သင်္ဃာႏရတနာႏ

သင်္ဃာႏရတနာႏအရိယာႏ ကထွာထွူဒါႏ သင်္ဃာႏတောႏဖုံႏနဝ်ꩻ - ၁။ ရိုႏသေႏဗာႏ မဉ်ႏတရိုႏသေႏဗာတဝ်းနဝ်ꩻ ကောတရိုႏသေႏတဝ်းသား လောကလိုꩻတာႏ ထွာအီစီꩻပွာꩻရေꩻ အန္တရာယ်ႏမဉ်ႏတွိုႏ ဘဝသံႏသရာႏသူꩻနဝ်ꩻ ခံႏစာꩻဗာႏအကျိုꩻ တဟဝ်တဝ်းစား။ ၂။ ကရိုႏသေႏအွဉ်ႏရေꩻ၊ ကိုꩻကွယ်ႏဒါႏ အရိယာႏသင်္ဃာႏတောႏသားနဝ်ꩻ ဘဝသံႏသရာႏကို အငိုꩻတဖျတ်နွောင်ꩻတဝ်းအကျိုꩻနဝ်ꩻ လꩻဗာႏအမန်ႏသွူ။ ကွပ်ပွိုးနဝ်ꩻမꩻ အကျိုꩻကဖေႏနွောင်ꩻဒါႏ အရိယာႏသင်္ဃာႏတောႏနဝ်ꩻလဲ့ ထွာအငိုꩻတဖျတ်နွောင်ꩻတဝ်း ရတနာႏသွူ။ ၃။ သုပ္ပဋိပ္ပန္န-ကံကျင်ꩻဟဝ်ဟဝ်၊ ဥဇုပ္ပဋိပန္န-ကံကျင်ꩻစွို့ꩻစွို့ꩻစွဉ်ႏစွဉ်ႏ၊ ဉာယပ္ပဋိပ္ပန္န-လောကအကို ကအဝ်ႏဒါႏ ဂုဏ်ႏပကာသန လာဘ်လာဘအကျိုꩻတဲ့နဝ်ꩻ၊ သံႏသရာႏအကို ကအီႏခံႏစာꩻဗာႏအကျိုꩻတဲ့နဝ်ꩻ တစိꩻစိꩻထွာနွောင်ꩻတဝ်းဒွုမ်တဲင် ထွာဒျာနိဗ္ဗာန်ႏအကျိုꩻတာႏခြေင်ခြေင် ကကံကျင်ꩻဒါႏ သင်္ဃာႏတောႏနဝ်ꩻ ဘာႏသာႏအလောင်ႏအလင်တဲ့ တအဝ်ႏနွောင်ꩻတဝ်း၊ ကွပ်ပွိုးနဝ်ꩻမꩻ အရိယာႏသင်္ဃာႏတောႏနဝ်ꩻ အပီဗွိုန်အဲဉ်ထဝ်း ထွာအယံသွတ်ꩻ ရတနာႏသွူ။ ၄။ သင်္ဃာႏရတနာႏနဝ်ꩻ မော့ꩻခွဲးဗာႏဘုရာꩻရတနာႏ ပေါႏခိန်ႏလွုမ်ꩻတဲင် ထွာမော့ꩻယပ်ꩻခုဲင်ႏလွဉ်ꩻငါႏ ရတနာႏတန်သွူ။ ၅။ သင်္ဃာႏရတနာႏနဝ်ꩻ ဘဝကရီးခါ ကကံကျင်ꩻဒါႏ ပုဂ္ဂိုလ်ႏအဆင်းအရန်းထိုသားနဝ်ꩻမꩻ မော့ꩻခွဲး ဆယ်ꩻကပ်ကိုꩻကွယ်ႏနွောင်ꩻတဲင် သင်္ဃာႏရတနာႏနဝ်ꩻ ထွာအဆင်းအရန်းထိုသား သုံꩻဆောင်ႏတာႏဒျာႏနဝ်ꩻသွူ။

အရိယာႏသင်္ဃာႏဂုဏ်ႏတောႏ (၉)ပါꩻ

