လူႏသံဃာႏအကျိုꩻတန်
"ဒါရုကမ္မိကသုတ် (လူႏသံဃာႏနဝ်ꩻ အကျိုꩻတန်)" အွိုးခꩻတလဲင်ႏ- နီဗွေႏဘုရာꩻ အဝ်ႏအုံ ဒုံနာတိက၊ ကျောင်ꩻအွတ်ꩻကိုအတွင်ꩻ သေင်ႏပွယ်ꩻစာꩻ ဒါရုကမ္မိကသဌေꩻနောဝ်ꩻ ထင်ႏထေ့နီဗွေႏဘုရာꩻ၊ ဝုဲင်ႏနီဗွေႏဘုရာꩻထွူခါ နီဗွေႏဘုရာꩻရီနုဲင်းယို- "တကာႏ ဒါရုကမ္မိက- နာꩻအမျိုꩻကိုနဝ်ꩻ လူႏဗာႏနေထာꩻ၊ မာꩻဗာႏနေ ဒါႏနဟောင်း" "ဩဗွေႏ ဘုရာꩻမျတ်ဗွေႏဩ- ခွေသွဉ်းအမျိုꩻကိုနဝ်ꩻ လူႏဗာႏဒျာႏထာꩻ၊ မာꩻဗာႏဒျာႏ ဒါႏန ဗွေႏဩ၊ ခွေသွဉ်းကလူႏနဝ်ꩻ ရဟန္တာႏပါ၊ အရဟတ္တမဂ္ဂဋ္ဌာန်ႏပါ၊ ဆောင်ႏဓုတင်ႏသားဖုံႏပါ ဗွေႏဩ" "တကာႏ ဒါရုကမ္မိက- လိုꩻအုံဒျာႏလမ်း ခြွိုင်းနမ်းစွုမ်ႏနီꩻဟာ၊ အဝ်ႏတွမ်ႏပိုမာ လိုꩻနုဲင်းနာꩻနဝ်ꩻ 'ဝွေꩻဗွေႏယို ရဟန္တာႏ၊ ဝွေꩻဗွေႏနဝ်ꩻ အရဟတ္တမဂ္ဂဋ္ဌာန်ႏ'ကရိုꩻနဝ်ꩻ တသေနွောင်ꩻတဝ်း။ ရဟန်ꩻနဝ်ꩻ အုံဒျာႏတခြာကို သေင်ႏမွူးဆလ၊ လူႏခံႏနေးသွမ်ꩻ၊ ဗုဲင်သင်္ကန်ꩻ ပံသုကူႏတဲ့ယောဝ်း၊ ပေါႏအသꩻလောလယ်တန်၊ ကျွားတန်၊ ဒွစ်ꩻဒဲ့စ်ꩻတန်၊ ငေါဝ်းကျံꩻတန်၊ ဒေါ့ꩻလော်လယ်ဒါႏထာꩻ၊ သတိꩻအဲဉ်ထဝ်း၊ ဆင်ႏချင်ႏဉာဏ်ႏအဲဉ်ထဝ်း၊ လိုꩻထိရမွေးတဝ်း၊ လိုꩻထာꩻငမ်းတန်-သꩻဖွီဖုဲင်တန်၊ လိုꩻဣန္ဒြေႏအဲဉ်ထဝ်း၊ ပေါႏထွာနုဲင်းနဝ်ꩻနဝ်ꩻ ကဲ့ꩻရဲ့ꩻသဲ့ꩻသွမ်ꩻထွိုက်ဒျာႏနောဝ်ꩻသွူ။ ရဟန်ꩻနဝ်ꩻ အုံဒျာႏတခြာကို သေင်ႏမွူးဆလ၊ လူႏခံႏနေးသွမ်ꩻ၊ ရွုံႏဗုဲင်ဒျာႏ သင်္ကန်ꩻပံသုကူႏ၊ အသꩻလောလယ်တဝ်း၊ ကျွားတဝ်း၊ ဒွစ်ꩻဒဲ့စ်ꩻတဝ်း၊ ငေါဝ်းကျံꩻတဝ်း၊ ဒေါ့ꩻလော်လယ်တဝ်း၊ သတိꩻအဝ်ႏဒျာႏ၊ ဆင်ႏချင်ႏဉာဏ်ႏအဝ်ႏဒျာႏ၊ လိုꩻထိရဒျာႏ၊ လိုꩻထာꩻငမ်းတန်တဝ်း-သꩻဖွီဖုဲင်တဝ်း၊ လိုꩻဣန္ဒြေႏအဝ်ႏဒျာႏ၊ ပေါႏထွာနုဲင်းနဝ်ꩻနဝ်ꩻ အံႏဖြာႏထွိုက်ဒျာႏနောဝ်ꩻသွူ။ "တကာႏ ဒါရုကမ္မိကဟွေး- ရဟန်ꩻနဝ်ꩻ အဝ်ႏဒျာႏကျောင်ꩻဒုံ၊ အုံဒျာႏကျောင်ꩻဝေင်ꩻ၊ တွုံꩻတဝ်းသွမ်ꩻ၊ ရွုံႏဗုဲင်ဒျာႏသင်္ကန်ꩻဝင်ꩻလူႏ၊ အသꩻလောလယ်တန်၊ ကျွားတန်၊ ဒွစ်ꩻဒဲ့စ်ꩻတန်၊ ငေါဝ်းကျံꩻတန်၊ ဒေါ့ꩻလော်လယ်ဒါႏထာꩻ၊ သတိꩻအဲဉ်ထဝ်း၊ ဆင်ႏချင်ႏဉာဏ်ႏအဲဉ်ထဝ်း၊ လိုꩻထိရမွေးတဝ်း၊ လိုꩻထာꩻငမ်းတန်-သꩻဖွီဖုဲင်တန်၊ လိုꩻဣန္ဒြေႏအဲဉ်ထဝ်း၊ ပေါႏထွာနုဲင်းနဝ်ꩻနဝ်ꩻ ကဲ့ꩻရဲ့ꩻသဲ့ꩻသွမ်ꩻထွိုက်ဒျာႏနောဝ်ꩻသွူ။ ရဟန်ꩻနဝ်ꩻ အဝ်ႏဒျာႏကျောင်ꩻဒုံ၊ အုံဒျာႏကျောင်ꩻဝေင်ꩻ၊ တွုံꩻတဝ်းသွမ်ꩻ၊ ရွုံႏဗုဲင်ဒျာႏသင်္ကန်ꩻဝင်ꩻလူႏ၊ အသꩻလောလယ်တဝ်း၊ ကျွားတဝ်း၊ ဒွစ်ꩻဒဲ့စ်ꩻတဝ်း၊ ငေါဝ်းကျံꩻတဝ်း၊ ဒေါ့ꩻလော်လယ်တောဝ်းထာꩻ၊ သတိꩻအဝ်ႏဒျာႏ၊ ဆင်ႏချင်ႏဉာဏ်ႏအဝ်ႏဒျာႏ၊ လိုꩻထိရဒျာႏ၊ လိုꩻထာꩻငမ်းတန်တဝ်း-သꩻဖွီဖုဲင်တဝ်း၊ လိုꩻဣန္ဒြေႏအဝ်ႏဒျာႏ၊ ပေါႏထွာနုဲင်းနဝ်ꩻနဝ်ꩻ အံႏဖြာႏထွိုက်ဒျာႏနောဝ်ꩻသွူ။ လူႏသံဃာႏဟုဲင်း၊ ပေါႏလူႏသံဃာႏနဝ်ꩻ နာꩻသꩻရေꩻ-သꩻစွူဖြွိုးစွဉ်ႏသနယ်၊ နာꩻမဉ်ႏသီသူꩻ-တွိုႏဗာႏလူꩻခမ်း"။ "မွေးသွူဗွေႏ၊ ကားယိုမာꩻငါ ခွေသွဉ်းလူႏဒျာႏ သံဃာႏဗွေႏဩ" အာႏမခံႏလဝ်းခါꩻ ဗွေႏဘုရာꩻနုဲင်းနဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ ဆက္ကနိပါတ်၊ ဒါရုကမ္မိကသုတ်)[၁][၂]