ကျောင်ꩻသုင်ꩻပအိုဝ်ႏလေက်ဟော်ꩻ

မွန်ဂိုခွိုꩻနွယ်ႏဖုံႏ အဝ်ႏမွန်ဂို ထာꩻပူႏထိုလောင်း နေင်ႏပေါင်ꩻထင်ႏည လိုꩻပွါꩻတချတဲင် မူလလိုꩻတမျိုꩻဒျာႏရိုꩻတဲ့ ထင်ႏခြုဲင်းနဝ်လင်ꩻဒေႏသ ဥတု ဟမ်ႏခံႏဗိုန်တဝ်းဝင်ꩻမꩻ လိုꩻမျိုꩻပွါꩻဖြယ်ထိုꩻဗာႏ။ မွန်ခမာခွိုꩻနွယ်ႏ လင်ꩻရီးလွိုဝင်ꩻ၊ ဝွေꩻသီးလင်ꩻဖဲ့ꩻ မဲခေါင်ခြောင်ႏ၊ ခြုံꩻခြောင်ရွေꩻအတွိုင်ꩻ အုံချꩻလွ ယိုꩻတရာꩻ၊ ကမ္ဘောဇ၊ မန်းနဲင်ႏငံႏခဝ်နဝ်ကိုဖုံႏ၊ ဝွေꩻသီးယို အိုပ်စွောတ်ꩻဖို မန်းတနဲင်ႏငံႏလိုမ်းတဲင် ဒေႏသခဝ်နဝ်ကို အဝ်ႏထွာလွေꩻဖိုဝင်ꩻအတန်၊ မန်းဟဲ့ꩻ"မွန်"၊ ယိုꩻတရာꩻဖဲ့ꩻ ဟဲ့ꩻ"ခမာ"လိုꩻမျိုꩻ။ မွန်ခမာသီး ခင်ႏလမ်းထင်ႏခြွော့ မွန်ဂိုတခွိုꩻခေါ် တိဗဲတ်တောမ်ႏမန်းလိုꩻမျိုꩻ အဝ်ႏခယ်ႏခမ်း ခဝ်ခတွို့ꩻနဝ် လင်ꩻလွောန်ထဲင်း၊ ခလားဝွေꩻသီးကနွို့ တပ်အွောန်အနေႏ နွို့ရီးသားနဝ်ꩻ ပျူ ကန်းယံ သဲက်ဖုံႏ၊ ပျူလိုꩻမျိုꩻဖုံႏ လင်ꩻလွောန်ꩻခြောင် ဧရာႏဝတီႏခြောင် တလဲင်ႏတစိꩻစိꩻ ဗꩻတွိုႏမန်းနဲင်ႏငံႏ ထာႏဝရပ်၊ သဲက်ကန်းယံသီးနဝ်ꩻ အုံခိုႏလွ ကောင်ရွေꩻတွို့ꩻ ခင်ႏထျꩻရပ်ဖုံႏ၊ ထင်ႏညလွောန်မꩻ သဲက်သီးနဝ်ꩻ ကွဲးတိုးလွေꩻပါ ဧရာႏဝတီႏတောမ်ႏ ချင်းတွင်းခြောင်ခါႏဖုံႏ၊ ကန်းယံဖုံႏနဝ်ꩻ ကာဗꩻထွူကောင်ရွေꩻတွို့ꩻတဲင် လင်ꩻလွေꩻရခဲင်ႏဖဲ့ꩻ၊ အတွင်ꩻနဝ်ꩻ လွိုးရမန်းနဲင်ႏငံႏခဒေါမ်ဖဲ့ꩻ မွန်ခမာခွိုꩻဖုံႏ အဝ်ႏရီးမꩻတဲင် တိဗဲတ်မန်းခွိုꩻဖုံႏ အုံယွိုင်းဗော့ꩻဒျာႏ အခဝ်ခိုႏ။

ဖြဝ်ꩻခယ်ႏခွိုꩻယို မွန်ဂိုခွိုꩻဒျာႏနေနေ၊ ကွဲႏတွော့ꩻ လင်ꩻဆုဲင်ꩻလွိုဝင်ꩻ၊ လင်ꩻဆုဲင်ꩻသားကို ဖြဝ်ꩻတောမ်ႏ ယိုꩻတရာꩻဖုံႏယို ထင်ႏသျာꩻလွိုဝင်ꩻ၊ ဝွေꩻသီးယို အဝ်ႏခယ်ႏခမ်းထီခါ ထွာခဲႏခွိုꩻရိုꩻတဲ့ မဲန်ခမ်ႏတဝ်း ခွန်ခယ်ႏသီးအိုပ်စိုꩻမꩻ နက်းချာခွန်ခယ်ႏ၊ အာႏတူႏတဝ်း ထင်ႏသုမ်ꩻမꩻ ဆွတ်နဝ်လင်ꩻ၊ အနာလွို ထင်ႏတွိုႏမန်းနဲင်ႏငံႏ ခဝ်ကွောန်ႏထင်ꩻ ယူနန်နယ်ႏစပ် ကွဲးစုဗူႏလꩻ၊ နွုတ်ꩻရျာꩻစုထာႏဝကို လဲင်ꩻကွီးထွိုင်ႏနွောင်ꩻလဲန်း နန်ချိုခွန်စဲန်ႏ၊ တွိုႏသွစ်ꩻရျာꩻစုထာႏဝကို သိမ်ꩻထူႏခမ်းခဝ်ခခိုႏ၊ တောမ်ႏတိဗဲတ်ဖုံႏ မာꩻမဟာမိတ်ဝင်ꩻ လဲင်ꩻတွိုက်ꩻနွောင်ꩻချာလꩻလဲန်းခယ်ႏ၊ အဝ်ႏနဝ်ꩻတဲင် အိုပ်ဗꩻပါတွိုႏစွဉ်ႏ အာသံခမ်း။ နန်ချိုဖြဝ်ꩻသီးယို ကျင်ႏလယ်ႏလွ ထာꩻဆို့ꩻထာꩻလွူး၊ တွိုက်ꩻစဲ့ꩻဖုံႏမꩻ ဝွေꩻသီးဩဇာႏ တခြို့နွောင်ꩻလꩻ မန်းနဲင်ႏငံႏခဝ်ထင်ꩻလွုမ်ꩻတကာႏတဝ်း ခဝ်နဝ် ပျူသီးလောင်းတဲ့ တွိုႏပါလို့လက္ခဏာႏအဝ်ႏ၊ နဝ်ꩻမꩻဝင်ꩻရိုꩻလွ "တဲနွုတ်ꩻ ဗꩻကွတ်ꩻရျာꩻစုကို ဖြဝ်ꩻနန်ချိုသီး တံꩻခိုꩻအတန်သွတ်ꩻခိင်ႏ။

ကွီးထွိုင်ႏခမ်းပေႏ တခေးဝင်ꩻ ဟော်ဟင်းအာႏဏာႏခိင်ႏ

မွန်ခမာ တိဗဲတ်မန်းသီး အစခါ အုံဗူႏဝင်ꩻ ညာꩻညာꩻတစု၊ ညတဲင် လွောင်ႏဗူႏကွီးထွိုင်ႏစခန်း ခမ်းတုံး၊ တွင်ꩻနဝ်ꩻ ကကွီးနွောင်ꩻလွ ခမ်းတုံးသားနဝ်ꩻ သဲက်တောမ်ႏအခွိုꩻဗော့ꩻဝင်ꩻသားသီး "သိန်းတွဲး"ကရိုꩻဒါႏ တကောင်းခမ်း၊ မဲင်ꩻသီးနဝ်ꩻ သုဝဏ္ဏဘူမိကရိုꩻဒါႏ သထုံႏခမ်း ပျူသီးနဝ်ꩻ ပြယ်ႏကရိုꩻဒါႏ သရေခေတ္တရာခမ်း၊ ကန်းယံသီးနဝ်ꩻ ဓညဝတီႏကရိုꩻဒါႏ ရခဲင်ႏခမ်းဖုံႏသွူ။ နဝ်ꩻဖုံႏယို သိန်းတွဲးကရိုꩻဒါႏ တကောင်းခမ်းယို ရရီးသွတ်ꩻ၊ နဝ်ꩻမꩻ မန်းခွန်စဲန်ႏကိုဒေါ့ꩻ "အဘိရာဇာ"ကရိုꩻဒါႏ သာႏကီႏဝင်ႏခွန်တပါꩻ အဝ်ႏအိန္ဒိယခဝ်ထင်ꩻ လင်ꩻလွောန် တဲႏခါꩻဝေင်ꩻတကောင်း၊ ခွန်နဝ်ꩻထင်ႏသီ အပိုကံရာဇာတန်စိုး တောမ်ႏအလိုꩻ လင်ꩻတဲးဖျင်ဝေင်ꩻကန်းယံရပ် ဓညဝတီႏရခဲင်ႏခမ်း ဝေင်ꩻယကို၊ တကောင်းနဝ်ꩻကို ခွန်စဲန်ႏ(၅၀)၊ အနာလွို သတိုးမဟာရာဇာခွန်စိုး ခယ်ႏသီးလင်ꩻတွိုက်ꩻကုဲင်ထိုꩻ ရိုꩻနုဲင်းနဝ်ꩻသွူ။

