ဖြားခွန်ဝိဇ္ဇာႏ
ခွန်ဖိုးတူး၊ ကျောင်ꩻဆရာႏခွန်ဖိုးတူး (ဟဲ့ꩻ) ဖြားခွန်ဝိဇ္ဇာႏ နဝ်ꩻ ထွာဒျာႏ ပအိုဝ်ႏစွိုးခွိုꩻ ဖြိုတန်ထင်ႏထိုရေꩻတာႏ စွိုးခွိုꩻ ဘာႏသာႏ လိတ်လုဲင်ꩻရေꩻအတာႏ အွဉ်ငါကျိုꩻဆောင်ႏသားတဖြာꩻဒျာႏသွူ။ ကျောင်ꩻဆရာႏခွန်ဖိုးတူး (ဟဲ့ꩻ) ဖြားခွန်ဝိဇ္ဇာႏ လွူးဖွါꩻဇာႏတိရပ်နဝ်ꩻ ထွာဒျာႏ ဝေင်ꩻနယ်ႏသထုံႏတန် အွိုင်ႏစဲက်ကောႏ (ကျိုက္ကော်ကျေးရွာအုပ်စု)၊ ဒုံကင်မွန်းချုံ (ကင်မွန်းချုံရွာ) အဖါဦးပန်း မွိုးမဉ်ꩻ (နင်ႏ----)၊ အဝ်ႏမွိုးဖါနီဖြာꩻ လွူးဖွာꩻလင်ꩻ ကေားဇာႏနေင်ႏ ၁၂၉၇-ဗာႏ၊ လာဒဲဉ်ကံလောင်း(၇)နီꩻ၊ မွူးနီꩻ-အင်္ဂါႏ၊ ခရာဇ်နေင်ႏ ၁၉၃၆-ဗာႏ၊ လာဇန်နဝါရီ (၁၄)နီꩻ၊ ပေႏခါမဉ်ꩻ "မောင်ဖိုးတူး"နဝ်ꩻသွူ။ ဖူးဝေး(၄)ဖြာꩻအကို မောင်ဖိုးတူးယို ထွာဒုတိယတဖြာꩻသွူ။
| ဖြားခွန်ဝိဇ္ဇာႏ | |
|---|---|
| မိဉ်ꩻ ဇာႏတိ | ခွန်ဖိုးတူး |
| လွူးဖွာꩻ | ကေားဇာႏနေင်ႏ ၁၂၉၇-ဗာႏ၊ လာဒဲဉ်ကံလောင်း(၇)နီꩻ၊ မွူးနီꩻ-အင်္ဂါႏ၊ ခရိစ်နေင်ႏ ၁၉၃၆-ဗာႏ၊ လာဇန်နဝါရီ (၁၄)နီꩻ၊ ဝေင်ꩻနယ်ႏသထုံႏတန် အွိုင်ႏစဲက်ကောႏ (ကျိုက္ကော်အုပ်စု)၊ ဒုံကင်မွန်းချုံ၊ |
| သီမား | နေင်ႏ ၁၃၆၆-ဗာႏ လာတထိန်ႏလောင်း (၁၂)နီꩻ၊ (၈-၁၂-၂၀၀၄) သက်လꩻ (၆၉)နေင်ႏ ဝေင်ꩻတောင်ႏကီꩻ ဒုံဟံႏဗွာ၊ |
| ခမ်းထီခွိုꩻ |  မျန်မာ |
| လိုꩻမျိုꩻ |  ပအိုဝ်ႏ |
| ပညာႏရေꩻ | မန်းခမ်းလꩻလွစ်တခြင်ရေꩻထွူ အရန်းထိုကမ္ဘာႏ အထကပညာႏရေꩻ အောင်ႏလꩻအရန်း(၁၀)၊ |
| ထာꩻမာꩻ |
|
| အစွိုꩻအဗူႏ |
|
| မိဉ်ꩻကျော်ႏလွီးဟွမ်ဗာႏခရာႏ | ကျောင်ꩻဆရာႏ |
| ကိုꩻကွဲႏယွုမ်းအံႏမုꩻ | ဗုဒ္ဓဘာႏသာႏ |
| ပိုဖုံႏ | နင်ႏမီႏဗဲ့ (ဟဲ့ꩻ) နင်ႏဆွေစီ (ရွှေကြည်)၊ ခွန်ဖိုးစိန် (၁၀)တန်ꩻ၊ နင်ႏခံꩻ၊ နင်ꩻမိနု၊ နင်ႏအောင်ႏ၊ နင်ꩻသန်းအေး၊ နင်ႏမိအု၊ ခွန်ကျော်ခမ်း၊ ခွန်ကျော်ဟိန် |
| မွိုးဖာ(ဗွေႏ) | ဖြားပန်း၊ မွိုး- |
ပညာႏရေꩻအထီအသွီႏ