၁။ သုပ္ပဋိပ္ပန္နဂုဏ်ႏတောႏ - ဘုရာꩻတပဲ့ꩻ အရိယာႏသင်္ဃာႏပေါင်ꩻ သူႏတောႏကောင်ꩻသီးဖုံႏနဝ်ꩻ နီဗွေႏဘုရာꩻဆုမ္မꩻသေꩻခါꩻအတွိုင်ꩻ လွောက်ꩻနာႏလို့စင် ကံကျင်ꩻဟဝ်ဟဝ်လွဒျာႏသွူ။ ၂။ ဥပ္ပဋိပန္နဂုဏ်ႏတောႏ - ဘုရာꩻတပဲ့ꩻ အရိယာႏသင်္ဃာႏပေါင်ꩻ သူႏတောႏကောင်ꩻသီးဖုံႏနဝ်ꩻ နီဗွေႏဘုရာꩻကဟော်ꩻသေꩻခါꩻဒါႏအတွိုင်ꩻ ရေႏရွယ်ႏချက်အွဉ်ႏထွူ နိဗ္ဗာန်ႏတဲင် စွို့ꩻစွို့ꩻစွဉ်ႏစွဉ်ႏကံကျင်ꩻလွဒျာႏသွူ။ ၃။ ဉာယပ္ပဋိပန္နဂုဏ်ႏတေႏ - ဘုရာꩻတပဲ့ꩻ အရိယာႏသင်္ဃာႏပေါင်ꩻ သူႏတောႏကောင်ꩻသီးဖုံႏနဝ်ꩻ မေႏခိုးသွူ ကလူꩻလဲ့ တမာꩻဖေ့တန်တဝ်းဒွုမ်တဲင် ဒုက္ခကညိမ်ꩻဒါႏ နိဗ္ဗာန်ႏချမ်ꩻသာႏအတွက် ကံကျင်ꩻလွဒျာႏသွူ။ ၄။ သာမီစိပ္ပဋိပန္နဂုဏ်ႏတောႏ - ဘုရာꩻတပဲ့ꩻ အရိယာႏသင်္ဃာႏပေါင်ꩻ သူႏတောႏကောင်ꩻသီးဖုံႏနဝ်ꩻ ယံဖေႏနေး ကတန်ႏတွမ်ႏတကာႏ တကာႏမသီး ရိုႏရိုႏသေႏသေႏကလူႏတန်ꩻဒါႏ ပစ္စေꩻဥစ္စာႏနဝ်ꩻ ကံကျင်ꩻလွဒျာႏသွူ။ ၅။ အာဟုနေယဂုဏ်ႏ - ဘုရာꩻတပဲ့ꩻ အရိယာႏသင်္ဃာႏပေါင်ꩻ သူႏတောႏကောင်ꩻသီးဖုံႏနဝ်ꩻ တကာႏ တကာႏမသီး အဝ်ႏအရပ်ညာꩻကို ကထူႏလွဉ်ဒါႏ အလူႏစာႏအမျိုꩻမျိုꩻနဝ်ꩻ လူႏခံႏထွိုက်ဒျာႏသွူ။ ၆။ ပါဟုနယျဂုဏ်ႏ - ဘုရာꩻတပဲ့ꩻ အရိယာႏသင်္ဃာႏပေါင်ꩻ သူႏတောႏကောင်ꩻသီးဖုံႏနဝ်ꩻ ထွာဒျာႏဘုရာꩻ မဉ်ႏပွင်ꩻလွဉ်တဆူႏမꩻ ပေါႏလွဉ်ဒါႏ ကမ္ဘာႏသူႏတောႏကောင်ꩻထဉ်ႏဖုံႏတဲင် တကာႏ တကာႏမသီး ရေႏရွယ်ႏသေꩻခါꩻဒါႏ ထဉ်ႏညာꩻတာႏ ပစ္စေꩻဥစ္စာႏနဝ်ꩻ လူႏခံႏထွိုက်ဒျာႏသွူ။ ၇။ ဒက္ခိဏေယျဂုဏ်ႏတောႏ - ဘုရာꩻတပဲ့ꩻ အရိယာႏသင်္ဃာႏပေါင်ꩻ သူႏတောႏကောင်ꩻသီးဖုံႏနဝ်ꩻ ဘဝနောင်ႏလာႏ ချမ်ꩻသာႏစီꩻပွာꩻ ယံကထွာတဲင် ရေႏရွယ်ႏလူႏဒါႏ အလူႏစာႏမျိုꩻနဝ်ꩻလဲ့ လူႏခံႏထွိုက်ဒျာႏသွူ။ ၈။ အဉ္ဇလီ ကရဏီယဂုဏ်ႏတောႏ - ဘုရာꩻတပဲ့ꩻ အရိယာႏသင်္ဃာႏပေါင်ꩻ သူႏတောႏကောင်ꩻသီးဖုံႏနဝ်ꩻ တလောကလွုမ်း ရိုႏသေႏဝုဲင်ႏထွိုက်ဒျာႏသွူ။ ၉။ အနုတ္တရံ ပုညက္ခေတ္တံ လောကဿဂုဏ်ႏတောႏ - ဘုရာꩻတပဲ့ꩻ အရိယာႏသင်္ဃာႏပေါင်ꩻ သူႏတောႏကောင်ꩻသီးဖုံႏနဝ်ꩻ ထွာဒျာႏလိုꩻလူꩻဗြဟ္မာႏသီး အယံသွတ်ꩻ အဟဝ်သွတ်ꩻ ကုသိုလ်ႏခြွီဆို့ꩻရုဲင်သော့ꩻအီတာႏ ခင်ႏလမ်းသွူ။

လာဇာလူꩻမူႏဝတ္ထု

နီဗွေႏဘုရာꩻ သက်တောႏအဝ်ႏထင်ႏသျာꩻ အယံတွင်ꩻ ဆင်ꩻရယ်ꩻသားမူႏပေႏတဖြာꩻ အုံပွေါးလုဲင်းတွင်ꩻ အံႏပဆိုးတာႏ ငိုးသေꩻခါꩻဗွူဖေါင်းသွူ။ ရဟန်ꩻတောႏ ကဿပနဝ်ꩻလဲ့ အဝ်ႏစာႏစာꩻ နိရောဓသမာပတ်စထန်ႏတွင်ꩻက ထင်ႏထီႏဆင်ꩻရယ်ꩻသားမူႏပေႏနဝ်ꩻတဲင် ကျွꩻတုံꩻသွမ်ꩻလဲင်ႏကိုသွူ။ ဆင်ꩻရယ်ꩻသားမူႏပေႏနဝ်ꩻလဲ့ အနမ်းအံႏတာႏ ဗွူဖေါင်းနဝ်ꩻ လူႏသွူသျင်ႏမဟာႏကပဿတဲင် ယူႏယူႏထွူဝွေꩻဒါႏနနဝ်ꩻတဲင် ဝွေꩻသꩻရေꩻမွေးစွဉ်ႏထာꩻ ဝွေꩻထင်ႏသဲင်ꩻချာ အသုမ်းလုဲင်းကိုတွင်ꩻ ရူးကအဝ်ႏဒါႏ လုဲင်းကွန်ႏဆကီအဲင်ႏတဲင် သီထိုꩻစွဉ်ႏတလဲင်ႏချင်ႏသွူ။ ဆင်ꩻရယ်ꩻသားမူႏပေႏ ကအီႏသီသွူအခိန်ႏတွင်ꩻ သꩻစွယ်ꩻယူႏလꩻဒျာႏ ဝွေꩻကမာꩻသေꩻခါꩻဒါႏ ဗွူဖေါင်းကုသိုလ်ႏဒါႏနနဝ်ꩻတဲင် ကထွိုင်ႏသီနဝ်ꩻ ထင်ႏထွာစွဉ်ႏ ဗွူဖေါင်းအဝ်ႏဟွဲးဖူႏဒါႏဘုံႏကိုတဲင် ထွာလူꩻမူႏ၊ အမဉ်ꩻဟဲ့ꩻ"လာဇာ"နဝ်ꩻသွူ။ လာဇာလူꩻမူႏနဝ်ꩻ ကေꩻဇူꩻတင်ႏငါႏ သျင်ႏမဟာကဿပတဲင် မဉ်မာꩻဖေႏငါႏ သျင်ႏမဟာကဿပဝွတ်ပေႏဝွတ်တန်နဝ်ꩻမꩻ လင်ꩻထေ့သျင်ႏမဟာကဿပ ကအဝ်ႏအုံဒါႏ ထံးကိုနဝ်ꩻသွူ။ သျင်ႏမဟာကဿပ ခံႏတဝ်းအပျုစုတဲင် ငွိုးငွိုးငင ကထင်ႏသဲင်ꩻချာ လူꩻခမ်းတွင်ꩻ နီဗွေႏဘုရာꩻထီႏတွော့ꩻ ဟော်ꩻဖေႏတရာꩻတဲင် ထွာစွဉ်ႏ သောတာႏပန်ႏနဝ်ꩻသွူ။ အရိယာႏသင်္ဃာႏတောႏနဝ်ꩻ ဗွိုန်ပီစွဉ်ႏ သွို့ꩻခြံလုဲင်းယာႏ ဟံႏဟဝ် ကေားကမာꩻကုသိုလ်ႏသားနဝ်ꩻ ဗွိုန်ပီစွဉ်ႏ သွို့ꩻခြံလုဲင်းယာႏဗွေႏ ကေားကမာꩻကုသိုလ်ႏသား ကမာꩻသေꩻခါꩻဒါႏ လူႏတန်ꩻမုꩻ ဘာႏဝနာႏကမ္မဋ္ဌာန်ꩻ စီꩻဖျန်ꩻမုꩻဖုံႏနဝ်ꩻ အောင်ႏအောင်ႏမျင်ႏမျင်ႏ အခူꩻကဗွေဒါႏ အခြွီနဝ်ꩻသွူ။ ဗုဒ္ဓဘာႏသာႏအပေါင်ꩻ သူႏတောႏကောင်ꩻသီးဖုံႏဟွေး

ရေႏရောႏထွူ သက်တောႏထင်ႏသျာꩻ နီဗွေႏဘုရာꩻတဲင် လူႏလွ သွမ်ꩻတောႏ ထီခွꩻ ကဝ်ႏ နံႏသာႏ မေႏတဲင် စဒါႏအထူႏစာႏဝတ္ထုဖုံႏနဝ်ꩻသွူ၊ ကပူႏဇောႏဒါႏနုဲင်းယိုနဝ်ꩻ မာꩻကေႏလွုမ်ꩻဝွတ္တရာꩻ ရိုႏသေႏလွုမ်ꩻ ပုဂ္ဂိုလ်ႏလံးထျꩻလမ်းသောင်သဖော်ꩻအနေႏ ဖေႏနေးကထွာမွုန်းနုဲင်းနဝ်ꩻတဲင် ကပူႏဇောႏဒါႏရုပ်ပုံႏ၊ စေႏတီႏတောႏတွင်ꩻ နီသꩻကို ဖေႏနေးကယူႏဖြောင်လွေꩻတွိုႏ နီဗွေႏဘုရာꩻကျောင်ꩻကိုတွော့ꩻ ပီဗွိုန်စွဉ်ႏကပူႏဇောႏဗာႏ သက်တောႏထင်ႏသျာꩻ နီဗွေႏဘုရာꩻနဝ်ꩻသွူ။ မဉ်းကပ်နီဗွေႏဘုရာꩻသွမ်ꩻတောႏ မွူးလွယ်ꩻခိန်ႏနဝ်ꩻ ခံႏဗာႏဝင်ꩻအံႏသဲ့ꩻ အံႏသွမ်ꩻ ပီဗွိုန်နုဲင်းနဝ်ꩻ အရောင်ႏခေ့ꩻအဲဉ်ထဝ်း