တကောင်းခမ်းထင်ႏဝုဲင်ꩻ သရေခေတ္တရာပြယ်ႏခမ်း ထွိုင်ႏလုဲင်ႏ၊ ရာႏဇဝင်ႏကိုရိုꩻ အယံသွတ်ꩻ၊ အဝ်ႏပင်ႏလယ်ႏထျꩻတဲင် ထွာဗာႏသင်္ဘောꩻကွန်ႏဝေင်ꩻတန်၊ အိန္ဒိယသား ယလဲင်ႏအာရတ်သား လွောန်ဖြေꩻစာသော့ꩻ၊ ခမ်းသားတိဗဲတ်မန်းခွိုꩻကို ပျူယိုထွာအထင်ႏသျာꩻလွိုဝင်ꩻ၊ မန်းရာႏဇဝင်ႏကိုဒေါ့ꩻ ခမ်းနဝ်ꩻ ဒွတ္တပေါင်ႏခွန်တဲႏ၊ ဝေင်ꩻခကွဉ်ႏနဝ်ꩻ မောစာရပ်ကို ခွန်နဝ်ꩻကတဲႏခါꩻ ဝေင်ꩻဖွောင်ꩻဖုံႏ၊ ရိုပ်ဖုံႏ၊ ဗေားဗောတန်ဘုရာꩻ၊ ဘုရာꩻဆွော့ꩻပထိုꩻဖုံႏ ထီႏဗꩻယိုခါ၊ ပထိုꩻစားနဝ်ꩻ ပီတဝ်းစေႏတီႏ မန်းခမ်းကို၊ ပီဒျာႏ ပထိုꩻအိန္ဒိယခမ်း စူခြောင်ꩻစခါ။ သရေခေတ္တရာ ပျူနဲင်ႏငံႏ ခွန်(၂၇)ဖြာꩻ အနာလွို သုပညာခွန်စိုး ပျူချင်ꩻချင်ꩻ ညီႏညွတ်တဝ်းဝင်ꩻတဲင် ကန်းယံတောမ်ႏမဲင်ꩻသီး လွောက်တွိုက်ꩻ နဲင်ႏငံႏကုဲင်ထိုꩻဗာႏ အရိုꩻနုဲင်းနဝ်ꩻ၊ ပျူလိုꩻမျိုꩻနဝ်ꩻတွင်ꩻ အဝ်ႏစပ်တောမ်ႏ အိန္ဒိယအာရတ်လွုမ်ꩻတကာႏတဝ်း ဝွေꩻသီးနဲင်ႏငန်ႏယို ခထင်ꩻဖဲ့ꩻ ဗꩻတွိုႏစွောန်ႏ "ရွှေဘို"နယ်ႏ၊ ဟန်လင်း-တဲင် တောမ်ႏခယ်ႏနံချိုဖုံႏတဲ့ အဝ်ႏစပ်ပါ၊ နန်ချိုနဲင်ႏငန်ႏကို နေင်ႏ(၇၆၀)တွင်ꩻ ခွန်ကိုလိုဖိန် ကွိုက်ꩻတောမ်ႏတိဗဲတ် ကတွိုက်ꩻခယ်ႏခါ ပျူသီးတဲ့ တွိုက်ꩻကိုကဒွို့၊ လေက်တောင်ꩻခါꩻအဝ်ႏ၊ ထဲင်းက နေင်ႏ(၈၀၀)ရပ် ပျူနဲင်ႏငံႏဂီတ အဖွဲ့တဖွဲ့ တွိုႏလွေꩻခယ်ႏခွန်ဝေင်ꩻ ဆီအန်ဖူး ခွန်ခယ်ႏတောမ်ႏ မူꩻမတ်ဖုံႏ ဟွုန်စိုမ်ꩻလွသွူတကာႏတဝ်း ခယ်ႏကဗျာဆရာႏတန်ဖုံႏတဲ့ နေးတောမ်ႏပျူထာꩻအူဒုံႏ ထာꩻကျူႏ ဝွေꩻသီးစပ်လွောန်ꩻဗာႏဖိုကဗျာ အမုဲင်အဝ်ႏခါꩻ၊ တွင်ꩻနဝ်ꩻ လွိုးရ ပျူသီးခွန်ဝေင်ꩻ ခြုဲင်းထင်ꩻလဲန်း ဟန်လင်း(လိန်း)တန်က၊ နဝ်ꩻမꩻ နေင်ႏ(၈၃၂)ကို ဖြဝ်ꩻနန်ချို(ဆျို)သီး နွို့ယားတဲင် နဲင်ႏငန်ႏကုဲင်ထိုꩻ ရိုꩻနုဲင်းနဝ်ꩻ။

