(၆၆)လဲင်ႏဗွေမွူးနီꩻ

(၆၆)လဲင်ႏဗွေ မွူးနီꩻခွိုꩻပအိုဝ်ႏအကို သဘာပတိငေါဝ်းငွါ

• ရိုႏသေႏအွဉ်ႏရေꩻထွိုက်ငါႏ မွိုးဖါဖူးဝေးအမျာꩻသီးဖုံႏဩ-

ဒဲဉ်သီႏလာဗွေနီꩻယို ထွာပအိုဝ်ႏလိုꩻမျိုꩻ မွူးနီꩻထူꩻ မွူးနီꩻမျတ်နောဝ်ꩻသွူ၊ စွုမ်ႏနေင်ႏ ကတွိုႏလွဉ်ဒါႏ ဒဲဉ်သီႏလာဗွေနီꩻနောဝ်ꩻ နီသွဉ်းသီးပအိုဝ်ႏဖုံႏ ရက်စွိုးခွိုꩻ၊ ရက်လိုꩻမျိုꩻယို သꩻဓာတ်အာႏယိန်းတလာထဲင်းထဲင်းနောဝ်ꩻသွူ၊ အကျောင်ꩻနုဲင်းမုဲင်ꩻနဲးတဲင် နီသွဉ်းသီး ပအိုဝ်ႏခမ်းရင်ꩻသားယိုနောဝ်ꩻ အုံသော့ꩻသေႏသေႏ ခမ်းပေါင်ꩻဗူႏ မြန်မာနဲင်ႏငံႏအကို အစဲဉ်ႏအဆက်ဆက် နေင်ႏပေါင်ꩻညဆွာꩻ အုံငီꩻတွမ်ႏခမ်းရင်ꩻသား အလောင်ႏအလင်နောဝ်ꩻ သမဲင်ꩻအောဝ်ႏယီးနယ်သေꩻခါꩻလဲဉ်းဒျာႏနောဝ်ꩻသွူ။ နီသွဉ်းသီး ပအိုဝ်ႏခမ်းရင်ꩻသားယိုနောဝ်ꩻ ဖျတ်ကာႏလွဉ်ဗာႏ ခေတ်အမျိုꩻမျိုꩻ၊ စနစ်အမျိုꩻမျိုꩻကရိုꩻနောဝ်ꩻ ခမ်းရင်ꩻသား ကားကအောဝ်ႏ သေထွꩻလဲဉ်ႏဒါႏ ပငါပရာꩻနောဝ်ꩻသွူ၊ ပထမမြန်မာနဲင်ႏငံႏ ကတဲႏထောင်ႏဒါႏ အနောႏရထာႏခလားကပေါႏ နီသွဉ်းသီးပအိုဝ်ႏလိုꩻမျိုꩻ အုတ်ချုတ်ရေꩻနောဝ်ꩻ နမ်းတွမ်ႏနမ်း အုတ်ချုပ်ချာတဲင် ပအိုဝ်ႏအရောင်ႏ လေတောင်ႏလွဉ်ဗာႏကရိုꩻနောဝ်ꩻ သမဲင်ꩻအွဉ်ႏနယ်နွောင်ꩻဒျာႏ သက်သေႏနောဝ်ꩻသွူ။