မွူးယာခိုႏနဝ်ꩻတဲ့ ဟဝ်ပူႏဇောႏတဝ်း နီဗွေႏဘုရာꩻမေႏနဝ်ꩻသွူ။ နီဗွေႏဘုရာꩻရုပ်ပုံႏ ကအဝ်ႏသော့ꩻဒါႏလမ်းကို အာႏရုံႏခံႏ ဘုရာꩻဝတ်ကို စေႏတီႏသောင်ဖုံႏနဝ်ꩻ ဖယောင်ꩻတဲင်ႏအေႏဖုံႏ လီလီလာလာဒါႏတဝ်း၊ ထာꩻအီႏထာꩻစျꩻဖုံႏ ထီလွီးလဲင်ꩻနွုမ်ꩻကုဲင် အွဉ်ႏညလွဉ်ꩻငါႏ ဘုရာꩻကဝ်ႏဖွိုင်ꩻဖုံႏနဝ်ꩻလဲ့ တဟဝ်တဝ်း၊ အဝ်ႏလိုႏဖျင်လွဝင်ꩻ ပငါပရာꩻနဝ်ꩻသွူ။ ဘုရာꩻအဆောက်အဦးကိုနဝ်ꩻလဲ့ ထာꩻခြိုꩻသျွုတ်သျွုတ်သျက်သျက်စား မဉ်ႏတအဝ်ႏသော့ꩻတဝ်းနဝ်ꩻမꩻ ကျက်သရေႏယိန်းအဝ်ႏတဲင် အဝ်ႏလိုႏအွဉ်ႏသော့ꩻဒျာႏ ထာꩻခြိုꩻသျင်ꩻသျင်ꩻစားငါႏနဝ်ꩻသွူ။ တဖြာꩻဒျာႏမဉ်ႏတတ်နွိုင်ႏတဝ်းလဲ့ လိုꩻအမျာꩻစုပေါင်ꩻထွူဝင်ꩻတွော့ꩻ အဝ်ႏလိုႏတဲႏဒျာႏဘုရာꩻကျောင်ꩻစေႏတီႏ တဲးတဲးဝါးဝါးစားနဝ်ꩻသွူ။ ကေႏညိုႏခရာႏ လဲင်ꩻတထွာနွောင်ꩻတဝ်းဒွုမ်ဒါႏ ဘုရာꩻကျောင်ꩻကုဲင်၊ စေႏတီႏကုဲင်၊ စေႏတီႏပြင်ꩻ၊ စေႏတီႏယဖုံႏနဝ်ꩻလဲ့ စုပေါင်ꩻဝင်ꩻပျုပျင်ႏလွ ခလားကတဲႏထဲင်းယင်း စေႏတီႏကအဝ်ႏထွူလဲဉ်းအရပ်နဝ်ꩻ ထွားဆွာꩻဆွာꩻသွူထာꩻတဲင် တဲႏလွသွော့ စေႏတီႏတအဝ်ႏတဝ်းဒွိုန်းအရပ်နဝ်ꩻသွူ။ မဉ်ႏဝုဲင်ႏဘုရာꩻတွမ်ႏ သင်္ဃာႏဖုံႏနဝ်ꩻ နေးတွမ်ႏခင်ႏလေင်းနီဖဲ့ꩻ စူနီပင် ကတောင် ကရိုꩻဒါႏ ခွေါင်းရွမုꩻငတ်ꩻတဲင် ရိုႏရိုႏသေႏသေႏ မဉ်ႏဝုဲင်ႏနဝ်ꩻမꩻ ယေန်ႏကေႏမုꩻလဲ့ထွာ၊ အကျိုꩻတဲ့လꩻအာ၊ အသောင်အရင်ꩻသား မဉ်ႏထီႏတဲ့ဟဝ်နဝ်ꩻသွူ။ မဉ်ႏနာႏတရာꩻတွင်ꩻလဲ့ အဝ်ႏလိုႏဒေါ့ꩻရီတဝ်းလို့ဝင်ꩻ၊ သꩻကိုယူႏလွသွော့ ရဟန်ꩻသာႏမဏေႏသီး ကဟော်ꩻသူꩻ၊ တရာꩻမဉ်ႏသွတ်ꩻလဲ့ သာႏဓုဟဝ်ဟဝ်လွသွော့ဝင်ꩻ ပငါပရာꩻ သွံလဲင်ႏသွံခြွိုက်၊ နာႏတရာꩻကထင်ႏထွူ ဆျာꩻထီဝွေႏအမျတွင်ꩻနဝ်ꩻလဲ့ အဝ်ႏလိုႏဒေါ့ꩻရီတဝ်းဒွိုန်းလို့ဝင်ꩻ၊ တဖြာꩻတွမ်ႏတဖြာꩻ အုံမွုန်းတဝ်းဒွိုန်း၊ ကောကဆျာꩻထီသားနဝ်ꩻ အဝ်ႏလိုႏဆျာꩻသော့ꩻတဝ်း ဆွေႏအင်ႏကို၊ ဆျာꩻသော့ꩻဒျာႏသွော့ ဝန်ႏတောင်ꩻတန်၊ ထီဗျေားစတဲင် အခင်ႏလမ်းကြောင်းကြောင်းစင်စင်ကို၊ ဆျာꩻထီမဉ်ႏထွူ ဝင်ꩻမဉ်ႏဝွေႏကုသိုလ်ႏ နီမဉ်ႏသာႏဓုနဝ်ꩻ "သာႏဓု-သာႏဓု-သာႏဓု"ရွစ်သွော့သွံလဲင်ႏနုဲင်းနဝ်ꩻ၊ "သား"မာꩻဗာႏတဝ်းနုဲင်းနဝ်ꩻသွူ။ ယေ ဝုဍ္ဎ မပစယန္တိ၊ နာရာဓမ္မဿ ကောဝိဒါ ။ ဒိဋ္ဌေ ဓမ္မေ စ ပသံသာ၊ သမ္ပရာယေဝ သုဂ္ဂတိံ ။ ကကျင်ႏလယ်ႏ သေနာႏလွဒါႏတရာꩻ ပုဂ္ဂိုလ်ႏဖုံႏနဝ်ꩻ ရိုႏသေႏလွ အသက်သိက္ခာႏ သီႏလ သမာႏဓိဂုဏ်ႏကအဝ်ႏဒါႏ ပုဂ္ဂိုလ်ႏဖုံႏနဝ်ꩻသွူ။ ပုဂ္ဂိုလ်ႏစားယိုနဝ်ꩻ ဘဝယိုခါလဲ့ ခံႏဗာႏဝင်ꩻအံႏဖြာႏ၊ ဘဝသံႏသရာႏတဲ့ တွိုႏဗာႏဘဝဟဝ်သွူ။ သဒ္ဓမ္မံ ဒေသနာ ကာလေ၊ သာဓု သာဓူတိ ဘာသတော ။ မုခတော ဇာယတေ ဂန္ဓော၊ ဥပ္ပလံဝ ယထောဒကေ ။ ရဟန်ꩻသင်္ဃာႏ၊ သျင်ႏပေႏ၊ မော်စတဲင်ပုဂ္ဂိုလ်ႏဖုံႏ ကဟော်ꩻသင်္ဂြိုဟ်ႏဖေႏဒါႏ တရာꩻတောႏအမျိုꩻမျိုꩻ အစွိုးစွိုးဖုံႏယို အွဉ်ႏသꩻဗွာဗွာစင်စင်တဲင် "သာႏထု-သာႏထု-သာႏထု" နီမဉ်ႏရွစ်ပူႏဇောႏ ရိုႏသေႏဗာႏနုဲင်းနဝ်ꩻနဝ်ꩻ နီဖြောင်းအလွီးယို အပဲစ်ဆူႏနာႏကကင်ꩻဒါႏ နဝ်ꩻတဖြုံႏအကို နောင်တဖြုံႏအကို ကတုဲင်လွဉ်ဒါႏ ဗိုလွီးဟွမ်နဝ်ꩻ ဗွိုန်ပီဝင်ꩻနဝ်ꩻသွူ။