မဉ်ႏဖြားဆုဲင်ꩻချာ

"မဉ်ႏဖြားဆုဲင်ꩻချာ ယံကဒဲ့ꩻအံႏဗာႏ ရွဉ်အဒီႏရာႏ၊ ယိုခါ အဝ်ႏလိုႏဆို့ꩻသေꩻ ရွဉ်ဥစ္စာႏမွူး" ပအိုဝ်ႏလိုꩻမျိုꩻယို ကဲဉ်းအာအာနဝ်ꩻ လိုပ်ꩻမာꩻဆို့ꩻရုဲင်ဒျာႏ သွို့ꩻလုဲင်းခြံနဝ်ꩻသွူ၊ ကလိုပ်ꩻမာꩻဆို့ꩻရုဲင်ဒျာႏ သွို့ꩻလုဲင်းခြံနုဲင်းယိုနဝ်ꩻ တယ်ႏမွိုးဖြားဖါဖြားစိုႏခါကာႏ ထွာလွဉ်လဲဉ်း အစဲဉ်ႏအဆက်နဝ်ꩻသွူ။ ကလိုပ်ꩻကမာꩻလွဉ်ဗာႏနုဲင်းယိုနဝ်ꩻ ပအိုဝ်ႏလိုꩻမျိုꩻအတာႏ အကျိုꩻစီꩻပွါꩻထွာအီ၊ လွူးနမ်းကမ်းကြိုတာႏ၊ ဖေႏအာႏပိုပညာႏရေꩻတာႏ၊ လူႏတာႏတန်ꩻတာႏ၊ အကေပ်ꩻအခွဲꩻတာႏ၊ ထာꩻဆော့ထာꩻဆာ ကုယာတသီႏတာႏ၊ အံႏတာႏအွꩻတာႏဖုံႏနဝ်ꩻ လိုမ်းကိုမ်ႏအီနဝ်ꩻသွူ၊ မဉ်ႏဒေါ့ꩻဗာႏ အလိုမ်းကိုမ်ႏနေးလုမ်ꩻ၊ အလွန်းအလွို အီႏအဝ်ႏကုဲင်ဗာႏနဝ်ꩻ တယိုꩻတဝ်းနဝ်ꩻသွူ။ မဉ်ႏဒေါ့ꩻဗာႏနဝ်ꩻ ကလိုပ်ꩻကမာꩻငါႏလဲ့ အလွန်းအလွို တအဲဉ်ထဝ်းဗာႏထာꩻနဝ်ꩻ ကွပ်တမုဲင်ꩻဟောင်း၊ ကလိုပ်ꩻကမာꩻ ကရွိုးဗာႏသွူလဲ့ ဟဝ်ဟဝ်ကွဉ်ကꩻဗာႏတဝ်းဒွုန်း၊ လမ်းပါႏဟဝ်ဟဝ် အုံဗာႏတဝ်းဒွုန်း၊ ယပ်ꩻထွူယပ်ꩻထဲင်း အယပ်ꩻထဲင်းထဲင်းဗာႏဒျာႏနဝ်ꩻသွူ။ ကလိုပ်ꩻကမာꩻတွော့ꩻ ကလꩻလွဉ်ဒျာႏ စီꩻပွါꩻအလꩻယို အွဉ်ႏပလို့ꩻအနီꩻရင်ꩻတာႏ ရွဉ်နဝ်ꩻ အွဉ်ႏဖိုဖိုနေဟောင်း၊ အနီꩻအရင်ꩻတာႏကရိုꩻနဝ်ꩻ အွဉ်ႏခြွဉ်းဟဝ်ရွဉ် ခွုင်းကလꩻလꩻယို ဆို့ꩻရွဉ်မွူး၊ ထွဉ်ႏလွူးအပေႏ၊ ထွဉ်ႏထိုမ်ႏအသွꩻနုဲင်းနဝ်ꩻဒျာႏသွူ။ ထိုမ်ႏမာꩻထိုမ်ႏကျံႏတွော့ꩻ ခွုင်းကလꩻလွဉ်ဒါႏရွဉ်ယို လꩻအတွိုင်ꩻ မဉ်ႏခွုင်းကသုံꩻလို့ချာဗော့ꩻနုဲင်းနဝ်ꩻနဝ်ꩻ ထာꩻမာꩻသက်တန်ꩻ အာခန်းစွဉ်ႏလဲ့ ထာꩻမာꩻယို တသွတ်ꩻထိုꩻတဝ်း၊ နမ်းဖြားခန်းတဲ့ မာꩻတဝ်းတဲ့ အံႏဗာႏဒွုမ်၊ နမ်းဖြားသွူလဲ့ အဝ်ႏမာꩻဖြားဖြား၊ အဝ်ႏယပ်ꩻဖြားဖြား၊ အဝ်ႏရွိုးဖြားဖြားဗာႏဒျာႏထာꩻနဝ်ꩻသွူ။ ရွယ်ႏအဝ်ႏပေႏရွယ်ႏအဝ်ႏဆားခိန်ႏနဝ်ꩻ လွေꩻသဲင်ꩻနဂွောင်ꩻ ခုမ်မာꩻနွောင်ꩻတဲင် မာꩻဗာႏရွိုးဗာႏနဝ်ꩻ အဗာႏတခုဲင်ႏတဝ်းလဲ့ သက်မဉ်ႏတန် နမ်းမဉ်ႏဖြားတနီꩻခါနဝ်ꩻ အီႏမာꩻဗာႏ အီႏခံႏရွိုးဗာႏနဝ်ꩻ မာꩻတနွောင်ꩻတဝ်းဒွုမ်၊ ခံႏရွိုးတနွောင်ꩻတဝ်းဒွုမ်နဝ်ꩻသွူ။ ထာꩻယူႏထာꩻတွေꩻ အရန်းကထိုလဲဉ်းဒါႏ နုဲင်းဝင်ꩻခမ်းလင်သားဖုံႏနဝ်ꩻ ရွယ်ႏအဝ်ႏပေႏခိန်ႏယို ထိုမ်ႏကျံႏစုရွမ်မွေးမွေးထွူ ကလꩻလွဉ်ဒါႏရွဉ်ယို ခွဲသုံꩻပဉ်စားစား၊ ထွားခြပ်ပဉ်ချိုꩻချိုꩻတဲင် ယဟန်ႏနဝ်ꩻ အွဉ်ႏကုဲင်အနီꩻအရင်ꩻတာႏတွော့ꩻ ဝင်ꩻဆို့ꩻရွဉ်မွူး၊ ဝင်ꩻထွဉ်ႏလွူးအပေႏတဲင် ထွိုင်ႏဖြားတနီꩻခါလဲ့ တယပ်ꩻဗာႏတဝ်းဒွုမ်၊ ဝင်ꩻအံႏလွဉ်ꩻဗော့ꩻဒျာႏ ဝင်ꩻကဆို့ꩻသေꩻ ရွဉ်မွူးအဒီႏအရာႏနဝ်ꩻသွူ။ ဝင်ꩻကလꩻရွဉ်ယို သုံꩻနုဲင်းမုဲင်ꩻ၊ တလာယို ရွဉ်မဉ်ႏနွို့ခန်းတရျာꩻ(တစွဲး)ဗီႏလဲ့ သိုမ်ဆီဗီႏယို အံႏတာႏအွꩻတာႏ၊ သိုမ်ဆီဗီႏယို သုံꩻတာႏစုဲင်ႏတာႏ၊ သိုမ်ဆီဗီႏယို လူႏတာႏတန်ꩻတာႏ၊ ကေပ်ꩻတာႏခွဲꩻတာႏ၊ အနာတဆီဗီႏယို အွဉ်ႏခြွဉ်းဟဝ် အနီꩻရင်ꩻတာႏ၊ နမ်းတာႏနဝ်ꩻသွူ။ နမ်းတာႏ၊ အနီꩻအရင်ꩻယို ခံႏတဝ်းအစုဲင်ႏကဲင်၊ အသုံꩻကဲင်တစိꩻစိꩻနဝ်ꩻသွူ၊ ထွာမုဲင်ꩻနဲးတဲင် သုံꩻတာႏစုဲင်ႏတာႏ အဒဝ်ႏဒဝ်ႏယို ထေခေါ်ခါꩻထွူလဲဉ်းနဝ်ꩻသွူ၊ ကခွဲꩻကထေခေါ်ခါꩻအတွိုင်ꩻ ပေါႏလွိုနဝ်ꩻ သုံꩻတဝ်းစုဲင်ႏတဝ်း အွဉ်ႏထွော့ခါꩻနေးနုဲင်းနဝ်ꩻသွူ။ နဝ်ꩻမꩻတဲင် တလာတစိꩻ ကစုရွမ်၊ ကလꩻလွဉ်ဒါႏ အနီꩻအရင်ꩻတာႏ ရွဉ်ယို မဉ်ႏဗွေသွူ ခန်ꩻတွိုင်ꩻတဗာႏခိန်ႏနဝ်ꩻ သင်ꩻရာꩻထာꩻမာꩻတဗာႏဗာႏကို အွဉ်ႏပလို့ꩻအီ အနီꩻအရင်ꩻနဝ်ꩻသွူ၊ ကအွဉ်ႏပလို့ꩻအနီꩻရင်ꩻနဝ်ꩻနဝ်ꩻ ထွာဆို့ꩻရွဉ်မွူးနဝ်ꩻသွူ။ တနီꩻခါ မဉ်ႏဖြားခိန်ႏ ယံအံႏဗာႏ ရွဉ်မွူးအဒီႏအရာႏနဝ်ꩻသွူ။ ယဟန်ႏသားနဝ်ꩻ အနေင်ႏနေင်ႏ၊ အလာလာ မွူးနီꩻပေါင်ꩻအာ ကစုရွမ်ခါꩻဒါႏရွဉ်ယို လွေꩻအွဉ်ႏပလို့ꩻအနီꩻအရင်ꩻ ရော့ꩻတဝ်းတဲင် သုမ်ꩻထိုꩻခြေင်ဗာႏ အခြွိုက်ခြွိုက်သားတဲ့ အဝ်ႏအာတန်သွူ၊ ကွဲးတွော့ꩻ တဖေႏတဝ်းအသုမ်ꩻ၊ ခံႏချော့ꩻတဝ်းဇွဲ၊ ဝီရိယတဲင် စုရွမ်ထဲင်း၊ အွဉ်ႏပလို့ꩻထဲင်းစွဉ်ႏ ခမုဲင်ꩻခြွိုက်ခြွိုက်ထွူ အနာလွို ထွာလွဉ်ဗာႏကမ္ဘာႏလောင်း အခြွေသွတ်ꩻ၊ အချံꩻသာႏသွတ်ꩻ လိုꩻပုဂ္ဂိုလ်ႏဖုံႏနဝ်ꩻသွူ။ အွဉ်ႏပလို့ꩻအနီꩻအရင်ꩻကရိုꩻနဝ်ꩻလဲ့ ထိုမ်ႏဖေႏရွဉ်အေႏစား တမွေးတဝ်း၊ ထွားပလို့ꩻဗာႏ သေႏသေႏချာႏချာႏနဝ်ꩻသွူ။ နဝ်ꩻမꩻ ပအိုဝ်ႏမူႏခိုသီး စွုမ်ႏဖြာꩻလဲ့ အဝ်ႏပေႏဆားခိန်ႏနဝ်ꩻ လိုပ်ꩻမာꩻနွောင်ꩻလဲ့ မဉ်ႏဖြားခိန်ႏ ယံကအုံဗာႏချံꩻချံꩻသာႏသာႏ၊ ယံကအံႏလွဉ်ꩻဗာႏ ရွဉ်မွူးအဒီႏအရာႏနဝ်ꩻ ကထိုမ်ႏလꩻအတွိုင်ꩻယို အံႏအွꩻအီယဟန်ႏ၊ သုံꩻစုဲင်ႏအီယဟန်ႏ၊ လူႏတန်ꩻအီယဟန်ႏ၊ ဆီဆတဆယို အွဉ်ႏကုဲင်စုရွဉ်တွော့ꩻ ဆို့ꩻသေꩻဝင်ꩻရွဉ်မွူးနဝ်ꩻ ဟဝ်ငါႏသွူ။ ဆုဲင်ꩻချာ နမ်းနဝ်ꩻ တထိုမ်ႏတမာꩻတဝ်းဒွုမ်တွော့ꩻ ရွဉ်တွမ်ႏရွဉ်ဒျာႏ ထိုမ်ႏချာရွဉ်၊ အနီꩻအရင်ꩻလဲ့ အာအတွိုင်ꩻ ဖေႏကယိန်းအာအာထဲင်းနဝ်ꩻ အဝ်ႏတဆ ထွဉ်ႏနီ၊ အဝ်ႏတဗာႏ အွဉ်ႏပလို့ꩻထဲင်း နီသိုမ်ဗာႏ မဉ်ႏမာꩻလွေꩻနုဲင်းနဝ်ꩻနဝ်ꩻ ကထွာနမ်းဖြားလဲ့ မဉ်လွေꩻလယ်ႏခမ်းလင်နယ်ႏလင်၊ ဒေသန္တရဗဟုသုတဖုံႏလဲ့ အီႏလွေꩻဗာႏနွောင်ꩻနဝ်ꩻသွူ။