ပအိုဝ်ႏတစွိုးခွိုꩻလုမ်း

"ပအိုဝ်ႏတစွိုးခွိုꩻလုမ်း နုဲင်ႏငံႏရေꩻ၊ စွိုးခွိုꩻရေꩻ မူဝါဒခံႏထူႏချက် အဝ်ႏမုဲင်ꩻကို" အခိန်ႏနုဲင်းယိုခါ မန်းခမ်းထီယို အထွာအပြောင်ꩻနဝ်ꩻ ကျုံႏတလူႏတနꩻဆုမ်ႏဝင်ꩻ အခိန်ႏကာႏလကိုနဝ်ꩻသွူ။ တဖဲ့ꩻနဝ်ꩻ မဲးပွယ်ꩻထွူ အကျိုꩻတရာꩻယို မာꩻထွာအီနွောင်ꩻပြောင်ꩻလုဲင်ႏအစိုႏရနဝ်ꩻသွူ၊ ယင်းတဗာႏနဝ်ꩻ မန်းခမ်းထီကို စဲ့ꩻတပ်မတောႏတွမ်ႏ ခုမ်ခြွိုင်းခမ်းရင်ꩻသားစဲ့ꩻစွိုꩻအခါႏ အတွိုက်ꩻအခꩻ အွဉ်ႏဆွိုးရေꩻ တဲမ်းထွို့ꩻနွောင်ꩻစူမုဲင် NCA လိတ်ချုတ်တဲင် ယိုခါ တွိုႏလွဉ်ခမ်းခြွဉ်းဗူႏငိမ်ꩻချံꩻရေꩻညီႏလာႏခံႏ ဒေါ့ꩻရီဝင်ꩻနဲင်ႏငံႏရေꩻအရန်းနဝ်ꩻသွူ။

အစိုႏရစွိုꩻတသာ ကအီႏထင်ႏလွဉ်ယိုလဲ့ ခမ်းထီအတာႏ အီႏမာꩻနွောင်ꩻ အပြောင်ꩻအလုဲင်ႏတတွာမုဲင်ꩻ၊ ခမ်းသားအတာႏ အီႏမာꩻဖေႏနွောင်ꩻ အကျိုꩻတခွုင်းမုဲင်ꩻကရိုꩻနဝ်ꩻ အီႏပွေါးထွားဗာႏနဝ်ꩻသွူ။ နုဲင်းယိုခါ နေပြည်တော်ကို ကအဝ်ႏမာꩻလွေꩻဒျာႏ ခမ်းခြွဉ်းဗူႏငိမ်ꩻချံꩻရေꩻညီႏလာႏခံႏကိုနဝ်ꩻ မန်းခမ်းကိုခမ်းရင်ꩻသား လိုꩻမျိုꩻစွုမ်ႏယို တွမ်ႏအစိုႏရနမ်းခြောင်ꩻတဲ့ တရိုꩻတဝ်း၊ လွတ်တောႏနမ်းခြောင်ꩻအနေႏတဲ့တရိုꩻတဝ်း၊ တွမ်ႏနဲင်ႏငံႏရေꩻပါတီနမ်းခြောင်ꩻအနေႏတဲ့တရိုꩻတဝ်း၊ တွမ်ႏခုခြွိုင်းခမ်းရင်ꩻသားစဲ့ꩻစွိုꩻနမ်းခြောင်ꩻအနေႏတဲ့တရိုꩻတဝ်း၊ တွမ်ႏခမ်းရင်ꩻသားနမ်းခြောင်ꩻအနေႏတဲ့တရိုꩻတဝ်း၊ တွမ်ႏပါသော့ꩻထွိုက်ပါသော့ꩻသင်ꩻ သေဒါႏပညာႏသျင်ႏသားနမ်းခြောင်ꩻအနေႏတဲ့တရိုꩻတဝ်း၊ တွမ်ႏပါသော့ꩻခွင်ꩻ နမ်းခြောင်ꩻအဖဲ့ꩻစွုမ်ႏတဲင် ပါသော့ꩻခွင်ꩻအဝ်ႏနဝ်ꩻသွူ။ မန်းခမ်းကို ကားကအဝ်ႏ အစိုႏရအပါ ခမ်းရင်ꩻသားခမ်းသားနမ်းခြောင်ꩻအစွုမ်ႏ ကပါဝင်ႏဒေါ့ꩻရီဒျာႏ နဲင်ႏငံႏရေꩻငဝ်းဝဲင်ꩻယိုနဝ်ꩻ အီႏထွို့ꩻချꩻလွေꩻ၊ အီႏပုံႏဖောႏလွေꩻဗာႏ မန်းခမ်းထီယို အပုံႏအပွိုင်နုဲင်းမုဲင်ꩻ၊ နဲင်ႏငံႏရေꩻကို ခမ်းရင်ꩻသားဖုံႏယို တသွုန်တွောင်းတွာ ပါသော့ꩻခွင်ꩻ အဝ်ႏဗာႏနုဲင်းနုဲင်းဝင်ꩻနုဲင်းမုဲင်ꩻ၊ မန်းခမ်းကို ခမ်းထီလိုမ်းဗဉ်ႏရေꩻဖုံႏယို ဖြွမ်းဝင်ꩻအီႏအွဉ်ႏလွေꩻဗာႏ စဲ့ꩻတပ်မတောႏနုဲင်းမုဲင်ꩻ၊ မန်းခမ်းကို စီꩻပွါꩻရေꩻဆေꩻကွက်ယို ခမ်းသားကဆို့ꩻရုဲင် ကွန်ႏကျမ်ꩻယို ဗွောင်ဖြွဉ်အီႏအွဉ်ႏဖေႏဆေꩻကွက်နုဲင်းမုဲင်ꩻ၊ မန်းခမ်းကို လိုꩻမုရေꩻဖုံႏယို လိုꩻတမျိုꩻတွမ်ႏတမျိုꩻ၊ တဘာႏသာႏတွမ်ႏတဘာႏသာႏ အီႏအုံညီꩻအဝ်ႏရဝ်းတန်ႏတူႏဗာႏဝင်ꩻနုဲင်းမုဲင်ꩻ စစွဉ်ႏဆဲင်ႏရာꩻမန်းခမ်းထီ အခေႏနေႏဖုံႏနုဲင်းနဝ်ꩻသွူ။

မဉ်ႏဒေါ့ꩻဗာႏ ကဒေါ့ꩻရီလွေꩻဒါႏ အထျꩻကဏ္ဍငတ်ꩻဗာႏနဝ်ꩻ နဲင်ႏငံႏရေꩻ၊ လိုꩻမုရေꩻ၊ စီꩻပွါꩻရေꩻ၊ လိုမ်းဗဉ်ႏရေꩻတွမ်ႏ ဟံႏယာႏတွမ်ႏ သဘာဝအသောင်အရင်ꩻရေꩻရာႏ စတဲင်ယိုဖုံႏနဝ်ꩻသွူ။ နဝ်ꩻမꩻ ကဏ္ဍယိုငတ်ꩻဗာႏအကို ပအိုဝ်ႏအစွိုးခွိုꩻလုမ်းအတာႏ ပအိုဝ်ႏစွိုးခွိုꩻသီးမူနဝ်ꩻ မဉ်လွေꩻပုံႏစံႏနုဲင်းမုဲင်ꩻ၊ မဉ်သွင်ꩻသော့ꩻမူနုဲင်းမုဲင်ꩻနဝ်ꩻ အဝ်ႏလိုႏဖျင်ဆင်ငါႏသွူ။ ဝင်ꩻလိုꩻမျိုꩻလင်နဝ်ꩻ မဉ်ႏရိုꩻနဲင်ႏငံႏရေꩻလဲ့ မဉ်လွေꩻမူနုဲင်းမုဲင်ꩻ၊ မဉ်ႏရိုꩻစီꩻပွါꩻရေꩻလဲ့ မဉ်လွေꩻမူနုဲင်းမုဲင်ꩻ၊ မဉ်ႏရိုꩻလိုꩻမုရေꩻလဲ့ လွေꩻမူနုဲင်းမုဲင်ꩻ၊ မဉ်ႏရိုꩻလိုမ်းဗဉ်ႏရေꩻလဲ့ လွေꩻမူနုဲင်းမုဲင်ꩻ၊ မဉ်ႏရိုꩻဟံႏယာႏ တွမ်ႏသဘာဝရေꩻရာႏလဲ့ လွေꩻမူနုဲင်းမုဲင်ꩻ-စတဲင် ဝင်ꩻလိုꩻတမျိုꩻသာꩻလုမ်းအနေႏ ထေခါꩻမူခံႏထူႏချက်အဝ်ႏတဲင် မဉ်ႏနွို့ဒေါ့ꩻရီ နဲင်ႏငံႏရေꩻငဝ်းဝဲင်ꩻကိုနဝ်ꩻ လွေꩻစွဉ်ႏပါတီနေးလဲ့သင်၊ နွို့စွဉ်ႏခုမ်ခြွိုင်းစဲ့ꩻစွိုꩻနေးလဲ့သင်၊ နွို့စွဉ်ႏလွတ်တောႏအနေႏ၊ နွို့စွဉ်ႏခမ်းရင်ꩻသားနမ်းခြောင်ꩻအနေႏ၊ သေဒါႏပညာႏသျင်ႏအနေႏလဲ့သင် နွို့စွဉ်ႏတဖူꩻအလီးမုဲင်ꩻမုဲင်ꩻတဲ့ယဝ်း ဝင်ꩻထန်ႏဒျာႏ မူဝါဒခံႏထူႏချက်တဗာႏချင်ႏနဝ်ꩻသွူ။

