ပအိုဝ်ႏလိုꩻမျိုꩻသီး
"ပအိုဝ်ႏလိုꩻမျိုꩻသီး ကအဝ်ႏဆို့ꩻလိုပ်ꩻဒါႏကွန်ႏဖုံႏယို အငိုꩻအဝ်ႏအဝ်ႏ ဖေႏကစာနွောင်ꩻဗာႏနဝ်ꩻ အီႏမာꩻဗာႏနုဲင်းမုဲင်ꩻ" ဟန်ႏသနီꩻယိုနဝ်ꩻ တယ်ႏထောင်ႏခမ်းထီရေꩻကိုတဲ့နဝ်ꩻ၊ မာꩻပြွူႏဖြိုလွိုင်ႏကွုန်ꩻခမ်းထီရေꩻတဲ့နဝ်ꩻ၊ ပင်ႏထိုလိုꩻမျိုꩻတောမ်ႏ ယေန်ႏငဲးရေꩻတဲ့နဝ်ꩻ၊ မာꩻနုဲင်ႏငံႏရေꩻတဲ့နဝ်ꩻ၊ မာꩻစဲ့ꩻရေꩻ လိုမ်းဗဉ်ႏရေꩻတဲ့နဝ်ꩻ၊ ပင်ႏထိုပညာႏရေꩻတဲ့နဝ်ꩻ၊ ထိန်ꩻထွားခမ်းသားခြွိုင်ႏသန်ꩻရေꩻတဲ့နဝ်ꩻ၊ ပင်ႏထိုသာႏသနာႏရေꩻတဲ့နဝ်ꩻ မာꩻစွဉ်ႏတမုဲင်ꩻမုဲင်ꩻအရေꩻတယဝ်း စီꩻပွါꩻရေꩻယိုနဝ်ꩻ ထွာအထျꩻနဝ်ꩻသွူ။ ဟန်ႏသနီꩻ လိုမုရေꩻ၊ စဲ့ꩻရေꩻ၊ နယ်ꩻပညာႏရေꩻဖုံႏ ကထင်ႏထိုလဲဉ်းဒါႏ နုဲင်းထီအခေါဝ်တွို့ꩻဖုံႏသူꩻ အထျꩻနဝ်ꩻ ကောပ်စွဉ်ႏစီꩻပွါꩻရေꩻယို အာႏတလာနဝ်ꩻသွူ။ စီꩻပွါꩻရေꩻမိဉ်းရိုꩻသွူနဝ်ꩻ ထေစာလက်နက်စူခြွိုင်းတဲင် မာꩻစီꩻပွါꩻရေꩻသားတဲ့အဝ်ႏ၊ ထေစာလိုꩻသုင်ꩻစက်ြခြွိုင်းခြိုꩻ ကာꩻအမျိုꩻမျိုꩻဖုံႏ၊ ထီကိုတာႏ သင်္ဘောꩻအမျိုꩻမျိုꩻဖုံႏ၊ ဝါးတလီꩻလောင်းတာႏ သင်္ဘောꩻကွင်ႏ အမျိုမျိုꩻသားတဲ့အဝ်ႏ၊ ထေစာခမ်းထီကို ကထန်ႏဒါႏ သဘာဝအရွီးအခိုႏ လုံးရတနာႏအမျိုꩻမျိုꩻဖုံႏ၊ သေင်ႏအမျိုꩻမျိုꩻဖုံႏသားတဲ့အဝ်ႏ၊ ခမ်းထီယင်ဟန်ႏဖုံႏနဝ်ꩻ ရေနံထန်ႏအာတဲင် မေႏဆာႏ(ရေနံ)ယို အွဉ်ႏအထျꩻ ထွာစီꩻပွါꩻရေꩻ၊ ထေစာခမ်းထီသားတဲ့ အဝ်ႏနဝ်ꩻသွူ။ ခမ်းထီယင်ဟန်ႏဖုံႏနဝ်ꩻ သဘာဝအရွီးအခိုႏ တထန်ႏတဝ်းတဲ့ အဝ်ႏ၊ တထေနွောင်ꩻတဝ်း စက်ခြွိုင်းခြိုꩻတမုဲင်ꩻမုဲင်ꩻတဲ့အဝ်ႏ၊ နုဲင်းအစ္စရေးခမ်းနဝ်ꩻ ဆို့ꩻရုဲင်လူးတာႏ ဟံႏယာႏငါတဲ့ခြောခြော၊ နုဲင်းစင်ကာပူခမ်းနဝ်ꩻ ခမ်းသားသုင်ꩻအွꩻထီတာႏငါတဲ့ တအဝ်ႏတဝ်း၊ ဖြေꩻထူႏဗာႏနေးခမ်းလင်၊ နုဲင်းခမ်းထီယိုစားဖုံႏတဲ့ အဝ်ႏနဝ်ꩻသွူ၊ ကွဲတွော့ꩻ ခမ်းထီယိုစားဖုံႏနဝ်ꩻ ကောပ်စီꩻပွါꩻရေꩻအာႏဟဝ်၊ နယ်ꩻပညာႏအာႏဟဝ်တဲင် ဟန်ႏသနီꩻ ကမ္ဘာႏလောင်း ထင်ႏထိုပြွူႏဖြိုခမ်းထီစာႏရင်ꩻအကို အဝ်ႏပါထဲင်းဆကီဖဲ့ꩻသွတ်ꩻယို အဝ်ႏထီႏထွꩻဒျာႏဝင်ꩻနဝ်ꩻသွူ။ နဝ်ꩻမꩻ ထွားသွူခမ်းထီ အဒေါဝ်ႏဒေါဝ်ႏဖုံႏ ကထေထန်ႏကွန်ႏတောမ်ႏ စီꩻပွါꩻရေꩻအခေႏနေႏယိုတဲင် ခမ်းထီတဖြုံႏတောမ်ႏတဖြုံႏ တဗွိုန်ပီတဝ်းဝင်ꩻအခါႏ ခမ်းထီယင်ဟန်ႏဖုံႏနဝ်ꩻ အယပ်ꩻအခုဲင်ႏကို ကမ္ဘာႏစီꩻပွါꩻရေꩻဆေꩻကွက်အခါႏ အုံထွိုင်ႏသော့ꩻနုဲင်းမုဲင်ꩻကရိုꩻနဝ်ꩻ ခဉ်ႏထွားထွူတဲင် ဟန်ႏသနီꩻ ပအိုဝ်ႏဒေႏသကို ကအဝ်ႏပအိုဝ်ႏခမ်းသားသီး ကဆို့ꩻရုဲင်တွော့ꩻ ကထန်ႏလွဉ်ဒါႏ ကွန်ႏဖုံႏယို ကောပ်တမုဲင်ꩻ မွော့စာဗာႏတွိုႏ တောမ်ႏအငိုꩻပေါꩻပေါꩻဟောင်း၊ အငိုꩻဖေႏကအဝ်ႏနဝ်ꩻ ထိုမ်ႏတဝ်းဒွုမ်အနယ်ꩻ အုံဗော့ꩻနုဲင်းယိုဟောင်း။ ဟန်ႏသနီꩻ ပအိုဝ်ႏဒေႏသတောမ်ႏ ပအိုဝ်ႏလိုꩻမျိုꩻသီးအကို ကထွာကကျုံႏလွဉ် အဓိကပျဿနာႏနဝ်ꩻ ပအိုဝ်ႏသီးကထေဒါႏ ကွန်ႏအမျိုꩻမျိုꩻယို အငိုꩻတအဝ်ႏတဝ်း၊ စာအံႏဗာႏပေါꩻပေါꩻနဝ်ꩻသွူ၊ ကဆို့ꩻရုဲင် ကလိုပ်ꩻမာꩻလွဉ် ပဉ်နေင်ႏတောႏတွင်ꩻ ထွိုင်ႏစာနဝ်ꩻ အငိုꩻသမ်းတအဝ်ႏတဝ်းတဲင် လွူးကုန်ꩻအီချာ လမ်းနားဟွိုန်ꩻနွဗာင်ꩻတဝ်း၊ ပိုလီꩻပညာႏရေꩻတာႏ ထွဉ်ႏသွဉ်စွဲးကမ်းသွတ်ꩻသွတ်ꩻနွဗာင်ꩻတဝ်း၊ ယင်ဟန်ႏသားနဝ်ꩻ အီႏလွူးအီပိုတာႏ တနွောင်ꩻတဝ်းတဲင် ပိုခိုပေႏ ပိုမူႏပေႏနဝ်ꩻ လဲင်ꩻတွိုႏဗာႏနေးစွဉ်ႏ လယ်ႏဖေႏဗာႏဝင်ꩻဖဝနဝ်ꩻသွူ။ နဝ်ꩻမꩻ မိဉ်းအွာထွားချာယင်းနဝ်ꩻ ကောပ်စွဉ်ႏပအိုဝ်ႏလိုꩻမျိုꩻသီး စီꩻပွါꩻရေꩻဖဝ အဆင်ႏတပြေႏတဝ်းယို ထွာစွဉ်ႏအထျꩻထျꩻနဝ်ꩻသွူ၊ ပအိုဝ်ႏလိုꩻမျိုꩻသီး တဖြာꩻစီႏ၊ လမ်းတနားဟွိုန်ꩻစီႏ၊ တရပ်တဒုံစီႏ၊ ခွိုင်းကားလို့တဲင် ပအိုဝ်ႏတစွိုးခွိုꩻလုမ်း စီꩻပွါꩻရေꩻ ယံဖေႏနေး အဆင်ႏကပြေႏနဝ်ꩻ ပါꩻမုဲင်ꩻတဲ့ တလွဉ်မာꩻဖေႏတဝ်း၊ ပအိုဝ်ႏကိုဒျာႏ ကအီႏဒိုငါ ထွင်ႏတသာစီꩻပွါꩻရꩻတဖူꩻသားတဲ့ တအဝ်ႏတဝ်းနဝ်ꩻမꩻ ကအဝ်ႏပေါꩻလဲဉ်းသွူ ပအိုဝ်ႏသီးကွန်ႏနဝ်ꩻ အယိန်းပေါꩻထဲင်းထဲင်း၊ အဝ်ႏစာပေါꩻဗာႏစွူစွူဒျာႏ။ အဝ်ႏပအိုဝ်ႏဒေႏသကို ကထန်ႏ ပအိုဝ်ႏသီးကွန်ႏဖုံႏယို အခန်အဝ်ႏအဝ်ႏ၊ အငိုꩻကွိုင်ႏကွိုင်ႏ ဖေႏကစာနွောင်ꩻနဝ်ꩻ အီႏမာꩻဗာႏနုဲင်းမုဲင်ꩻ၊ အဝ်ႏလိုႏထိုမ်ႏလဲဉ်းအနယ်ꩻနဝ်ꩻသွူ၊ နုဲင်းယိုခါ ကပေါꩻဗာႏနဝ်ꩻ ပအိုဝ်ႏသီး ခွေထေနာꩻထေကွန်ႏယို အဝ်ႏစာချာဒျာႏဗော့ꩻ ရပ်ဝေင်ꩻကိုတွိုင်ꩻတွိုင်ꩻနဝ်ꩻလုမ်ꩻတဲင် ဝေင်ꩻတဖြုံႏနီဖြုံႏသိုမ်ဖြုံႏယို လိုꩻဖြာꩻပေါင်ꩻတပေါႏအာငါႏတဝ်း၊ နဝ်ꩻမꩻ ကေားကထေသားနဝ်ꩻ မိဉ်းအာ၊ ကေားကသုင်ꩻသားမိဉ်းဆေ့ꩻ၊ မိဉ်းအဲဉ်ထဝ်းနဝ်ꩻလဲ့ ကွန်ႏနဝ်ꩻ အပေါꩻဗာႏဒျာႏရင်ꩻသွူ။ ဆုဲင်ꩻယို နုဲင်းကထွာဒါႏ တောင်ႏကီꩻဝေင်ꩻထျꩻပအိုဝ်ႏဖုံႏနဝ်ꩻ ကောပ်ကျုံႏဗာႏပျဿနာႏယို ညဆွာꩻလွဉ်တဲင် ယင်ဟန်ႏသားနဖုံႏနဝ်ꩻ ပအိုဝ်ႏသီးကဆို့ꩻရုဲင်ဒါႏကွန်ႏ ဟန်ႏသဉ်လာႏယို ကူꩻကားလွေꩻစာတေား ဝေင်ꩻလင် နုဲင်းရန်ႏကုန်ႏဖုံႏ၊ နေပြည်တော်ဖုံႏ၊ မန်ꩻတလေꩻဖုံႏနဝ်ꩻ အဝ်ႏလွဉ်၊ ထီႏဗာႏနဝ်ꩻသွူ၊ ယိုနဝ်ꩻ ပအိုဝ်ႏသီး ကထေဒါႏကွန်ႏယို လိုꩻဝေင်ꩻလင်သားဖုံႏ ဖြေꩻသုင်ꩻတဲင် အငိုꩻအဝ်ႏအဝ်ႏ စာဗာႏနွောင်ꩻနဝ်ꩻသွူ။ ဖြေꩻတဲ့စာ ဖြေꩻတဝ်းတဲ့စာ-ကရိုꩻဒါႏ စာဗာႏပေါꩻပေါꩻဒျာႏ နီရပ်ဝေင်ꩻတောင်ႏကီꩻ၊ ဟိုပုံꩻ၊ ပင်လောင်ꩻကို မွေးတဝ်းဒုမ်နဝ်ꩻသွူ၊ ယိုခါနဝ်ꩻ ထွာလွဉ်ထဲင်းနုဲင်းမုဲင်ꩻဟောင်းနဲးနဝ်ꩻ ကောပ်ဝေင်ꩻလင်သား၊ ဝေင်ꩻတန်သားဖြေꩻသုင်ꩻတဲင် ခွုင်းကဆို့ꩻသမျ၊ ခွုင်းကအဝ်ႏသမျနဝ်ꩻ စာဗာႏအငိုꩻအဝ်ႏအဝ်ႏထွူ တလိုမ်းခိꩻတဝ်းဒွုမ်၊ အဝ်ႏလိုႏစွဉ်ႏ အထဲင်းနဝ်ꩻသွူ။ လိုꩻသီးကထေဒါႏကွန်ႏယို ထေဒျာႏလိုꩻသုင်ꩻတာႏဒျာႏရင်ꩻရင်ꩻတဲင် ပအိုဝ်ႏသီးကွန်ႏယို လိုꩻအာအာ ဖေႏကသုင်ꩻထွꩻနွောင်ꩻနဝ်ꩻ အဝ်ႏလိုႏတုတ်ꩻ၊ အဝ်ႏလိုႏအီလွေꩻစွစ်ꩻစွစ်ꩻဖေႏနဝ်ꩻသွူ၊ မြန်မာခမ်းထီနဝ်ꩻ လိုꩻဖြာꩻပေါင်ꩻ အဝ်ႏသန်းငတ်ꩻဆီ၊ ကမ္ဘာႏလိုꩻဖြောꩻပေါင်ꩻနဝ်ꩻ အဝ်ႏသန်းနွတ်ꩻရေင်တဲင် ပအိုဝ်ႏသီးကွန်ႏယို လိုꩻခမ်းလင် ဖေႏကသုင်ꩻနွောင်ꩻ၊ ဖေႏကနွို့တောမ်ႏ၊ ဖေႏကနွို့နွောင်ꩻ ကမ္ဘာႏဆေꩻကွက်ကို အဝ်ႏလိုႏနဝ်ꩻသွူ။[၁][၂]