ကွဲးတဲင်တွော့ꩻ တဲႏစလွေꩻပဂံႏခေတ် ဗꩻတွိုႏလွဉ် ဗြိတိသျှခေတ်ကိုနောဝ်ꩻ နီသွဉ်းသီး ပအိုဝ်ႏသမဲင်ꩻ တထင်ႏသျာꩻတောဝ်းဒွုမ်နောဝ်ꩻသွူ၊ ကယိန်းဟုဲင်းဟုဲင်းထဲင်းနောဝ်ꩻ အောဝ်ႏနေကသွူဩ၊ နီသွဉ်းသီး ကထီႏထွꩻ ပဒေႏသရာဇ်ခေတ်ကို ပေ့ꩻဗာႏမဲ့၊ ပေ့ꩻဗာႏနားတဲင် နမ်းတွမ်ႏနမ်း ပအိုဝ်ႏဒျာႏကရိုꩻနောဝ်ꩻတဲ့ ဒေါ့ꩻချာတဗွိုန်ႏတောဝ်းတွော့ꩻ သꩻရွူႏဗာႏ၊ သꩻပေႏဗာႏသွူတကာႏတောဝ်း လိုꩻမျိုꩻတဲ့ အီႏထိုꩻမားပါဗာႏစွဉ်ႏနောဝ်ꩻသွူ။ ကွဲးတဲင်တွော့ꩻ ပအိုဝ်ႏလိုꩻမျိုꩻနောဝ်ꩻ သꩻရက်ခွိုꩻဖေႏခါꩻ သမဲင်ꩻအမွီႏတဲင် နီသွဉ်းသီး ပအိုဝ်ႏလိုꩻမျိုꩻငေါဝ်းငွါ၊ လိတ်လုဲင်ꩻ၊ ယေန်ႏငဲမုꩻဓလေ့ꩻထွုံꩻစံႏ ထိန်ꩻသိမ်ꩻလွဉ် တသွုပ်ထွူတသွုပ်နောဝ်ꩻမꩻ ဗꩻတွိုႏလွဉ်ယိုခါ လိုꩻမျိုꩻတမျိုꩻအနေႏ အုံတဲင်နွောင်ꩻကရိုꩻနောဝ်ꩻ အွဉ်ငါလိုꩻတန်သီး တသွုပ်ထွူတသွုပ် သွုပ်ငါအွဉ်ထိန်ꩻတီလွေꩻ စွိုးခွိုꩻဘာႏသာႏ သာႏသနာႏလွုမ်ꩻတကာႏတောဝ်း ပိုလီꩻဖုံႏ သꩻဓာတ်မဲဉ်ထိန်ꩻတီလွေꩻ စွိုးခွိုꩻဘာႏသာႏ သာႏသနာႏဖေႏကပေါႏတဲ့ ဖေႏခါꩻပါဒျာႏနောဝ်ꩻသွူ။

• ပအိုဝ်ႏမွိုးဖါ လိုꩻအမျာꩻသီးဖုံႏဩ-

ကမ္ဘာႏလောင်းကိုတဲ့နောဝ်ꩻ၊ မြန်မာနဲင်ႏငံႏကိုတဲ့နောဝ်ꩻ ကွပ်စွဉ်ႏထိန်ꩻတီချာတောဝ်း လိုꩻမျိုꩻတဲင် လိုꩻမျိုꩻကထိုꩻမားဗာႏနောဝ်ꩻ ဆေ့ꩻတောဝ်းနောဝ်ꩻသွူ၊ နောဝ်ꩻမꩻ "ဟံႏမဉ်ႏမျောႏနောဝ်ꩻ လိုꩻလို့တောဝ်း၊ လိုꩻချင်ꩻချင်ꩻ မဉ်ႏမျောႏနောဝ်ꩻ လိုꩻလို့"ကရိုꩻဒါႏ ငေါဝ်းအောဝ်ႏအတွိုင်ꩻ ပအိုဝ်ႏခမ်းသားမွိုးဖါ လိုꩻအမျာꩻ ဟောဝ်အွဉ်ႏသတိꩻငါႏနောဝ်ꩻသွူ၊ ကွပ်နောဝ်ꩻမꩻ နီလိုꩻမျိုꩻ၊ နီလိတ်လုဲင်ꩻ၊ နီငေါဝ်းငွါ၊ နီယေန်ႏငဲးမုꩻ၊ နီဓလေ့ꩻထွုံꩻစံႏတွမ်ႏ စွိုးခွိုꩻဘာႏသာႏ သာႏသနာႏယို ဖေႏကထိုꩻမားဗာႏမွိုန်းနောဝ်ꩻ အောဝ်ႏလိုႏပင်ႏထိုတသွဗာင်းထိုငါႏ၊ အောဝ်ႏလိုႏဖောႏလွေꩻ အနမ်းအခြုံအကျောင်ꩻ မဲဉ်တမာပါငါႏနောဝ်ꩻသွူ။ နေင်ႏ ၂၀၀၈-ဗာႏ၊ ဖွဲ့ဗူႏပွုံႏ အခေႏခံႏဥပဒေႏပုဒ်မ-၂၂(က)အလꩻ ခမ်းရင်ꩻသားငေါဝ်းငွါ၊ လိတ်လုဲင်ꩻ၊ အနုပညာႏ၊ ယေန်ႏငဲးမုꩻ ဖေႏကလွိုင်ႏကွိုန်ꩻလွဉ်နောဝ်ꩻ နဲင်ႏငံႏတောႏ အီႏကူႏညီႏလွေꩻဒျာႏ-အွဉ်ႏထွော့သေꩻခါꩻဖေႏလဲက်း၊ နောဝ်ꩻလွုမ်ꩻမကာႏ ခမ်းရင်ꩻသား ကအောဝ်ႏမဲဉ်လꩻဒါႏ နဲင်ႏငံႏတောႏကို တရာꩻတရျားမုꩻ၊ သꩻတခြင်မုꩻတွမ်ႏ တရျားမုꩻ၊ အောဝ်ႏခမ်းရင်ꩻသား အခွင်ꩻအရေꩻ၊ ဒီမိုကရေသီအရေꩻယို ဖေႏကကဲက်ငီႏတွမ်ႏ ဥပဒေႏတွော့ꩻ နမ်းပဲင်ႏအုပ်ချုတ်ခွင်ꩻ၊ ခွုမ်စံႏဖေႏကလꩻ အခေႏခံႏတွမ်ႏ နီထွုံꩻတွမ်ႏနီထွုံꩻ အုတ်ချတ်ချာ ဖြယ်ဒရယ်ခမ်းပေါင်ꩻဗူႏ(ဖက်ဒရယ် ပြည်ထောင်စု)စနစ်တဲင် ယံတဲႏထောင်ႏနွောင်ꩻနောဝ်ꩻ နဲင်ႏငံႏတောႏတွမ်ႏ ခမ်းရင်ꩻသားအစွိုꩻဖုံႏ အောဝ်ႏကျိုꩻစာꩻခွုမ်မာꩻလွေꩻလဲဉ်းဒျာႏနောဝ်ꩻသွူ။