မွဉ်းဖျင်မန်းခမ်းလꩻလွတ်လပ်ရေꩻထွူဆုဲင်ꩻနဝ်ꩻ ဝွန်ႏတန်ချုတ် ဦးနုခေတ်စိုးတွင်ꩻ ဖြေႏအောင်ႏ "အရန်းထိုကမ္ဘာႏ အထကပညာႏရေꩻ""အခြေခံပညာအထက်တန်းကျောင်း"အောင်ႏဒသမရန်း၊ အတန်ꩻ(၁၀)နဝ်ꩻသွူ။
ပအိုဝ်ႏပေႏ မဲ့နားယံဗွောင်တာႏ ထင်ႏဗာႏခမ်းကောင်
မွဉ်းဖျင်မောင်ဖိုးတူး သက်(၂၂)နေင်ႏအရွယ်ႏ ခရာဇ် ၁၉၅၈-ဗာႏ နေင်ႏထျꩻ ဇန္နဝါရီကာလဖေါင်နဝ်ꩻ ကျောင်ꩻဆရာႏတန် ဦးခွန်ဘအေး (သထုံနောင်ကလာꩻ၊ ခမ်းကောင်ဒုံ) ဟဲ့ꩻထင်ႏခမ်းကောင် ပအိုဝ်ႏဒေႏသ၊ ဖေႏတာႏဝွန်ႏအွဉ်ႏမာꩻသွုပ် စူထောက်ကျောင်ꩻဆရာႏ ဒုံပဆျာႏကြိုႏ၊ သထုံႏပေႏသီႏသဲင်ႏနယ်ႏနဝ်ꩻသွူ။ ခရာဇ် ၁၉၅၈-ဗာႏ၊ မေလာ နွောင်ꩻဟံႏတောႏအစိုႏရတွမ်ႏ ပအိုဝ်ႏစွိုးခွိုꩻအွဉ်ငါ ကထွာဒါႏ ဖြားဗွာဦးလှဖေ၊ ဗိုလ်တုံ (ဗိုလ်ချန်ဇုံ)သီးစွိုꩻ ခါးလားလားကထူႏ "ဒီမိုကရေစီတွမ်ႏ လက်နက်စူခွုမ်လုဲင်ႏလို့ဝင်ꩻ"(ငြိမ်းချမ်းရေး)ညိမ်ꩻဖေ့ရောင်းရျူႏနဝ်ꩻ ဖြားဗွာဦးလှဖေ ဟဲ့ꩻထင်ႏဆရာႏခွန်ဘအေး လူထုခေတ်ပညာႏရေꩻ မာꩻကျောင်ꩻဆရာႏ ပဆျာႏကြိုႏ၊ ဆရာႏခွန်ဘအေး အဝ်ႏလိုႏလွေꩻဗွောင်တေားတေားရပ်လောင်ႏလင်၊ ဝေင်ꩻနယ်ႏလင်တဲင် ဆရာႏခွန်ဘအေး နမ်းခြောင်ꩻတင် (ကိုယ်ႏစာꩻ)နဝ်ꩻ ဆရာႏဖိုးတူး နွို့သော့ꩻထူႏတာႏဝွန်ႏသွဉ်ဖေႏ သွဉ်စွဲးပင်ႏကိုနဝ်ꩻသွူ။
သွဉ်တန်ꩻဒါႏလျင်ႏ အ-သွံဖြုံႏ
မွဉ်းဖျင်ခရာဇ် ၁၉၅၉-ဗာႏ တယ်ႏစလာဇူလဲင် (၂၇)နီꩻ ဗꩻဩဂုတ် (၁၅)နီꩻ ညဆွာꩻ (၂၁)နီꩻ မောင်ဖိုးတူးပါတွမ်ႏ ခမ်းကောင်စွိုꩻ ဆရာႏလောင်ႏလင် (၃၅)ဖြာꩻ လင်ꩻထင်ႏ "သွဉ်တန်ꩻဒါႏလျင်ႏ အ-သွံဖြုံႏ"(အ-သုံးလုံးကြေသင်တန်း) မိတ္ထီလာႏနဝ်ꩻသွူ။ ပ-အ-မ-ဖ စွိုးခွိုꩻအွဉ်ငါ ဖြားဗွာဦးလှဖေ စုခြွဉ်းဖန်းဖြယ်ဖေႏ ထင်ႏသွဉ်တန်ꩻသား ခမ်းကောင် (၃၅)ဖြာꩻစွိုꩻကို မောင်ဖိုးတူးယို ပါညီꩻရဝ်းတဖြာꩻသွူ။ တနယ်ꩻမဉ်ႏဒေါ့ꩻဗာႏ ဖြားဗွာဦးလှဖေ ပိုလီꩻရဲဘော်ဝွန်ႏထမ်ꩻ ထေင်းထမ်ႏစွိုးခွိုꩻတာႏဝွန်ႏတဖြာꩻနေနေ။ မောင်ဖိုးတူး ထင်ႏသွဉ်တန်ꩻ "အ-သုံးလုံးကြေသင်တန်း-မိတ္ထီလာႏ""စိတ်ဓာတ်စစ်ဆင်ရေးသင်တန်းကျောင်း၊ မင်္ဂလာဒုံ"ဝေင်ꩻရန်ႏကွုန်ႏနဝ်ꩻသွူ။ သွဉ်တန်ꩻယိုနဝ်ꩻ သွဉ်ဒျာႏနွောင်ꩻဟံႏရေꩻ သမဲင်ꩻရေꩻရာႏ လိတ်လုဲင်ꩻယေန်ႏငဲးရေꩻစစွဉ်ႏ ခမ်းထီအင်္ဂါႏထာꩻမာꩻဖုံႏရိုꩻနဝ်ꩻသွူ။ သွဉ်တန်ꩻမင်္ဂလာဒုံ ထင်ႏထွူတဲင် မောင်ဖိုးတူးသီး ခမ်းကောင်စွိုꩻ (၃၅)ဖြာꩻ သဲင်ꩻလို့ခမ်းကောင် ဝေင်ꩻတောင်ႏကီꩻသွူ၊ မောင်ဖိုးတူးနဝ်ꩻ သဲင်ꩻချာပဆျာႏကြိုႏ သွဉ်သွုပ်ဖေႏယင်း ကျောင်ꩻသားမူႏခိုသီး မူလရန်းပညာႏ ပဆျာႏကြိုႏ။
အ-သုံးလုံးကြေ ဆရာဖြစ်သင်တန်း၊ မိတ္ထီလာမြို့
မွဉ်းဖျင်အ-သုံးလုံးကြေသင်တန်း ကရိုꩻနဝ်ꩻ-
- ၁။ အရေး- တဲမ်းဒါႏဗာႏ
- ၂။ အဖတ်- ဟော်ꩻဒါႏဗာႏ
- ၃။ အတွက်-နပ်တွက်ဒါႏဗာႏ
အ-သုံးလုံးသင်တန်းယိုနဝ်ꩻ နွောင်ꩻဟံႏတောႏအစိုႏရ အင်းမိုးချက် အွဉ်ႏဖေႏဒျာႏစဲ့ꩻတပ်မတောႏ (မြန်မာ့တပ်မတော်)တာႏ၊ ဗွောင်ဖေႏဝွေꩻသီးစဲ့ꩻတာႏဒျာႏသွူ၊ "စာမတတ်သူ ပပျောက်ရေး စီမံကိန်း"ကိုနဝ်ꩻ ထွို့ꩻငင်ႏသော့ꩻပါစဲ့ꩻ။ စဲ့ꩻမန်း (မြန်မာ့တပ်မတော်)ဒါႏတဝ်းလိတ် ကဲဉ်းအာအာတဲင် စဲ့ꩻတဖွောင်ꩻစီꩻကန်ꩻ၊ စဲ့ꩻဥပဒေႏတသေတဝ်း၊ တဖြောင်တဝ်း၊ ထွာအီခမ်းထီထင်ႏထိုရေꩻ အရဲးအပါႏ (အဆီးအတား)နဝ်ꩻမꩻ ပအိုဝ်ႏစွိုးခွိုꩻအွဉ်ငါ ကထွာဒါႏ ဖြားဗွာဦးလှဖေ ပအိုဝ်ႏစဲ့ꩻကတူႏ (စစ်ဦးစီးချုပ်)ပိုႏတုံ (ဗိုလ်ချိန်ဇုံ) ဝွေꩻသီးထာꩻထီႏ ပအိုဝ်ႏဒေႏသကိုယိုလဲ့ ယိန်းအဝ်ႏလိုႏ၊ အဝ်ႏလိုႏမွေးမရေႏမရာႏ ဆန္ဒထာꩻထီႏအဝ်ႏနုဲင်းနဝ်ꩻမꩻ ပွိုင်ဆင်မာꩻလွေꩻဗာႏ ပိုလီꩻပအိုဝ်ႏမူႏခိုလောင်း သွိုန်ႏသꩻကိုနဝ်ꩻသွူ။
ပအိုဝ်ႏခမ်းကောင်(၃၅)ဖြာꩻစွိုꩻ
မွဉ်းဖျင်ကလင်ꩻထင်ႏဒျာႏ "မိတ္ထီလာႏ အ-သုံးလုံးကြေသင်တန်း""မင်္ဂလာဒုံ စိတ်ဓာတ်စစ်ဆင်ရေးသင်တန်း"ခမ်းကောင် (၃၅)ဖြာꩻစွိုꩻကို ကတောင်ꩻထွꩻဒင်ႏပျꩻအွဉ်ႏနယ်ဗာႏနဝ်ꩻ-
- (၁) ဆရာႏခွန်မျိုးလွင် (နောင်ကလာꩻ၊ ဒုံခမ်းကောင်) ဆုဲင်ꩻတာႏဝွန်ႏထဲ့ ဒုံလုံးဒါ ဝေင်ꩻနယ်ႏသီႏသဲင်ႏ။
- (၂) ဆရာႏမောင်ဖိုးတူး (သထုံကျိုက္ကော်၊ ကင်မွန်းချုံရွာ) ဆုဲင်ꩻတာႏဝွန်ႏထဲ့ပဆျာႏကြိုႏ၊ ဆုဲင်ꩻမာထေင်းထံႏသွုပ်ပအိုဝ်ႏဒုတိယတောႏလန်ႏရေꩻ ၁၉၆၇-PNO ညိမ်ꩻချမ်ꩻရေꩻကာႏလ။
