အဝ်ႏလိုႏလွူးသွဉ်ဒျာႏ

"အဝ်ႏလိုႏလွူးသွဉ်ဒျာႏ လိုꩻယွဲးသီးနမ်းတွမ်ႏနမ်း အုံထွိုင်ႏချာ၊ ယုမ်းအံႏချာ၊ စဉ်ꩻစာꩻယူႏချာဖေႏကဒါႏ" နီမန်းခမ်းထီယို ကသွဉ်ကလွူးထန်ႏ လိုꩻပေႏနဝ်ꩻ လိုꩻပေႏသီး အနမ်းတွမ်ႏအနမ်း ယံကအုံတနွောင်းချာဒါႏ၊ ယံကစဉ်ꩻစာꩻခွဲꩻချာꩻချာဒါႏ တမွေးတဝ်း၊ သွဉ်ဖေႏထဲင်းဒျာႏ အုံကွူꩻဝင်ꩻနယ်ꩻ၊ သွင်ꩻဖေႏထဲင်းဒျာႏ အုံခိုႏဝင်ꩻသꩻဓာတ် အထွာထိုꩻထဲင်းနုဲင်းနဝ်ꩻသွူ။ ထွာမုဲင်ꩻဟောင်းနဲးတဲင် ကထွာလိုꩻပေႏ အီႏမာꩻယိုꩻလဲ့ "မာꩻမွုန်းဟုဲင်း"-ငမ်းအမာႏ၊ အီႏမာꩻနဝ်ꩻလဲ့ 'မာꩻမွုန်းလုဲင်း'ငမ်းအကုဲင်၊ အဝ်ႏစွဉ်ႏဒျာႏ အရဲးအဆီꩻဖဲ့ꩻကွေႏကွေႏတဲင် ကထွာလိုꩻပေႏသီးနဝ်ꩻ မာꩻခွင်ꩻ စံꩻခွင်ꩻ သွဉ်ထူႏခွင်ꩻ အဝ်ႏလꩻတဝ်းဒွုမ်တွော့ꩻ သက်လဲင်ꩻလꩻသွူ နီဆီသိုမ်ဆီလဲ့ မာꩻဗွုန်ႏတဝ်းဒွုန်းတမုဲင်ꩻမုဲင်ꩻ လဲင်ꩻတွိုႏစွဉ်ႏဖဝနဝ်ꩻသွူ၊ အီႏမာꩻထာꩻတစွိုးစွိုးယို ငမ်းအကုဲင်၊ နန်းအမာႏကရိုꩻဒါႏ ထာꩻငမ်းသꩻယို အဝ်ႏဗွို့ꩻခြောႏလꩻ သꩻကိုတဲင် တရွန်ꩻထန်ႏနွောင်ꩻတဝ်းဒွုမ် ထာꩻနန်းထာꩻငမ်းဖဝနဝ်ꩻသွူ။ မျက်မောက်ယိုခါ မန်းခမ်းထီကို မန်းထမ်းထီသားတဲ့နဝ်ꩻ၊ ပအိုဝ်ႏပိုလီꩻပေႏကိုဒျာႏတဲ့နဝ်ꩻ ကအဝ်ႏကျုံႏဗာႏ အအာသွတ်ꩻနဝ်ꩻ ပျဿနာႏယိုတဗာႏနဝ်ꩻသွူ၊ တခိန်ႏကို ကွပ်စွဉ်းဒျာႏ ငမ်းအမာႏ နန်းအမာႏတွော့ꩻ လိုꩻတန်နဝ်ꩻ ခုမ်မာꩻလို့၊ ဖေႏသွဉ်မာꩻတဝ်းလိုꩻပေႏတဲင် ဖူးဝေးလိုꩻတန် မိဉ်ႏအဝ်ႏတဝ်း တနီꩻခိန်ႏ လိုꩻပေႏ မော့ႏတွိုႏအီဗာႏ ထာꩻဒုက္ခနဝ်ꩻသွူ။ ကွပ်ရက်ငါႏတွော့ꩻ နန်းအတရွို့ꩻ၊ ကွပ်ရာႏငါႏမꩻ ငမ်းအမာႏနဝ်ꩻ မွေးဒျာႏသွူ၊ ရက်တဝ်းမွေးတဝ်း ကွပ်ရက်လွဉ်ꩻငါႏတဲင် ထွာထိုꩻဒါႏ ထာꩻရက်မာႏနဝ်ꩻသွူ။ သက်တဆီသွစ်ꩻနေင်ႏမာꩻလနဝ်ꩻ သွဉ်ဖေႏ ဒေါ့ꩻဖေႏ အဝ်ႏမွေးဒျာႏသွူ၊ ပအိုဝ်ႏကို ကဲဉ်းအာအာ ပိုလီꩻလိုꩻပေႏ သက်လဲင်ꩻလꩻသွူ နီဆီသိုမ်ဆီလဲ့ ကထွာမွိုးဖါလိုꩻတန်နဝ်ꩻ တွမ်ႏထာꩻနန်းတဲင် ကအဝ်ႏဒေါ့ꩻဖေႏနဝ်ꩻ ထီႏဗာႏနဝ်ꩻသွူ၊ အဝ်ႏပေႏခိန်ႏ မာꩻခွင်ꩻသွဉ်ခွင်ꩻ နမ်းမော့ꩻမိဉ်ႏအဝ်ႏဗာႏနဝ်ꩻ အရွယ်ႏနီသိုမ်ဆီယို ဝွေꩻအုံထွိုင်ႏချာနွောင်ꩻ၊ ဝွေꩻစဉ်ꩻစာꩻခွဲꩻချာꩻချာနွောင်ꩻဒါႏလဲဉ်းနဝ်ꩻသွူ။ ကွပ်ပွိုးစွဉ်ႏဒျာႏ ဖူးဝေးလိုꩻတန်သီး သꩻတဆွော့ꩻတဝ်း၊ အွဉ်ႏစွꩻလဲဉ်းတဝ်းတွော့ꩻ ထွိုင်ႏဒေါ့ꩻဖေႏတသေႏသေႏနဝ်ꩻ ကထွာလိုꩻပေႏယို မိဉ်းအီႏမာꩻ ထာꩻမာꩻတမျိုꩻမျိုꩻနဝ်ꩻ နမ်းတွမ်ႏနမ်း ယုမ်းအံႏမု ဗွေတဝ်းဒွုမ်နဝ်ꩻသွူ။ စီꩻပွါꩻရေꩻအလꩻ အွဉ်ႏပလို့ꩻအနီꩻအရင်ꩻဖဲ့ꩻဆဲင်ႏရာꩻ တရိုꩻတဝ်း၊ ရပ်ကိုဒေႏသကို လိုႏအပ်အမျိုꩻမုဲင်ꩻ ခုမ်မာꩻထွင်ႏအွဉ်ဖေႏ တရိုꩻတဝ်း၊ အီႏဒေါ့ꩻဗာႏ ငဝ်းအမဲဉ်ႏတရာꩻဖုံႏယိုတရိုꩻတဝ်း နမ်းတွမ်ႏနမ်း ယုမ်းအံႏမုဗွေဗွေ၊ ခံႏထူႏချက်တဉ်ႏတဉ်ႏတဲင် အုံထွိုင်ချာ စဉ်ꩻစာꩻခွဲꩻချာꩻချာနွောင်ꩻအရန်း ဖေႏကထွာလွဉ်နဝ်ꩻ ဖူးဝေးလိုꩻတန်တွမ်ႏ အသောင်အရင်ꩻသီးယို အဝ်ႏလိုႏနွန်ႏဖေႏအာႏဒျာႏ တွမ်ႏအနယ်ꩻမဲဉ်ႏမဲဉ်ႏနဝ်ꩻသွူ။ မိဉ်ႏထွားပညာႏရေꩻစနစ်လဲ့ ကျပ်အွံယို စေဖြေႏချာယို၊ ထွားအွံအတွိုင်ꩻ စေဖြေႏချာနဝ်ꩻအတွိုင်ꩻခေတ်၊ တွမ်ႏရိုꩻတဝ်း အီႏဖေႏအာႏ မာꩻတနယ်ꩻလꩻတဝ်း ကျိုꩻစာꩻယင်းတနယ်ꩻ ငမ်းအမာႏ နန်းအမာႏတဲင် တနယ်ꩻနယ်ꩻငါတဲ့ ဖေႏသွဉ်ထူႏ ဖေႏခုမ်မာꩻတဝ်းလိုꩻပေႏ-စတဲင် အုံအဝ်ႏလွဉ်ꩻဗာႏဒျာႏ တွမ်ႏအသောင်အရင်ꩻနုဲင်းယို နီမန်းခမ်းလိုꩻပေႏ၊ အဝ်ႏသေငါႏအမဲဉ်ႏလဲ့ ဒေါ့ꩻချာတဗွုန်ႏတဝ်းနဝ်ꩻ ကွပ်စွဉ်ႏဒျာႏ ဖူးဝေးလိုꩻတန်သီး ထာꩻရက်ယို အဝ်ႏဒို့ꩻတခြို့ခါꩻ။ ကမ္ဘာႏလောင်း ကထွာဒါႏ အစ္စရေးလ်ခမ်းထီ ဂျူးလိုꩻမျိုꩻနဝ်ꩻ ကမ္ဘာႏဉာဏ်ႏအဟဝ်သွတ်ꩻလိုꩻမျိုꩻ လဲင်ꩻတွင်ႏဟဲ့ꩻရိုꩻနေးနဝ်ꩻသွူ။ ဂျူးလိုꩻမျိုꩻယို တေက်ꩻနျꩻခံႏဗာႏအမျိုꩻမျိုꩻထွူ ခမ်းထီထိုꩻမားထဲ့သုမ်ꩻဗာႏဖိုနဝ်ꩻသွူ။ ဂျူးလိုꩻမျိုꩻလိုꩻဖြာꩻပေါင်ꩻယို အဝ်ႏကမ္ဘာႏလိုꩻဖြာꩻပေါင်ꩻ ၀-၂ရျာꩻခေါင်ꩻလဲ့ ကမ္ဘာႏလောင်းအခြွေသွတ်ꩻ ထာꩻမာꩻပဲင်ႏဗွေႏစာႏရင်ꩻနဝ်ꩻ အဝ်ႏပါ ၅၀ ရျာꩻခေါင်ꩻတွမ်ႏ ကမ္ဘာႏလောင်း ပညာႏအဝ်ႏလိုꩻမိဉ်ꩻတန်အိုင်းစတိုင်း၊ ကားလ်မတ်စ်၊ တာအိုဝင်သီးဖုံႏယို ထွာဒျာႏဂျူးလိုꩻမျိုꩻနဝ်ꩻသွူ။ ဂျူးလိုꩻမျိုꩻသီးနဝ်ꩻ ယံဟဝ်ဒါႏလိုꩻပေႏ ပညာႏရေꩻယို ထင်ႏထိုပြွူႏဖြိုရေꩻအတာႏ ဟဝ်ကျိုꩻတာႏ ထါာအခေႏခံႏ ယုမ်းအံႏခါꩻနဝ်ꩻသွူ၊ လိုꩻပေႏသီး ထာꩻယူႏလွစ်တခြင်ဖေႏဒျာႏ၊ နမ်းတွမ်ႏနမ်း အုံတနွောင်းချာ၊ နမ်းတွမ်ႏနမ်း အာႏကွိုꩻယုမ်းအံႏချာ ဖေႏကအဝ်ႏနဝ်ꩻ အွဉ်ႏရေꩻလွူးသွဉ်လွေꩻဖေႏနဝ်ꩻသွူ။ သက်ဗꩻငတ်ꩻနေင်ႏနဝ်ꩻ အဝ်ႏရက်ဒျာႏ၊ သက်လꩻတဆီနေင်ႏနဝ်ꩻ ဝွေꩻကနွောင်ꩻရာꩻယို ထွဉ်ႏမာꩻ၊ သက်မိဉ်ႏလꩻသွူ တဆီငတ်ꩻနေင်ႏနဝ်ꩻ ဝွေꩻနမ်းယံအာႏကွိုꩻချာ အွဉ်ႏထွော့ဒါႏဗာႏနဝ်ꩻသွူ။ ဂျူးလိုꩻမျိုꩻနဝ်ꩻ လိုꩻမျိုꩻရက်လိတ်အုပ် လဲင်ꩻပုံႏခွိုင်ꩻနေးနုဲင်းနဝ်ꩻသွူ၊ လမ်းနားဟွိုန်ꩻတွိုင်ꩻယို လိတ်အုပ်စင်ႏအဝ်ႏနဝ်ꩻသွူ၊ ကဲဉ်းအာ သက်ဆီလစ်ꩻနေင်ႏမာꩻကီ ဂျူးလိုꩻယွဲးသီးဖုံႏနဝ်ꩻ တလာယို အဆေ့ꩻသွတ်ꩻ ဟော်ꩻထွားထွူ လိတ်အုပ်တဖွူꩻ သေထွꩻဗာႏနဝ်ꩻသွူ။ လိုꩻပေႏအတာႏ ဉာဏ်ႏပညာႏယို အွဉ်ႏအရေꩻလွူးသွဉ်ဖေႏနဝ်ꩻသွူ၊ ဟော်ꩻမိဉ်ႏထွူ ယံကယူႏတွေꩻဒါႏ၊ ယံကစဉ်ꩻစာꩻဒါႏနဝ်ꩻ လွူးသွဉ်ဖေႏပါနဝ်ꩻသွူ။ သွဉ်အတွိုင်ꩻကျပ်၊ ကျပ်အတွိုင်ꩻဒါႏ၊ ဒါႏအတွိုင်ꩻစေ ပညာႏရေꩻစနစ်ယို အဝ်ႏဝဲးခတ်ꩻခါꩻဒျာႏ နီလိုꩻပေႏသီး ကတူႏခီး အထီအသွီႏနဝ်ꩻသွူ။ နဝ်ꩻမꩻ နီလိုꩻပေႏသီး တယ်ႏပေႏခါယို ဖေႏကဟော်ꩻလွူꩻကျင်ꩻလိတ် အဝ်ႏလိုႏသွဉ်ဖေႏငါႏနဝ်ꩻသွူ၊ မိဉ်ႏဟော်ꩻထွူသွူ ဖေႏကယူႏတွေꩻ စဉ်ꩻစာꩻလွဉ်ꩻဒါႏ အဝ်ႏလိုႏသွဉ်လွူꩻဖေႏငါႏနဝ်ꩻသွူ၊ နဝ်ꩻမꩻ ထာꩻဒါႏထာꩻသေအလောင်း နမ်းထာꩻထီႏတွမ်ႏ ဖန်ဆင်ꩻထာꩻယူႏထသာသားဖုံႏ အီႏထန်ႏအာလွဉ်နဝ်ꩻသွူ။