ဖစ်လူꩻပင်ꩻလိုꩻနာႏအကျိုꩻ

ပင်ꩻလူꩻဖစ်လိုꩻ နာႏအကျိုꩻ(၁)

လွဉ်လွလွဉ်လွဗွေႏဟွေး- တွမ်ႏလူꩻတွမ်ႏလိုꩻ၊ ယိုခါနဝ်ꩻ အီႏနာႏသွူအကျိုꩻ၊ အီႏဝွေႏသွူကုသိုလ်ႏ၊ လွဉ်လွလွဉ်လွ အခိန်ႏယိုခါ၊ ကာလွကာလွ အခိန်ႏယိုတွင်ꩻ၊ နီသွဉ်းသီးရင်ꩻ ပွယ်ꩻတကာႏ၊ အင်ဖြောင်းဖစ်ဗာႏ ထွူနဲးဩ၊ အခိန်ႏလဲ့ခေါ အခါႏလꩻ၊ ကွပ်ပွိုးနဝ်ꩻမ လွဉ်ခန်းလုဲး၊ မူႏလဲ့နုဲးနုဲး ခိုပီပီ၊ ဝိဟာရကျောင်ꩻကီ သံႏဃာႏပေါင်ꩻ၊ ရဟန်ꩻလိုꩻကျောင်ꩻ သာႏမဏေႏ၊ ဝါႏတန်ဝါႏပေႏ ကျွꩻလို့လဲန်း၊ အဝ်ႏကုဲင်လွုမ်ꩻထဲင်း ပွယ်ꩻတကာႏ၊ ကလူႏလဲန်းဒါႏ ဟန်ႏသနီꩻ၊ အောင်ႏထွူဖြီꩻစီꩻ နာႏအကျိုꩻ၊ လူꩻယိုတွမ်ႏလိုꩻ သွဉ်းဖစ်လွဉ်၊ နဝ်ထင်ꩻခိုႏဒွမ် လစ်ꩻဖဲ့ꩻနား၊ တမျိုꩻတစား မအဝ်ႏကုဲ၊ လူꩻမျိုꩻတင်ꩻလုဲ သွဉ်းဖစ်သမ်း၊ လူꩻကပွေါးလံး ကပွေါးဒုံ၊ ကျောင်ꩻကန်ႏပွေါးအုံ လူꩻသမ္မာႏ၊ အွိုင်ႏနယ်ႏယင်ဒျာႏ ခမ်းနယ်ႏပါ၊ ယုတ်မျတ်ကထွာ ခွိုင်းလူꩻမျိုꩻ၊ ဟမ်ႏလောင်းမရိုꩻ ဘူမဋ္ဌ၊ မို့ꩻအာႏကာႏသ လူꩻသူထပ်၊ သွဉ်းသီးဖစ်စပ် ပင်ꩻလို့စူꩻ၊ ဗျဟ္မာႏဘုံႏထူꩻ တဆီသူ၊ ယိုခါခါသွူ သွဉ်းဖစ်လဝ်း၊ တအဝ်ႏကုဲတဝ်း လစ်ꩻအပါယ်ႏ၊ ငါးရုဲꩻခမ်းနယ်ႏ ခွန်ယမ၊ အဝ်ႏခံဒုက္ခ ပိတ္တာႏဘုံႏ၊ လို့စင်လုံးစုံႏ ဖစ်ဟွုန်ဩ၊ လွဉ်ခန်းဝင်ꩻနေား နာႏအကျိုꩻ၊ တွမ်ႏလူꩻတွမ်ႏလိုꩻ နေးကုသိုလ်ႏ၊ ရဟန်ꩻပုဂ္ဂိုလ်ႏ ကျွꩻလို့လဲန်း၊ မာꩻမွိုင်မွိုင်ဗဲင်း လွဉ်ခန်းဝင်ꩻ၊ ယိုခါခါတွင်ꩻ အီႏတယ်ႏစ၊ ခွိုင်းတဲင်ဒါႏန ကလူႏဗာႏ၊ အကျိုꩻအီႏနာႏ ထွူနဲးနေား၊ လွဉ်ခန်းလုဲးဩ လွဉ်လုဲးဗွေႏ၊ အကျိုꩻအီႏဝွေႏ သာႏဓုညီꩻ၊ ခိန်ႏဟန်ႏသနီꩻ ယိုခါခါ၊ လွဉ်လွကာလွ ပငါပရာꩻနေား ဗွေႏသီးဩ။ ကာႏကအဝ်ႏ လိုꩻလူꩻဗျဟ္မာႏ၊ သတ္တဝါႏသီး၊ လွဉ်လွလွဉ်လွ ပငါပရာꩻဗွေႏဟွေး၊ တွမ်ႏလူꩻတွမ်ႏလိုꩻ နာႏညီꩻဝင်ꩻအကျိုꩻ၊ နာႏထူႏသာႏဓုညီꩻဝင်ꩻကုသိုလ်ႏ ဗွေႏဩ။

ပင်ꩻလူꩻဖစ်လိုꩻ နာႏအကျိုꩻ(၂)

