ယံထိန်ꩻသိမ်ꩻချာ

"ယံထိန်ꩻသိမ်ꩻချာသွော့ စွိုးခွိုꩻယေန်ႏငဲးမုꩻ" ၂၁-ရျာꩻဗူႏ ကထွိုင်ႏတွိုႏလွဉ်နောဝ်ꩻ ကမ္ဘာႏလောင်းကိုကအောဝ်ႏဒါႏ ဘာႏသာႏငေါဝ်းငွါဖုံႏ၊ ယေန်ႏငဲမုꩻဖုံႏ၊ ဆဲင်ႏရာꩻယွုမ်းအံႏကိုꩻကွယ်ႏမုꩻဖုံႏ၊ ဓလေ့ꩻထွုံꩻဖုံႏယို ရော်ꩻလွဉ်လဲဉ်းဝင်ꩻ ခမ်းထီတွမ်ႏလိုꩻမျိုꩻ နမ်းပဲင်ႏယေန်ႏငဲးမုꩻ၊ နမ်းပဲင်ႏဓလေ့ꩻထွုံꩻစံႏဖုံႏ ဖေႏကထိုꩻမားဗာႏမွိုးနောဝ်ꩻ လိုꩻတွိုင်ꩻစွုမ်ႏဖြာꩻ လိုႏထိန်ꩻသိမ်ꩻချာငါႏဝင်ꩻ ပငါပရာꩻ၊ ယေန်ႏငဲမုꩻယို ထွာလိုꩻမျိုꩻသမဲင်ꩻ၊ ယေန်ႏငဲမုꩻမဉ်ႏထိုꩻမားနောဝ်ꩻ သမဲင်ꩻထိုꩻမား၊ သမဲင်ꩻမဉ်ႏထိုꩻမားနောဝ်ꩻ ခမ်းထီတွမ်ႏလိုꩻမျိုꩻလဲ့ အီႏထိုꩻမားပါနောဝ်ꩻသွူ။ တခေတ်ထွူတခေတ် နီမွိုးဖြားနီဖါဖြားသီး ကအွဉ်ႏကုဲင်ခါꩻဖေႏဒါႏ ယေန်ႏငဲမုꩻအမွီႏဟောဝ်တွမ်ႏသမဲင်ꩻယို နီအီႏလꩻဗာႏသွူ။ ဘာႏသာႏငေါဝ်းငွါ အကွဉ်အကꩻ ဘာႏသာႏရေꩻကိုꩻကွယ်ႏမုꩻ ဂီတအနုပညာႏတွမ်ႏ ဓလေ့ꩻထွုံꩻစံႏဖုံႏယို ထွာယေန်ႏငဲမုꩻလွဉ်းလွဉ်းနောဝ်ꩻသွူ။ အတိတ်တွမ်ႏ ပစ္စုပ္ပန်ႏကာႏလ ယိုငခါ လိုꩻမျိုꩻတမျိုꩻ ကခွုမ်မာꩻလွဉ်တွော့ꩻ မော့ꩻဗာႏ၊ ထီႏဗာႏ ဘဝအဟောဝ်အကုဲင်အလောင်း ထာꩻသေထာꩻလိမ္မာႏဖုံႏနောဝ်ꩻ ထွာလွဉ်လိုꩻမျိုꩻတမျိုꩻ ယေန်ႏငဲမုꩻသွူ။ ယေန်ႏငဲမုꩻနောဝ်ꩻ အောဝ်ႏ(၂)မျိုꩻ၊ တမျိုꩻနောဝ်ꩻ ရုတ်ဖဲ့ꩻဆဲင်ႏရာꩻယေန်ႏငဲမုꩻ၊ တမျိုꩻနောဝ်ꩻ "သꩻ(နာမ်ႏ)"ဖဲ့ꩻဆဲင်ႏရာꩻ ယေန်ႏငဲမုꩻနောဝ်ꩻသွူ။ ကွပ်စွဉ်ႏခေတ်အောဝ်ႏပြောင်ꩻလွဉ် ခေတ်အောဝ်ႏတိုꩻတက်လွဉ်တဲင် နေင်ႏပေါင်ꩻကထွိုင်ႏညဆွာꩻလွဉ်နောဝ်ꩻ လိုꩻမျိုꩻမုဲင်ꩻယေန်ႏငဲမုꩻတယောဝ်း သဘာဝထွုံႏစံႏအလꩻ အပြောင်ꩻထိုꩻဒါႏ၊ အထိုꩻမားဒါႏဒျာႏရင်ꩻ၊ ၂၁-ရျာꩻစုဗူႏ ကထွိုင်ႏတွိုႏလွဉ်၊ ကထွိုင်ႏနွို့လွဉ်နောဝ်ꩻ ပြောင်ꩻလယ်ꩻမုꩻ ယိန်းမွိုင်မွိုင်ထဲင်း၊ ယိုခါ ခမ်းထန်ႏ(နဲင်ႏငံႏချာꩻ) ယေန်ႏငဲမုꩻကထွာဒါႏ အအူအဒုံႏဖုံႏ၊ အသုံꩻအဆောင်ႏဖုံႏ၊ အကွဉ်အကꩻဖုံႏ နွို့ဒို့ꩻတခြို့လွဉ်တဲင် မြန်မာခမ်းကိုကအောဝ်ႏဒါႏ လိုꩻမျိုꩻဖုံႏနောဝ်ꩻ လိုꩻမျိုꩻအလွောက်ꩻ နမ်းပဲင်ႏယေန်ႏငဲမုꩻ ကွဲးထိုꩻမားမားလဲဉ်း တလဲင်ႏတစိꩻစိꩻနောဝ်ꩻသွူ။ နောဝ်ꩻမꩻ ဖူးဝေးမန်းလိုꩻမျိုꩻနောဝ်ꩻ ငမ်းသꩻငါႏဝွေꩻသီးလိုꩻမျိုꩻ သမဲင်ꩻတွမ်ႏ ယေန်ႏငဲမုꩻထိုꩻမားထိုꩻမဲင် တနေင်ႏတလဲင်ႏ နဲင်ႏငံႏတောႏအတန်အကဲႏ အောဝ်ႏမာꩻလွေꩻဖေႏ ရွစ် ကျူႏ တဲမ်း ဒုံႏခေးပြဲင်ႏပွယ်ꩻ၊ ကမာꩻဒါႏခေးပြဲင်ႏပွယ်ꩻယို လိုꩻပေႏကဝါႏသနာႏဒါႏ အရွစ်ဖဲ့ꩻလဲ့ နွို့ခေးပြဲင်ႏလွေꩻ အရွစ်ဖဲ့ꩻ၊ ကဝါႏသနာႏဒါႏ အကျူႏဖဲ့ꩻလဲ့ ခေးပြဲင်ႏလွေꩻအကျူႏဖဲ့ꩻ၊ ကဝါႏသနာႏဒါႏ အတဲမ်းဖဲ့ꩻလဲ့ နွို့ခေးပြဲင်ႏလွေꩻအတဲမ်းဖဲ့ꩻ၊ ကဝါႏသနာႏဒါႏ အဒုံႏအအူဖဲ့ꩻလဲ့ နွို့ခေးပြဲင်ႏလွေꩻ အဒုံႏအအူဖဲ့ꩻ၊ လိုꩻပေႏကနွို့ခေးပြဲင်ႏဒါႏ ရွစ်၊ ကျူႏ၊ တဲမ်း၊ ဒုံႏသားဖုံႏယို စွန်ꩻထီကအောဝ်ႏဒါႏ လိုꩻပေႏဖုံႏနောဝ်ꩻ နဲင်ႏငံႏတောႏအတန်အကဲႏ ဖေႏအပ်လွေꩻဖေႏ လိုꩻစွန်ꩻထီထင်ဆုꩻနောဝ်ꩻသွူ။ နီပအိုဝ်ႏလိုꩻမျိုꩻသမဲင်ꩻတွမ်ႏ ယေန်ႏငဲမုꩻ ဖေႏကထိုꩻမားဗာႏမွိုန်းနောဝ်ꩻ တနေင်ႏတလဲင်ႏ ဆဲင်ႏရာꩻတာႏဝွန်ႏအောဝ်ႏပုဂ္ဂိုလ်ႏလိုꩻတန် မဉ်ႏအွဉ်မာꩻဖေႏ ရွစ်၊ ကျူႏ၊ တဲမ်း၊ ဒုံႏနောဝ်ꩻ ကထွာဒါႏ ခွိုꩻသွုပ်တသာလိုꩻပေႏဆꩻလယို အီႏသေထွꩻချာ နီပအိုဝ်ႏလိုꩻမျိုꩻ အသမဲင်ꩻတွမ်ႏ ယေန်ႏငဲမုꩻအကျောင်ꩻခရာႏဖုံႏ၊ မဉ်ႏသေထွꩻချာ နီပအိုဝ်ႏသမဲင်ꩻတွမ်ႏ ယေန်ႏငဲမုꩻအကျောင်ꩻအခရာႏမꩻ သꩻမဲဉ်ထိန်ꩻသိမ်ꩻချာ နီစွိုးခွိုꩻယေန်ႏငဲမုꩻ သꩻပေါꩻလွဉ်နောဝ်ꩻသွူ။ နောဝ်ꩻမꩻ ခွိုင်းယိုမာꩻငါ ကထွာဒါႏ ခွိုꩻသွုပ်တသာလိုꩻပေႏဆꩻလသားဖုံႏ အောဝ်ႏလိုႏထောင်ထွားစဲင်းစဲင်းလဲဉ်း နီပအိုဝ်ႏလိုꩻမျိုꩻ အကျောင်ꩻခရာႏဖုံႏ၊ နီပအိုဝ်ႏလိုꩻမျိုꩻ ဇာႏတိအရွီးအခိုႏဖုံႏ၊ နီပအိုဝ်ႏယေန်ႏငဲမုꩻဖုံႏ၊ အောဝ်ႏလိုႏထိန်ꩻသိမ်ꩻဟောဝ်ဟောဝ်ငါႏ နီပအိုဝ်ႏလိုꩻမျိုꩻနမ်းပဲင်ႏယေန်ႏငဲမုꩻ၊ ယေန်ႏငဲမုꩻမဉ်ႏတဉ်ႏခွေါင်တောဝ်းနောဝ်ꩻ မဲ့ꩻယေန်ႏငဲမုꩻအေလောင်ႏအလင် အီႏနွို့ဒို့ꩻတခြို့သော့ꩻ နီလိုꩻမျိုꩻယေန်ႏငဲမုꩻအလောင်းသွူ။ ယေန်ႏငဲမုꩻ မဉ်ႏတဉ်ႏခွေါင်မꩻ ဇာႏတိသွီႏ ဇာႏတိမာန်ႏတွမ်ႏ ရက်ခွိုꩻ"သꩻ"ဓာတ်အီႏအာႏတလာလွဉ်၊ နီယေန်ႏငဲမုꩻ ဖေႏကအောဝ်ႏမွန်ဗန်တသေႏသေႏ၊ ဖေႏကအောဝ်ႏတဉ်ႏခွေါင်တသေႏသေႏတွမ်ႏ နီလိုꩻမျိုꩻဖေႏကထိုꩻမားဗာႏမွိုန်းနောဝ်ꩻ ရက်ခွိုꩻပအိုဝ်ႏ လိုꩻမျိုꩻကားကအောဝ်ႏ သမဲင်ꩻဖေႏတာႏဝွန်ႏအောဝ်ႏအကျောင်ꩻ ဒင်ႏပျꩻလွေꩻဗာႏ တွမ်ႏရွမ်ဖြုဲင်ꩻယိုနောဝ်ꩻသွူ။