- (၃) ဆရာႏစိုးမောင် (ဟိုပုံꩻ) ဆုဲင်ꩻတာႏဝွန်ႏထဲ့နောင်စုံ။
- (၄) ဆရာႏအောင်စီ(ကြည်) နောင်ကလာꩻ၊ ဒုံခမ်းကောင်။
- (၅) ဆရာႏအောင်စိန် (နောင်ကလာꩻ)။
- (၆) ဆရာႏထွက်ဖေ (ထမ်းယံꩻ)။
- (၇) ဆရာႏထွက်ဒုတ် (ပင်အွဉ်း)။
- (၈) ဆရာႏလစိန် (တောင်ႏကီꩻ၊ ခဝ်နဝ်)။
- (၉) ဆရာႏထွန်းအောင် (ပင်လောင်ꩻ)(ပေယျာလ)
- (၃၅) ဆရာႏထွန်းသိန်း (စဲက်ကော်ꩻ ဒေါက်ရပ်)
စိတ်ဓာတ်စစ်ဆင်ရေးသွဉ်တန်ꩻကျောင်ꩻ
မွဉ်းဖျင်'စိတ်ဓာတ်စစ်ဆင်ရေးသင်တန်းကျောင်း"ဌာႏနချုတ်နဝ်ꩻ အဝ်ႏမင်္ဂလာဒုံ၊ ရန်ႏကွုန်ႏသွူ၊ သွဉ်တန်ꩻ သွဉ်ဗာႏဘာႏသာႏနဝ်ꩻ ဆဲင်ႏရာꩻနဲင်ႏငံႏရေꩻသမဲင်ꩻ "သꩻရက်စွိုးခွိုꩻ ယံမွန်ဗန်ဖုဲင်ထင်အီတာႏ""မျိုးချစ်စိတ်ဓာတ်ရှင်သန်ထက်မြက်ရေး"လိတ်လုဲင်ꩻယေန်ႏငဲးရေꩻစတဲင် ခမ်းထီအင်္ဂါႏနဝ်ꩻသွူ။ ပအိုဝ်ႏခမ်းဒွမ် (၃၅)ဖြာꩻစွိုꩻ ထင်ႏသွဉ်တန်ꩻ မင်္ဂလာဒုံ "စိတ်ဓာတ်စစ်ဆင်ရေးသင်တန်းကျောင်း"ညဆွာꩻ (၂၁)နီꩻ ထင်ႏထွူတဲင် သဲင်ꩻသွဉ်သွုပ်ယင်း "အ-သုံးလုံးကြေဆရာႏဖြစ်သင်တန်း"မိတ္ထီလာႏနဝ်ꩻ ည(၂၁)နီꩻထင်ႏဗွေတဲင် အွဉ်ဝင်ꩻသဲင်ꩻလို့ ခမ်းကောင်ဝေင်ꩻတောင်ႏကီꩻတွော့ꩻ အုံပဆားဒုံဟံႏဗွာ၊ ဖူးဝေးပအိုဝ်ႏလမ်း။
ပအိုဝ်ႏလိုꩻယွဲးခမ်းဒွမ် ဆရာႏလောင်ꩻ (၃၅)ဖြာꩻစွိုꩻ
မွဉ်းဖျင်ပအိုဝ်ႏပေႏခမ်းဒွမ် ဆရာႏလောင်ꩻ (၃၅)ဖြာꩻစွိုꩻကို ကတောင်ꩻထွꩻဖုံႏနဝ်ꩻ-
- (၁) ဆရာႏခွန်ထွန်းရီ (သထုံမြို့၊ ကျောင်းကုန်းရပ်) ဆုဲင်ꩻတာႏဝွန်ႏထဲ့ ဝေင်ꩻနယ်ႏတောင်ႏကီꩻ ( ) ဒုံဟံႏဗွာသွူ။ ဆုဲင်ꩻနွို့မာꩻသွုပ် ပအိုဝ်ႏဒုတိယတောႏလန်ႏရေꩻ ခရာဇ် ၁၉၉၁-P.N.O (ငြိမ်းချမ်းရေးကာလ) ညိမ်ꩻဖေ့ရောင်းရျူႏ။
- (၂) ဆရာႏခွန်ကျော်ညွန့် (သထုံနောင်ကလာꩻ၊ အလယ်ရွာ) ဆုဲင်ꩻတာႏဝွန်ႏထဲ့ နယ်ႏပင်လောင်ꩻ ဒုံ----- ၊ ဆုဲင်ꩻထေင်းထံႏသွုပ် ပအိုဝ်ႏစွိုးခွိုꩻ ဒုတိယတောႏလန်ႏရေꩻ မဉ်ꩻတွင်ႏဗိုလ်မူးယက္ခ (ထဲ့သွုမ်ꩻ)။
- (၃) ဆရာႏမူႏနင်ꩻလှယေန်(ရင်) (နောက်ကလာꩻ) တာႏဝွန်ႏထဲ့ ဒုံလုဲင်းပေႏ၊ ဗန်းစောက်၊ မုဲင်းကောင်။
- (၄) ဆရာႏမူႏနင်ꩻခေန်ယီ (ခင်ရီ) တာႏဝွန်ႏထဲ့ ဒုံလုံးဒါ၊ ဝေင်ꩻနယ်ႏသီႏသဲင်ႏ။