တောမ်ႏသရေခေတ္တရာ တခေတ်ချင်ꩻကို သုဝဏ္ဏဘူမိ သထုံႏခမ်း ကွုန်ꩻလဲဉ်းဒျာႏရင်ꩻ၊ ခမ်းနဝ်ꩻ မဲင်ꩻဒေႏသလဲ့ထွာ၊ ဖေႏရေꩻ ထာꩻကားသားမꩻ အိန္ဒိယ၊ ခယ်ႏ၊ အာဆျခဝ်ကွဉ်ႏနဝ် ထာꩻကားသား ဖြေꩻစာသော့ꩻကွန်ႏ၊ ထွာသော့ꩻအတွူးရော့ꩻ ပင်ႏလယ်ႏကူပေႏတဲင် ကဲန်းအာ အိန္ဒိယခဝ်နဝ်သား အဲန်းလꩻ၊ နဝ်ꩻမꩻ ယလဲင်ႏရွို့ꩻဝင်ꩻ သိမ်ႏထိုꩻအကွန်ႏစားနဝ်ꩻဖုံႏ အဝ်ႏဒျာႏ။ မဲင်ꩻသီးအုံအာ ယိုꩻတရာꩻခဝ်နဝ် ဒွါရဝတီႏနဲင်ႏငံႏ၊ အဝ်ႏနဝ်ꩻ တခြို့လꩻပါ တနင်္သာရီဟမ်ႏ စင်းဟန်ႏ၊ တွင်ꩻနဝ်ꩻ ခထင်ꩻဖဲ့ꩻ ဟရိဘုဉ္ဇကရိုꩻဒါႏနဲင်ႏငန်ႏတဲ့ အဝ်ႏကဒွို့၊ မဲင်ꩻနဲင်ႏငန်ႏ သုဝဏ္ဏဘူမိခမ်းယို အဝ်ႏစပ်တောမ်ႏ ခွိုꩻနွယ်ႏဗိုန်သားတဲင် အလွိုးကွုန်ꩻထာꩻပေႏ၊ နေင်ႏ(၈၀၀)လွိုရပ် အာရတ်တဖြာꩻ လေက်တောင်ꩻကိုတဲမ်းခါꩻ ခွန်မဲင်ꩻထျꩻ ဆင်ထိုမ်းအဝ်ႏပဉ် ငတ်ꩻမွုန်ႏလွိုရိုꩻနုဲင်းနဝ်ꩻ၊ အတွင်ꩻနဝ်ꩻ ကွန်ႏထန်ႏအဝ်ႏဖုဲင်၊ ကတီႏပါႏ၊ သေင်ႏဝါႏကနွို့သော့ꩻတသီႏ တခြိုꩻဖုံႏ ရိုꩻနုဲင်းနဝ်ꩻ၊ မန်းရာႏဇဝင်ႏဒေါ့ꩻ သထုင်ႏပေႏယို တဲႏလွောန်အွိုးနေင်ႏ (၂၀၀၀)လွိုကာႏရိုꩻတဲ့ ထီလိုမ်ႏကုဲင်ထိုꩻဗာႏမꩻ ခြုဲင်းတသာဗာႏခင်ႏလမ်းတဲ့၊ ခွန်စဲန်ႏဗꩻ (၅၉)ဖြာꩻနဝ်ꩻလဲ့ဒေါ့ꩻခါꩻ။

