားဗာႏမွိုန်းနောဝ်ꩻ ခွိုင်းယိုမာꩻငါ ပအိုဝ်ႏချင်ꩻချင်ꩻ လွောင်ႏဗူႏလွသွော့ဝင်ꩻအကျောင်ꩻ နေးတွမ်ႏမေတ္တာႏစေႏတနာႏ စင်စင်ဗွာဗွာတဲင် တဲမ်းလွေꩻဖေႏဗာႏ ရွမ်ဖြုဲင်ꩻယိုသွူ။