တွိုႏပအိုဝ်ႏလိုꩻမျိုꩻနဝ်ꩻဟ မုဲင်ꩻခါမꩻ မူဝါဒခံႏထူႏတဗာႏချင်ႏ အီႏထန်ႏလွဉ်နွောင်ꩻဟောင်း။ ပီအဲန်အိုအနေႏလဲ့ တွိုင်ႏပင်ႏတဝ်း မဉ်မာꩻလွေꩻဗော့ꩻနုဲင်းနဝ်ꩻ။ ပီအဲန်အျောန်အိုအနေႏလဲ့ ဒေါ့ꩻရီတဝ်း မဉ်မာꩻလွေꩻဗော့ꩻနုဲင်းနဝ်ꩻ။ ပအမဖအနေႏလဲ့ အုံကိုမ်တဝ်း မဉ်မာꩻလွေꩻဗော့ꩻနုဲင်းနဝ်ꩻ-ဖုံႏနဝ်ꩻ တဝင်ႏတဝ်း ပအိုဝ်ႏတစွိုးခွိုꩻလုမ်းနဲင်ႏငံႏရေꩻ၊ ထွာဗော့ꩻဒျာႏ တခူးတခဝ်နဲင်ႏငံႏရေꩻ၊ ထွာဗော့ꩻဒျာႏ တစွိုꩻတဗူႏနဲင်ႏငံႏရေꩻနဝ်ꩻသွူ။ နုဲင်းယိုခါ ပအိုဝ်ႏတစွိုးခွိုꩻလုမ်း မူဝါဒခံႏထူႏချက်ယို ကဏ္ဍမုဲင်ꩻနဝ်ꩻ အဝ်ႏနုဲင်းမုဲင်ꩻကရိုꩻယို စဲင်းစဲင်းစဲ့စဲ့ အဝ်ႏလိုႏအဝ်ႏခါꩻ၊ အဝ်ႏလိုႏထေခါꩻလဲဉ်းသွူ။ နဲင်ႏငံႏရေꩻနဝ်ꩻ ပအိုဝ်ႏမူဝါဒအဝ်ႏနုဲင်းမုဲင်ꩻ၊ စီꩻပွါꩻရေꩻနဝ်ꩻ ပအိုဝ်ႏလိုꩻမျိုꩻမူဝါဒအဝ်ႏနုဲင်းမုဲင်ꩻ၊ လိုꩻမုရေꩻယို ပအိုဝ်ႏလိုꩻမျိုꩻ မူဝါဒအဝ်ႏနုဲင်းမုဲင်ꩻ၊ လိုမ်းဗဉ်ႏရေꩻယို ပအိုဝ်ႏလိုꩻမျိုꩻခံႏထူႏချက်အဝ်ႏနုဲင်းမုဲင်ꩻ၊ ဟံႏယာႏတွမ်ႏသဘာဝရေꩻယို ပအိုဝ်ႏမူအဝ်ႏနုဲင်းမုဲင်ꩻနဝ်ꩻ မဉ်ႏထေနွောင်ꩻ သွင်ꩻသော့ꩻနွောင်ꩻဒျာႏမꩻ ကအီႏထန်ႏလွဉ်ဒျာႏ ခမ်းထီပုံႏပွိုင်တသာယိုကို ပအိုဝ်ႏလိုꩻမျိုꩻခွင်ꩻရေꩻ အီႏပါသော့ꩻနဝ်ꩻသွူ။ အစွိုꩻတစွိုꩻ မူဝါဒခံႏထူႏချက်ယို မဉ်ႏအွဉ်ႏထွာတေား စွိုးခွိုꩻမူဝါဒခံႏထူႏချက်နဝ်ꩻတဲ့ တထွာနွောင်ꩻတဝ်းတဲင် ပအိုဝ်ႏတစွိုးခွိုꩻလုမ်း မူဝါဒခံႏထူႏချက် ဖေႏကထန်ႏနဝ်ꩻ အဝ်ႏလိုႏမာꩻငါႏလဲဉ်း ပအိုဝ်ႏတစွိုးခွိုꩻလုမ်းညီႏလာႏခံႏအကျောင်ꩻ ခမ်းသားငဝ်း ခြွူႏမွဉ်းသားစွိုꩻ တဲမ်းတမာဖေႏသေလွေꩻဗာႏနဝ်ꩻသွူ။