လေက်တဲမ်းဟော်ꩻ တဲႏစလွောန်တွင်ꩻနဝ်ꩻ မန်းတွိုင်ႏကို မွန်ခမာတောမ်ႏ တိဗဲတ်မန်းခွိုꩻဖုံႏ မူလကိုကာႏ ခေါမ်ꩻလာꩻထာꩻဆို့ꩻရုဲင် အဖွဲ့အိုပ် ကားစယေန်ႏငဲးမုꩻ ခင်ႏဖါႏဖုံႏ အဝ်ႏလဲန်းတောတန်၊ ခွိုꩻဗွိုန်ချင်ꩻဗူႏ ကွီးထွိုင်ႏလꩻ ခမ်းထီပေႏတဲင် ထင်ႏသွုပ်လꩻပါ လိုꩻနဲင်ႏငန်ႏလင် အိန္ဒိယကားစားဖုံႏတဲင် ယေန်ႏငဲးမုꩻဆန်ꩻတသာဖုံႏ လလွထဲင်း၊ ကာႏကလꩻ ယေန်ႏမုꩻကိုဖုံႏ ဟဝ်ရာꩻလွိုက်သုင်ꩻ၊ အွောန်ႏထွာလွ နမ်းပဲင်ႏယေန်ႏငဲးမုꩻဖုံႏ။ တကောင်းခမ်း အဝ်ႏထွိုင်ႏတွင်ꩻ သဲက်တောမ်ႏအခွိုꩻဗိုန်သားဖဲ့ꩻ သွုပ်စပ်လွ သာႏကီႏခွန်ခွိုꩻ အိန္ဒိယနဲင်ႏငန်ႏသား ပွိုးသွုပ်လꩻဝင်ꩻ နုဲင်းနဝ်ꩻမꩻ မဟာယာနကရိုꩻဒါႏ ဗုဒ္ဓဘာႏသာႏခဝ်ထင်ꩻတောမ်ႏ မာဂဓ၊ သက္ကတကားစား လေက်တဲမ်းဖုံႏယင်၊ အနုပညာႏ စုမုꩻပညာႏ ကားစားဖိုင်ႏတဲ့ ဒါႏလွောန်ပါ။ ထွူမꩻ သရေခေတ္တရာတောမ်ႏ သထုံႏခမ်းဖုံႏ ကအဝ်ႏထွိုင်ႏလွောန် တောမ်ႏအိန္ဒိယခဝ်နဝ်သား ပလ္လဝ၊ အိန္ဒြာ၊ ကဒမ္ဗဖုံႏတဲ့ သွုပ်မွိုတ်လꩻတဲင် ပျူတောမ်ႏမဲင်ꩻသီးဖုံႏ လꩻခါꩻ ဟိနာယာနကရိုꩻဒါႏ ထေရဝါဒ ဗုဒ္ဓဘာႏသာႏခဝ်နဝ်သီး ပါတောမ်ႏလေက်တဲမ်းဖုံႏ၊ ပွိုးလꩻနုဲင်းနဝ်ꩻမꩻ မဲင်ꩻလေက်ယို လွေꩻဗိုန်ထိုꩻ လေက်ကဉ္စိပူရ အိန္ဒိယခမ်နဝ်သုင်ꩻ ပလ္လဝအက္ခရာႏတောမ်ႏ ပျူသီးလေက်တဲမ်းယို လွေꩻဗိုန်ထိုꩻဗာႏ ဗုံဗဲင်နယ်ႏ ဂိုအာဝေင်ꩻထျꩻသုင်ꩻ ကဒမ္ဗအက္ခရာႏ ဒေါ့ꩻလွနုဲင်းနဝ်ꩻသွူ။

