လိုꩻယွဲးတွမ်ႏယေန်ႏငဲးရေꩻ

"လိုꩻယွဲးတွမ်ႏယေန်ႏငဲးရေꩻ" "ယေန်ႏငဲးရေꩻ"ကရိုꩻနဝ်ꩻ ကင်ꩻထိုꩻတွမ်ႏလိုꩻသီးတွော့ꩻ အဝ်ႏခေါ်ဒျာႏတမွေးတဝ်း၊ အခင်ႏမွဉ် အ၀်ႏလိုꩻသီးအုံအဝ်ႏမုꩻစနစ်၊ လိုꩻသိးအုံခြွိဉ်းဆွိုင်ꩻလွဝင်ꩻကိုတွော့ꩻ ပေါႏလွဉ်ထဲင်းယင်းတရန်းနုဲင်းနဝ်ꩻဒျာႏသွူ၊ နဝ်ꩻမꩻ လိုꩻတွမ်ႏယေန်ႏငဲးမုꩻယို ဖခေါ်လို့ဝင်ꩻ တလꩻနွောင်ꩻတဝ်း၊ ပေါႏယေန်ႏငဲးရေꩻထိုꩻမားလဲ့ လိုꩻမျိုꩻလဲ့ လိုꩻမားပါဒါႏ-ကရိုꩻဒါႏထာꩻသေယို လိုꩻတွိုင်ꩻခံႏထူႏ၊ လိုꩻတွိုင်ꩻသေနာႏခါꩻလွနုဲင်းနဝ်ꩻဖုံႏသွူ။ ကွပ်နဝ်ꩻမꩻ လိုꩻမျိုꩻအစွိုးစွိုး အဒဝ်ႏဒဝ်ႏဖုံႏ အဝ်ႏထိန်ꩻသိမ်ꩻလွေꩻလွ ယေန်ႏငဲးရေꩻ၊ ရဲးရဲပ်လွဝင်ꩻဖုံႏ၊ ဆို့ꩻတဲႏမွဉ်းဖျင်ထွူတွော့ꩻ ဖေႏနေးကပွါꩻလွဉ်လဲ့ အဝ်ႏယူႏအဝ်ႏကျမ်ႏ အဝ်ႏခွုမ်မာꩻလွဝင်ꩻဖုံႏ၊ ယေန်ႏငဲးရေꩻ-ကရိုꩻနဝ်ꩻ ဝွေꩻတွမ်ႏဝွေꩻ ခွုမ်မာꩻချာဒျာႏ၊ တရွို့ꩻလွေꩻငါဒျာႏ၊ ပြောင်ꩻလုဲင်ႏမွဉ်းဖျင်ချာဒျာႏနဝ်ꩻ တအဲဉ်ထဝ်း၊ အဝ်ႏဒျာႏလိုꩻသီး ကထေထန်ႏခွုမ်မာꩻဖေႏ၊ ကရုဲင်ꩻတသွိုးဖေႏ၊ ဖေႏနေးကထွာ အပြောင်ꩻအလုဲင်ႏ အမွဉ်းဖျင်နဝ်ꩻ ခွုမ်မာꩻလွဖေႏဗာႏ ယေန်ႏငဲးရေꩻနုဲင်းနဝ်ꩻလွုမ်ꩻသွူ။ ယေန်ႏငဲးရေꩻကရိုꩻနဝ်ꩻ အပုံႏအငုဲင်ꩻယေန်ႏငဲး၊ အဒေါ့ꩻအဖြဝ်ႏယေန်ႏငဲး၊ အွဉ်ႏသꩻယေန်ႏငဲးဖုံႏ အဝ်ႏပါသော့ꩻငီꩻ၊ ယေန်ႏငဲးရေꩻယို လိုꩻသီးကဖန်ဆင်ꩻခါꩻဒါႏ လိုꩻမုꩻရေꩻ အသောင်အရင်ꩻ ကေားကအုံအဝ်ႏ ရုဲင်ꩻတသွိုးဖိုဒါႏ အသောင်အရင်ꩻနဝ်ꩻကိုသား ကအွဉ်ႏစုခြွဉ်းသေꩻခါꩻဖေႏဒါႏ ထာꩻသေဉာဏ်ႏ၊ ဗဟုသုတ၊ ခွုမ်မာꩻနယ်ꩻလွုမ်ꩻတကာႏတဝ်း ကားတဲင် လိုꩻဘောင်ႏအစွိုꩻအဗူႏတန် ကထိုမ်ႏစုသေꩻခါꩻဖေႏဒါႏ ယူႏကျမ်ႏ'ရမ်ꩻတွက်ဒျာႏ ဆဲင်ႏရာꩻရုပ်အခဝ်' ဆဲင်ႏရာꩻသꩻအကွို့ꩻ အချက်အရန်းရန်းဖုံႏယို ဟဲ့ꩻဗာႏ"ယေန်ႏငဲးရေꩻ"နဝ်ꩻသွူ။ "ယေန်ႏငဲးရေꩻ"ကရိုꩻနဝ်ꩻ ထွာဒျာႏ လိုꩻသီးနမ်းရင်ꩻ ကဖန်ဆင်ꩻဒါႏ သဘာဝအသောင်အရင်ꩻကို အကွို့ꩻအခဝ်တဗာႏဒျာႏ၊ ယေန်ႏငဲးရေꩻကရိုꩻနဝ်ꩻ ထွာဒျာႏအနယ်ꩻတဲႏဆို့ꩻမွဉ်းဖျင်အီ လိုꩻမျိုꩻတမျိုꩻသီးဘဝ အပုံႏစံႏတန်သွူ၊ လိုꩻဘောင်ႏအစွိုꩻအဗူႏအကိုယို လိုꩻသီးကသွုပ်ဆွိုက် ကအုံအဝ်ႏ ကအံႏအွꩻ ကရုဲင်ꩻတသွိုးဒါႏ အပုံႏစံႏနဝ်ꩻ ထွာဒျာႏလိုꩻသီးယေန်ႏငဲးရေꩻစနစ်နဝ်ꩻသွူ၊ ယေန်ႏငဲးရေꩻယို မဉ်ႏဒေါ့ꩻဒွေါင်ႏဒွေါင်ႏဖြွောင်ႏဖြွောင်ႏနဝ်ꩻ ဟဲ့ꩻဗာႏ "လိုꩻမျိုꩻတမျိုꩻသီး ဘဝပုံႏစံႏ"နုဲင်းနဝ်ꩻ၊ ယေန်ႏငဲးရေꩻ-ကရိုꩻနဝ်ꩻ လိုꩻကခံႏနွမ်ꩻဒါႏ ဝင်ꩻလိုꩻမျိုꩻယေန်ႏငဲးရေꩻသားနဝ်ꩻမꩻ ထွာယေန်ႏငဲးရေꩻမွေးမွေးနဝ်ꩻသွူ။ ယေန်ႏငဲးရေꩻ-ကရိုꩻနဝ်ꩻ ထွာဒျာႏကေားကအဝ်ႏစပ်ဆွိုင်ꩻတွမ်ႏ လိုꩻအစွိုꩻအဗူႏသား တဖြာꩻဖြာꩻ အထာꩻသေဉာဏ်ႏ၊ ထာꩻယွုမ်းအံႏ၊ အနုပညာႏ၊ အအွဉ်ႏသꩻ၊ တရာꩻဥပဒေႏတွမ်ႏ ဓလေ့ꩻထုံꩻစံႏ-စတဲင်နုဲင်းနဝ်ꩻဖုံႏသွူ၊ ယေန်ႏငဲးရေꩻယို ကင်ꩻထိုꩻတွမ်ႏလိုꩻသီး၊ လိုꩻသီးခင်ႏလမ်းအုံ(လမ်းပါႏ)ဖုံႏတလꩻတဝ်းတဲင် အဝ်ႏဆွိုင်ꩻဒွန်တွယ်ꩻသေႏသေႏဗာႏလို့ဝင်ꩻကရိုꩻနဝ်ꩻ သေထွꩻနွောင်ꩻဒျာႏနဝ်ꩻသွူ။ ယေန်ႏငဲးရေꩻကို မဉ်ႏထွားနေးလိုꩻအနေႏလဲ့ အွိုးအတိတ်ကာႏလတွင်ꩻ ဘာႏသာႏငဝ်းငွါ၊ ထာꩻသေဉာဏ်ႏ၊ ထာꩻယွုမ်းအံႏဓလေ့ꩻထုံꩻစံႏ၊ အနုပညာႏ၊ အအွဉ်ႏသꩻ၊ စီꩻကန်ꩻဥပဒေႏဖုံႏတဲ့သင်၊ အဝ်ႏဖါဖြားသီးဖါတဲင် လင်ꩻလဖါဖြား၊ အဝ်ႏဖါဖြားတဲင် လင်ꩻလဖါ၊ အဝ်ႏဖါတဲင် လင်ꩻလပို၊ အဝ်ႏပိုတဲင် လင်ꩻလလီꩻ၊ အဝ်ႏလီꩻတဲင် တွိုႏလွဉ်စွဉ်ႏလင်ꩻ- အဝ်ႏတဖြာꩻ ပြောင်ꩻလွေꩻတငါငါ တဖြာꩻအထျꩻတွော့ꩻ ကခံႏထူႏသွုပ်လွေꩻ တရန်းထွူတရန်းနုဲင်းနဝ်ꩻသွူ။ ယေန်ႏငဲးရေꩻ အဓိပ္ပါယ်ႏအဒွေါင်ႏသွတ်ꩻနဝ်ꩻ ထွာဟဲ့ꩻရိုꩻဗာႏ လိုꩻသီးထာꩻသက်သာႏ၊ တခြင်ဖွီ၊ အချင်ꩻချင်ꩻထာꩻသေနာႏတွမ်ႏ နမ်းသꩻဖေႏကချမ်ꩻသာႏအီတာႏ လိုꩻသီးနမ်းရင်ꩻ ကဖန်ဆင်ꩻသေꩻခါꩻဒါႏ ထာꩻရာꩻဖုံႏနဝ်ꩻသွူ၊ ငဝ်းငွါ၊ လိတ်လုဲင်ꩻ၊ အခြွိုင်းအဆင်အကွဉ်ကꩻ၊ ယွုမ်းအံႏဘာႏသာႏ၊ ဂီတအနုပညာႏတွမ်ႏ ဓလေ့ꩻထုံꩻစံႏ-စတဲင်ဖုံႏနဝ်ꩻ ထွာဒျာႏလိုꩻသီးနမ်းရင်ꩻ ဖန်ဆင်ꩻသေꩻခါꩻ ထာꩻရာꩻဖုံႏဒျာႏရင်ꩻတဲင် အဝ်ႏပါသော့ꩻငီꩻ ယေန်ႏငဲးရေꩻကိုနဝ်ꩻသွူ။ ကမ္ဘာႏလောင်းကိုယို ယေန်ႏငဲးရေꩻတအဲဉ်ထဝ်းလိုꩻမျိုꩻနဝ်ꩻ တအဝ်ႏနွောင်ꩻတဝ်း၊ လိုꩻမျိုꩻတွိုင်ꩻသီး ဝွေꩻယေန်ႏငဲးရေꩻတွမ်ႏဝွေꩻ အဝ်ႏလွဗာႏအမန်ႏရင်ꩻ၊ ကလွူꩻထွား လိုꩻမျိုꩻတမျိုꩻသီး ယေန်ႏငဲးရေꩻတွင်ꩻနဝ်ꩻ ယာႏယီႏအနေႏ လိုႏအွဉ်ႏဗဉ်ႏသေꩻခါꩻ စွိုးခွိုꩻရေꩻသꩻဓာတ်သွူ၊ ကထိုမ်ႏနပ်စမ်ꩻဒါႏ လိုꩻမျိုꩻတမျိုꩻယေန်ႏငဲးရေꩻတွင်ꩻနဝ်ꩻ အုံသော့ꩻလိုꩻမျိုꩻနဝ်ꩻသီးခင်ႏလမ်းကိုထွူတဲင် အဝ်ႏလိုႏလွူꩻအီဒျာႏ တွမ်ႏလိုꩻမျိုꩻနဝ်ꩻသား ထာꩻထီႏအနေႏနဝ်ꩻသွူ။ ယေန်ႏငဲးရေꩻနဝ်ꩻ အဝ်ႏဒင်ႏတထွူဒျာႏ အသောင်အရင်ꩻ အခေႏအနေႏလောင်း၊ အသောင်အရင်ꩻနဝ်ꩻ အဝ်ႏဖန်ဆင်ꩻဖေႏ ယေန်ႏငဲးရေꩻသီး အဆင်းအရန်း၊ ယေန်ႏငဲးရေꩻကို အတန်သွတ်ꩻအချက်နဝ်ꩻ လိုႏပယ်ႏထိုꩻတဝ်း ထုံꩻပွိုင်းလဲင်ႏသွူ၊ ပစ္စုပ္ပန်ႏယို အခင်ႏယန် အဝ်ႏဒင်ႏအတိတ်လောင်း၊ အနာႏဂတ်လဲ့ အခင်ႏယန် အဝ်ႏဒင်ႏယင်းဒျာႏ ပစ္စုပ္ပန်ႏလောင်းယိုနေနေ၊ ဖောႏထန်ႏထိုမ်ႏရောမ် အွဉ်ႏဟဝ်သေꩻခါꩻ ယေန်ႏငဲးရေꩻကရီးခါ အစွိုးစွိုးအဒဝ်ႏဒဝ်ႏထွူတဲင် မာꩻအီအခင်ႏမွဉ်နဝ်ꩻတွော့ꩻ မဉ်ႏမွဉ်းဖျင် ပြောင်ꩻလုဲင်ႏလွေꩻဖေႏနဝ်ꩻ ယေန်ႏငဲးရေꩻယို ဗိမ်ပြေ့ꩻထိုꩻဗာႏတဝ်း၊ အဝ်ႏတသာလွေꩻ တသာလွေꩻသေႏသေႏတဲင် ထင်ႏထိုလဲဉ်းလဲ့ ကယိန်းထင်ႏထိုထဲင်းထဲင်းဗာႏနဝ်ꩻသွူ။ "ယေန်ႏငဲးရေꩻ အဆင်းအရန်း ထိုꩻမွေးစွဉ်ႏဒျာႏ"ကားတဲင် ခမ်းထီနဲင်ႏငံႏ ကမဉ်ထူႏဂုဏ်ႏနုဲင်းနဝ်ꩻသားနဝ်ꩻ အွဉ်ႏနယ်အီလွတွမ်ႏ တဲႏရျာꩻဗူႏခွုင်းမုဲင်ꩻကာႏ' ရေင်ဗူႏခွုင်းမုဲင်ꩻကာႏ အဖါဖြားဖါ-စတဲင် ကအွဉ်ႏကုဲင်ခါꩻဖေႏဒါႏ အမွီႏလီꩻရီးခါ သမဲင်ꩻသက်သေႏဖုံႏနဝ်ꩻသွူ၊ ကွပ်နဝ်ꩻမꩻ ယေန်ႏငဲးရေꩻယို "ဖါဖြားသီးဖါစဲဉ်ႏဆက်ထဲ့တဝ်း အဝ်ႏသုံꩻ၊ အဝ်ႏကျင်ꩻသေႏသေႏလွ၊ တွမ်ႏစာရိတ္တ၊ မွိုးဖါအလွောက်ꩻ၊ ကျင်ꩻထုံꩻစရဲက်၊ အခွိုꩻ၊ ထိန်ꩻပွေါးသျောင်ႏဒျာႏ၊ အယေန်ႏအခြွဉ်း၊ သွꩻခွဟဝ်၊ သက်တန်သူႏတောႏ၊ အထုံꩻနယ်ꩻယို ဗွိုႏအန်ꩻထိုꩻတဝ်း၊ တောင်ꩻကျပ်လွူꩻသွော့"အွဉ်ႏနယ်ခါꩻဖေႏ လောကသာရပျို့ကိုနုဲင်းနဝ်ꩻသွူ။ ယေန်ႏငဲးရေꩻနဝ်ꩻ အဝ်ႏနီမျိုꩻနီစား၊ ယေန်ႏငဲးရေꩻဆဲင်ႏရာꩻရုပ်အကွို့ꩻ၊ ယေန်ႏငဲးရေꩻဆဲင်ႏရာꩻ သꩻအကွို့ꩻအခဝ်-အဝ်ႏနုဲင်းနဝ်ꩻ၊ ယေန်ႏငဲးရေꩻဆဲင်ႏရာꩻ ရုပ်အကွို့ꩻအခဝ်-ကရိုꩻနဝ်ꩻ ခင်ႏလမ်းကအုံအဝ်ႏအီဖုံႏ၊ အခြွိုင်းကွဉ်ကꩻ၊ တခြိုꩻအသုံꩻဆောင်ႏဖုံႏ၊ ကိရိယာႏခြွိုင်းခြဝ်ႏဖုံႏနဝ်ꩻ ပါသော့ꩻလို့နဝ်ꩻသွူ။ ဆဲင်ႏရာꩻသꩻယေန်ႏငဲးရေꩻနဝ်ꩻ သꩻထာꩻယူႏထာꩻစိက္ကူꩻ၊ ထာꩻယူႏထာꩻတွေꩻ ကျမ်ႏစဲႏအနယ်ꩻဖုံႏ၊ အငုဲင်ꩻအကျင်ꩻဖုံႏ၊ ထာꩻအွဉ်ႏတန်ႏဖိုꩻဖုံႏ တွမ်ႏလိုꩻသီးထာꩻဖန်ဆင်ꩻဖုံႏ၊ အက္ခရာႏလိတ်လုဲင်ꩻ အတဲမ်းအကဲစ်ꩻ၊ သိပ္ပံပညာႏ၊ လိုꩻမုရေꩻစနစ်၊ ဥပဒေႏခွဉ်းတဲက် ထာꩻယွုမ်းအံႏကိုꩻကွယ်ႏ-စတဲင် ပါဝင်ႏသော့ꩻနဝ်ꩻသွူ။ ယေန်ႏငဲးရေꩻကို လိုꩻသီးယိုꩻယာႏဓလေ့ꩻဖုံႏ၊ ခွမ်ꩻလိန်ꩻခွမ်ꩻလာꩻဖုံႏ၊ ကဝ်ႏလုဲင်ꩻကဝ်ႏတောက်ꩻအနုပညာႏ၊ အရွစ်အကျူႏ-စတဲင် အနုပညာႏ၊ အတဲမ်းအကဲစ်ꩻ အယူႏအတွေꩻလိတ်လုဲင်ꩻရေꩻရာႏဖုံႏ၊ သိပ္ပံပညာႏဖုံႏတွမ်ႏ ယေန်ႏငဲးရေꩻအလင်ဖုံႏလဲ့ အဝ်ႏပါသော့ꩻသွူ၊ ယေန်ႏငဲးရေꩻသီးအခင်ႏမွဉ် ရုပ်ဝတ္ထုအကွို့ꩻအခဝ်နဝ်ꩻ ထွာဒျာႏ လိုꩻသီးအံႏအွꩻအုံအဝ်ႏရေꩻကရိုꩻဒါႏ စီꩻပွါꩻရေꩻပုံႏသဏ္ဌာန်ႏနဝ်ꩻသွူ။ လိုꩻသီးဘဝ အုံအဝ်ႏတဉ်ႏခြွော့အီတာႏ ကမာꩻထေဒါႏကွန်ႏ အပုံႏစနစ်နဝ်ꩻ ထွာမွဉ်းဖျင်အွဉ်ႏထွော့ဖေႏ ယေန်ႏငဲးရေꩻသီး အပုံႏငုဲင်ꩻအကိုအထန်ႏလက္ခဏာႏသွူ၊ ကမ္ဘာႏလောင်းအထွောင်းထွောင်းကို လိုꩻမျိုꩻအဒဝ်ႏဒဝ်ႏသီး ခွုင်းတဲင်အရီးသွတ်ꩻ မူလယေန်ႏငဲးရေꩻနဝ်ꩻ အခင်ႏမွဉ်အွဉ်ႏဒျာႏ ဆို့ꩻရုဲင်အဒီႏအရာႏထွူ ကထေဒါႏကွန်ႏအလောင်းတွော့ꩻ တဲႏဆို့ꩻလွေꩻနုဲင်းနဝ်ꩻရင်ꩻသွူ။ လိုꩻသီးယေန်ႏငဲးရေꩻတွမ်ႏ လိုꩻသီးအအုံအအဝ်ႏ အဆင်းအရန်း ဖေႏနေးကထင်ႏထိုပြွူႏဖြိုအီတာႏ ပြောင်ꩻလုဲင်ႏဖေႏအထျꩻအထောင်ꩻနဝ်ꩻ ထွာဒျာႏ ဆို့ꩻရုဲင်အဒီႏအရာႏဒျာႏရင်ꩻသွူ၊ ခွုင်းတဲင် လိုꩻသီးယေန်ႏငဲးရေꩻလို့လို့နဝ်ꩻ အထျꩻထျꩻယို ထွာဒျာႏယေန်ႏငဲးရေꩻ အခင်ႏမွဉ်ဒျာႏ ဆို့ꩻရုဲင်ရေꩻထာꩻဒါႏ-ရိုꩻဗာႏနုဲင်းနဝ်ꩻသွူ။ တဲႏစစွဉ်ႏ ကခြွဉ်းဗူႏတဉ်ႏတဉ်ႏခွေါင်ခွေါင်လꩻ လိုꩻအစွိုꩻအဗူႏနဝ်ꩻမာꩻငါ တဲႏထောင်ႏလွဉ်နွောင်ꩻစခန်းဒျာႏ ယေန်ႏငဲးရေꩻအမျိုꩻမျိုꩻသွူ၊ ယေန်ႏငဲးရေꩻသီး ဒုတိယတဲင်ႏထွန်ႏနဝ်ꩻ ပြောင်ꩻချာငါလူႏလုဲင်ႏတွမ်ႏ နဲင်ႏငံႏလင်သားတဲင် ထွာဒျာႏ ကအဝ်ႏဒါႏနဲင်ႏငံႏလင်သားလောင်း ယေန်ႏငဲးရေꩻအတသာသာနဝ်ꩻစားသွူ။ ကတဲႏထောင်ႏစယေန်ႏငဲးရေꩻနဝ်ꩻ အဝ်ႏလိုႏမွေးစွဉ်ႏ အာႏတသာသွီႏတသာသွူ၊ သွီႏတသာယေန်ႏငဲးရေꩻ အထန်ႏယို နမ်းယေန်ႏငဲးရေꩻ မျောႏထိုꩻလꩻထွူတဲင် ဖေႏနေးကထွာလုဲင်ႏ အပွိုင်ငုဲင်ꩻပြောင်ꩻလုဲင်ႏလွဉ်ဒါႏ ယေန်ႏငဲးရေꩻအပြွူႏဖြိုနဝ်ꩻ ကျိုꩻစာꩻလွဗာႏနဝ်ꩻသွူ၊ ဗုဒ္ဓယေန်ႏငဲးရေꩻနဝ်ꩻ ထွာဒျာႏယေန်ႏငဲးရေꩻ အခင်ႏမွဉ်တွမ်ႏဗျဟ္မစိုရ်ႏတရာꩻနဝ်ꩻသွူ။ ယိန်းခွေါင်ယိန်းခံႏ၊ ကထွိုင်ႏလဲဉ်းသော့ꩻ ဗုဒ္ဓယေန်ႏငဲးရေꩻဆလနဝ်ꩻ ထွာယေန်ႏငဲးရေꩻ အခံႏဆွော့ꩻ၊ သဲစ်ကလꩻ ဗုဒ္ဓဝါဒတွမ်ႏ ပါဠိလိတ်လုဲင်ꩻတဲ့ ထွာမန်းသီးလꩻလွေꩻခန်းဒျာႏ အနယ်ꩻနိဿယတွမ်ႏ ယန္တရာႏတဗာႏလိုမ်းနဝ်ꩻဗိုန်ဝင်ꩻသွူ၊ လိုꩻမုꩻရေꩻကိစ္စအဒဝ်ႏဒဝ်ႏတွက်တာႏ ဓမ္မသတ်ကျမ်ꩻဖုံႏနဝ်ꩻ ထွာစီꩻကန်ꩻဥပဒေႏတန်နဝ်ꩻသွူ။ ဓမ္မသတ်ကျမ်ꩻကရိုꩻနဝ်ꩻ ကသွုပ်ဆွိုက်ဒါႏ လိုꩻချင်ꩻချင်ꩻတွင်ꩻ ပျဌာန်းခါꩻဖေႏ လွောက်နာႏကံကျင်ꩻခရာႏ ဝတ္တရာꩻတွမ်ႏ ကလိုႏသျောင်ႏဗာႏဒါႏ ထာꩻရာꩻမျိုꩻဖုံႏသွူ၊ ဓမ္မသတ်ကျမ်ꩻဖုံႏနဝ်ꩻ ထွာဒျာႏ အွဉ်ႏချꩻနယ်ဖေႏ အရေꩻကတန်ငါႏငါႏ မန်းယေန်ႏငဲးရေꩻပုံႏငုဲင်ꩻ၊ ဘဝထာꩻထီႏ၊ ထာꩻယူႏထာꩻတွေꩻပုံႏစံႏတန်နဝ်ꩻသွူ။ လိုꩻသီးနဝ်ꩻ တဲႏစစွဉ်ႏဒျာႏ အွိုးရျာꩻဗူႏပေါင်ꩻအာခိန်ႏသူꩻကာႏ ထိုမ်ႏစမ်ꩻလွဝင်ꩻ သဘာဝကပလို့ꩻဒါႏ အဆန်ꩻလွိုခေါ်မျိုꩻ၊ ထေဖောႏလွဝင်ꩻ၊ ကမော့ꩻလွဉ်ဒါႏအချက်တွမ်ႏ ထာꩻဒါႏပညာႏဖုံႏယို ယောင်းဖေႏခါꩻသေꩻလွ လိုꩻဆုဲင်ꩻသားဖုံႏစူကို၊ အခင်ႏမွဉ်အွဉ်ႏ ကယောင်းစူဖေႏသေꩻလွဒါႏ ယေန်ႏငဲးရေꩻအနုပညာႏဖုံႏယိုထွူတွော့ꩻ ဖေႏနေးကထင်ႏထိုနဝ်ꩻ ပွါꩻအာလွယင်းတရန်းဖုံႏသွူ။ ကခံႏထူႏသေꩻခါꩻအရန်းရန်း၊ ကပွါꩻအာလွယင်းဒျာႏ ယေန်ႏငဲးရေꩻအမွေႏအကဲဉ်ယာႏတွမ်ႏ ထာꩻသေပညာႏ' ထာꩻဒါႏပညာႏဖုံႏနဝ်ꩻ ထွာစွဉ်ႏဒျာႏအငိုꩻတဖျတ်နွောင်ꩻတဝ်း ရတနာႏတန်နဝ်ꩻသွူ။