သုနက္ခတ္တံ သုမင်္ဂလံ၊ ဟန်ႏသနီꩻယိုနဝ်ꩻ မွူးနီꩻဟဝ် မွူးနီꩻမျတ်၊ နက္ခတ်ဟဝ် နက္ခတ်ဒါႏ၊ မင်္ဂလာႏအဝ်ႏ အခိန်ႏမွူးနီꩻတဲင်- လွဉ်လွဉ်ဗွေႏဟွေး လွဉ်လွဉ်၊ ယိုနဝ်ꩻခွေသွဉ်း ဖစ်ဟွုန်လဝ်းဗာႏ၊ ပွယ်ꩻတကာႏ မူႏတွမ်ႏခို၊ ဟန်ႏနီꩻယို ကမာꩻပွယ်ꩻလူႏ၊ သွုန်ႏသꩻဖျူႏ ကမာꩻပွယ်ꩻတန်ꩻ၊ အခိန်ႏရင်ꩻ တွိုႏဖျော်ဖြ၊ ဓမ္မသဝန နာႏအကျိုꩻ၊ နီယိုရိုꩻ ဆေꩻ့တွမ်ႏအာ၊ ကပါညီꩻ ကလူႏရဝ်း၊ အုံကုဲမွုန်းတဝ်း လွဉ်နာႏညီꩻ၊ နွုတ်ꩻမွူးနီꩻသာꩻ ပေႏတွမ်ႏတန်၊ ခွေသွဉ်းခြဝ်သန် ဟဲ့ꩻလွဉ်စု၊ အခိန်ႏသာႏဓု အိႏတွိုႏမန်ႏ၊ ခွေသွဉ်းဖစ်ထင်ႏ ပင်ꩻပါ၊ လူꩻပေါင်ꩻအာဒေႏဝါႏ၊ ကပွေါးဒါႏနီသွဉ်းသီးလမ်း၊ ကကမ်းဒါႏနီသွဉ်းသီးဒုံ၊ ကအုံဒါႏနီသွဉ်းသီးကျောင်ꩻ၊ ကစောင်ꩻဒါႏနီသွဉ်းသီးရပ်၊ လူꩻမျတ်တနံမျိုꩻ၊ ဘုမ္မစိုꩻရုက္ခစိုꩻ၊ အာႏကာႏသစိုꩻ၊ လူꩻသိုမ်မျိုꩻလို့လို့၊ ဖစ်မို့မို့ပင်ꩻကြောင်း၊ ကောင်လောင်းထီကို၊ လူꩻမျိုꩻယို မအဝ်ႏကျန်ႏ၊ ခွေသွဉ်းဖစ်ထင်ႏပင်ꩻလဝ်း၊ ဗွေႏပဉ္စောဝ်းသာႏသနာႏ၊ ကအဝ်ႏထိန်ꩻဒါႏလူꩻမျတ်၊ ခွေသွဉ်းဖစ်စပ်ပင်ꩻပါ၊ ထဲင်းဒွိုန်းခြာအဝ်ႏနေက၊ ဓနရဋ္ဌ၊ ဝိရူဠှက၊ ဝိရူပက္ခ၊ ကုဝေရ၊ စတုလောကပါလ၊ လူꩻတန်ဝင်ꩻလစ်ꩻယိုယင်၊ ခွေသွဉ်းဖစ်ဖျင်ပင်ꩻသမ်း၊ လွဉ်လွဉ်ခန်းယိုခါခါ၊ လာပါလာပါယိုဟန်ႏလဲင်ႏ၊ အခိန်ႏမဲန်ႏအခါႏတွိုႏ၊ စဝ်းပုဂ္ဂိုလ်ႏရဟန်ꩻပေါင်ꩻ၊ ဗွေႏလိုꩻကျောင်ꩻသံႏဃာႏသီး၊ ကျွꩻဖျော်ရီးတပန်ꩻကီ၊ အဝ်ႏကုဲနီပွယ်ꩻတကာႏ၊ တွမ်ႏဒေႏဝါႏလူꩻမျိုꩻအာ၊ သံႏဃာႏငါလွဉ်အုံလင်ꩻ၊ လွဉ်ထူႏခန်းဝင်ꩻခင်ႏလံး၊ လွဉ်ခန်းလုဲးဗွေႏ၊ ကာခန်းလုဲးစဝ်း၊ ယွိုက်ꩻမွုန်းတဝ်းမွိုင်မွိုင်၊ ထွိုင်မွုန်းတဝ်းကျင်ႏကျင်ႏ၊ ခွေသွဉ်းဖစ်ထင်ႏဟွုန်ဗာႏ၊ ပွယ်ꩻတကာႏတွမ်ႏအမျာꩻ၊ စွုမ်ႏဖြီးစွုမ်ႏဖြာꩻသွူဗွေႏဩႏ လွဉ်လွလွဉ်လွ၊ လွဉ်ခန်းလွဉ်ခန်း ပငါပရာꩻ၊ လွဉ်နာႏညီꩻအကျိုꩻ၊ လွဉ်ထူႏညီꩻကုသိုလ်ႏ ဗွေႏဩ။