ယံထိန်ꩻသိမ်ꩻချာသွော့

'"ယံထိန်ꩻသိမ်ꩻချာသွော့ စွိုးခွိုꩻယေန်ႏငဲရေꩻ"' ကမ္ဘာႏလောင်းကိုကအောဝ်ႏဒါႏ လိုꩻမျိုꩻဖုံႏနောဝ်ꩻ လိုꩻမျိုꩻပငါပရာꩻ နမ်းယေန်ႏငဲးရေꩻ အောဝ်ႏလွဒျာႏဝင်ꩻ ပငါပရာꩻ၊ နေင်ႏပေါင်ꩻအာ လာပေါင်ꩻည ကလဲဉ်းခိုႏချာ မဟာမစာႏ နီမွိုးဖြားဖါဖြားသီး အွဉ်ႏကုဲင်သေꩻခါꩻဖေႏ ယေန်ႏငဲမုꩻအမွီႏဟောဝ်တွမ်ႏ သမဲင်ꩻတဲင် နီလꩻလွဉ်ဗာႏနောဝ်ꩻသွူ။ ဘာႏသာႏငေါဝ်းငွါ အကွဉ်အကꩻ၊ ဘာႏသာႏကိုꩻကွယ်ꩻမုꩻ ဂီတအနုပညာႏတွမ်ႏ ဓလေ့ꩻထွုံꩻစ့ႏဖုံႏယို ထွာဒျာႏယေန်ႏငဲမုꩻလွဉ်းလွဉ်း၊ ယေန်ႏငဲမုꩻမဉ်ႏအဲဉ်ထောဝ်းနောဝ်ꩻ တွမ်ႏလိုꩻမျိုꩻတအဲဉ်ထောဝ်းနောဝ်ꩻ ပီပီဝင်ꩻ၊ ယေန်ႏငဲမုꩻမဉ်ႏတဉ်ႏခွေါင်မꩻ လိုꩻမျိုꩻလဲ့ အီႏတဉ်ႏခွေါင်၊ ယေန်ႏငဲမုꩻ မဉ်ႏထိုꩻမားနောဝ်ꩻ လိုꩻမျိုꩻပါထိုꩻမားဒါႏနောဝ်ꩻသွူ။ ယေန်ႏငဲမုꩻနောဝ်ꩻ အောဝ်ႏ(၂)မျိုꩻ၊ ရုတ်ဖဲ့ꩻဆဲင်ႏရာꩻ ယေန်ႏငဲမုꩻတွမ်ႏ 'သꩻ'(နာမ်ႏ)ဖဲ့ꩻဆဲင်ႏရာꩻ ယေန်ႏငဲမုꩻနောဝ်ꩻသွူ။ လိုꩻမျိုꩻတမျိုꩻ အကွဉ်အကꩻ၊ တခြိုꩻတလေင်ꩻ၊ အခြွိုင်းအခြိုꩻ လမ်းပါႏဖုံႏနောဝ်ꩻ ထွာရုတ်ဖဲ့ꩻဆဲင်ႏရာꩻ ယေန်ႏငဲမုꩻ၊ အအုံအအောဝ်ႏ၊ အဒေါ့ꩻအဖြောဝ်ႏ သꩻသꩻဘော်ꩻထာꩻယွုမ်းအံႏ၊ ထာꩻကိုꩻကွယ်ႏမုꩻဖုံႏယို ထွာသꩻဖဲ့ꩻဆဲင်ႏရာꩻ ယေန်ႏငဲမုꩻနောဝ်ꩻသွူ။ အကွဉ်အကꩻ အခြွိုင်းအခြိုꩻဖုံႏ ဘာႏသာႏကိုꩻကွယ်ႏမုꩻဖုံႏ၊ တယ်ႏဒုံတယ်ႏဆောင်ႏဖုံႏ၊ အုပ်ချွုတ်ရေꩻတွမ်ႏ တရာꩻစီႏရင်ႏနယ်ꩻဖုံႏ၊ ဗော့ꩻဖူးဗော့ꩻဝေး ရော့ꩻစွိုးရော့ꩻခွိုꩻဖုံႏ၊ ဖန်းဖြယ်အမွီႏဖုံႏ၊ ဟဲ့ꩻဖန်ဖေႏအမဉ်ꩻဖုံႏ၊ သွဉ်ပညာႏနယ်ꩻဖုံႏ၊ ပွယ်ꩻလူႏပွယ်ꩻတန်ꩻဖုံႏ၊ မူႏနံꩻခိုဗင်ႏဘဝဖုံႏ၊ ပွယ်ꩻခဲဉ်းလူႏ ပွယ်ꩻမင်္ဂလာႏစေနေင်းယာဖုံႏ၊ အအံႏအအွꩻဖုံႏ၊ တမာဝါꩻ အွဉ်ႏကုဲင်ဝင်ꩻအခရာႏဖုံႏ၊ ငေါဝ်းသချင်ꩻဖုံႏယို ဆရာႏတန်ဟဲစ်ကဲစ် ကတဲမ်းထန်ႏဒါႏ (ပအိုဝ်းလူမျိုးအကြောင်း)လိတ်စောင်ႏတွမ်ႏ (အင်းလေး) မောင်ခွန်နွယ် ကတဲမ်းဒါႏ (ပအိုဝ်း)လိတ်စောင်ႏကိုဖုံႏနောဝ်ꩻ ပအိုဝ်ႏလိုꩻမျိုꩻ ယေန်ႏငဲရေꩻအခရာႏ အောဝ်ႏပါသော့ꩻစွုမ်ႏနောဝ်ꩻသွူ။ ခွိုင်းယိုမာꩻငါ နီပအိုဝ်ႏလိုꩻမျိုꩻ ယေန်ႏငဲရေꩻဖေႏကထိုꩻမားဗာႏမွိုန်းနောဝ်ꩻ ကထွာဒါႏ ပအိုဝ်ႏခေတ်ပညာႏဒါႏသား ခွိုꩻသွုပ်တသာဖုံႏ အောဝ်ႏလိုႏထောင်ထွားစဲင်းစဲင်းလွေꩻ ပအိုဝ်ႏလိုꩻမျိုꩻအကျောင်ꩻခရာႏဖုံႏ၊ ဇာႏတိအရွီးအခိုႏဖုံႏ၊ ယေန်ႏငဲမုꩻဖုံႏသွူ။ အောဝ်ႏလိုႏထိန်ꩻသိမ်ꩻဟောဝ်ဟောဝ်ငါႏ နီပအိုဝ်ႏလိုꩻမျိုꩻ နမ်းပဲင်ႏယေန်ႏငဲမုꩻ အကဲဉ်အဗဲ့ꩻတွမ်ႏ ဝိသေသလက္ခဏာႏဖုံႏ၊ နီယေန်ႏငဲမုꩻ မဉ်ႏတဉ်ႏခွေါင်တောဝ်းနောဝ်ꩻ မဲ့ꩻလိုꩻမျိုꩻလင် ယေန်ႏငဲမုꩻ လွဉ်ဒို့ꩻတခြို့ထိုꩻ နီယေန်ႏငဲမုꩻသွူ။ ယေန်ႏငဲမုꩻ မဉ်ႏတဉ်ႏခွေါင်မꩻ ဇာႏတိသွီႏ ဇာႏတိမာန်ႏ သꩻရက်စွိုးခွိုꩻ အာႏအီႏတလာလွဉ်နောဝ်ꩻသွူ။ အထူꩻမဲဉ်ဖေႏသတိꩻငါႏ တစွိုးနောဝ်ꩻ ၂၇-၈-၂၀၁၆ နီꩻ ခမ်းပေါင်ꩻဗူႏငိမ်ꩻချံꩻရေꩻအတာႏ ကမာꩻလွေꩻဒါႏ (၂၁)ရျာꩻစု ပင်ႏလုံ-ပွယ်ꩻအုံကွံ ဒဲဉ်သီႏဗွေကွင်ꩻ ဒဲဉ်သီႏဗွေဟော်တန်ကို စွိုးခွိုꩻခေါင်းဆောင်တန် အဂ္ဂမဟာသီရိသုဓမ္မ မဏိဇောတဓရ၊ ဝဏ္ဏကျော်ထင် ဖြားတန်စင်ꩻဖါအောင်ႏခမ်းထီငေါဝ်း ဩဝါဒကိုအလꩻ ထွဉ်ႏဟွိုန်သေꩻခါꩻ ငေါဝ်းတစွိုးနောဝ်ꩻ "ခွိုင်းယိုမာꩻငါ ပအိုဝ်ႏလိတ်လုဲင်ꩻ ဖေႏကထိုꩻမားဗာႏမွိုန်းနောဝ်ꩻ ပုဂ္ဂိုလ်ႏတဖြာꩻအနေႏ တရိုꩻတောဝ်း၊ နေးတွမ်ႏအမျာꩻအနေႏတရိုꩻတောဝ်း မဉ်ႏတယ်ႏလူႏ ဗွေႏဗွန်ကျောင်ꩻ၊ တရွပ်၊ တရေႏအိန်ႏ၊ ထီအုံႏ၊ ထီတွိုက်၊ ထီနောင်၊ စေႏတီႏဖုံႏတရိုꩻတောဝ်း ကအီႏတဲမ်းဒပ်ꩻဒင်ႏဒါႏ အလူႏတကာႏမဉ်ꩻတွမ်ႏ လူႏသော့ꩻရွဉ်ဆေ့ꩻအာ ပါတွမ်ႏကအီႏတဲမ်းဒါႏလိတ် မွူးနီꩻစွယ်ꩻဖုံႏယို ယံတဲမ်းဒျာႏသွော့ တွမ်ႏလိတ်ပအိုဝ်ႏ၊ မဉ်ႏတဲမ်းဒုံမဉ်ꩻတဲ့နောဝ်ꩻ၊ မာꩻစွဉ်ႏပွယ်ꩻအမျိုꩻမုဲင်ꩻတယောဝ်း မဉ်ႏတွယ်ႏလိတ်ဖစ်လိတ်ပင်ꩻနောဝ်ꩻ အွဉ်ႏတန်ႏဖိုꩻချာ နီလိုꩻမျိုꩻလိတ်တဲင် ယံတဲမ်းဖေႏဒျာႏသွော့ တွမ်ႏလိတ်ပအိုဝ်ႏအကျောင်ꩻ"ထွဉ်ႏဟွိုန်သေꩻခါꩻနုဲင်းနောဝ်ꩻသွူ။ စွိုးခွိုꩻခေါင်းဆောင်တန် ကထွဉ်ႏဟွိုန်သေꩻခါꩻအတွိုင်ꩻ ကအီႏဖောႏလွေꩻအနမ်းအခြုံနောဝ်ꩻ နီနာꩻဖုံႏတာႏဝွန်ႏအောဝ်ႏတဲင် ခွိုင်းယိုမာꩻငါ မာꩻထာꩻမာꩻအမျိုꩻမုဲင်ꩻတယောဝ်း စူꩻယိုꩻမွိုန်းထာꩻ၊ အွဉ်ႏမွိုန်းတောဝ်း သꩻထာꩻတယောဝ်း၊ ခေါင်းဆောင်တန်ကအွဉ်ႏနယ်ဒါႏ အနယ်ꩻဟောဝ်တဖူꩻအတွိုင်ꩻ ခွိုꩻရက်သꩻဓာတ်ကအောဝ်ႏဒါႏ ပအိုဝ်ႏလိုꩻမျိုꩻကားကအောဝ်ႏ ယံလွောက်ꩻနာႏဖေါႏလွေꩻဖေႏသွော့ အနမ်းအခြုံနောဝ်ꩻသွူ။ နီပအိုဝ်ႏလိုꩻမျိုꩻနောဝ်ꩻ ထူႏဒါႏတောဝ်း အခွင်ꩻအရေꩻနုဲင်းလိုꩻမျိုꩻလင်၊ ပအိုဝ်ႏလိုꩻမျိုꩻနောဝ်ꩻ မာꩻထာꩻမာꩻအမျိုꩻမုဲင်ꩻတယောဝ်း ထာꩻတယောဝ်းသꩻနောဝ်ꩻ အာငါႏ၊ ကွပ်လွူးသꩻထာꩻတယောဝ်း၊ ထာꩻစူꩻယိုꩻတဲင် အဆုဲင်ꩻသွတ်ꩻ ထွာထိုꩻဒါႏ လိုꩻမျိုꩻလင်တပဲ့ꩻ၊ လိုꩻမျိုꩻလင်နောဝ်ꩻ လက်ꩻတဲ့လက်ꩻ၊ ထူႏအခွင်ꩻအရေꩻလဲ့ဒါႏ၊ ထွားမွိုန်းအလင် ဝေင်ꩻကိုကအောဝ်ႏဒါႏ ခယ်ႏလိုꩻမျိုꩻကျောင်ꩻ၊ လမ်း၊ ဆဲင်ႏဖုံႏနောဝ်ꩻ တဲမ်းဗွို့ꩻသေꩻခါꩻတွမ်ႏ ခယ်ႏလိတ်လွဉ်းလွဉ်း၊ ဥပမာႏထဲင်းတစွိုးနောဝ်ꩻ စင်္ကာပူဆရာႏတောႏ ကလွဉ်လူႏဒါႏ ဘုရာꩻမွေႏတောႏကက္ကူႏနောဝ်ꩻ ဝွေꩻသီးကတဲမ်းဗွို့ꩻခါꩻဒါႏ အလူႏဗွေႏမဉ်ꩻတွမ်ႏ ရွဉ်လို့ဆေ့ꩻအာနောဝ်ꩻ တဲမ်းဒျာႏတွမ်ႏခယ်ႏလိတ်၊ ဝင်ꩻတတဲမ်းတောဝ်း တွမ်ႏလိတ်အင်္ဂလိပ်၊ လိတ်မန်း၊ လိတ်ပအိုဝ်ႏကရိုꩻနောဝ်ꩻ ပအိုဝ်ႏလိုꩻမျိုꩻ ဟောဝ်အွဉ်ႏသတိꩻငါႏနောဝ်ꩻသွူ။ ဟန်ႏနီꩻယိုမာꩻငါ ပအိုဝ်ႏလိုꩻမျိုꩻ ဖေႏကထင်ႏသျာꩻလွဉ်နောဝ်ꩻ ဝေင်ꩻပေႏဝေင်ꩻတန်ကို ကအောဝ်ႏဒါႏ ပအိုဝ်ႏပွယ်ꩻစာꩻရွဉ်သားဖုံႏ မဉ်ႏဗွောင်ပွယ်ꩻယွုံႏတရိုꩻတောဝ်း၊ ဆဲင်ႏအမျိုꩻမုဲင်ꩻတရိုꩻတောဝ်း ဆဲင်ႏဆိုင်းဘုတ်လောင်းနောဝ်ꩻ ယံတဲမ်းဗွို့ꩻပါ ပအိုဝ်ႏအလံႏတောႏပွုံႏ၊ ဆဲင်ႏမဉ်ꩻလဲ့ ယံဖန်ႏတဲမ်းဖေႏသွော့ တွမ်ႏလိတ်ပအိုဝ်ႏအကျောင်ꩻ နေးတွမ်ႏသꩻရက်ခွိုꩻတဲင် တဲမ်းလွေꩻဖေႏဗာႏ ရွမ်ဖြုဲင်ꩻယိုနောဝ်ꩻသွူ။