• ပအိုဝ်ႏမွိုးဖါအမျာꩻသီးဖုံႏဩ-

ကဒေါ့ꩻလွေꩻဒါႏ အချက်ဆꩻကီဖုံႏယိုနောဝ်ꩻ ပအိုဝ်ႏတွမ်ႏခမ်းရင်ꩻသားအလင် ယံဖေႏကခံႏစာꩻနွောင်ꩻနောဝ်ꩻ-

• (၁) ပအိုဝ်ႏခမ်းသားအကို ထွꩻခေတ်လွိုင်ႏကွိုန်ꩻ ပြွူႏဖြိုရေꩻ ထာꩻယူႏထာꩻတွေꩻတွမ်ႏ အနာႏဂတ်တာႏ ထာꩻထီႏလုဲင်းလုဲင်း၊ ထာꩻထီႏဆွာꩻဆွာꩻအောဝ်ႏဗာႏနောဝ်ꩻသွူ။
• (၂) ဒါႏပညာႏသား၊ လိုꩻအရွီးအခိုႏဖုံႏ ယံဇေႏကပေါႏထန်ႏအာအာနောဝ်ꩻ လိုႏလွူးထန်ႏငါႏ ခွိုꩻရက်သꩻဓာတ် အောဝ်ႏလိုႏမွန်ဗွန်တဉ်ႏခွေါင်ငါႏသွူ။
• (၃) ပအိုဝ်ႏလိုꩻမျိုꩻချင်ꩻချင်ꩻ ဖေႏကလွောင်ႏဗူႏ ဆွန်ꩻစူနွောင်ꩻတသေႏသေႏနောဝ်ꩻ အောဝ်ႏလိုႏငါႏအကျောင်ꩻ (၆၆)လဲင်ႏဗွေ ထူႏဂွုဏ်ႏခရာႏဟောဝ်ငါႏ၊ အောဝ်ႏမွူးနီꩻခွိုꩻပအိုဝ်ႏကို နိုꩻဆောႏတမာလွေꩻဗာႏ ပအိုဝ်ႏမွိုးဖါ ဖူးဝေးအမျာꩻသီးနောဝ်ꩻသွူ။

ပအိုဝ်ႏမွိုးဖါ ဖူးဝေးအမျာꩻ ကားကအောဝ်ႏ နီပါꩻနမ်းသꩻ ယံရျူႏခွꩻဒျာႏသွဗာ့ စွုမ်ႏဖြာꩻဖြာꩻအကျောင်ꩻ ပသာလွေꩻဗာႏငေါဝ်းမေတ္တာႏထွူတဲင် ခွေသွဉ်းသဘာပတိငေါဝ်းငွါယို အွဉ်ႏထွူလွေꩻဗော့ꩻ တခွိုင်းယိုသွူ ဖူးဝေးအမျာꩻသီးယာဩ။