- (၅) ဆရာႏမူႏနင်ꩻဌေး (သထုံနောင်ကလာꩻ)၊ တာႏဝွန်ႏထဲ့ ဒုံပဆျာႏကြိုႏ၊ နယ်ႏသီႏသဲင်ႏ။
- (၆) ဆရာႏစိန်ရွှေ (ခမ်းဒွမ်၊ သထုံႏဖဲ့ꩻ) အောင်ႏတန်ꩻဆီ (I.A)တာႏဝွန်ႏထဲ့ ဒုံလွယ်ပွတ်ꩻ၊ ဝေင်ꩻနယ်ႏသီႏသဲင်ႏ၊ ဆုဲင်ꩻထေင်းထံႏသွုပ် ပအိုဝ်ႏဒုတိယတောႏလန်ႏရေꩻ၊ ဆုဲင်ꩻနွို့ထေင်းထံႏ (ရ-လ-လ-ဖ)ဒုဥက္ကဋ္ဌ။
- (၇) စောငွေစိုး (သထုံႏ၊ စောက်ꩻ)။
- (၈) စောထွန်းသိန်း (သထုံႏ၊ စောက်ꩻ)
- (ပ)
- (၃၅) စောစိန်တောင် (သထုံႏ၊ စောက်ꩻ)
ဆရာႏမူႏနင်ꩻလှယေန် (နောင်ကလာꩻ၊ ယိုခါ သက်လꩻ ၇၀ ဟိုတွူး) ကထင်ႏသွဉ် "စိတ်ဓာတ်စစ်ဆင်ရေးသင်တန်း"မင်္ဂလာဒုံနဝ်ꩻ လꩻဆုꩻ (ဂုဏ်ထူးဆောင်)ဆုꩻရိုꩻနဝ်ꩻသွူ။
မာꩻပွယ်ꩻရပ်ကျိုႏလင်ꩻ သွဉ်တန်ꩻဆရာႏ
မွဉ်းဖျင်"စိတ်ဓာတ်စစ်ဆင်ရေးသင်တန်း၊ အ-သုံးလုံးကြေဆရာဖြစ်သင်တန်း"သွဉ်တန်ꩻယို နီစွိုးနီဒဝ်ႏ ထင်ႏထွူတဲင် ခမ်းဒွမ်+ခမ်းကောင် အဖြာꩻပေါင်ꩻ(၇၀)ဖုံႏယို ပ-အ-မ-ဖ ဥက္ကဋ္ဌ ဖြားဗွာဦးလှဖေဖစ်ဟဲ့ꩻစု ပ-အ-မ-ဖ ရွုမ်ꩻတန်ကို တောင်ႏကီꩻ၊ "မာꩻပွယ်ꩻရပ်ကျိုႏဆွုမ်ႏ သွဉ်တန်ꩻဆရာႏတသာ"ဖေႏငဝ်းမိန်းဩဝါဒ သွင်ꩻစိမ်သော့ꩻ ဝံသာနုသꩻဓာတ်ရက်ခွိုꩻ (မျိုးချစ်စိတ်ဓာတ်ရှင်သန်ရေး) ပါတွမ်ႏဖန်းဖြယ်ဖေႏအပ်တာႏဝွန်ႏ ထဲ့ဒုံမုဲင်ꩻ၊ လွေꩻဗာႏနယ်ႏမုဲင်ꩻဖုံႏနဝ်ꩻသွူ။ ပ-အ-မ-ဖ ဖြားဗွာဦးလှဖေဩဝါဒ တွမ်ဗဲ့ꩻထန်ႏတခူးတခဝ် (ကောက်နုတ်ချက်) ယင်ဟန်ႏနဝ်ꩻ နုဲင်းယို- "နီပအိုဝ်ႏစွိုးခွိုꩻ ခမ်းကောင်ဒေႏသနဝ်ꩻ အုံအဝ်ႏရေꩻထဲ့ဖွိုႏငါႏ၊ မဲ့နားဗွောင်တဝ်းငါႏ၊ မဲ့ငါပေႏငါႏ၊ ဝင်ꩻထီႏဖွီငါႏ နီစွိုးခွိုꩻလိုꩻမျိုꩻ၊ ကွပ်နဝ်ꩻမꩻ ကထွာဒါႏ ဆရာႏခိုသီးတဲ့နဝ်ꩻ၊ ဆရာႏမူႏသီးတဲ့နဝ်ꩻ အွဉ်ႏဗဲင်းသꩻတန်တန်၊ သꩻဆွာꩻဆွာꩻ၊ လွူးဗဲင်းဝင်ꩻ မေတ္တာႏစေႏတနာႏ အနေတ်နာႏစွုမ်ႏဖြာꩻဖြာꩻ၊ ထွားဗဲင်းထောက်ဗဲင်း နီစွိုးခွိုꩻပအိုဝ်ႏမဲ့ငါ တွမ်ႏထွာဗာႏမွိုန်း ရွဉ်ထွာအထျꩻ အသပျာဆရာႏ ယံထွာဒျာႏသွော့ စေႏတနာႏမေတ္တာႏ ကရုဏာႏဆရာႏ စွုမ်ႏဖြာꩻဖြာꩻ၊ နီသွဉ်းသီး ပ-အ-မ-ဖ မဲဉ်မေတ္တာႏရပ်ခံႏငါႏ ငဝ်းဝါႏစာႏနုဲင်းနဝ်ꩻသနယ်"စတဲင်ဝံသာနု သꩻဓာတ်ရက်စွိုးခွိုꩻဖုံႏနဝ်ꩻသွူ။