ပွိုးလꩻလွောန်နုဲင်းယိုမꩻ မဲင်ꩻပျူသီးယို လေက်တဲမ်းဘာႏသာႏဝါႏဒ လိုꩻမုꩻသွုပ်ဆမ်ႏရေꩻ ဓလေ့ꩻဖုံႏ ပြောင်ꩻလုဲင်ႏထူꩻချာꩻလွောန်၊ မဲင်ႏနဲင်ႏငန်ႏတောမ်ႏ သရေခေတ္တရာကို ကတဲႏခါꩻဒါႏ ပထိုꩻစခါဖုံႏ ဗိုန်ဒျာႏတောမ်ႏ ဟိန္ဒူပထိုꩻလီꩻစခါ ထွားဗော့ꩻနဝ် ချင်းယူႏနွောင်ꩻဒျာႏ၊ မဲင်ꩻပျူသီးတဲ့ စူခြောင်ꩻစားနဝ်ꩻလောင်း အုံဒင်ႏသွူတဲင် သာႏသနာႏခင်ႏလမ်းယို တဲႏခါ ဖေႏကထွာအဟဝ်သွတ်ꩻ၊ မဲင်ꩻနဲင်ႏငန်ႏကို အဝ်ႏခါꩻအစကာႏ နုဲင်း"ရွေမော်ဓောစေႏတီႏ၊ ရွှေႏတကုင်ႏစေႏတီႏဖုံႏနဝ်ꩻ အဝ်ႏစခါ ပြောင်ꩻထန်ႏ မန်းခမ်းကိုသားသီး စူခြောင်ꩻဖုံႏအကျောင်ꩻ ထွာသေꩻ သာဓကတရပ်ဖုံႏသွူ။

မန်းသီးလင်ꩻလလွောန်

မန်းအဝ်ႏ ခယ်ႏခမ်းတွို့ꩻထင်ꩻ တိဗဲတ်ကောင်လောင်းတောမ်ႏ ဂိုဗီသယ်ကန္တာရ ကန်ဆူရပ် မာꩻအမ်ႏလွဖွိုင်ꩻဟံႏ အလုဲင်ꩻသား မဖဲ့ꩻနဝ် ဝွေꩻသီးကျင်ꩻလယ်ႏလွို၊ ခယ်ႏမာꩻနွောင်ꩻဝွေꩻသီးနုဲင်ႏချာနွောင်ꩻတဝ်း ဆွတ်ထေ့ တိဗဲတ်ခမ်းဖဲ့ꩻ၊ ညတဝ်းတိဗဲတ်အာႏအဝ်ႏ နက်ချာခယ်ႏ၊ ခယ်ႏဖင်းလွေꩻဗာႏ ယူနန်နယ်ႏ၊ တွင်ꩻနဝ်ꩻ ဖြဝ်ꩻနန်ချို တံꩻခိုꩻအဝ်ႏဟဝ်နေက နဝ်ꩻမꩻ လွေꩻအုံရော်ꩻဗာႏက ဖြဝ်ꩻနန်ချိုစူခလ၊ မန်းကရိုꩻဒါႏ လိုꩻမျိုꩻယို ခမ်ႏတဝ်းယင်း ဖြဝ်ꩻနန်ချိုအံႏနွောင်ꩻ တွိုႏနေင်ႏ(၇၀၀)စု ကာႏလင်ꩻ မေခတောမ်ႏ ခြိုင်ꩻခြောင်ရပ် အုံသော့ꩻကျောက်ဆည်နယ်ႏကို ကအီႏတွိုႏဗာႏနဝ်ꩻကို ပွိုးနေင်ႏညထိုꩻမꩻ ပညာႏလီꩻ အံႏဖေင်ꩻ၊ ဒါႏတေားဖြဝ်ꩻနန်ချိုပညာႏ၊ ဆုဲင်ꩻချာထွာအီ အိုပ်နွောင်ꩻလꩻဝင်ꩻတာႏ။

ကံဆူနယ်ႏသား ကလင်ꩻအုံ ကျောက်ဆယ်နယ်ႏကို ခြောင်စမုံ၊ ပန်းလောင် ဇော်ဂျီဖုံႏ ထီလွူးနမ်းရော့ꩻဟဝ်ငါႏမꩻ ခꩻချာသားလင်ꩻလွောန်တဲင် ကွဲးတိုတို၊ တွိုႏဗꩻစွောန်ႏ "မြင်းဗူး' တောင်တွင်းကြီး' ပြည်"၊ အဝ်ႏနဝ်ခထင်ꩻဖဲ့ꩻ ဗꩻစွောန်ႏ "ရွှေဘို" "ဒီပဲယင်း""မေဒူး" တစွိုꩻဗꩻချင်ꩻကောင်၊ နေင်ႏကွတ်ꩻရျာꩻစုရပ် ပကံႏဟမ်ႏချာငါ အုံစုသော့ꩻလꩻ ထွာခန်းအစွိုꩻ။