ဒေႏသခံႏရပ်သား လွဉ်ရပ်ကျိုႏဆရာႏ
မွဉ်းဖျင်"ရပ်ကျိုႏထူးဂုဏ်ႏဆရာႏသီး"အခြပ်အရဲဉ်ႏကိစ္စနဝ်ꩻထွူတဲင် ဝေင်ꩻနယ်ႏတောင်ႏကီꩻ၊ ဟိုပုံꩻ၊ သီႏသဲင်ႏ၊ ပင်လောင်ꩻ၊ ပင်ႏလုံ စင်းသင်းကောင် စတဲင်ဝေင်ꩻနယ်ႏ ပအိုဝ်ႏဒေႏသကို ဆရာႏအဖြာꩻမုဲင်ꩻ တာႏဝွန်ႏထဲ့ ဒုံမုဲင်ꩻလဲ့ ဖန်းဖြယ်ထွူတဲင် ဒေႏသခံႏရပ်ရာႏ လွဉ်ရပ်ကျိုႏလွဆရာႏ ဒုံပငါပရာꩻဖုံႏသွူ။
လူထုခေတ်ပညာႏရေꩻ
မွဉ်းဖျင်လူထုခေတ်ပညာႏရေꩻ ရိုꩻနဝ်ꩻတဲင် ကျောင်ꩻဆရာႏလာတာႏ (လꩻခꩻ) တလာ ၅၀-ရပ်နဝ်ꩻ ဒေႏသခံႏရပ်သား ထူႏတာႏဝွန်ႏဖေႏချာဒျာႏသွူ၊ ကျောင်ꩻဆရာႏအံႏဒဲဉ်ကိစ္စ အံႏချာဒျာႏတပဲ့ꩻလမ်း၊ တလမ်းထွူတလမ်း တပဲ့ꩻတွမ်ႏတပဲ့ꩻမွိုးဖါ ဖစ်ဟဲ့ꩻသွုံꩻဆောင်ႏ ဒဲဉ်ဟန်ႏရိုꩻနဝ်ꩻသွူ။ ပ-အ-မ-ဖ (ဗဟိုရ်ႏ) ကအွဉ်မာꩻဗာႏ တဖူꩻခြောင်ꩻ (လမ်းစဉ်) အခြပ်အရဲဉ်ႏနုဲင်းယိုနဝ်ꩻ အလောင်ႏလင်မွေးတဝ်း ဒေႏသခံႏတပဲ့ꩻတွမ်ႏ တပဲ့ꩻမွိုးဖါ လိုꩻအုံအဝ်ႏရေꩻ အဆင်ႏအရန်း (လူနေမှုအဆင့်အတန်း) ထဲ့ဖွိုႏလဲဉ်းဆုဲင်ꩻတကားမုဲင်ꩻ၊ ရန်းထိုတကားမုဲင်ꩻ တယ်ႏစစွဉ်ႏအထျꩻ ကမ္ဘာႏ(အောက်ခြေကွင်းဆင်းလေ့လာ)သဖော်ꩻယံကသေထွꩻလို့ လက္ခဏာႏအမုဲင် အခေႏအနေႏနဝ်ꩻသွူ။ မဉ်ႏမော့ꩻတလူႏခွဲးကျုံႏ တနောက်ꩻလို့ဝင်ꩻ ဟော်ꩻနယ်ခြုဲင်းနယ်ဖေႏသဖော်ꩻတရာꩻ စိမ်ထဲမ်သော့ꩻ ဆရာႏသီးထာꩻသေ ဗဟုသုတတဲ့လꩻ၊ စွီႏစူထွို့ꩻဗူႏ ဟဲ့ꩻလွေꩻထွို့ꩻဗူႏအီတာႏ (စည်းရုံးရေး)တဲ့ထွာပါ ကျောင်ꩻဆရာႏဦးခွန်မျိုးလွင် "နောင်ကလာꩻ၊ သက်(၇၇)"ခြုဲင်းနယ်နုဲင်းနဝ်ꩻသွူ။
ပိုအဝ်ႏညီꩻဝင်ꩻ (၉)ဖြာꩻ
မွဉ်းဖျင်(၁) နင်ႏမီႏဗဲ့ (ဟဲ့ꩻ) နင်ႏဆွေစီ (ရွှေကြည်) (၂) ခွန်ဖိုးစိန် (၁၀)တန်ꩻ (၃) နင်ႏခံꩻ (၄) နင်ꩻမိနု (၅) နင်ႏအောင်ႏ (၆) နင်ꩻသန်းအေး (၇) နင်ႏမိအု (၈) ခွန်ကျော်ခမ်း (၉) ခွန်ကျော်ဟိန်း တောႏလမ်းထွူတဲင် ကျိုꩻဆောင်ႏဖေႏဌာႏန "ဟိုပုံꩻ-ရန်ႏကင်ꩻ သေင်ႏလာႏပွယ်ꩻယွုံႏ"နမ်းခြောင်ꩻတင် (မန်နေးဂျာ)နဝ်ꩻ သွံနေင်ႏ။ ခရာဇ် ၁၉၆၄-ဗာႏ၊ သက်(၂၉)နေင်ႏဖေါင်ꩻနဝ်ꩻ ခွုမ်မာꩻကျိုꩻဆောင်ႏဖေႏ ပ-အ-မ-ဖ နမ်းခြောင်ꩻတင် (မန်နေဂျာ) ပွယ်ꩻယွုံႏ ဘန်းယေန်ႏနဝ်ꩻ သွံနေင်ႏ။ ခရာဇ် ၁၉၆၇-ဗာႏ၊ သက်(၃၂)အရွယ်ႏ သေင်ႏလာႏပွယ်ꩻယွုံႏ ဘန်းယေန်ႏနဝ်ꩻ ပြောင်ꩻပြွတ်လုဲင်ႏ လိုꩻပေႏယွဲးဆꩻလထွူတဲင် နွို့ထေင်းထံႏ ပအိုဝ်ႏစွိုးခွိုꩻ ဒုတိယတောႏလန်ႏရေꩻ ဗꩻ ၁၉၉၁-ဗာႏ၊ ပီအဲန်အိုတွမ်ႏ စဲ့ꩻအစိုႏရ "အွဉ်ႏယွုတ်ဆွိုးတွိုက်ꩻခꩻ-ညိမ်ꩻချံꩻရေꩻကာႏလ"နဝ်ꩻသွူ။ ထေင်းထံႏရုဲင်ꩻတသွိုးသွုပ်တငါငါ ဒုတိယတောႏလန်ႏရေꩻကာႏလတွင်ꩻ တဲမ်းထွတ်နျꩻထန်ႏ "ပအိုဝ်ႏစွိုးခွိုꩻသမဲင်ꩻ (PA-OH PEOPLE. by mika Rolly)။ ပါတွမ်ႏတလာ (၁)လဲင်ႏ (ဗဟိုရ်ႏ)အနေႏ ထွတ်ထေ "စွိုးခွိုꩻအာႏရဲင်ꩻဂျာနယ်"ပအိုဝ်ႏ+မန်း+အင်္ဂလိပ် သွံဘာႏသာႏ ကွပ်တွယ်ꩻဝင်ꩻနဝ်ꩻသွူ။
ထေင်းထံႏစွိုးခွိုꩻထာꩻမာꩻဖုံႏ
မွဉ်းဖျင်- (၁) ခရာဇ် ၁၉၅၈-ဗာႏ၊ မေလာ (၅)နီꩻ ဒီမိုကရေစီတွမ်ႏ လက်နက်စူခွုမ် ပြွတ်လုဲင်ႏဝင်ꩻထွူ မာꩻကျောင်ꩻဆရာႏ။
- (၂) ပ-အ-မ-ဖ (ဗဟိုရ်ႏ) ရွဉ်တောင်ႏတာႏ သေင်ႏလာႏပွယ်ꩻစာꩻယွုံႏ အဝယ်ဒိုင် ဟိုပုံꩻ၊ ဘန်းယေန်ႏ၊ ထေင်းထံႏမာꩻ မန်နေဂျာ (၆)နေင်ႏ။
- (၃) ၁၉၇၆-ဗာႏ ကလွောင်ႏဗူႏစတသာဒါႏ ပအိုဝ်ႏစွိုးခွိုꩻအစွိုꩻ (ပီအဲန်အို) လုံးဒါ ညီႏလာႏခံႏနဝ်ꩻ အမျာꩻသဖော်ꩻတူႏ ဒင်ႏမျောက် ဗဟိုရ်ႏကောႏမတီႏ ပါအစွိုꩻကို။
- (၄) ၁၉၇၇-ဗာႏ၊ ကျောင်ꩻကို (ဗဟိုရ်ႏ) အစီꩻဝွေꩻထွူနဝ်ꩻ ထွာအွဉ်အကိုရေꩻ (တွဲဘက်အတွင်းရေးမှူး)။
- (၅) သူရိယခမ်း ခမ်းဗွေႏတာႏဝွန်ႏ။
- (၆) ၁၉၉၁-ဗာႏ၊ ဧပြီလာ (၁)နီꩻ န-ဝ-တ စဲ့ꩻအစိုႏရတွမ်ႏ ပီအဲန်အို အွဉ်ႏယွုတ်ꩻတွိုက်ꩻခꩻ ညိမ်ꩻဖေ့ရောင်ႏရျူႏထွူနဝ်ꩻ ထွာပီအဲန်အိုအွဉ်ငါ အွဉ်အကိုရေꩻ (အတွင်းရေးမှူးချုပ်)။
- (၇) ပဆျာႏကြိုႏ တွယ်ꩻဖက် အ-ထ-က ယံထွာနွောင်ꩻတာႏ တမာဆွာႏကို နာယကလိုꩻတန်။
- (၈) တယ်ႏနေင်ႏ (၁၉၉၉၊ ၁၃၆၀) တွမ်ႏ ၂၀၀၀၊ ၁၃၆၁-နေင်ႏတွင်ꩻ (ဒဲဉ်သီႏလက်ဆောင်ႏ ၁၈-၁၉)ထေင်းထံႏသောင်ႏသာကို "ဒဲဉ်သီႏလက်ဆောင်ႏ ရွမ်ဖြုဲင်ꩻအယ်ဒီတာ (မွဉ်းချော်ꩻ)စွိုꩻ"တွမ်ႏ ခံႏအထျꩻထူႏ တာႏဝွန်ႏတဲမ်း ဆဲင်ႏရာꩻသမဲင်ꩻရွမ်ဖြုဲင်ꩻ (ဆောင်းပါး) ဖြားဗွာဦးလှဖေ အတ္ထုပ္ပတ္တိစတဲင် စွိုးခွိုꩻအကျိုꩻကေꩻဇူꩻတန်အာ လိတ်လုဲင်ꩻဖုံႏနဝ်ꩻသွူ။ ထေင်းထံႏထွတ်တဲမ်း ဆဲင်ꩻရာꩻပအိုဝ်ႏသမဲင်ꩻရုဲင်ꩻနေတွင်ꩻဖုံႏသွူ။
နေင်ႏ ၁၃၆၆-ဗာႏ၊ လာကထိန်ႏလောင်း (၁၂)နီꩻ (၈-၁၂-၂၀၀၄) သက်လꩻ (၆၉)နေင်ႏ ဗျာဓိဓမ္မလိုꩻဖြား ရောႏဂါႏနိစ္စက်တေက်ꩻနျꩻတဲင် အနိစ္စခန္ဓာႏပြောင်ꩻကုဲင်ထိုꩻ တောင်ႏကီꩻ ဒုံဟံႏဗွာ အဗွေႏဖြားလမ်း ဂေဟာလောင်းကိုနဝ်ꩻသွူ။ ပအိုဝ်ႏစွိုးခွိုꩻ ထွတ်လိတ် (စာဆိုတော်) တဖြာꩻဟူးလင်ꩻထိုꩻနဝ်ꩻသွူ။
ဒဲဉ်သီႏလက်ဆောင်ႏ အမုဲင်(၂၅)ကိုနဝ်ꩻ ထူႏတာႏဝွန်ႏကိုဗာႏဖို တာႏဝွန်ႏလဲ့အဝ်ႏပါနဝ်ꩻသွူ။ နဝ်ꩻလွုမ်ꩻတကာႏတဝ်း ဖြားခွန်ဝိဇ္ဇာႏယိုနဝ်ꩻ နေးတွမ်ႏကလောင်အာႏတဲင် ကတဲမ်းဗာႏသုံꩻအီဗာႏဖို ကလောင်မဉ်ꩻနဝ်ꩻ-
- (၁) ခွန်စောက်အာႏ-မုဲင်းကောင်
- (၂) ခွန်နေႏသား - မုဲင်းကောင်
- (၃) ခွန်အိုး-သထုံႏပေႏ
- (၄) ပိုႏခံꩻ- သုဝဏ္ဏခမ်း ဒဲဉ်သီႏလက်ဆောင်ႏ အမုဲင်(၃၂)ကိုနဝ်ꩻ အဝ်ႏပါလွေꩻနုဲင်းနဝ်ꩻသွူ)။ ဒဲဉ်သီႏလက်ဆောင်ႏ အမုဲင်(၁၆)ကိုနဝ်ꩻတဲ့ ရွမ်ဖြုဲင်ꩻ၊ ဝတ္ထုအဝ်ႏပါသော့ꩻ၊ ကွဲႏတွော့ꩻ (၁၁)ဗꩻလွေꩻ (၁၅)ငတ်ꩻတဲ့နဝ်ꩻ (၁၇/၁၈)တဲ့နဝ်ꩻ စီႏခြပ်သားထျꩻယို ဒဲဉ်သီႏလက်ဆောင်ႏ လိတ်စောင်ႏအဲဉ်ထဝ်းတဲင် ပါတပါတဝ်းနဝ်ꩻ သေထွꩻတဝ်း၊ အမုဲင်(၁၉/၂၀)ကိုဖုံႏလဲ့ပါဒျာႏ၊ အမုဲင်(၂၁)နဝ်ꩻလဲ့ လိတ်စောင်ႏအဲဉ်ထဝ်းတွော့ꩻ သေထွꩻတဝ်း၊ အလွိုးပါဒျာႏနေနေ၊ အမုဲင်(၂၂/၂၃)ဗꩻလွေꩻအမုဲင်နဝ်ꩻဖုံႏနဝ်ꩻ ရွမ်ဖြုဲင်ꩻတဝ်းလဲ့ ဝတ္ထုဖုံႏနဝ်ꩻအဝ်ႏပါ၊ ကွပ်ပွိုးနဝ်ꩻမꩻ ဝွေꩻဖြားယိုနဝ်ꩻ စွိုးခွိုꩻ ဘာႏသာႏ လိတ်လုဲင်ꩻရေꩻအတာႏ အွဉ်ငါကျိုꩻဆောင်ႏသားတဖြာꩻအနေႏ ဒင်ႏခါꩻဗာႏမုဲင်တောင်ꩻသေꩻနုဲင်းယိုသွူ။ (စီႏခြပ်လိတ်သား)။အာစရိယ ဂုဏော အနန္တော-[၁]
အာႏကွိုꩻ
မွဉ်းဖျင်- ↑ ပိုခိုဗွာ(မုဲင်းကောင်ရွေꩻ)၊ ဒဲဉ်သီႏလက်ဆောင်ႏ အမုဲင်-၃၁